ស្នងការនគរបាលរាជធានី បង្ហាញមុខជនសង្ស័យ៨នាក់ ដែលចាប់បង្ខាំងជនជាតិចិន និងជំរិតលុយជាង៥ម៉ឺនដុល្លារ

ភ្នំពេញ ៖ នៅវេលាម៉ោង១០ព្រឹក ថ្ងៃទី២២ ខែវិច្ឆិកា ឆ្នាំ២០២៥ ស្ថិតនៅក្នុងស្នងការដ្ឋាននគរបាលរាជធានីភ្នំពេញកម្លាំងនគរបាលកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានបង្ក្រាបនិង បង្ហាញមុខ ជនសង្ស័យចំនួន៨នាក់ ក្រោយធ្វើសកម្មភាព ចាប់បង្ខាំងជនជាតិចិន និង ជំរិតទារប្រាក់ចំនួន ៥មុឺន ២ពាន់ដុល្លារ ។

លោកវរសេនីយ៍ឯក អេង សោភា នាយការិយាល័យនគរបាលព្រហ្មទណ្ឌកម្រិតធ្ងន់ បានឱ្យដឹងថា ដោយមានបទបញ្ជាពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពរញ ឧត្តមសេនីយ៍ទោ ញ៉ុង រស់មេត្តា ស្នងការងទទួលដឹកនាំការិយាល័យកម្រិតធ្ងន់ បានបញ្ជាឱ្យកម្លាំងនគរបាលព្រហ្មទណ្ឌកម្រិតធ្ងន់ ចុះស្រាវជ្រាវ ករណីចាប់បង្ខាំងជនជាតិចិន និងជម្រិតទារប្រាក់ចំនួន ៥ម៉ឺន ២ពាន់ដុល្លារ កាលពីវេលាម៉ោង៣ និង២០នាទីទៀបភ្លឺ ថ្ងៃទី១៥ ខែវិច្ឆិកា ឆ្នាំ២០២៥ នៅចំណុចខុនដូ១កន្លែង ដែលស្ថិតនៅបណ្តោយផ្លូវលេខ៣៥២ ភូមិ៨ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ។

តាមការស្រាវជ្រាវតាមរយៈកាំមេរ៉ាសុវត្ថិភាព ការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានសហការណ៍ជាមួយអធិការដ្ឋាននគរបាលទាំង១៤ខណ្ឌ និងស្នងការដ្ឋាននគរបាលខេត្តកណ្ដាល , ខេត្តតាកែវ , ខេត្តកំពត ,សៀមរាប និងខេត្តព្រះសីហនុ ដោយកំណត់បាននូវទីតាំងរបស់ ជនសង្ស័យ កំពុងពួនសម្ងំលាក់ខ្លួន រហូតឈានដល់ការបង្រ្កាបជនសង្ស័យចំនួន ៨នាក់ ជាជនជាតិខ្មែរ ។

ក្នុងការបង្ក្រាបនេះ កម្លាំងនគរបាលជំនាញបានដកហូតវត្ថុតាងពីជនសង្ស័យរួមមាន៖ រថយន្តម៉ាក Toyota Prius ពណ៌ស ផ្លាកលេខ កំពត 2B-8818 និងរថយន្តម៉ាក Toyota Prius ពណ៌ប្រផេះ ដែលមានផ្លាកលេខ ភ្នំពេញ 2BQ-8101 ។ ព្រមទាំងកាំភ្លើងខ្លី ០៤ដើម , ទូរសព្ទចំនួន ០៦គ្រឿង , គ្រាប់ចំនួន ៣៨គ្រាប់ , ខ្នោះដៃចំនួន ០៧ , សម្លៀកបំពាក់កងរាជអាវុធហត្ថចំនួន ០៤កំប្លេ , កាតកងរាជអាវុធហត្ថចំនួន ០២សន្លឹក(COPY) និងកាបូបស្ពាយចំនួន ០១ ។បច្ចុប្បន្នជនសង្ស័យទាំង៨នាក់ ត្រូវបានមន្ត្រីជំនាញការិយាល័យនគរបាលព្រហ្មទណ្ឌកម្រិតធ្ងន់ កសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីអនុវត្តបន្តនីតិវិធីច្បាប់ ៕