រដ្ឋមន្ត្រីក្រសួងរ៉ែអះអាង ប្រេង និងឧស្ម័ននៅ បន្តនាំចូលកម្ពុជា ទោះបីស្ថានភាពមជ្ឈិមបូព៌ាកំពុងតានតឹង

លោក កែវ រតនៈ រដ្ឋមន្ត្រីមន្ត្រីក្រសួងរ៉ែ ​និង​ថាមពល បានប្រាប់ឱ្យដឹងថា ស្ថានការណ៍នៃសង្គ្រាមនៅតំបន់មជ្ឈិមបូព៌ាបានជះឥទ្ធិពលខ្លាំងក្លាលើការនាំចូល និងការបញ្ជាទិញប្រេងឥន្ធនៈ និងឧស្ម័នមកកម្ពុជាតែរដ្ឋភិបាលនៅតែបន្តដោះស្រាយ។ 

ក្នុងពេលចុះជួបជាមួយតំណាងក្រុមហ៊ុនតេលា នៅខេត្តព្រះសីហហនុ ​នៅព្រឹកថ្ងៃទី ៣០ ខែមីនា ២០២៦ពេលកប៉ាល់ដឹកឧស្ម័ន LPG មានចំណុះ ៣៤០០ តោន ចូលមកបង្គ្រប់ការផ្គត់ផ្គង់នៅកម្ពុជាលោក កែវ រតនៈ បាលើកឡើងថា ​ពិភពលោកកំពុងតែ​ជ្រួលច្របល់​រឿងបញ្ហាប្រេងបង្កចេញពីជម្លោះនៅមជ្ឈិមបូព៌ា ខណៈនៅតំបន់អាស៊ី រងផលប៉ះពាល់ធ្ងន់ធ្ងរ ដោយសារច្រកសមុទ្រ Hormuz ដែលរាំងស្ទះដោយសង្គ្រាមគឺ ៨៤% ប្រេង និងឧស្ម័ននាំចេញពីច្រកនោះ មកតំបន់អាស៊ី។ តំបន់អាស៊ីកំពុងប្រឈមបញ្ហាខ្លាំង ដោយ​​​សារ​ការបិទច្រកសមុទ្រ Hormuz។

លោក កែវ រតនៈបន្ថែមថា៖ «ក្នុងស្ថានភាពដ៏លំបាកនេះ ក្រុមហ៊ុនខិតខំអស់លទ្ធភាព​ ដើម្បីស្វែងរកប្រភពផ្គត់ផ្គង់មកកម្ពុជា ហើយការស្វែងរកប្រភពនេះ មិនថាប្រេងសាំង ប្រេងម៉ាស៊ូត ឬក៏ឧស្ម័ន LPG សុទ្ធតែដណ្ដើមគ្នាទិញ ដោយសារខ្វះគ្រប់កន្លែង មិនមែនមានន័យថា មានលុយដើរទៅកាម៉ង់ទិញបានទេ ក្នុងសភាពការលំបាកនេះ គឺថា មានលុយបញ្ជាទិញហើយ វាអត់មានផលិតផលឱ្យយើងទៀត»។លោកថាផលិតផលតឹងតែងជាងគេមាន២ ប្រភេទ គឺប្រេងម៉ាស៊ូត និងឧស្ម័ន LPG ខណៈមានប្រទេស កម្ពុជា វៀតណាម បង់ក្លាដេស ស្រីលង្កា ឥណ្ឌា ប្រឈមនឹងការខ្វះ ឧស្ម័ន LPG ជាចម្បង។

ថ្ងៃនេះ ​មានកប៉ាល់ថ្មីមួយនាំចូលឧស្ម័ន LPG មក គឺមួយក្នុងចំណោមជើង ទាំង ៥ ដែលត្រូវរកចូលប្រចាំខែ ហើយការយក ៤ ឬ ៥ ជើង មួយខែនេះ គឺមិនទាន់អាចឆ្លើយតបទៅនឹងតម្រូវការនៅកម្ពុជាបានទេ។លោក កែវ រតនៈ បន្ថែមថា បើករណីធម្មតា ក្រុមហ៊ុនតេលា ផ្គត់ផ្គង់ដល់ទៅ ៧ ជើងក្នុងមួយខែ។ ប៉ុន្តែក្នុងស្ថានភាពលំបាកនេះរក ៨ ជើងអត់បានទេ ដោយសារក្នុងតំបន់នេះ ទីផ្សារតឹងតែងខ្លាំងណាស់។

លោក កែវ រតនៈ បន្តអំពាវនាវឱ្យប្រជាពលរដ្ឋចូលរួមសន្សំសំចៃប្រេងឥន្ធនៈ ខណៈរាជរដ្ឋាភិបាលកំពុងធ្វើការជាមួយដៃគូសំខាន់ៗទាំងក្នុងស្រុក និងក្រៅស្រុក ដើម្បីធានាថាយើងនៅតែមានប្រេង និងឧស្ម័នមកផ្គត់ផ្គង់ក្នុងស្រុក។

លោក កែវ រតនៈ លើកឧទាហរណ៍ថា បើសិនជាផ្ទះមួយមានឡានសាំង១ និងឡានម៉ាស៊ូត១ បើអញ្ចឹងសភាពការបច្ចុប្បន្ននេះ គឺជួយប្រើឡានសាំង ទុកម៉ាស៊ូតបន្ដិច ប្រសិនបើអាចធ្វើទៅបាន។ ហើយបើមានចង្ក្រាន្តឧស្ម័ន LPG ហើយអាចទិញចង្ក្រាន្តអគ្គិសនី ទៅប្រើអគ្គិសនីវិញ៕