ចំណងអាពាហ៍ពិពាហ៍​ដើរ​ដល់​ផ្លូវបំបែក តារាចម្រៀង សួ​ស វី​សា និង​លោក ថ​មមី សម្រេច​ចែកផ្លូវដើរ​រៀង​ៗ​ខ្លួន

ភ្នំពេញ៖ ផេ​ក​ហ្វេ​ស​ប៊ុ​ក​របស់​តារាចម្រៀង សួ​ស វី​សា បាន​សរសេរ​ថា ៖ «នាងខ្ញុំសូមប្រកាសជាសាធារណៈ នាងខ្ញុំ សួស វីសា សូមជម្រាបជូនថា នៅថ្ងៃទី ១៨ ខែសីហា ឆ្នាំ២០២៦ នេះ នាងខ្ញុំ និងអតីតស្វាមី លោក ប៊ុនថុល ប៊ុនថង ហៅ (ថមមី) បានសម្រេចលែងលះគ្នាជាស្ថាពរតាមការព្រមព្រៀងតាមផ្លូវច្បាប់នៅសាលាដំបូងរាជធានីភ្នំពេញ។ 

ចាប់ពីថ្ងៃនេះតទៅយើងទាំងពីរមិនមានទំនាក់ទំនងក្នុងនាមជាប្តីប្រពន្ធតទៅទៀតឡើយ មូលហេតុរស់នៅមិនចុះសម្រុងនិងគ្នា។ហើយយេីងសម្រេចដើរតាមផ្លូវរៀងៗខ្លួនដោយសន្តិភាព ដោយការគោរព និងមិនមានការចងគំនុំនិងគ្នាទេ។នាងខ្ញុំសង្ឃឹមថាបងប្អូនមេត្តាគោរពតាមការសម្រេចចិត្តរបស់យើង និងសូមអរគុណចំពោះការស្រលាញ់គាំទ្រកន្លងមក។ក៏សូមគោរពអរគុណដល់ បងប្រុសមេធាវី អាំង សុវណ្ណារ៉ា ដែលបានជួយសម្របសម្រួលរឿងក្តីនាងខ្ញុំបញ្ចប់ដោយសន្តិវិធី ដោយក្តីគោរពពីនាងខ្ញុំ សួស វីសា» ។

ចំណែកលោក ថមមី បានថ្លែងសារនៅថ្ងៃតែមួយ អមដោយកូនប្រុសស្រីទាំងពីរ ដោយគ្មានសួស វីសា នៅក្បែនោះថា «ក្ដីស្រលាញ់ មិនអាចប្រែ និងគ្មានអ្វីកាត់ថ្លៃបាន បេះដូងប៉ាៗទាំងទ្វេ ១៨.០៨.២០២៦ ស្នាដៃថតរូប របស់កូនស្រី ជេននី មិនអន់មែន ថតរូបប៉ាៗ និងប្អូនឡើងស្អាត»។តារារួមអាជីពនិងមហាជនគាំទ្រមានការភ្ញាក់ផ្អើល និងខ្លះសោកស្ដាយចំពោះគូស្នេហ៍តារាចម្រៀង សួស វីសា និងលោក ថមមី ដែលតារាពូកែរកស៊ី មានជីវភាពធូរធារ នាប៉ុន្មានឆ្នាំចុងក្រោយនេះតែបែជាបែកកញនាទៅវិញ ។ ឡូវនាងសួស វីសា ត្រូវធ្លាក់ខ្លួនជាស្រ្ដីមេម៉ាយកូនពីរ ក្នុងអាយុ៣៣ឆ្នាំ ។

 គួរបញ្ជាក់ថា មុនសួស វីសា ទម្លាយរឿងលែងលះប្ដី តាមប្រព័ន្ធតុលាការនេះ កាលពីកាលពីថ្ងៃទី១០ ខែឧសភា ឆ្នាំ២០២៦ តារាចម្រៀង សួស វីសា បានចេញសារគួរឲ្យភ្ញាក់ផ្អើលថា «ខែថ្មីនេះ ខ្ញុំកំពុងតែត្រៀមខ្លួនក្លាយជាមេម៉ាយហើយ ព្រោះហត់នឿយនឹងជីវិតមានប្ដី ដូចអត់ប្ដីណាស់»។ ចំណែកប្ដីនាង ពេលនោះតបសារទៅប្រពន្ធថា «តាមផ្លូវទៅរកផ្លូវព្រះធម៌  ទើបស្ងប់ចិត្ត សូមជួយណែនាំកន្លែងវិបស្សនា មកកាន់ខ្ញុំមួយ បងប្អូន»។

ប៉ុន្ដែនៅថ្ងៃទី១១ ខែឧសភា វីសា បានចេញមកបញ្ជាក់ថា នាងនិងប្ដី មិនបានលែងលះគ្នាទេ ហើយនាងបានសូមទោសជាសាធារណៈ ដល់មហាជនទៀតផង។ វីសា ថា ក្រោយនាងចេញសារថា ត្រៀមខ្លួនក្លាយជាស្រ្ដីមេម៉ាយនោះមក ក្រុមគ្រួសារទាំងសងខាង បានព្យាយាមសម្រុះសម្រួល ផ្សះផ្សាគ្នាវិញ ទើបនាងព្រមតាមឪពុកម្ដាយ។ ប៉ុន្តែគួរឲ្យស្ដាយ វីសា-ថមមី រស់នៅផ្អែមល្ហែមជាមួយគ្នា បានតែជាង២ខែប៉ុណ្ណោះ ក្រោយផ្សះផ្សា នៅទីបំផុត ពួកគេសម្រេចដឹកដៃគ្នាលែងលះ តាមផ្លូវច្បាប់។          

 សួស វីសា បានរៀបការជាមួយលោក ប៊ុនថុល ប៊ុនថង កាលពីថ្ងៃទី២៨ ខែវិច្ឆិកា ឆ្នាំ២០១៩ ដែលចំណងស្នេហាជិត៧ឆ្នាំ ពួកគេទទួលបានចំណងដៃ កូនពីរនាក់ កូនស្រីទី១ ឈ្មោះថង សាម៉ូលីណា ហៅ Jenny អាយុជាង៥ឆ្នាំ កូនប្រុសទីពីរ ឈ្មោះថង សាតារាពិសិដ្ឋ ហៅ Johnny អាយុជាង១ឆ្នាំ។ កាលពីចុងឆ្នាំ២០១៩ នាងតែងតែងនិយាយថា ខ្លួនជានារីមានសំណាងបំផុតលើលោក ព្រោះប្ដីថ្នាក់ថ្នមនាងដូចជាព្រះនាង ខណៈលោក ថមមី ប្រកាសថា ស្រលាញ់ប្រពន្ធកូន អស់១ជីវិត ប៉ុន្តែអ្វីៗពិតជាមិនទៀងមែន ពេលនេះ ពួកគេបែរជាសម្រេចចិត្តលែងលះគ្នាដាចភឹងតែម្តង ក្រោមហេតុផល រស់នៅមិនចុះសម្រុងគ្នា៕