
វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1774 នាក់
ម្សិលមិញ 14622 នាក់
សរុប 21238323 នាក់
ភ្នំពេញ៖អង្គការឃ្លាំមើលសិទ្ធិមនុស្ស Human Rights Watch តាមរយៈអត្ថបទចុះនៅថ្ងៃទី១៩ ខែវិច្ឆិកា បានលើកឡើងថា កម្ពុជាគួរឆ្លើយតបនឹងសំណើររបស់ប្រមុខរដ្ឋាភិបាលបារាំង ក្នុងការស៊ើបអង្កេត និងរកជនសង្ស័យ ២នាក់ ដែលជាប់ពាក់ព័ន្ធនឹងការសម្លាប់លោក លិម គិមយ៉ា អតីតតំណាងរាស្ត្របក្សប្រឆាំង កាលពីដើមឆ្នាំ២០២៥។ នៅក្នុងអត្ថបទរបស់ខ្លួន អង្គការឃ្លាំមើលសិទ្ធិមនុស្សអន្តរជាតិមួយនេះ ចង់ឃើញរដ្ឋាភិបាលកម្ពុជាបើកការស៊ើបអង្កេតដោយឯករាជ្យ ឥតលម្អៀង ពិសេសកុំឱ្យជនសង្ស័យទាំង ២នាក់បន្តមានសេរីភាព។
សូមរំឭកថា ក្នុងអំឡុងទស្សនកិច្ចនៅកម្ពុជា កាលពីថ្ងៃទី១៥វិច្ឆិកាកន្លងទៅថ្មីៗ លោកប្រធានាធិបតីបារាំង អេម៉ានុយអែល ម៉ាក្រុង បានលើកឡើងនៅចំពោះមុខលោកនាយករដ្ឋមន្ត្រី ហ៊ុន ម៉ាណែត ដោយស្នើឱ្យរដ្ឋាភិបាលកម្ពុជា បន្តស៊ើបអង្កេតរកជនសង្ស័យ ដែលមានជាប់ពាក់ព័ន្ធក្នុងករណីបាញ់សម្លាប់លោក លិម គិមយ៉ា នៅប្រទេសថៃ។ លោក ម៉ាក្រុង ចង់ឱ្យរដ្ឋាភិបាលកម្ពុជា ធ្វើយ៉ាងណានាំយកជនសង្ស័យទាំងនោះឱ្យមកទទួលខុសត្រូវចំពោះមុខច្បាប់។
ចំពោះ HRW សាររបស់ប្រមុខរដ្ឋបារាំង ជាសារនយោបាយម៉ឺងម៉ាត់ និងជាការស្តីបន្ទោសជាសាធារណៈដ៏កម្រមួយទៅកាន់រដ្ឋាភិបាលកម្ពុជា។ អង្គការខាងលើក៏បានជំរុញឱ្យមេដឹកនាំនៃបណ្តាប្រទេសដទៃទៀត ជួយបន្លឺសាររបស់ប្រមុខរដ្ឋបារាំងឱ្យកាន់តែខ្លាំងឡើង និងសង្ឃឹមថារដ្ឋាភិបាលកម្ពុជា នឹងបើកលំហនយោបាយ ព្រមទាំងដោះលែងអ្នកទោសមនសិការចេញពីពន្ធនាគារ។ រដ្ឋាភិបាលកម្ពុជា ក៏ដូចជាក្រសួងមហាផ្ទៃ ពុំមានការធ្វើអត្ថាធិប្បាយអ្វីនៅឡើយទេ ជុំវិញការលើកឡើងរបស់អង្គការ HRWនៅថ្ងៃនេះ។
ដោយឡែកនៅក្នុងសន្និសីទសារព័ត៌មានស្តីពីលទ្ធផលដំណើរទស្សនកិច្ចផ្លូវរដ្ឋរបស់លោក អេម៉ានុយអែល ម៉ាក្រុង និងកិច្ចប្រជុំកំពូលហ្រ្វង់កូហ្វូនីលើកទី២០ លោក អូលីវីយេ រីស្ហា ឯកអគ្គរដ្ឋទូតបារាំងប្រចាំកម្ពុជាបានបញ្ជាក់បន្ថែមថា ការស្នើសុំរបស់បារាំង គឺដោយសារតែបារាំងសង្ស័យថា ដើមចមនៃការបាញ់សម្លាប់លោក លិម គិមយ៉ា មានប្រភពពីកម្ពុជា។
គួរកត់សម្គាល់ថា កាលពីថ្ងៃទី១៧ ខែវិច្ឆិកា ឆ្នាំ២០២៦ ប៉ូលិសអន្តរជាតិអាំងទែប៉ូលបានចេញនិវេទន៍ក្រហមស្វែងរក និងឃាត់ខ្លួនបុគ្គល ២នាក់ រួមមានឈ្មោះ ពេជ្រ គឹមស្រ៊ិន និង លី រតនៈរស្មី ដែលជាជនសង្ស័យ សមគំនិតក្នុងការរៀបចំគម្រោងបាញ់សម្លាប់លោក លិម គិមយ៉ា អតីតតំណាងរាស្ត្រនៃអតីតគណបក្សសង្គ្រោះជាតិនៅក្រុងបាងកក ប្រទេសថៃ កាលពីឆ្នាំ២០២៥។
សមត្ថកិច្ចថៃកំណត់បានជនសង្ស័យចំនួន ៤នាក់ ក្នុងនោះជនសង្ស័យទី១ ជាខ្មាន់កាំភ្លើងជនជាតិថៃឈ្មោះ អេកាឡាក់ ភាណយ ជនសង្ស័យទី២ ជាអ្នកបោះតម្រុយជាជនជាតិខ្មែរឈ្មោះ ពេជ្រ គឹមស្រ៊ិន និងជនសង្ស័យទី៣ អ្នកបើកឡានជនជាតិថៃឈ្មោះ ឆាគីត ប៊ួភ្លេ ដែលបានដឹកខ្មាន់កាំភ្លើងគេចខ្លួនចូលទឹកដីកម្ពុជា។ ចុងក្រោយគឺលោក លី រតនរស្មី ជនជាតិខ្មែរ ដែលជាអ្នកនៅពីក្រោយការជួលខ្មាន់កាំភ្លើងឱ្យបាញ់សម្លាប់ជនរងគ្រោះ។ ឃាតករជាជនជាតិថៃឈ្មោះ អេកាឡាក់ ភាណយ ត្រូវបានតុលាការថៃកាត់ទោសដាក់គុកអស់មួយជីវិត ពីបទឃាតកម្ម៕ (ប្រភពវិទ្យុបារាំងអន្តរជាតិ)