និស្សិតឆ្នាំទី ២ ម្នាក់ ត្រូវបានម៉ូតូ៣គ្រឿង ជិះដេញធាក់ផ្ដួលនិងកាប់ទៅលើពេលកំពុងតែជិះម៉ូតូបណ្តាលឲ្យបាត់បង់ជីវិត ។ជនរងគ្រោះមានឈ្មោះរ៉ាត់ ពិសិដ្ឋអាយុ២១ឆ្នាំ រស់នៅ ភូមិទួលរការ ឃុំជាងទង ស្រុកត្រាំកក់ ខេត្តតាកែវ 

ខេត្តកណ្តាល៖ប្រភពពីប្រជាពលរដ្ឋ និងក្រុមគ្រួសារនៃសពឲ្យដឹងថាករណីនេះកើត នៅតាមបណ្ដោយផ្លូវជាតិលេខ ៣ គីឡូម៉ែត្រលេខ៣០ ភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល ព្រឹកថ្ងៃទី០២ វិច្ឆិកា ២០២៥។ 

តែបើតាមសមត្តកិច្ចឲ្យដឹងថាវាករណីហិង្សាដោយចេតនាមានស្ថានទម្ងន់ទោស (បណ្ដាលឲ្យស្លាប់ម្នាក់ និងរងរបួស ២នាក់) បានកើតឡើងកាលពីវេលាម៉ោង ០៣:០០នាទីទាបភ្លឺ ថ្ងៃទី០២ វិច្ឆិកា ២០២៥ នៅចំណុចតាមបណ្ដោយផ្លូវជាតិលេខ៣ ស្ថិតក្នុងភូមិព្រៃទទឹង ឃុំត្រពាំងវែង ស្រុកកណ្ដាលស្ទឹង ខេត្តកណ្ដាល។ ជនរងគ្រោះទាំង ៥នាក់ជិះម៉ូតូ ៣គ្រឿង ត្រូវបានក្រុមជនសង្ស័យមានគ្នីគ្នាជាច្រើននាក់ (មិនស្គាល់អត្តសញ្ញាណ) ជិះម៉ូតូ ៧គ្រឿង ធ្វើសកម្មភាពធាក់ផ្ដួលម៉ូតូ និងកាប់ដោយផ្លែដាវ។

លោកវរសេនីយ៍ឯក ឡេង សុខរុន អធិការនគរបាលស្រុកកណ្ដាលស្ទឹង បានឲ្យដឹងថា ជនរងគ្រោះទាំង ៥នាក់ មានទីលំនៅជាមួយគ្នាក្នុងភូមិទួលរកា ឃុំជាងទង ស្រុកត្រាំកក់ ខេត្តតាកែវ។ ពួកគេមានឈ្មោះ៖ រ៉ាត់ ពិសិដ្ឋ (ប្រុស, ២១ឆ្នាំ) មុខរបរនិស្សិត (ស្លាប់), អុន សុជាតិ (ប្រុស, ១៨ឆ្នាំ) មុខរបរកម្មករសំណង់, ធី ធារ៉ា (ប្រុស, ២១ឆ្នាំ) មុខរបរជាងជួសជុលម៉ូតូ, ឌឹប ប្រុសពេជ្រ (ប្រុស, ២៣ឆ្នាំ) មុខរបរកម្មករសំណង់ (រងរបួស), និង ស៊ីណេ សំណាង (ប្រុស, ២៦ឆ្នាំ) មុខរបរជាងជួសជុលម៉ូតូ (រងរបួស)។ វត្ថុតាងដែលនៅនឹងកន្លែងកើតហេតុគឺម៉ូតូ ១គ្រឿងម៉ាក Honda Dream C១២៥ ពណ៌ខ្មៅ ពាក់ស្លាកលេខតាកែវ ១AF-៥៤៣០ (ជារបស់ជនរងគ្រោះ)។

លោកអធិការបានប្រាប់បន្ថែមទៀតថា នៅវេលាកើតហេតុ ជនរងគ្រោះទាំង ៥នាក់ជិះម៉ូតូ ៣គ្រឿង (ក្នុងទិសដៅពីត្បូងទៅជើង) ទៅធ្វើការនិងទៅរៀននៅភ្នំពេញ។ ពេលមកដល់ចំណុចកើតហេតុ ក្រុមជនសង្ស័យមួយក្រុមធំ ជិះម៉ូតូ ៧គ្រឿង បិទភ្លើងទាំងអស់ បានជិះតាមពីក្រោយ។ ពួកគេបានព្យាយាមកាប់ជនរងគ្រោះ ធាក់ម៉ូតូជនរងគ្រោះបណ្ដាលឲ្យដួល។ ក្រុមជនសង្ស័យបានធាក់ម៉ូតូរបស់ជនរងគ្រោះឈ្មោះ ឌឹប ប្រុសពេជ្រ និង រ៉ាត់ ពិសិដ្ឋ បណ្ដាលឲ្យដួល ហើយឈ្មោះ រ៉ាត់ ពិសិដ្ឋ ក៏បានដួលបោកទៅនឹងលូដែលគេទុកចោលនៅក្បែរចិញ្ចើមផ្លូវ បណ្ដាលឲ្យស្លាប់បាត់បង់ជីវិត។ ក្រោយបង្កហេតុ ក្រុមជនសង្ស័យក៏បានជិះម៉ូតូទៅទិសខាងត្បូងគេចខ្លួនបាត់។

ក្រោយកើតហេតុ សមត្ថកិច្ចបានបញ្ជូនជនរងគ្រោះ ២នាក់ដែលរងរបួសទៅព្យាបាលនៅមន្ទីរពេទ្យបង្អែកស្រុកកណ្ដាលស្ទឹង ឯសពជនរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។បច្ចុប្បន្ន ផ្នែកជំនាញសហការណ៍ជាមួយតាមបណ្ដាប៉ុស្តិ៍នគរបាលទាំង ១៨ ក្នុងស្រុកកណ្ដាលស្ទឹង បន្តស្រាវជ្រាវតាមរកមុខសញ្ញា៕