លោក កែវ សុទ្ធិ កូនខ្មែរម្នាក់ទៀតត្រូវបានសាកលវិទ្យាល័យ Oxford ផ្តល់អាហារូបករណ៍ថ្នាក់បណ្ឌិតនីតិសាស្ត្រ និងសង្គម
08-July-2026 / សុខភាពនិងកីឡា
ភ្នំពេញ៖ លោក កែវ សុទ្ធិ រដ្ឋលេខាធិការ នៃក្រសួងប្រៃសណីយ៍ និងទូរគមនាគមន៍ និងជាអនុប្រធានគណៈកម្មាធិការសិទ្ធិមនុស្សកម្ពុជា ថ្មីៗនេះបានទទួលការជ្រើសរើសឱ្យបន្តរៀនថ្នាក់បណ្ឌិតនីតិសាស្ត្រ និងសង្គម (DPhil in Socio-Legal Studies) នៅសាកលវិទ្យាល័យ Oxford នៃចក្រភពអង់គ្លេសដ៏ល្បីល្បាញថ្នាក់ពិភពលោក។លោក កែវ សុទ្ធិជាកូនប្រុសលោកកែវរ៉េមីទេសរដ្ឋមន្ត្រីនិងជាប្រធានគណៈកម្មាធិការសិទ្ធិមនុស្សកម្ពុជានិង ចៅប្រុសបង្កើតរបស់លោកឈឹមសៀកឡេងជាមន្ត្រីជើងចាស់គណបក្សហ្វ៊ុនស៊ិនប៉ិចផងដែរគឺជាមនុស្សម្នាក់ ក្នងចំនៅមបេក្ខភាពពីររូបប៉ុណ្ណោះ នៅទូទាំងពិភពលោកដែលទទួលបានការជ្រើសរើសពីសាកលវិទ្យាល័យ Oxford សម្រាប់កម្មវិធីថ្នាក់បណ្ឌិតនេះបើទើបីសកលវិទ្យាល័យនេះត្រូវបានរដ្ឋការលោកត្រាំកាត់លុយជំនួយខ្ទង់ពាន់លានដុល្លារចេញក្តី។
គួរបញ្ជាក់ថា កម្មវិធីថ្នាក់បណ្ឌិតនេះ ជាកម្មវិធីដែលពិបាកចូល ហើយស្ថិតនៅក្រោមការគ្រប់គ្រងរបស់មជ្ឈមណ្ឌលសិក្សានីតិសាស្ត្រ និងសង្គម (Centre for Socio-Legal Studies) ដែលមានកេរ្តិ៍ឈ្មោះថ្នាក់អន្តរជាតិ ក្នុងការស្រាវជ្រាវឆ្លងវិស័យ អំពីទំនាក់ទំនងរវាងច្បាប់ និងសង្គម។ មជ្ឈមណ្ឌលនេះស្ថិតនៅក្នុងបណ្តាញមហាវិទ្យាល័យច្បាប់ (Faculty of Law) នៃសាកលវិទ្យាល័យ Oxford ដែលជាមហាវិទ្យាល័យច្បាប់មានឈ្មោះបោះសំឡេងលើសកលលោក។ កម្មវិធីថ្នាក់បណ្ឌិតនេះផ្ដល់ឱកាសជូនសិស្សានុសិស្ស ឱ្យសិក្សាស្រាវជ្រាវអំពីទំនាក់ទំនងរវាងច្បាប់និងសង្គម រួមមានលក្ខណៈធម្មជាតិនៃច្បាប់ ទំនាក់ទំនងរវាងច្បាប់ជាមួយសីលធម៌ សាសនា និងយុត្តិធម៌ តួនាទីរបស់ច្បាប់ក្នុងការគ្រប់គ្រង រដ្ឋបាល និងសហគមន៍ ក៏ដូចជាការអភិវឌ្ឍច្បាប់ ប្រព័ន្ធច្បាប់ និងវប្បធម៌ច្បាប់។
លោក កែវ សុទ្ធិ បានសម្រេចចិត្តជ្រើសរើសមុខវិជ្ជានេះ ដើម្បីស្រាវជ្រាវអំពីការវិវឌ្ឍ និងតួនាទីនៃច្បាប់កម្ពុជាក្នុងការស្ថាបនាជាតិ។ ការស្រាវជ្រាវរបស់លោកកែវសិទ្ធិ គឺមានបំណងជួយបំពេញចន្លោះប្រហោងនេះ ដោយសិក្សាអំពីការវិវឌ្ឍនៃប្រព័ន្ធច្បាប់ កត្តាដែលនាំឱ្យកើតមានច្បាប់ និងគោលនយោបាយសំខាន់ៗ ព្រមទាំងឥទ្ធិពលនៃច្បាប់លើសង្គមកម្ពុជាក្នុងសម័យបច្ចុប្បន្ន។«ប្រព័ន្ធច្បាប់កម្ពុជា កើតឡើងពីធាតុផ្សំចម្រុះដែលមានជាអាទិ៍ ព្រះមហាក្សត្រ វប្បធម៌ ប្រពៃណី ច្បាប់អាណានិគមបារាំង នីតិសាស្ត្រសង្គមនិយម និងឥទ្ធិពលពីតួអង្គអន្តរជាតិ។ ការស្រាវជ្រាវនេះមានសារៈសំខាន់ ព្រោះវាអាចផ្ដល់នូវការយល់ដឹងអំពីប្រវត្តិ និងអនាគតនៃការវិវឌ្ឍរបស់ច្បាប់កម្ពុជា ក្នុងបរិបទនៃប្រទេសមួយដែលកំពុងស្ថាបនាឡើងវិញពីសង្គ្រាម។ ខ្ញុំសង្ឃឹមថា ការស្រាវជ្រាវនេះនឹងរួមចំណែកដល់ការសិក្សាក្នុងវិស័យនីតិសាស្ត្រនិងសង្គម ព្រមទាំងដំណើរការកែទម្រង់ច្បាប់បច្ចុប្បន្ននៅកម្ពុជា» នេះជាកាបញ្ជាក់របស់ លោក កែវ សុទ្ធិ។ប្រាប់កាសែត
សូមបញ្ជាក់ថា ក្នុងតួនាទីបច្ចុប្បន្នជារដ្ឋលេខាធិការ នៃក្រសួងប្រៃសណីយ៍ និងទូរគមនាគមន៍ លោកទទួលបន្ទុកត្រួតពិនិត្យកិច្ចការច្បាប់ និងគោលនយោបាយ ក៏ដូចជាកិច្ចការអាស៊ានរបស់ក្រសួង។ លោកកំពុងសហដឹកនាំការតាក់តែងច្បាប់ និងគោលនយោបាយសំខាន់ៗ រួមទាំងសេចក្តីព្រាងច្បាប់ស្តីពីសន្តិសុខសាយប័រ សេចក្តីព្រាងច្បាប់ស្តីពីកិច្ចការពារទិន្នន័យបុគ្គល គោលនយោបាយក្លោដជាអាទិភាព និងយុទ្ធសាស្ត្រជាតិស្ដីពីបញ្ញាសិប្បនិម្មិត។ ក្នុងតួនាទីបច្ចុប្បន្នជាអនុប្រធានគណៈកម្មាធិការសិទ្ធិមនុស្សកម្ពុជា លោកបានដឹកនាំគណៈប្រតិភូកម្ពុជាចូលរួមការពិនិត្យរបាយការណ៍ពិនិត្យឡើងវិញជាសកលតាមកាលកំណត់ (Universal Periodic Review – UPR) ជុំទី៤ និងកិច្ចប្រជុំពិនិត្យរបាយការណ៍ជាតិលើកដំបូងរបស់កម្ពុជា ពាក់ព័ន្ធនឹងការអនុវត្តអនុសញ្ញាអន្តរជាតិស្ដីពីការការពារជនគ្រប់រូបពីការបាត់ខ្លួនដោយបង្ខំ នាសម័យប្រជុំលើកទី២៦ របស់គណៈកម្មាធិការទទួលបន្ទុកបាត់ខ្លួនដោយបង្ខំ អង្គការសាហប្រជាជាតិ នៅទីក្រុងហ្សឺណែវ ប្រទេសស្វ៊ីស។
លោក កែវ សុទ្ធិ ក៏ជាមេធាវីនៅព្រះរាជាណាចក្រកម្ពុជា និងរដ្ឋកូឡារ៉ាដូ (Colorado)នៃសហរដ្ឋអាមេរិកផងដែរ។ មុនពេលត្រឡប់មកកម្ពុជាវិញ លោកបានបម្រើការងារជាមេធាវីផ្នែកព្រហ្មទណ្ឌ នៅរដ្ឋកូឡារ៉ាដូ។ លោកក៏ធ្លាប់ធ្វើការជា Legal Officer អស់រយៈពេលបួនឆ្នាំ នៅផ្នែកសហមេធាវីនាំមុខតំណាងដើមបណ្ដឹងរដ្ឋប្បវេណី ដោយតំណាងដើមបណ្ដឹងរដ្ឋប្បវេណី និងជនរងគ្រោះក្នុងដំណើរការចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា ដែលហៅកាត់ថា “តុលាការខ្មែរក្រហម”។ កាលលោកនៅជានិស្សិតច្បាប់ លោកបានដកស្រង់បទពិសោធ និងធ្វើការនៅ តុលាការព្រហ្មទណ្ឌអន្តរជាតិ (International Criminal Court) នៅទីក្រុងឡាអេ នៃប្រទេសហូឡង់ និងក្រុមហ៊ុនមេធាវីចក្រភពអង់គ្លេស Freshfields Bruckhaus Deringer នៅប្រទេសសិង្ហបុរី។
លោកកែវសិទ្ធីនាពេលកន្លងមកលោកទទួលបានបណ្ឌិតផ្នែកច្បាប់ (Juris Doctor) និងអនុបណ្ឌិតច្បាប់សិទ្ធិមនុស្សអន្តរជាតិ (Master of Laws in International Human Rights) ពីសាលាច្បាប់ Northwestern Pritzker School of Law ដែលជាសាលាច្បាប់កំពូលមួយនៅសហរដ្ឋអាមេរិក និងបរិញ្ញាបត្រផ្នែកវិទ្យាសាស្ត្រនយោបាយពីសាកលវិទ្យាល័យ University of Washington៕
