ជំទាវអ្នកឧកញ៉ា ម៉ៅ ចំណាន និងអ្នកឧកញ៉ា លាង ម៉េងប្រកាស ឧបត្ថម្ភថវិកា ១២០លានរៀល គាំទ្រដល់ការសម្តែងចាប៉ីដងវែងទូទាំងប្រទេស

ភ្នំពេញ៖ លោកជំទាវអ្នកឧកញ៉ា ម៉ៅ ចំណាន គិត ម៉េង ប្រធានសមាគមសិល្បករខ្មែរ បានឧបត្ថម្ភ ២០លានរៀលនិងអ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន ខ្មែរ ប៊ែវើរីជីស (Khmer Beverages)  និងលោកជំទាវ គឹម ចាន់ណា ដែលបានឧបត្ថម្ភថវិកា ១០០លានរៀលក្នុងមួយឆ្នាំ ដើម្បីគាំទ្រដល់ការសម្តែងចាប៉ីដងវែង។ 

ការប្រកាសឧបត្ថម្ភគាំទ្រធ្វើឡើង ក្នុងពិធីអបអរសាទរខួបលើកទី៩ ចាប៉ីដងវែង ត្រូវបានចុះក្នុងបញ្ជីបេតិកភណ្ឌវប្បធម៌អរូបី នារសៀលថ្ងៃទី២៣ ខែវិច្ឆិកា ឆ្នាំ២០២នៅផ្សារទំនើប ជីប ម៉ុង ២៧១ ។
លោកជំទាវអ្នកឧកញ៉ា ម៉ៅ ចំណានបានសម្តែងសេចក្តីសោមនស្ស ដែលបានចូលរួមព្រឹត្តិការណ៍ដ៏មានអត្ថន័យជ្រាលជ្រៅសម្រាប់ប្រទេសកម្ពុជា, ជាមួយបងប្អូនសិល្បករ សិល្បការិនី និងភ្ញៀវកិត្តិយសទាំងអស់ដែលចូលរួម អបអរសាទខួបលើកទី៩ ដែល ចាប៉ីដងវែង ត្រូវបានចុះបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ។

លោកជំទាវអ្នកឧកញ៉ា ម៉ៅ ចំណាន មានប្រសាសន៍ថា ចាប៉ីដងវែង គឺជាស្នាដៃសិល្បៈដ៏អស្ចារ្យរបស់ដូនតា ដែលបានបង្រួមបញ្ចូលរវាង ភាសា តន្ត្រី និងប្រាជ្ញាខ្មែរយើង។ វាមិនត្រឹមជាឧបករណ៍តន្ត្រី ឬតន្ត្រីសម្រាប់ការកម្សាន្តតែមួយមុខនោះទេ ប៉ុន្តែចាប៉ីដងវែង ជាវិធីនៃការបង្ហាញគំនិត ការអប់រំ និងការចែករំលែកអារម្មណ៍រីករាយនៅក្នុងជីវភាពប្រចាំថ្ងៃ។ ពេលវេលាចេះតែវិវត្ត យើងសង្កេតឃើញថា នៅក្នុងរយៈពេលចុងក្រោយៗនេះ យុវសិល្បកររបស់យើងបានបន្ថែមនូវគំនិតច្នៃប្រឌិត និងបានបង្កើតបទចម្រៀងថ្មីៗ ដោយបានរួមបញ្ចូលនូវសូរសំនៀងចាប៉ីជាមួយ ដែលធ្វើឱ្យបទភ្លេង និងបទចម្រៀងកាន់តែមានរសជាតិពិសេសប្លែក, ជាក់ស្តែង ដូចជា បទ Time to Rise ដែលលេង ច្រៀង និងសម្តែងរួមគ្នារវាង ព្រឹទ្ធាចារ្យកោសល្យវោហារ គង់ ណៃ និង ប្អូន វណ្ណដា ជាដើម។ សំឡេងចាប៉ី គឺជាសំឡេងនៃការចងចាំអតីតកាល និងជាសំឡេងនៃក្តីសង្ឃឹមសម្រាប់អនាគត។

លោកជំទាវអ្នកឧកញ៉ា ម៉ៅ ចំណានក៏បានកោតសរសើរចំពោះតារាចម្រៀងរាមច្បងអ្នកនាង ម៉េង កែវពេជ្ជតា និងកូនស្រី ដែលតែងតែផ្សាភ្ជាប់រំលេចវត្តមានឧបករណ៍ភ្លេងបុរាណខ្មែរ ពិសេសចាប៉ីដងវែង នេះតែម្តង នៅក្នុងបទចម្រៀង និងការសម្តែងនៅលើឆាកតន្ត្រីនានារបស់ខ្លួន។  លោកជំទាវអ្នកឧកញ៉ា ម៉ៅ ចំណានដែល បានអមដំណើរជាមួយនឹងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នាំយករបាំព្រះរាជទ្រព្យទៅសម្តែងនៅអឺរ៉ុប កាលពីដើមឆ្នាំ២០២៥ ហើយនៅចុងឆ្នាំនេះ យើងកំពុងរៀបចំការប្រគំតន្ត្រីដ៏ធំមួយនៅប្រទេសបារាំង ដោយនាំយកសិល្បៈបុរាណខ្មែរ ដូចជា របាំកល្យាណីទេវី និងរបាំស្វា រួមជាមួយនឹងទំនើបកម្មថ្មីនៃវិស័យចម្រៀងរ៉េបកម្ពុជា ដែលមានតារាចម្រៀង វណ្ណដា វណ្ណថាន នរិទ្ធ យ៉ូហៃ និង ស៊ូហ្សាណា ទៅសម្តែងនៅលើឆាកអន្តរជាតិ ក្នុងនោះក៏មានការជួយឧបត្ថម្ភធំពី ក្រុមហ៊ុន ជីប ម៉ុង លែន របស់អ្នកឧកញ៉ា លាង ម៉េង ផងដែរ។

ជាមួយគ្នានេះ លោកជំទាវអ្នកឧកញ៉ា ម៉ៅ ចំណាន សង្ឃឹមយ៉ាងមុតមាំថា នៅពេលខាងមុខ យើងនឹងអាចនាំយកចាប៉ីដងវែង រួមជាមួយនឹងសិល្បៈបុរាណខ្មែរជាច្រើនផ្សេងទៀត ទៅសម្តែងនៅក្រៅប្រទេសកាន់តែផុលផុសច្រើនឡើង។