មេយោធាកម្ពុជា និងអាមេរិក ពិភាក្សាអំពីគម្រោងធ្វើសមយុទ្ធឆ្មាំអង្គរកម្ពុជា-អាមេរិក ពេលខាងមុខចោលចិន?

ភ្នំពេញ៖នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោកកាលពីថ្ងៃទី៣០ ខែមីនា  បានទទួលជួបពិភាក្សាការងារជាមួយឧត្តមសេនីយ៍ទោ ជែល ខូលនីលា( GILES J.S. CORNELIA) មេបញ្ជាការរងកងទ័ពជើងគោកសហរដ្ឋអាមេរិក ប្រចាំតំបន់ប៉ាស៊ីហ្វិក ដើម្បីនិយាយគ្នាបន្ថែមទៀតទាក់ទងនឹងគម្រោងធ្វើសមយុទ្ធឆ្មាំអង្គរកម្ពុជា-អាមេរិក រួមគ្នា ដែលគ្រោងនឹងធ្វើឡើងលើទឹកដីកម្ពុជានាពេលខាងមុខនេះ។ 

ប្រភពពីកងទ័ពជើងគោកនៃកងយោធពលខេមរភូមិន្ទ បានឲ្យដឹងថាជំនួបទ្វេភាគីខាងលើនេះ គឺមានគោលបំណងពង្រឹង និងពង្រីកទំនាក់ទំនងកិច្ចសហប្រតិបត្តិការរវាងកងទ័ពជើងគោកទាំងពីរ ឱ្យកាន់តែរឹងមាំ និងមានប្រសិទ្ធភាពខ្ពស់ថែមទៀត ហើយភាគីទាំងពីរក៏បានពិភាក្សាផ្លាស់ប្តូរយោបល់លើទិសដៅសហប្រតិបត្តិការសំខាន់ៗ ដូចជាការរៀបចំយន្តការកិច្ចសន្ទនាក្រុមការងារកងទ័ពជើងគោក(Army Staff Talks) ដើម្បីជាវេទិកា សម្រាប់ការសម្របសម្រួល និងដឹកនាំសកម្មភាពសហប្រតិបត្តិការប្រចាំឆ្នាំជាដើម។

នាយឧត្តមសេនីយ៍ ម៉ៅ សុផាន និងលោកឧត្តមសេនីយ៍ជែល ខូលនីលា ក៏បានពិភាក្សាអំពីការរៀបចំសមយុទ្ធឆ្មាំអង្គរ (Angkor Sentinel) ដែលជាសមយុទ្ធរួមមានសារៈសំខាន់ក្នុងការលើកកម្ពស់សមត្ថភាព ប្រតិបត្តិការរួមរវាងកងទ័ពជើងគោកទាំងពីរផងដែរ។ សូមបញ្ជាក់ថា សមយុទ្ធឆ្មាំអង្គរកម្ពុជា-អាមេរិក (Angkor Sentinel) គឺជាសមយុទ្ធទ្វេភាគីប្រចាំឆ្នាំរវាងកងយោធពលខេមរភូមិន្ទ និងកងទ័ពជើងគោកសហរដ្ឋអាមេរិកប្រចាំតំបន់ប៉ាស៊ីហ្វិក ដែលផ្តោតលើការផ្តល់ជំនួយមនុស្សធម៌ ការជួយសង្គ្រោះគ្រោះមហន្តរាយ ផ្នែកសុខាភិបាល និងសន្តិភាពជាដើម។ ភាគីទាំងពីរនឹងធ្វើសមយុទ្ធដែលមានឈ្មោះថា «ឆ្មាំអង្គរ» នេះឡើងវិញនៅចុងឆ្នាំ២០២៦ ឬដើមឆ្នាំ២០២៧ បន្ទាប់ពីបានអាក់ខានអស់រយៈពេលជិត១០ឆ្នាំ ពោលគឺចាប់តាំងពីឆ្នាំ២០១៧មកនោះ។

បន្ទាប់ពីផ្អាកកិច្ចសហការយោធាជាមួយអាមេរិកកម្ពុជាក៏បានងាកមករួមគ្នាជាមួយយោធាចិនធ្វើសមយុទ្ធយោធាដែលមានឈ្មោះថានាគមាស។តាមលោកស្រីម៉ាលីសុជាតាបានចាត់ទុកសមយុទ្ធ គឺជាអាទិភាពដ៏សំខាន់មួយនៃកិច្ចសហប្រតិបត្តិការពារជាតិរវាង កម្ពុជា និងចិន នៅក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ ក្នុងគោលដៅពង្រឹងមិត្តភាព និងកិច្ចសហប្រតិបត្តិការរវាង កងទ័ពនៃប្រទេសទាំងពីរ និងបង្កើនសមត្ថភាព ជំនាញ និងបទពិសោធន៍របស់កងយោធពលខេមរភូមិន្ទ ក្នុងកិច្ចការការពារអធិបតេយ្យ បូរណភាពទឹកដី សន្តិភាព សន្តិសុខ និង សណ្តាប់ធ្នាប់សង្គមប្រកបដោយប្រសិទ្ធភាពខ្ពស់ ក៏ដូចជា ចូលរួមចំណែកដល់បេសកកម្មរក្សាសន្តិភាព នៅក្រោមឆ័ត្រអង្គការសហប្រជាជាតិ។

នៅឆ្នាំ២០២៥មុននឹងមានការឈ្លានវ៉ៃឈ្លានពានពីយោធាថៃ កងទ័ពទាំងពីរកម្ពុជា-ចិន បានឯកភាពគ្នា រៀបចំសមយុទ្ធ «នាគមាស-២០២៥» ដោយមានរយៈពេលសរុប ចំនួន១៥ថ្ងៃ គឺចាប់ពីថ្ងៃទី១៤ ខែឧសភា ឆ្នាំ២០២៥ ដល់ថ្ងៃទី២៨ ខែឧសភា ឆ្នាំ២០២៥ ក្រោមប្រធានបទ «ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌»។ សម យុទ្ធនេះនឹងត្រូវរៀបចំចំនួនពីរទីតាំង រួមមានទី១ សមយុទ្ធលើគោក និងអាកាស នឹងរៀបចំនៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែន រីករាយ ខេត្តកំពង់ឆ្នាំង។ ចំណែកទី២ សមយុទ្ធសមុទ្រ និងអាកាស ត្រូវរៀបចំនៅលើផ្ទៃសមុទ្រ និងដែនអាកាសកម្ពុជា ក្នុងតំបន់ ខេត្តព្រះសីហនុ។ ប៉ុន្តែអ្វីដែលប្រជាពលរដ្ឋមិនយល់គឺនៅត្រង់ថាពេលថៃធ្វើសង្គ្រាមឈ្លានពានកម្ពុជាកម្ពុជាមិនអាចទប់ទល់ជាមួយថៃបានទាំងជើងទឹកនិងជើងគោកបើទោះជាពេលធ្វើសមយុទ្ធមានបង្ហាញអាវុធយុទ្ធភណ្ឌ័ចិនទំនើបៗក៏ដោយ?។សម្រាប់សមយុទ្ធនាគមាសជាមួយយោធាចិននេះគេមិនដឹងថាតើត្រូវធ្វើបន្តទៀតឬអត់នោះទេ?។