
វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 20422 នាក់
ម្សិលមិញ 22729 នាក់
សរុប 21299963 នាក់
មីយ៉ានម៉ា៖ ក្រុមឧទ្ទាមនៅក្នុងប្រទេសមីយ៉ាន់ម៉ា បានប្រកាសបទឈប់បាញ់មួយផ្នែករយៈពេល២សប្ដាហ៍ ខណៈរបបយោធានៅថ្ងៃអាទិត្យ ទី៣០ ខែមីនា បានចាប់ផ្ដើមសម្របសម្រួល ដល់ប្រតិបត្តិការជួយសង្គ្រោះ និងការផ្ដល់ជំនួយ បន្ទាប់ពីគ្រោះរញ្ជួយដីដ៏ប្រល័យមួយបានវាយប្រហារលើប្រទេសដែលកំពុងមានសង្គ្រាមស៊ីវិលមួយនេះ។
ទីភ្នាក់ងារសារព័ត៌មាន បារាំងAFPបានឲ្យដឹងថា៖នៅក្នុងសេចក្ដីថ្លែងការណ៍មួយ របស់រដ្ឋាភិបាលស្រមោលរួបរួមជាតិ បានឱ្យដឹងថាកងកម្លាំងការពារប្រជាជន (PDF) នឹងអនុវត្តបទឈប់បាញ់រយៈពេល២សប្ដាហ៍ នៅក្នុងប្រតិបត្តិការវាយលុក លើកលែងសកម្មភាពការពារខ្លួន នៅតាមតំបន់ដែលរងគ្រោះដោយសារគ្រោះរញ្ជួយដី ដោយនឹងចាប់ផ្ដើមនៅថ្ងៃទី៣០ ខែមីនា ឆ្នាំ២០២៥»។ រដ្ឋាភិបាលស្រមោលក៏បានបញ្ជាក់ដែរថាខ្លួន នឹងធ្វើការសម្របសម្រួលជាមួយ UN និងបណ្ដាអង្គការក្រៅរដ្ឋាភិបាលនានា ដើម្បីធានានូវសន្តិសុខ ការដឹកជញ្ជូន ព្រមទាំងការបង្កើតជំរំជួយសង្គ្រោះ និងតង់ស្នាក់នៅបណ្ដោះអាសន្ន នៅ តាមតំបន់ដែលខ្លួនកំពុងគ្រប់គ្រង។
ការិយាល័យ UN សម្រាប់ការសម្របសម្រួលកិច្ចការមនុស្សធម៌ ឬហៅកាត់ថា OCHA បានឱ្យដឹងកាលពីថ្ងៃសៅរ៍ ទី២៩ ខែមីនាថាគ្រោះរញ្ជួយដី បានបង្កការបំផ្លិចបំផ្លាញ ធ្ងន់ធ្ងរដល់ហេដ្ឋារចនាសម្ព័ន្ធ សំខាន់ៗមានដូចជាស្អាន និងផ្លូវថ្នល់សំខាន់ៗមួយចំនួន ដែលនេះបានបង្កផលលំបាកដល់ប្រតិបត្តិការមនុស្សធម៌ ចូលទៅកាន់តំបន់ដែលកំពុងត្រូវការជំនួយបន្ទាន់។ ទីភ្នាក់ងាររបស់ UN មួយនេះ បានគូសបញ្ជាក់បន្ថែមដូច្នេះថា «ការខូចខាតដល់ផ្លូវល្បឿនលឿន Yangon-Nay Pyi Taw-Mandalay បានបង្កការរំខាន ហើយស្នាមប្រេះ និងការប្រែប្រួលទ្រង់ទ្រាយ មួយចំនួនបានបង្ខំឱ្យរថយន្ដធំៗត្រូវផ្អាកធ្វើប្រតិបត្តិការ»។កាលពីថ្ងៃសៅរ៍ ការិយាល័យសម្របសម្រួលកិច្ចការមនុស្សធម៌ (OCHA) របស់ អ.ស.ប បានលើកឡើងថា កត្តាកង្វះខាតការផ្គត់ផ្គង់ផ្នែកវេជ្ជសាស្ត្រ និងឧបករណ៍ផ្សេងៗនៅក្នុងប្រទេសដែលគ្រប់គ្រងដោយរបបយោធានេះ ក៏បន្ថែមភាពស្មុគស្មាញដល់កិច្ចខិតខំជួយសង្គ្រោះផងដែរ ។
បុគ្គលិកពេទ្យនៅតាមតំបន់នានា រួមទាំងទីក្រុងម៉ាន់ដាឡេ (Mandalay), ម៉ាកវេយ (Magway), ណៃពិដ៍ (Nay Pyi Taw) និងសាហ្គាអ៊ីង (Sagaing) ស្ថិតនៅភាគកណ្ដាល និងភាគពាយ័ព្យប្រទេសមីយ៉ាន់ម៉ា កំពុងទទួលនូវចំនួនអ្នកចូលសម្រាកព្យាបាលនៅមន្ទីពេទ្យ យ៉ាងច្រើនលើសលប់។ ក្នុងនោះ តំបន់ភាគខាងត្បូងប្រទេសនេះ រួមមាន តំបន់នឿងស៊ី (Nyaungshwe), កាឡាវ (Kalaw) និងតំបន់ពីនលួង (Pinlaung) រងនូវការវាយប្រហារយ៉ាងខ្លាំងពីគ្រោះរញ្ជួយដីកម្រិត ៧.៧ រ៉ិចទ័រ កាលពីរសៀលថ្ងៃសុក្រ ទី២៨ ខែមីនា ។រថយន្ដ ដឹកតង់ស្នាក់នៅបណ្ដោះអាសន្ន បរិក្ខារពេទ្យ និងជំនួយនានាចំនួន១៧គ្រឿង គ្រោងនឹងធ្វើដំណើរទៅដល់តំបន់រងគ្រោះនៅថ្ងៃអាទិត្យ ទី៣០ ខែមីនា។
មេដឹកនាំយោធានៃប្រទេសមីយ៉ាន់ម៉ា បានអនុញ្ញាតឱ្យបុគ្គលិកជួយសង្គ្រោះបរទេសជាច្រេីននាក់ ចូលរួមក្នុងការជួយសង្គ្រោះ នាថ្ងៃសៅរ៍នេះ។ ប្រទេសដែលបានប្រកាសផ្តល់ជំនួយមានដូចជា ចិន រុស្ស៉ី កូរ៉ខាងត្បូង ជប៉ុន និងសិង្ហបុរី ។ ក្រុមសង្គ្រោះចិន និងរុស្ស៉ី ត្រូវបានបញ្ជូនទៅកាន់តំបន់រងគ្រោះ។គួរបញ្ជាក់ថា គ្រោះរញ្ជួយដីកម្រិត ៧.៧រ៉ិចទ័របានវាយប្រហារលើភាពពាយព្យនៃទីក្រុង Sagaing នៅភាគកណ្ដាលនៃប្រទេសមីយ៉ាន់ម៉ា កាលពីថ្ងៃសុក្រ ទី២៨ ខែមីនា ហើយក៏បង្កផល ប៉ះពាល់ដល់ប្រទេសក្បែរខាងដូចជាថៃផងដែរ។ តាមរដ្ឋាភិបាលយោធាមីយ៉ាន់ម៉ា មនុស្សយ៉ាងហោច ១៦៤៤នាក់បានស្លាប់ ខណៈនៅទីក្រុងបាងកក មានអ្នកស្លាប់ ១០នាក់ ដោយសារ គ្រោះរញ្ជួយដីនេះ៕