
វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1773 នាក់
ម្សិលមិញ 14622 នាក់
សរុប 21238322 នាក់
ខេត្តកណ្តាល៖តំណាងសហព័ន្ធ CYPUF បានឲ្យដឹងថា នៅព្រឹកថ្ងៃព្រហស្បតិ៍ ទី១៩ ខែវិច្ឆិកា ឆ្នាំ២០២៦ នេះ ក្រោមការសម្របសម្រួលពីក្រសួងការងារ និងបណ្តុះបណ្តាលវិជ្ជាជីវៈ មន្ទីរការងារខេត្តកណ្តាល អាជ្ញាធរមូលដ្ឋានស្រុកខ្សាច់កណ្តាល សមាគម TAFTAC រួមជាមួយភាគីក្រុមហ៊ុន និងតំណាងកម្មករនិយោជិត កិច្ចប្រជុំដោះស្រាយវិវាទការងារទទួលបានលទ្ធផលវិជ្ជមានធំៗដូចខាងក្រោម៖
-ទទួលយកប្រធានសហជីព លោក យ៊ិន យ៉ុង ចូលធ្វើការវិញជាធម្មតា៖ និយោជកឯកភាពទទួលយក លោក យ៊ិន យ៉ុង ប្រធានសហជីពសាមគ្គីភាពការងារកម្ពុជា ចូលបម្រើការងារវិញ និងដកពាក្យបណ្តឹងសុំបញ្ឈប់ចេញពីក្រសួងការងារ។
- បញ្ចូលប្រាក់រង្វាន់ប្រចាំសប្តាហ៍ទៅក្នុងតារាងបើកប្រាក់ឈ្នួល៖ ចាប់ពីខែធ្នូ ឆ្នាំ២០២៦ តទៅ ក្រុមហ៊ុនឯកភាពបញ្ចូលប្រាក់រង្វាន់ប្រចាំសប្តាហ៍ទៅក្នុងតារាងបើកប្រាក់ឈ្នួលប្រចាំខែ ដើម្បីធានាភាពត្រឹមត្រូវនៃមូលដ្ឋានគណនាប្រាក់អត្ថប្រយោជន៍ស្របច្បាប់។
- ពិនិត្យឡើងវិញលើតួលេខផលិតកម្ម និងបញ្ឈប់ការព្រមាន៖ ក្រុមហ៊ុននឹងពិនិត្យឡើងវិញនូវការកំណត់ចំនួនផលិតកម្មដែលខ្ពស់ហួសកម្លាំងកម្មករ ហើយចាប់ពីថ្ងៃទី១៩ ខែវិច្ឆិកា ឆ្នាំ២០២៦ នេះតទៅ ក្រុមហ៊ុននឹងមិនធ្វើការព្រមានកម្មករពាក់ព័ន្ធនឹងបញ្ហានេះឡើយ។
- តម្លើងកង្ហារគ្រប់ឡាញ៖ ក្រុមហ៊ុនឯកភាពរៀបចំតម្លើងកង្ហារក្បាល Line QC និងតាមគ្រប់ឡាញទាំងអស់ ដើម្បីកាត់បន្ថយកម្តៅជូនកម្មករ។
-ការណែនាំ និងធ្វើកិច្ចសន្យាចំពោះអ្នកគ្រប់គ្រងរដ្ឋបាល៖ ភាគីក្រុមហ៊ុននឹងអញ្ជើញអ្នកគ្រប់គ្រងរដ្ឋបាលពាក់ព័ន្ធមកធ្វើការព្រមាន ណែនាំ និងធ្វើកិច្ចសន្យា ដើម្បីធានាការគោរពសិទ្ធិសេរីភាពកម្មករនិយោជិត។
-ធានាមិនមានការរើសអើង ឬសងសឹកគ្នា៖ ភាគីទាំងពីរឯកភាពគ្នាមិនធ្វើការប្តឹងផ្តល់ និងមិនមានការរើសអើងគ្នាឡើយ។បងប្អូនកម្មករនិយោជិតទាំងអស់ឯកភាពត្រឡប់ចូលធ្វើការវិញថ្ងៃទី២០វិច្ឆិកា។
សូមបញ្ជាក់ថានៅព្រឹក៨៖១០នាទី ថ្ងៃទី១៩ ខែវិច្ឆិកា ឆ្នាំ២០២៦នេះ កម្មករ-កម្មការិនីជាង ១,០០០នាក់ នៃក្រុមហ៊ុន ខេមបូ យូនីសូល ខូអិលធីឌី (Cambo Unisol Co., Ltd.) ដែលមានទីតាំងស្ថិតក្នុងតំបន់អភិវឌ្ឍន៍ 7NG ភូមិសេដា ឃុំវិហារសួគ៌ ស្រុកខ្សាច់កណ្តាល ខេត្តកណ្តាល។