ក្រុមអ្នកសង្កេតការណ៍អាស៊ាន AOT ចុះពិនិត្យស្ថានភាពផ្ទាល់នៅភូមិព្រៃចាន់ ទីដែលទាហានថៃបាញ់ប្រហារមកលើជនស៊ីវិលកម្ពុជា

បន្ទាយមានជ័យ៖ ក្រុមអ្នកសង្កេតការណ៍អាស៊ាន AOT នៅថ្ងៃទី១៣ ខែវិច្ឆិកា ឆ្នាំ២០២៥ បន្ដចុះទៅពិនិត្យស្ថានភាពផ្ទាល់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ទីដែលទាហានថៃបាញ់ប្រហារមកលើជនស៊ីវិលកម្ពុជា បណ្ដាលឲ្យស្លាប់ម្នាក់ និងរងរបួស៣នាក់ កាលពីរសៀលថ្ងៃទី១២វិវ្ឆិកាបន្ទាប់ពីបានចុះទៅពិនិត្យស្ថានភាពជនរងគ្រោះ ដែលត្រូវទាហានថៃបាញ់ប្រហារ ព្រមទាំងសាកសពអ្នកដែលបាត់បង់ជីវិតនៅមន្ទីរពេទ្យផងដែរ។ 

សូមរំលឹកថា នៅវេលាម៉ោង១៥៖៥០នាទី ថ្ងៃទី១២ ខែវិច្ឆិកា ២០២៥ កម្លាំងទាហានថៃ បានប្រើកាំភ្លើង RPD បាញ់ប្រហារមកលើប្រជាពលរដ្ឋកម្ពុជា ដែលកំពុងស្នាក់នៅក្នុងជម្រកកៅស៊ូតង់ក្នុងដែនអធិបតេយ្យកម្ពុជា ទីតាំង (ថៃដាក់កង់ឡាននិងរាយបន្លាលួស) ស្ថិតក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ឈមខាងថៃ ភូមិណងយ៉ាកែវ ឃុំណងម៉ាក់មុន ស្រុកគោកធ្យូង ខេត្តស្រះកែវ។

ជនរងគ្រោះដែលរងរបួសទាំង៣នាក់៖ទី១៖ ឈ្មោះ នី សុម៉េង ភេទប្រុស អាយុ៣២ឆ្នាំ រស់នៅភូមិផ្សារកណ្ដាល ឃុំផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ ត្រូវត្រគៀកខាងស្ដាំធ្លុះពីក្រោយមកមុខ.។ទី២៖ ឈ្មោះ រិទ្ធ ចាន់ធា ភេទប្រុស អាយុ២៩ឆ្នាំ រស់នៅភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យ (បាញ់ត្រូវភ្លៅស្តាំ)។ទី៣៖ ឈ្មោះ សូ ចំរ៉ុង ភេទប្រុស អាយុ៣៨ឆ្នាំ រស់នៅភូមិតំណក់ទឹក ឃុំចន្ទគីរី ក្រុងប៉ោយប៉ែត ខេត្តបន្ទាយមានជ័យ ត្រូវពោះ។

បើតាមសេចក្ដីរាយការណ៍ពីជួរមុខកម្ពុជា ដំបូងទាហានថៃ បានស្រែកជេរមកទាហានកម្ពុជា ប៉ុន្តែទាហានកម្ពុជាមិនតបត បន្ទាប់មកទាហានថៃ បានបាញ់ទាំងកំរោលមកលើ ប្រជាពលរដ្ឋកម្ពុជា ដេកនៅក្នុងតង់ ទីតាំងក្បែរទាហានថៃ រាយបន្លាលួស និងដាក់កងឡាន ក្នុងដែនអធិបតេយ្យភាពកម្ពុជា។

ជនស៊ីវិលកម្ពុជាដែលរងគ្រោះទាំងបីនាក់នោះ បានទទួលការវះកាត់យកក្បាលគ្រាប់ចេញដោយជោគជ័យ និងកំពុងបន្ដទទួលការថែទាំយ៉ាងយកចិត្តទុកដាក់បំផុតពីក្រុមគ្រូពេទ្យជំនាញ នៅមន្ទីរពេទ្យខេត្តមិត្តភាពកម្ពុជា ជប៉ុន មង្គលបូរី។ បងប្អូនប្រជាពលរដ្ឋរងគ្រោះទាំងបីនាក់នោះ កំពុងត្រូវបានបញ្ជូនចេញពីមន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ខេត្តបន្ទាយមានជ័យ មកកាន់មន្ទីរពេទ្យនៅរាជធានីភ្នំពេញ ដើម្បីបន្តការព្យាបាល។