សម្តេចតេជោ ហ៊ុន សែន ប្រកាសចាត់វិធានការលើអ្នកនាំសាច់បង្កកពីថៃ និងតាមរកមុខមន្ត្រីគប់គិតតែពេលចុះឆែកឆេឃ្លាំងស្តុកសាច់បង្កកនៅភ្នំពេញរកមិនឃើញបទល្មើស

បន្ទាយមានជ័យ៖ សម្តេចតេជោ ហ៊ុន សែន ប្រមុខរដ្ឋស្តីទី នៃកម្ពុជា នៅព្រឹកថ្ងៃទី១១ ខែមិថុនា ឆ្នាំ២០២៦នេះ បានប្រាប់ទៅកាន់អាជ្ញាធរឱ្យចាត់វិធានការច្បាប់ បង្ក្រាបលើក្រុមឈ្មួញនាំសាច់បង្កកពីប្រទេសថៃ។ ជាមួយគ្នានោះ សម្តេចតេជោ ហ៊ុន សែន ក៏បានប្រកាសមិនលើកលែងនោះទេ ចំពោះមន្ត្រីណាដែលពាក់ព័ន្ធអមដំណើរ នាំចូលសាច់បង្កកទាំងនោះ មកកាន់កម្ពុជា។

សម្តេចតេជោ ហ៊ុន សែន ថ្លែងបែបនេះ ក្នុងឱកាសសំណេះសំណាលជាមួយមន្ត្រីក្រុមប្រឹក្សា ថ្នាក់ដឹកនាំមន្ទីរ អង្គភាពនានានៅខេត្តបន្ទាយមានជ័យ ជាង១.០០០នាក់។ សម្តេចតេជោ បញ្ជាក់ទៀតថា សម្តេចនឹងតាមរកមុខរាល់ឈ្មួញដែលនាំទំនិញពីប្រទេសថៃ។

សម្តេចតេជោ ក៏បានបញ្ជាក់ថា រយៈពេលមួយឆ្នាំហើយដែលថៃបានបិទព្រំដែនជាមួយកម្ពុជា តែមិនបានបង្កបញ្ហាណាមួយមកលើកម្ពុជាពាក់ព័ន្ធបញ្ហាទំនិញនោះទេ។ តែផ្ទុយទៅវិញ ថៃបានបាត់បង់ថវិកាប្រមាណ១០ពាន់លានដុល្លារ តាមរយៈការលក់ទំនិញមកកម្ពុជា។

ក្រោយបង្រ្កាបទីតាំងស្តុកសាច់បង្កជាច្រើននៅល្ងាចថ្ងៃទី១០នេះ បណ្ឌិត គិន ភាប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភារ្យកម្ពុជា បានបញ្ចេញទស្សន:ថា៖ សារព្រមានរបស់សម្តេចតេជោចេញជាលទ្ធផលហើយ តែនៅចំណុចសំខាន់ពីរទៀតក្នុងសារព្រមានរបស់សម្តេច សូមឱ្យបងប្អូនតាមដានទាំងអស់គ្នា ៖

១. តើមន្ត្រីពុករលួយនិងឈ្មួញទុច្ចរិតដែលគុបគិតនាំចូលទំនិញទាំងនោះ នឹងត្រូវបានផ្តន្ទាទោសដោយរបៀបណា? ហើយត្រូវបានបញ្ជូនឱ្យទៅរែកដីជីកលេណដ្ឋាននៅសមរភូមិមុខដូចប្រសាសន៍សម្តេចតេជោដែរឬទេ?

២. តើទ្រព្យសម្បត្តិរបស់ពួកគេត្រូវបានរឹបអូសជាទ្រព្យសម្បត្តិជាតិដូចប្រសាសន៍សម្តេចតេជោទេ?ប្រសាសន៍សម្តេចតេជោខ្ពង់ខ្ពស់ណាស់ ជាបិតានគរ បើមន្ត្រីអនុវត្តច្បាប់ មិនអនុវត្តតាម ស្មើនឹងប្រមាថនគរ។ រង់ចាំមើលទាំងអស់គ្នា។

សូមបញ្ជាក់ថាតាមរយៈការចុះអុកឡុករបស់លោកចាងហ្វាងកាសែតផែងវណ្ណៈលើទីតាំងស្តុកសាច់បង្កកនៅថ្ងៃទី១០ ខែមិថុនា ឆ្នាំ២០២៦ ក្រុមការងាររដ្ឋបាលខណ្ឌសែនសុខ ចូលរួមជាមួយមន្ត្រីជំនាញពាក់ព័ន្ធ(កបប សាខាគយនិងរដ្ឋាករខណ្ឌសែនសុខ ស្នងការដ្ឋាននគរបាលរាជធានីភ្នំពេញ) ចុះត្រួតពិនិត្យទីតាំងឃ្លាំងស្តុកទំនិញមួយកន្លែងរបស់ក្រុមហ៊ុន FWI ដែលទទួលស្តុកទំនិញផ្សេងៗ រួមទាំងសាច់បង្កកផងដែរ ដែលមានស្ថិតនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ។

ក្រោយពីបានធ្វើការពិនិត្យផ្ទៀងផ្ទាត់ឯកសារ និងធ្វើតេស្តវិភាគរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង (កបប) និងសាខាគយរដ្ឋាករខណ្ឌសែនសុខ បញ្ជាក់ថា៖ ទំនិញប្រភេទសាច់បង្កក មានប្រតិវេទត៍គយ នាំចូលមកស្របច្បាប់ មានប្រភពមកពីប្រទេសចំនួន ០៩ រួមមាន៖ ចិន ប្រេស៊ីល សហរដ្ឋអាមេរិច ឥណ្ឌា ហ៊ូឡង់ តៃវ៉ាន់ អូស្ត្រាលី អេត្យូពី និងកម្ពុជា ពុំមានមុខទំនិញប្រភេទសាច់បង្កកនាំចូលពីប្រទសថៃឡើយ។

ដោយឡែកការចុះពិនិត្យទីតាំងឃ្លាំងយីហោ «ភុត ប៊ុន ហម» ស្ថិតនៅក្នុងភូមិឆ្លក សង្កាត់គោករកា ដែលសង្ស័យមាននាំចូល និងស្តុកបង្កកពីប្រទេសថៃ។បើតាមលោកស្រីអ្នដោសម្ផស្សកនាំពាក្យរដ្ឋបាលរាជធានីភ្នំពេញនាព្រឹកថ្ងៃទី១១ ខែមិថុនា ឆ្នាំ២០២៦នេះបានឲ្យដឹងថា។

ក្នុងប្រតិបត្តិការចុះត្រួតពិនិត្យនេះ ក្រុមការងារចំរុះបានរកឃើញ៖១. មានលិខិតអនុញ្ញាតអាជីវកម្ម និងប័ណ្ណពន្ធប៉ាតង់ ឆ្នាំ២០២៥.។២. ផលិតផលក្នុងស្រុក៖ ប្រហិតមាន់ ប្រហិតសាច់គោ ហតដកច្រើនប្រភេទ ណែមមីសួរ សាច់ជ្រូកចង្កាក់ និងឆ្អឹងខ្ចីទ្រូងមាន់។៣. ផលិតផលសរសៃកែងមាន់បង្កកសរុប ៦៤២ដុំតូចមានដាក់អក្សរ THAILAND ចំនួន១៣៧ ដុំតូច មានអក្សរថៃចំនួន ៧៨ ដុំតូច និងផលិតផលដែលគ្មានអក្សរបញ្ជាក់ប្រភពចំនួន ៤២៧ ដុំតូច។

ក្រោយចប់ប្រតិបត្តិការ ម្ចាស់ទីតាំងខាងលើត្រូវបាននាំខ្លួនទៅសាកសួរបន្ថែមនៅស្នងការដ្ឋាននគរបាលរាជធានីភ្នំពេញជុំវិញការនាំចូលផលិតផលទាំងនេះ និងស្វែងរកអ្នកពាក់ព័ន្ធ។ រីឯទីតាំងឃ្លាំង ក្រុមការងារសម្រេចបិទបណ្តោះអាសន្ន ដើម្បីបន្តនីតិវិធីច្បាប់។

លោកស្រីអ្នកនាំពាក្យក៏បានបន្តទៀតថា ក្នុងថ្ងៃនេះដែរ រដ្ឋបាលខណ្ឌឫស្សីកែវ ដោយមានការចូលរួមសហការពីលោកស្រី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កម្លាំងជំនាញការិយាល័យនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលរាជធានីភ្នំពេញ និងមន្ដ្រីជំនាញ ក.ប.ប រាជធានីភ្នំពេញ បានចុះធ្វើការត្រួតពិនិត្យទីតាំងឃ្លាំងសាច់បង្កកចំនួន ៣ទីតាំង ដែលសង្ស័យពាក់ព័ន្ធករណីនាំចូល ស្តុកទុក និងចែកចាយផលិតផលសាច់បង្កកជាផលិលតផលរបស់ប្រទេសថៃ រួមមាន៖ ១. ទីតាំងស្ថិតនៅផ្លូវ៥៩៨ ក្នុងភូមិស្វាយប៉ាក សង្កាត់ស្វាយប៉ាក ២. ទីតាំងស្ថិតនៅផ្លូវ ៥៩៨ សង្កាត់ច្រាំងចំរេះ២ និងទី៣. ឃ្លាំងទំនិង ISR (ចែទូច) ស្ថិតនៅផ្លូវលំ ភូមិទី៤ សង្កាត់ច្រាំងចំរេះទី១។ ចំពោះទីតាំង៣ នេះ កម្លាំងចំរុះបានចុះពិនិត្យមិនឃើញមានករណីទំនិញបង្កកដែលនាំចូលមកពីប្រទេសថៃឡើយ។ បើចឹងគិតម៉េចវិញ?តើការត្រួតពិនិត្យដោយមិនមានការស៊ើបអង្កេតច្បាស់លាស់ចឹងវាប៉ះពាល់ដល់សតិអារម្មណ៍របស់អ្នករកស៊ីទេ?។