កម្ពុជាប្រាប់ថៃថា កុំបង្កភាពតានតឹង និងពង្រីកតំបន់ជម្លោះទាក់ទងចោទប្រកាន់រឿងលេណដ្ឋាន និងផ្ទះពលរដ្ឋនៅពោធិ៍សាត់
11-February-2026 / សន្តិសុខសង្គម
ភ្នំពេញ៖នៅល្ងាចថ្ងៃទី១៦ ខែកញ្ញា អ្នកនាំពាក្យក្រសួងការពារជាតិកម្ពុជា លោកស្រី ឧត្តមសេនីយ៍ឯក ម៉ាលី សុជាតាបានថ្លែង ប្រាប់ឱ្យភាគីថៃកុំបង្ករឿង។ប្រតិកម្មរបស់អ្នកនាំពាក្យក្រសួងការពារជាតិគឺ បន្ទាប់ពីមាន គេហទំព័រកាសែតផ្លូវការរបស់ថៃមួយចំនួនក្នុងនោះរួមមាន The Nation Thailand, Khaosod គេហទំព័ររបស់ការិយាល័យអ្នកនាំពាក្យកងទ័ពជើងទឹកថៃ និងបញ្ជាការដ្ឋានការពារព្រំដែនច័ន្ទបុរី-ត្រាត នៅថ្ងៃទី១៦កញ្ញាបានលើកឡើងពីបញ្ហានៃការឈរជើង និងការតាំងទីលំនៅរបស់ប្រជាពលរដ្ឋកម្ពុជា នៅភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់ ទល់នឹងភូមិបានចំរៀក ឃុំចំរក់ ស្រុកមឿង ខេត្តត្រាត។
ឧត្តមនាវីឯក Parach Rattanaichaiyapan អ្នកនាំពាក្យរងនៃកងទ័ពជើងទឹកថៃ បានបង្ហើបថា ឆ្លើយតបនឹងព័ត៌មានថា កងកម្លាំងកម្ពុជាបានរំលោភបំពាន និងបង្កើតមូលដ្ឋានប្រតិបត្តិការ ហើយពលរដ្ឋកម្ពុជាបានសាងសង់ផ្ទះ និងកំពុងប្រើប្រាស់ដីកសិកម្មតាមព្រំដែនកម្ពុជា-ថៃ នៅតំបន់ចំនួន៣ នៃឃុំចេក ស្រុកចំការត្រា ស្រុកមឿង។ សេចក្តីរាយការណ៍បានបញ្ជាក់ថា ទោះបីជាពួកគេដឹងថាតំបន់នេះស្ថិតនៅក្រោមអធិបតេយ្យភាពរបស់ថៃក៏ដោយ ក៏កងកម្លាំងកម្ពុជាបានទន្ទ្រានកាន់កាប់ និងកាន់កាប់ជាច្រើនឆ្នាំមកហើយ តែគ្មានចំណាត់ការទេ។
គេគ្រាន់តែដឹងថា ភាគីថៃបានជូនដំណឹងដល់ភាគីកម្ពុជាហើយ ប៉ុន្តែមិនមានការផ្លាស់ប្តូរ ឬដកចេញទេ។ លោក Parach បានពន្យល់ថា តំបន់នេះស្ថិតក្នុងទឹកដីដែលថៃទាមទារតាម MOU ឆ្នាំ២០០០។ កាសែតថៃសសេរថា បញ្ជាការដ្ឋានការពារព្រំដែនចាន់ថាបុរី និងត្រាត (CTBDC) បានដាក់លិខិតតវ៉ាជាច្រើនដងឱ្យភាគីកម្ពុជាចាកចេញពីតំបន់គ្មានព្រំដែន។ នាពេលថ្មីៗនេះ នៅក្នុងកិច្ចប្រជុំពិសេសនៃគណៈកម្មាធិការព្រំដែនភូមិភាគថៃ-កម្ពុជា (RBC) ជាមួយយោធភូមិភាគទី៥ ខាងCTBDCថៃ បានលើកឡើងពីបញ្ហានៃការទន្ទ្រានម្តងទៀត។ បច្ចុប្បន្ននេះនៅតំបន់ដែលត្រូវបានទន្ទ្រានកាន់កាប់ CTBDC បានរុញកងកម្លាំងកម្ពុជាចេញដោយជោគជ័យ។ ទោះយ៉ាងណាភាគីកម្ពុជាមិនទាន់រុះរើសំណង់ឬចាក់បំពេញប្រឡាយនៅឡើយទេ។
ជុំវិញការលើកឡើងរបស់ភាគីថៃពាក់ព័ន្ធនឹងបញ្ហាទាំងនេះ អ្នកនាំពាក្យក្រសួងការពារជាតិកម្ពុជាបានឲ្យដឹងថា កន្លងមកកម្ពុជាបានផ្តល់ការបកស្រាយយ៉ាងច្បាស់លាស់រួចមកហើយ ហើយតាមរយៈលិខិតឆ្លើយតបរបស់យោធភូមិភាគទី៥កម្ពុជាកាលពីថ្ងៃទី១ ខែកុម្ភៈ ឆ្នាំ២០២២ ហើយកម្ពុជា-ថៃ ក៏បានដោះស្រាយបញ្ហាមួយចំនួនចប់រួចរាល់ផងដែរ។
ដោយឡែក បញ្ហាដែលនៅសេសសល់ដទៃទៀតដែលមិនស្ថិតនៅក្រោមអាណត្តិរបស់អង្គភាពតាមព្រំដែន ក៏ដូចជាអាជ្ញាធរមូលដ្ឋាននៅតាមព្រំដែន កម្ពុជាបានលើកសំណើរួចហើយថា បញ្ហាទាំងនេះគួរបញ្ជូនទៅឱ្យគណៈកម្មាធិការចម្រុះព្រំដែន (JBC) ពិភាក្សា និងដោះស្រាយ ស្របតាមអនុស្សារណៈនៃការយោគយល់គ្នា រវាងរដ្ឋាភិបាលនៃព្រះរាជណាចក្រកម្ពុជា និងរដ្ឋាភិបាលនៃព្រះរាជាណាចក្រថៃ ស្តីពីការវាស់វែង និងខ័ណ្ឌព្រំសីមាព្រំដែនគោក (MOU 2000)។ នេះបើតាមអ្នកនាំពាក្យគូសបញ្ជាក់បន្ថែម។
លោកស្រី ម៉ាលី សុជាតា អ្នកនាំពាក្យក្រសួងការពារជាតិកម្ពុជាលើកឡើងថា ក្នុងពេលដំណាលគ្នានេះ កម្ពុជាស្នើឱ្យគ្រប់ភាគីទាំងអស់ចៀសវាងសកម្មភាពទាំងឡាយណាដែលអាចនាំទៅដល់ការកើនឡើងនូវភាពតានតឹង និងការពង្រីកតំបន់ជម្លោះ ដោយខិតខំធ្វើយ៉ាងណាបង្កបរិយាកាសអំណោយផល ដល់ការអនុវត្តបទឈប់បាញ់ឱ្យបានពេញលេញ និងប្រកបដោយប្រសិទ្ធភាព ក្នុងនោះរួមទាំងការព្រមព្រៀងទាំងឡាយ ដែលភាគីទាំងពីរសម្រេចបាននៅក្នុងកិច្ចប្រជុំគណៈកម្មាធិការព្រំដែនទូទៅ (GBC) និងកិច្ចប្រជុំព្រំដែនថ្នាក់យោធភូមិភាគ (RBC) ទាំងអស់ឱ្យបានម៉ឺងម៉ាត់ និងខ្ជាប់ខ្ជួន។
ឆ្លៀតក្នុងឱកាសនេះ កម្ពុជាបញ្ជាក់ពីការប្តេជ្ញាចិត្តក្នុងការសហការជាមួយភាគីថៃនៅគ្រប់កម្រិត ដើម្បីលើកកម្ពស់សន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍ សម្រាប់ជាប្រយោជន៍ដល់ប្រទេស និងប្រជាជនប្រទេសទាំងពីរ។
សូមបញ្ជាក់ថាទន្ទឹមនិងបញ្ហាខាងលើនៅភូមិព្រៃចាន់ ឃុំ អូរបីជាន់ ស្រុកអូរជ្រៅ ខេត្ត បន្ទាយមានជ័យនាថ្ងៃទី១៦កញ្ញានេះដែរក៏មានទាហានឈុតខ្មៅថៃមកធ្វើសកម្មភាពរំលោភបំពានបទឈប់បាញ់ និងបានមករាយបន្លាលួសជាថ្មី នៅវេលាម៉ោង ២:២៤នាទី រសៀលថ្ងៃទី ១៦ ខែ កញ្ញា ឆ្នាំ ២០២៥ ។ ប៉ុន្ដែត្រូវបានកងទ័ព និង នគរបាលជួរមុខ រួមទាំងប្រជាពលរដ្ឋ បានរារាំងនិងបានដកហូតលួសបន្លាចេញ ។ ទីបំផុតទាហានឈុតខ្មៅថៃបរាជ័យបានដកថយទៅវិញយ៉ាងអាម៉ាស់ នៅវេលាម៉ោង ៤រសៀលថ្ងៃដដែល ។ រឿងដែលគួរឲ្យហួសចិត្តថៃរាយបន្លាលួសពទ្ធ័យកដីហើយត្រូវបានប្រជាពលរដ្ឋរើចេញថៃបែជាចោទកម្ពុជាថារំលោភបទឈប់បាញ់ដោយយោធាកម្ពុជាប្រើប្រាសប្រជាពលរដ្ឋមកបំពានទៅវិញ។ចំណែកលួសបន្លាត្រូវបានប្រជាពលរដ្ឋរើយកមកទុកក្នុងជាភស្តុតាង។សូមបញ្ជាក់ថាសកម្មភាពទាហ៊ានថៃបង្ករការរំខានក៏បានកើតឡើងផងដែរនៅច្រកអានសេះពេលដែលក្រុមប្រទេសសង្កេតការណ៍IOTដឹកនាំដោយប្រទេសម៉ាឡេស៊ីចុះទៅត្រួតពិនិត្យផងដែរ។
