IMF: «ថៃពីខ្លាសេដ្ឋកិច្ចអាស៊ាន ក្លាយជា «អ្នកជំងឺរ៉ាំរ៉ៃ» GDP 1.5% ដើរយឺតជាងគេក្នុងតំបន់!»

គេហទំព័រ siamrath របស់ថៃ ចេញផ្សាយនៅថ្ងៃទី១៧ មេសា ២០២៦ បានផ្សាយពីសេដ្ឋកិច្ចរបស់ខ្លួន ដែលកំពុងដាំក្បាលចុះក្នុងចំណោមប្រទេសអាស៊ាន។សេដ្ឋកិច្ចរបស់ប្រទេសថៃធ្លាប់ឈរលំដាប់ទី ២ ក្នុងអាស៊ាន ។តែកាលពីពេលថ្មីៗនេះ មូលនិធិរូបិយវត្ថុអន្តរជាតិ (IMF) បានកាត់បន្ថយការព្យាករណ៍កំណើន GDP របស់ថៃមកនៅត្រឹមតែ ១,៥% ប៉ុណ្ណោះសម្រាប់ឆ្នាំ ២០២៦ ដែលបង្ហាញថាថៃកំពុងក្លាយជា «អ្នកជំងឺ» លូតលាស់សេដ្ឋកិច្ចយឺតជាងគេបំផុតនៅក្នុងតំបន់។ 

«វៀតណាមដែលលូតលាស់លើស ៧%, ឥណ្ឌូនេស៊ី, ម៉ាឡេស៊ី, ហ្វីលីពីនលើស ៥% សូម្បីតែកម្ពុជាដែលកំពុងហក់ឡើងក្នុងរង្វង់ជាង ៥% សុទ្ធតែបង្ហាញថា «សេដ្ឋកិច្ចតំបន់កំពុងទៅមុខ» ។

បញ្ហារបស់ថៃ មិនមែនជាវិបត្តិរយៈពេលខ្លីដែលអាចដោះស្រាយបានដោយការចាក់លុយបណ្តោះអាសន្ននោះទេ ប៉ុន្តែវាគឺជា «ជំងឺសរីរាង្គ»៖។ឧស្សាហកម្មដែលធ្លាប់ជាឆ្អឹងខ្នង កំពុងឈានដល់ដំណាក់កាលទ្រុឌទ្រោម។ខណៈពិភពលោកកំពុងរត់រកបច្ចេកវិទ្យាខ្ពស់ (High-tech) និងថាមពលស្អាត ថៃហាក់នៅយឺតយ៉ាវក្នុងការទាក់ទាញទុនវិនិយោគពីបរទេស (FDI) បើធៀបនឹងគូប្រជែង។

ការពឹងផ្អែកខ្លាំងលើការនាំចូលថាមពល បានធ្វើឱ្យសេដ្ឋកិច្ចថៃងាយរងគ្រោះបំផុត។ នៅពេលសង្គ្រាមមជ្ឈិមបូព៌ានៅតែបន្តឆាបឆេះ តម្លៃប្រេងឡើងថ្លៃ នឹងរុញច្រានឱ្យថៃធ្លាក់ចូលក្នុងស្ថានភាព Stagflation ពោលគឺ៖ «សេដ្ឋកិច្ចមិនរីកចម្រើន ប៉ុន្តែតម្លៃទំនិញ និងថ្លៃរស់នៅកើនឡើងកប់ពពក»។

នៅខែតុលា ឆ្នាំ ២០២៦ ខាងមុខ ថៃនឹងធ្វើជាម្ចាស់ផ្ទះកិច្ចប្រជុំ IMF និងធនាគារពិភពលោក (WB)។ នេះគឺជាវេទិកាបង្ហាញមុខមាត់ផង និងជាវេទិកាដែលពិភពលោកនឹងដាក់ពិលឆ្លុះមើល «របួសសេដ្ឋកិច្ច» របស់ថៃយ៉ាងលម្អិតផងដែរ។ ប្រសិនបើគ្មាន «ម៉ាស៊ីនសេដ្ឋកិច្ចថ្មី» ទេនោះ ថៃអាចនឹងត្រូវចំណាយពេលរាប់ទសវត្សរ៍ដើម្បីស្តារមុខមាត់ឡើងវិញ ៕