អាមេរិកដាក់ទណ្ឌកម្មលើបុគ្គល៤រូប និងក្រុមហ៊ុនចំនួន៤១ ដែលមានជាប់ពាក់ព័ន្ធនឹងក្រុមហ៊ុនព្រីនស៍គ្រុបក្នុងពេលប្រទេសសឹង្ហបុរីចាប់ខ្លួនបានម្នាក់ដែរ!

ភ្នំពេញ៖សហរដ្ឋអាមេរិកបានដាក់ទណ្ឌកម្មលើបុគ្គល៤រូប និងក្រុមហ៊ុនចំនួន៤១ ដែលមានជាប់ពាក់ព័ន្ធនឹងក្រុមហ៊ុនព្រីនស៍គ្រុប (Prince Group) របស់មេឧក្រិដ្ឋជនឆបោកតាមអនឡាញដ៏ល្បី គឺលោក ចេន ហ្ស៊ី។ ការប្រកាសដាក់ទណ្ឌកម្មនេះ ដោយសារតែមានការរកឃើញថាបុគ្គល និងក្រុមហ៊ុនទាំងនេះនៅតែបន្តផ្តល់ការសម្របសម្រួល និងគាំទ្រដល់ក្រុមហ៊ុនព្រីនស៍គ្រុប ខណៈទណ្ឌកម្មទាំងនេះត្រូវបានអនុវត្តដោយការិយាល័យគ្រប់គ្រងទ្រព្យសម្បត្តិបរទេស(OFAC) នៃក្រសួងរតនាគារសហរដ្ឋអាមេរិក។ នេះបើតាមការបញ្ជាក់របស់ស្ថានទូតអាមេរិកប្រចាំកម្ពុជា។ 

តាមរយៈទំព័រហ្វេសប៊ុកផ្លូវការរបស់ខ្លួននៅថ្ងៃទី០៦ ខែវិច្ឆិកា ឆ្នាំ២០២៦នេះ ស្ថានទូតអាមេរិកប្រចាំកម្ពុជាអតីតឱ្យដឹងថា «សហរដ្ឋអាមេរិកកំពុងដាក់ទណ្ឌកម្មលើបុគ្គលចំនួន៤រូប និងអង្គភាពចំនួន៤១ ដែលមានជាប់ពាក់ព័ន្ធនឹងក្រុមអង្គការឧក្រិដ្ឋកម្មឆ្លងដែន(TCO) ឈ្មោះព្រីនស៍គ្រុប (Prince Group) ដែលមានមូលដ្ឋាននៅប្រទេសកម្ពុជា។ វិធានការនេះ គឺជាការបន្តពីការដាក់វិធានការទណ្ឌកម្មកាលពីខែតុលា ឆ្នាំ២០២៥ និងខែមិថុនា ឆ្នាំ២០២៦ ដែលផ្តោតលើថ្នាក់ដឹកនាំរបស់អង្គការនេះ ក្រុមហ៊ុនដែលមានជាប់ពាក់ព័ន្ធ និងអ្នកដែលជួយសម្រួលដល់ប្រតិបត្តិការហិរញ្ញវត្ថុរបស់អង្គការនេះ»។

ក្នុងសេចក្តីប្រកាសរបស់ក្រសួងរតនាគារសហរដ្ឋអាមេរិក បុគ្គល ៤នាក់ ដែលទើបរងទណ្ឌកម្មនោះរួមមាន Zhao Mengyao (ចាវ មឹងយាវ) Qui Yong(ជឺយុង) He Yujing (ហឺ អ៊ីជីង) និង Pang Visal ។ Pang Visal គឺជាជនជាតិខ្មែរ និងមានក្រុមហ៊ុនគ្រប់គ្រងសរុប១១ ហើយរូបលោក ក៏ត្រូវបានរដ្ឋាភិបាលអង់គ្លេសដាក់ទណ្ឌកម្មកាលពីថ្ងៃទី២៦ ខែមីនា ឆ្នាំ២០២៦ផងដែរ។

ចំណែក Zhao Mengyao គឺជាជំនួយការផ្ទាល់របស់ Qui Yong ។ Qui Yong ជាសមាជិកដ៏សំខាន់ម្នាក់របស់អង្គការឧក្រិដ្ឋកម្មឆ្លងដែន ព្រីនស៍គ្រុប ដែលគ្រប់គ្រងក្រុមហ៊ុនចំនួន ៨ នៅកោះ British Virgin Islands(BVI) និងក្រុមហ៊ុនចំនួន ៦ នៅហុងកុង។  រីឯ He Yujing គឺជាភរិយារបស់ Chen Bo ដែលជាមនុស្សសំខាន់ម្នាក់ក្នុងក្រុមហ៊ុនព្រីនស៍គ្រុប កាន់កាប់ក្រុមហ៊ុនសរុបចំនួន ១១ ខណៈ He Yujing គ្រប់គ្រងក្រុមហ៊ុនចំនួន ១ នៅកម្ពុជា។ 

ស្ថានទូតអាមេរិក បានបញ្ជាក់ទៀតថា សមាជិកនៃអង្គការឧក្រិដ្ឋកម្មឆ្លងដែន ព្រីនស៍គ្រុប បានកំណត់គោលដៅលើជនរងគ្រោះនៅសហរដ្ឋអាមេរិក និងនៅជុំវិញពិភពលោក តាមរយៈគម្រោងឆបោកតាមប្រព័ន្ធអ៊ីនធឺណិតដែលមានលក្ខណៈស្មុគស្មាញ និងប្រើប្រាស់បច្ចេកវិទ្យាទំនើប។ បើតាមស្ថានទូត សកម្មភាពឆបោកទាំងនេះ ជាច្រើនត្រូវបានប្រព្រឹត្តឡើងចេញពីទីតាំងបរិវេណធំៗដែលប្រើប្រាស់សម្រាប់ប្រតិបត្តិការឆបោកនៅក្នុងតំបន់អាស៊ីអាគ្នេយ៍។ ចំណែក ការដាក់ទណ្ឌកម្មនេះ គឺផ្តោតលើបុគ្គលមួយចំនួន និងក្រុមហ៊ុនជាប់ពាក់ព័ន្ធដែលនៅតែបន្តផ្តល់ការគាំទ្រជាសម្ភារៈ និងធនធានសំខាន់ៗដល់អង្គការឧក្រិដ្ឋកម្មឆ្លងដែន ព្រីនស៍គ្រុប។

គួរជម្រាបថាអតីតឧកញ៉ា លោក ចេន ហ្ស៊ី (Chen Zhi) ជាម្ចាស់ក្រុមហ៊ុនព្រីនស៍គ្រុប ត្រូវបានសមត្ថកិច្ចកម្ពុជាចាប់ខ្លួន និងបញ្ជូនទៅឱ្យអាជ្ញាធរចិនកាលពីដើមខឌែមករាឆ្នាំ២០២៦រួមជាមួយជនជាតិចិនពីរូបផ្សេងទៀតគឺលោក ស៊ូ ជីឡាំង (Xu Ji Liang) និងលោក សៅ ជី ហួយ (Shao Ji Hui) កាលពីអំឡុងដើមឆ្នាំ២០២៦ បន្ទាប់ពីអាមេរិក និងអង់គ្លេសរឹបអូសទ្រព្យសម្បត្តិ និងចោទប្រកាន់ថា ជាមេខ្លោងដ៏ធំក្នុងបទល្មើសចាប់បង្ខំមនុស្សឱ្យធ្វើការនៅក្នុងបណ្តាញឧក្រិដ្ឋកម្មឆបោកតាមអនឡាញនៅកម្ពុជា។ ព្រីនស៍គ្រុប ដែលចិនចាត់ទុកថា ជាអង្គការចាត់តាំងល្បែងស៊ីសងអនឡាញឆ្លងដែនមានមូលដ្ឋាននៅក្នុងទឹកដីកម្ពុជា ត្រូវបានអាជ្ញាធរចិនបើកការស៊ើបអង្កេតដោយសម្ងាត់ចាប់តាំងពីឆ្នាំ២០២០ បន្ទាប់ពីក្រុមហ៊ុនមួយនេះមានឈ្មោះនៅក្នុងបណ្តឹងក្នុងតុលាការចិនពាក់ព័ន្ធនឹងសំណុំរឿងឆបោកតាមអនឡាញ។

សូមរម្លឹកថា លោក ចេន ហ្ស៊ី មានអាយុ៣៧ឆ្នាំ កើតធំដឹងក្តីនៅប្រទេសចិន ប៉ុន្តែបានបោះបង់សញ្ជាតិចិននៅឆ្នាំ២០១៤ និងទទួលបានសញ្ជាតិខ្មែរ អង់គ្លេស និងស៊ីប។ តែនៅពេលចាប់ខ្លួន ក្រសួងមហាផ្ទៃកម្ពុជាបានបញ្ជាក់ថា លោក ចេន ហ្ស៊ី ត្រូវបានព្រះមហាក្សត្រចេញព្រះរាជក្រឹត្យដកសញ្ជាតិខ្មែរ កាលពីខែធ្នូ ឆ្នាំ២០២៥។ ចេន ហ្ស៊ី ក៏ធ្លាប់ជាអ្នកជំនួញដ៏ល្បីល្បាញម្នាក់ដែលធ្លាប់ទទួលបានគោរមងារឧកញ៉ាកាលពីខែកម្ភៈ ឆ្នាំ២០១៦ និងធ្លាប់ទទួលបានគោរមងារខ្ពស់មួយកាំទៀតគឺ «អ្នកឧកញ៉ា» នៅអំឡុងខែកក្កដា ឆ្នាំ២០២០ផងដែរ។

ស្ត្រី​ដើម​កំណើត​សិង្ហបុរីអាយុ​ ៤៤ឆ្នាំ ឈ្មោះ​ ឈិន​ សៀវ​លីង​(Chen Xiuling) ឬ Karen Chen ត្រូវបាន​សមត្ថ​កិច្ច​សិង្ហ​បុរី​ស្ទាក់​ចាប់​ខ្លួន ​នៅ​ព្រលាន​យន្ត​ហោះ ឆាង​អ៊ី ក្រោយពី​រក​ឃើញ​ថា ​មាន​ជាប់​ពាក់​ព័ន្ធ​នឹង​បណ្តាញ​ឧក្រិដ្ឋ​កម្ម​ឆបោកឆ្លង​ដែន​របស់​ក្រុម​ហ៊ុន ព្រីនស៍​ ហូលឌីង​ គ្រុប​ (Prince Holding Group)។ នេះ​បើ​តាម​សេចក្តីប្រកាស​របស់​នគរ​បាល​ជា​តិ​សិង្ហ​បុរី ​នៅថ្ងៃ​ព្រហស្បតិ៍ ទី​៥​ ខែ​វិច្ឆិកា​ ឆ្នាំ២០២៦​។​

ឈិន​ សៀវ​លីង​ ឬ Karen Chen ត្រូវ​បានចាប់​ខ្លួន​ ទៅតាម​​ដីការ​​តុលាការ​សិង្ហបុរី ​ក្នុង​​បទល្មើស​ចំនួន​ ២​ រួមមាន​បទញុះញង់បុគ្គលម្នាក់ទៀតឱ្យក្លែងបន្លំបញ្ជីគណនេយ្យ និង​បទប៉ុនប៉ងឆបោក។​ បើ​តាម​នគរ​បាល​សិង្ហ​បុរី​ ស្រ្តីឈ្មោះ ឈិន​ សៀវ​លីង​ ធ្លាប់ជានាយកក្រុមហ៊ុនចុះបញ្ជីនៅសិង្ហបុរីច្រើនកន្លែងរួមមាន​ ក្រុមហ៊ុន Skyline Investment Management និង​ក្រុមហ៊ុន Capital Zone Warehousing​ ដែល​ស្ថិតក្រោមកម្មសិទ្ធិផលប្រយោជន៍របស់លោក​ ចេន​ ហ្ស៊ី ​​ស្ថាបនិក និងជាប្រធានក្រុមប្រឹក្សាភិបាលនៃក្រុម​ហ៊ុន​ Prince Holding Group​។​

នៅ​ឆ្នាំ ២០២២​ សមត្ថ​កិច្ច​សិង្ហ​បុរីរក​ឃើញ​ថា​ Karen Chen​ បាន​បន្លំ​ឯក​សារ​កិច្ច​ព្រម​ព្រៀង​ មុន​នឹងដាក់ពាក្យស្នើនៅ​​សាជីវកម្ម JTC Corporation ​ក្រោម​ក្រសួងពាណិជ្ជកម្ម​សិង្ហ​បុរី​ ដើម្បីសុំ​ការ​បន្តកិច្ច​សន្យា​ជួល​អចលនទ្រព្យ​។​ ​ Karen Chen បាន​ញុះ​ញង់ឱ្យ​មន្ត្រី​ម្នា​ក់​ក្លែង​បន្លំ​ឯកសា​រ​នោះ។​ នេះបើ​តាម​សេចក្តីប្រកាស​របស់​នគរ​បាល​សិង្ហ​បុរី និងបញ្ជាក់ថា​ សមត្ថ​កិច្ច​កំពុង​បន្ត​ស៊ើប​អង្កេតបន្ថែម​ទៀត។​

គួរ​ដឹង​ថា​ ដៃជើង​របស់​លោក​ ចេន​ ហ្ស៊ី​ រូប​នេះ​ បាន​រត់​ចេញ​ពីប្រទេស​សិង្ហ​បុរីមក​កាន់ប្រទេស​កម្ពុជា​ នៅ​មុន​ពេ​ល​ដែលនគរ​បាល​ចាប់​ផ្តើមប្រតិបត្តិការ​ប្រឆាំង​​នឹង​សកម្ម​ភាព​របស់​ខ្លួន កាល​ពីអំឡុង​ខែ​តុលា​ ឆ្នាំ​២០២៥​។​ នគរបាល​សិង្ហ​បុរីបាន​បញ្ជាក់​ទៀត​ថា​ ចាប់តាំង​ពីខែ​មិថុនា​ ឆ្នាំ២០២៦​មក សមត្ថកិច្ច​សិង្ហ​បុរី​បាន​រឹប​អូសគណនីធនាគារ និងមូលបត្រផ្សេងៗ ដែល​មាន​តម្លៃ​ប្រមាណ ១០០​លាន​ដុល្លា​រ​សិង្ហ​បុរី ឬស្មើរ​ប្រមាណ ៧៨​លាន​ដុល្លារ​អាមេរិក​ ព្រម​ទាំង​ហាម​ឃាត់​ការ​ចាត់​ចែង​ទ្រព្យ​សម្បត្តិ​លើ​អចលនទ្រព្យ​ចំនួន​ ១៤​ផ្សេង​ទៀត ដែល​ជាប់ពាក់​ព័ន្ធ​នឹង​​ក្រុម​ហ៊ុន​ព្រីនស៍​។​

សូម​រំឭក​ថា​ កាលពី​ដើម​ខែ​តុលា​កន្លង​ទៅ អាជ្ញាធរសិង្ហបុរីបានរឹបអូសប្រាក់ចំនួន ៣៩លានដុល្លារសិង្ហបុរី ស្មើនឹង ៣០លានដុល្លារអាមេរិក ដែលបានមកពីការលក់អគារពាណិជ្ជកម្មមួយនៅសិង្ហបុរី។ នៅពេលនោះអាជ្ញាធរសិង្ហបុរី​បានរកឃើញថា ប្រាក់ទាំងនោះមានជាប់ពាក់ព័ន្ធជាមួយក្រុមហ៊ុន និងបុគ្គល ដែលមានទំនាក់ទំនងនឹងក្រុមហ៊ុនព្រីនស៍គ្រុបរបស់មេខ្លោងឆបោកអនឡាញ ចេន ហ្ស៊ី។ នគរ​បាល​សិង្ហបុរីបញ្ជាក់​បន្ថែមថា​ មក​ទល់​ពេលនេះ​អាជ្ញាធរ​បាន​រឹបអូសទ្រព្យ​សម្បត្តិ​ពាក់​ព័ន្ធ​នឹង​ក្រុម​ហ៊ុន​ ព្រីនស៍​ បាន​សរុប​ជាង​ ៧០០លាន​ដុល្លារ​សិង្ហ​បុរី​ ឬ​ស្មើរនឹង​ ៥៤៦​លាន​ដុល្លារ​អាមេរិក។

សូមរម្លឹកថា កាលពីថ្ងៃទី១៥ ខែតុលា ឆ្នាំ២០២៥ សហរដ្ឋអាមេរិក និងអង់គ្លេស បានដាក់ទណ្ឌកម្មធ្ងន់ធ្ងរលើក្រុមហ៊ុន ព្រីនស៍គ្រុប រួមទាំងបណ្តាញអង្គភាពទីផ្សារងងឹតសរុបចំនួន ១៤៦ផ្សេងទៀត ដែលពាក់ព័ន្ធនឹងឧស្សាហកម្មឆបោកអនឡាញ។ សហរដ្ឋអាមេរិក តាមរយៈតុលាការសហព័ន្ធទីក្រុង Brooklyn បានដាក់ពាក្យបណ្តឹងរឹបអូសទ្រព្យសម្បត្តិក្រុមហ៊ុនព្រីនស៍គ្រុបរបស់លោក ចេន ហ្ស៊ី ប្រមាណ ១៥ពាន់លានដុល្លារ។ ក្រោយមក នៅថ្ងៃទី២៣ ខែមិថុនា ឆ្នាំ២០២៦ ក្រសួងសេដ្ឋកិច្ចអាមេរិក បានដាក់ទណ្ឌកម្មលើបុគ្គល ៩នាក់ និងអង្គភាព ២៦ ដែលមានទំនាក់ទំនងនឹងអង្គការឧក្រិដ្ឋកម្មឆ្លងដែនព្រីនស៍គ្រុប៕