បែកធ្លាយករណីគុបគិតគ្នារំលោភយកដីព្រៃស្ថិតនៅភូមិស្រយ៉ង់ត្បូង ឃុំស្រយ៉ង់ ស្រុកគូលែន សរុបប្រមាណជាង៤០០ហិកតា

ព្រះវិហារ៖ករណីយ៍នេះបើតាមមន្ត្រីជំនាញឲ្យដឹងថាលោក ប៉ុង សារ៉ាវុធ(អ្នកនៅសៀមរាប) ដែលជាតំណាងឱ្យសាច់ញាតិចំនួន ២០គ្រួសារ បានឲ្យដឹងថា គាត់បានប្រមូលថវិកាទិញដីទីតាំងនេះពីប្រជាពលរដ្ឋក្នុងមូលដ្ឋានតាំងពីឆ្នាំ២០១៩ មកម្ល៉េះ។ ក្នុងនោះ មានដីទំហំ ១០ហិកតា ដែលមានប័ណ្ណកម្មសិទ្ធិ (ប្លង់រឹង) និងផ្ទៃដីផ្សេងទៀត មានត្រឹម លិខិតបញ្ជាក់ពីភូមិ-ឃុំ និងមានបង្កាន់ដៃបង់ពន្ធប្រថាប់ត្រាត្រឹមត្រូវ។ 

សម្រាប់ស្ថានភាពជាក់ស្តែងម្ចាស់ទីតាំងបានឈូសឆាយដាំដំណាំយុទ្ធសាស្ត្រ មានដូចជា៖ ដូង ២០ហិកតា, ស្វាយ ១០០ហិកតា និងក្រូច ២០ហិកតា (តែត្រូវភ្លើងឆេះខូចខាតអស់មួយចំនួន)។ ក្រៅពីនេះ ពួកគាត់បានជួលប្រជាពលរដ្ឋក្នុងមូលដ្ឋានចំនួន ១៣គ្រួសារ ឱ្យជួយដាំដុះ និងធ្វើស្រែ។

 តំណាងម្ចាស់ដីបញ្ជាក់ថា ទើបតែនៅឆ្នាំ២០២៣ កន្លងទៅនេះទេ ដែលពួកគាត់ ទទួលបានព័ត៌មានថាដីរបស់គាត់មួយផ្នែកស្ថិតក្នុងតំបន់ការពារធម្មជាតិហើយពួកគាត់បញ្ជាក់ថាគ្មានចេតនាធ្វើសកម្មភាពណាមួយឱ្យប៉ះពាល់ដល់ដីព្រៃនោះឡើយ។

តាមការវាយតម្លៃនិងផ្ទៀងផ្ទាត់ទិន្នន័យបន្ទាប់ពីម្ចាស់ទីតាំងបានផ្តល់ឯកសារកាន់កាប់ដីធ្លីមួយចំនួន (ឯកសារនៅសល់គ្រោងនឹងប្រគល់ជូននៅថ្ងៃទី៣០ ខែកក្កដា ឆ្នាំ២០២៦) ព្រមទាំងផ្តល់ទិន្នន័យ និយាមកាផ្ទៃដីទាំងស្រុងរួចមក មន្ទីរបរិស្ថានខេត្តព្រះវិហារ បានធ្វើការផ្ទៀងផ្ទាត់ និងរកឃើញលទ្ធផល ដូចខាងក្រោម៖

សូមបញ្ជាក់ថាផ្ទៃដីកសិដ្ឋានសរុបមានទំហំ ៥០៩,៧០ហិកតា៖តែ ក្នុងនោះមានប័ណ្ណកម្មសិទ្ធិ (ប្លង់រឹង)តែ ចំនួន ១០ហិកតា។ ចំពោះដីប្លង់រឹងនេះមន្ទីរបរិស្ថានខេត្ត នឹងស្នើសុំទិន្នន័យ (Shapefile) ពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ដើម្បីយកមកត្រួតស៊ីគ្នា (Overlay) ពិនិត្យមើលទីតាំងជាក់ស្តែងនៅលើផែនទី។

ផ្ទៃដីដែលគេកាន់កាប់ស្ថិតក្នុងតំបន់ការពារធម្មជាតិមានទំហំ ២៣៦,៩១ហិកតា៖ នៅលើទីតាំងនេះមានការកសាងទំនប់ទឹក ធ្វើស្រែសរីរាង្គ និងមានការចតគ្រឿងចក្រចំនួន ០៨គ្រឿង នៅក្បែរព្រំប្រទល់តំបន់ការពារធម្មជាតិ (រួមមាន៖ អេស្កាវ៉ាទ័រ ០២គ្រឿង, រថយន្តដឹកដី ០៣គ្រឿង, រ៉ូឡូកិនដី ០១គ្រឿង, ត្រាក់ទ័រ/អាប៊ុល ០១គ្រឿង និងអេស្កាវ៉ាទ័រ/លីវឺល័រ ០១គ្រឿង)។ផ្ទៃដីស្ថិតនៅក្រៅតំបន់ការពារធម្មជាតិមានទំហំ២៧២,៧៩ហិកតា៖ មានរៀបចំជាកន្លែងចិញ្ចឹម ត្រី និងសាងសង់ផ្ទះលម្ហែ (ជាទីតាំងស្ថិតក្នុងក្រុមហ៊ុនដីសម្បទានសេដ្ឋកិច្ចសិលាដាមិច)។

សូមអនុញ្ញាតបញ្ជាក់ថា ដែនជម្រកសត្វព្រៃភ្នំត្នោត-ភ្នំពកដែលជាទីតាំងខាងលើ ត្រូវបានបង្កើតឡើងដោយអនុក្រឹត្យ១៤៣ អនក្រ ប្រ.ក ចុះទី៣១ ខែសីហា ឆ្នាំ២០១៧ មានផ្ទៃដីសរុប៤២,០៩៧ ហិកតា។ នៅឆ្នាំ២០២៣ ផ្ទៃដែនជម្រកសត្វព្រៃភ្នំត្នោត-ភ្នំពក ត្រូវបានកែប្រែទៅជាទំហំ ៥១,៧៣០ ហិកតា យោងអនុក្រឹត្យលេច១៧៦ អនក្រ.បក ចុះថ្ងៃទី១៧ ខែកក្កដា ឆ្នាំ២០២៣។

មិនដឹងថាតើហេតុអីបានឈ្មោះខាងលើអាចសម្ងំឈូសឆាយរំលោភយកដីព្រៃរាប់រយងិកតាដោយមិនមានអាជ្ញាធរមូលដ្ឋាននិងមន្ត្រីជំនាញមិនដឹងចឹងនោះទេ?។ករណីនេះបើកុំតែកាសែតឆ្កឹះកកាយក៏គ្មានអ្នកណារមាស់មកការពារដីរដ្ឋនោះឡើយគេនឹងសម្ងំសោយលាភសក្ការៈបាតហើយ។