
វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 11490 នាក់
ម្សិលមិញ 14622 នាក់
សរុប 21248039 នាក់
ភ្នំពេញ៖ជនសង្ស័យចំនួន២នាក់ បានធ្វើសកម្មភាពលួចយកទូរសព្ទដៃចំនួន២គ្រឿង ពីនារីកម្មការិនីរោងចក្រ បានហើយតែបែជាទាមទារ ឱ្យម្ចាស់ទូរសព្ទស្រាតបង្ហាញ រាងកាយ ជាថ្នូនិងការឲ្យទូរសព្ទត្រឡប់មកវិញ ត្រូវបាន នគរបាលប៉ុស្តិ៍ចោមចៅទី៣ ឃាត់ខ្លួន។
ករណីយ៍នេះកើតឡើងនៅវេលាម៉ោង៣ ទាបភ្លឺ ថ្ងៃទី១៩ ខែវិច្ឆិកា ឆ្នាំ២០២៦ នៅបន្ទប់ជួលមិនចាំលេខ ស្ថិតក្នុងភូមិព្រៃព្រីងខាងជើង២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ជនសង្ស័យទាំង២នាក់ រួមមាន៖ ឈ្មោះ ចាន់ ឌី អាយុ២៦ឆ្នាំ ជនជាតិខ្មែរ មុខរបរ និងទីលំនៅមិនពិតប្រាកដ និង ជនសង្ស័យម្នាក់ទៀតមានឈ្មោះ ពៅ ករុណា អាយុ២៧ឆ្នាំ ជនជាតិខ្មែរ ស្នាក់នៅបន្ទប់ជួលក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិ៍សែនជ័យវត្ថុតាងដកហូតបានជាទូរសព្ទរបស់ជនរងគ្រោះចំនួន២គ្រឿង។
នារីរងគ្រោះជាម្ចាស់ទូរសព្ទ័ បានឱ្យដឹងថា មុនពេលកើតហេតុ ពួកនាងបានប្រើប្រាស់ទូរសព្ទរៀងៗខ្លួននៅក្នុងបន្ទប់ជួល បន្ទាប់មកបានដាក់ទូរសព្ទសាកថ្មនៅក្បាលដំណេក រួចក៏នាំគ្នាដេកលក់ ដោយមិនបានចាក់សោទ្វារបន្ទប់ឡើយ។ លុះដល់វេលាម៉ោង៦ព្រឹក ថ្ងៃទី១៩ ខែវិច្ឆិកា ឆ្នាំ២០២៦ ពេលភ្ញាក់ពីដំណេក ស្រាប់តែបាត់ទូរសព្ទទាំង២គ្រឿង ទើបពួកនាងនាំគ្នាទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលចោមចៅទី៣ ដើម្បីស្នើសុំកិច្ចអន្តរាគមន៍។
រហូតដល់វេលាម៉ោង១២និង២០នាទីថ្ងៃត្រង់ថ្ងៃដដែល នារីរងគ្រោះបានខ្ចីទូរស័ព្ទមិត្តភក្តិ ដើម្បីទាក់ទងទៅកាន់គណនីឆាតហ្វេសប៊ុក ដែលភ្ជាប់នឹងទូរស័ព្ទរបស់ពួកនាង។ នៅពេលនោះ ជនដែលទទួលការទាក់ទងបានអះអាងថា ខ្លួនជាជាងជួសជុលទូរសព្ទ ហើយមានគេយកទូរសព្ទទាំង២គ្រឿងទៅដាក់បញ្ចាំនៅកន្លែងខ្លួន ក្នុងតម្លៃមួយគ្រឿង១០ម៉ឺនរៀល។
អ្វីដែលធ្វើឱ្យនារីរងគ្រោះមានការភ្ញាក់ផ្អើល គឺជនសង្ស័យបានទាមទារឱ្យពួកនាងចូលទៅក្នុងបន្ទប់ទឹក ដោះសម្លៀកបំពាក់ និងបង្ហាញសុដន់ ព្រមទាំងប្រដាប់ភេទតាមរយៈឆាតហ្វេសប៊ុកជាមុន ទើបព្រមប្រគល់ទូរសព្ទឱ្យវិញ។ ប៉ុន្តែនារីរងគ្រោះទាំង២នាក់បានបដិសេធ មិនព្រមធ្វើតាមការទាមទារដ៏មិនសមរម្យនេះឡើយ ហើយបានរាយការណ៍ទៅសមត្ថកិច្ចជាបន្ទាន់។
កម្លាំងនគរបាលប៉ុស្តិ៍ចោមចៅទី៣ បានចុះស្រាវជ្រាវ និងប្រើប្រាស់ប្រព័ន្ធកំណត់ទីតាំង GPS ដែលភ្ជាប់ជាមួយទូរសព្ទម៉ាក iPhone XS Max រហូតឈានដល់ការឃាត់ខ្លួនជនសង្ស័យទាំង២នាក់ ព្រមទាំងដកហូតទូរសព្ទទាំង២គ្រឿងមកវិញ នៅចំណុចដីវាលក្បែរមហាវិថីស៊ី ជីនពីង (ផ្លូវក្រវាត់ក្រុងទី៣) ស្ថិតក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ។ជនសង្ស័យទាំង២នាក់មិនមែនជាជាងជួសជុលទូរសព្ទដូចការអះអាងនោះទេ។