នាយករដ្ឋមន្ត្រី ប្រកាសលុបចោល «មជ្ឈមណ្ឌលសិក្សាទំនើប» បន្ទាប់ពីឲ្យបើកបាន៤ឆ្នាំតែមិនដឹងដាក់កម្មវិធីអីជំនួស
15-March-2026 / សុខភាពនិងកីឡា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានៅរសៀលថ្ងៃទី២៦កុម្ភៈ បានប្រកាសពីការសម្រេចសម្រេចលុបចោល «មជ្ឈមណ្ឌលសិក្សាទំនើប» ដែលរៀបចំក្រោមកិច្ចសហការរវាងរដ្ឋ និងឯកជន ដោយសារតែកម្មវិធីនេះ មិនអាចទៅរួចឡើយ ហើយធ្វើឱ្យរដ្ឋបាត់ភាពម្ចាស់ការក្នុងការគ្រប់គ្រង។
នៅក្នុងឱកាសអញ្ជើញជាអធិបតីបិទសន្និបាតបូកសរុបការងារឆ្នាំសិក្សាចាស់ឆ្នាំ២០២៣-២០២៤ និងលើកទិសដៅការងារឆ្នាំសិក្សាថ្មីឆ្នាំ២០២៤-២០២៥ របស់ក្រសួងអប់រំ យុវជន និងកីឡា នៅវិទ្យាស្ថានបច្ចេកវិទ្យាកម្ពុជាសម្តេចបានបញ្ជាក់ដូច្នេះថា៖ «រឿងមជ្ឈមណ្ឌលសិក្សាទំនើប ថ្ងៃមុនខ្ញុំឱ្យលុបវិញ កិច្ចការងារនេះគឺជាការខិតខំរៀបចំក្នុងភាពជាដៃគូរវាងរដ្ឋ និងឯកជន ដើម្បីដោះស្រាយបញ្ហា ប៉ុន្តែការរៀបចំនេះដំណើរការមិនអាចទៅរួចទេ»។
ការប្រកាសបិទកម្មវិធីសិក្សាទំនើប ដែលមាននៅសាលាបឋមសិក្សាចំនួន១៨ ដោយបិទចំនួន ១២សាលាចោលទាំងស្រុង និង៦ទៀត បន្តដល់ចប់ឆ្នាំសិក្សា។ ការបិទមជ្ឈមណ្ឌលសិក្សាទំនើបនេះ ដោយសារសម្ដេចនាយករដ្ឋមន្ត្រីកម្ពុជា មិនចង់ឃើញសាលារៀនមានស្ដង់ដាពីរ។
សូមបញ្ជាក់ថា មជ្ឈមណ្ឌលសិក្សាទំនើប បានចាប់ផ្ដើមដំណើរការនៅក្នុងឆ្នាំ២០២០ ដែលបច្ចុប្បន្នមានក្នុងសាលាបឋមសិក្សាចំនួន១៨ នៅរាជធានីភ្នំពេញ និងខេត្តមួយចំនួន។ មជ្ឈមណ្ឌលសិក្សាទំនើប ជាកម្មវិធីដែលផ្តល់ការសិក្សាពេញមួយថ្ងៃ ចាប់ពីកម្រិតមត្តេយ្យ។គម្រោងការដែលរដ្ឋមន្ត្រិក្រសួងអប់រុំដាក់ចេញនេះមជ្ឈមណ្ឌលសិក្សាទំនើប កន្លងមកបានទទួលសិទ្ធិក្នុងការសហការជាមួយសាលាសាធារណៈមួយចំនួនពីកម្រិតមត្តេយ្យរហូតដល់មធ្យមសិក្សាទូទាំងប្រទេស ដោយផ្តល់កម្មវិធីសិក្សាពេញមួយថ្ងៃនៅសាលាបឋមសិក្សាសាធារណៈ ដែលជាដៃគូ ពោលគឺកម្មវិធីជាតិមួយវេនមាន៤ម៉ោង និងកម្មវិធីសិក្សាទំនើបមួយវេនមាន ៣ម៉ោង និងសិក្សា៥ថ្ងៃក្នុងមួយសប្តាហ៍ ពីថ្ងៃចន្ទ ដល់ថ្ងៃសុក្រ។កាលមុនមានការវាតម្លៃថា៖មជ្ឈមណ្ឌលសិក្សាទំនើប ជាគ្រឹះស្ថានសិក្សាសំខាន់មួយដែលកំពុងចូលរួមបណ្ដុះឱ្យកុមារកម្ពុជាលើចំណេះដឹងលើមុខវិជ្ជា STEM និងចំណេះដឹងភាសាអន្តរជាតិ រួមមានទាំងភាសាអង់គ្លេស និងភាសាចិន។ មុខវិជ្ជាទាំងនេះត្រូវសិក្សាពេញ១វេន ខណៈការសិស្សត្រូវសិក្សាតាមកម្មវិធីសិក្សាជាតិ១វេនផងដែរ។
ឈានចូលមកដល់ឆ្នាំសិក្សាថ្មី ២០២៣-២០២៤នេះ មជ្ឈមណ្ឌលសិក្សាទំនើប ត្រូវបានក្រសួងអប់រំ យុវជន និងកីឡា អនុញ្ញាតឱ្យបើកដំណើរការចំនួន ៧ទីតាំងរួចមកហើយ។ មជ្ឈមណ្ឌលសិក្សាទំនើបនេះ ស្ថិតក្នុងរាជធានីភ្នំពេញចំនួន ៦ ទីតាំង និងស្ថិតនៅខេត្តកំពង់ឆ្នាំង ១ទីតាំងផងដែរ។លក្ខណៈពិសេសរបស់មជ្ឈមណ្ឌលសិក្សាទំនើបនេះ គឺមានទីតាំងស្ថិតនៅក្នុងបរិវេណជាមួយសាលាបឋមសិក្សា ដោយមានកម្មវិធីសិក្សារយៈពេលពេញមួយថ្ងៃ។ ជាក់ស្ដែងគឺបង្រៀនតាមកម្មវិធីសិក្សារបស់ជាតិមួយពេល និងបង្រៀនតាមកម្មវិធីសិក្សាអន្តរជាតិមួយពេល។
លោក អូន ស៊ីថន ជានាយក មជ្ឈមណ្ឌលសិក្សាទំនើប សាខាបាក់ទូកបានប្រាប់កាសែតថា ការសិក្សាកម្មវិធីសិក្សាអន្តរជាតិ គឺផ្តោតសំខាន់លើវិទ្យាសាស្ត្របច្ចេកវិទ្យា STEM ដោយមានទាំងកម្មវិធី រ៉ូបូស៊ីង រ៉ូបូទិក ជាកម្មវិធីអប់រំបែបស្ទែម កម្រិតពិភពលោក បូករួមទាំងចំណេះដឹងលើភាសាអន្តរជាតិ ទាំងភាសាអង់គ្លេស និងភាសាចិន។
មជ្ឈមណ្ឌលសិក្សាទំនើប ក្នុងពេលបច្ចុប្បន្ននេះ មាន ៦ទីតាំងនៅរាជធានីភ្នំពេញ ក្នុងនោះរួមមាន ទីតាំងបឋមសិក្សាព្រះនរោត្តម ជាទីតាំងគោល បឋមសិក្សាចតុមុខ បឋមសិក្សាកូលាប១ បឋមសិក្សាទួលគោក បឋមសិក្សាបឹងសាឡាង បឋមសិក្សាបាក់ទូក រីឯ ១ទីតាំងផ្សេងទៀតស្ថិតនៅបឋមសិក្សាគំរូក្រុង ខេត្តកំពង់ឆ្នាំង។ ការចុះឈ្មោះសិក្សានៅមជ្ឈមណ្ឌលសិក្សាទំនើប គឺពុំទាមទារឱ្យសិស្សប្រឡងចូលនោះទេ។ សិស្សដែលគ្រប់អាយុចូលរៀន គឺអាចដាក់ពាក្យសិក្សាបានជាធម្មតា។ ចំពោះការសិក្សានៅមជ្ឈមណ្ឌលសិក្សាទំនើប ជាការសិក្សាបង់ថ្លៃ។ សិស្សត្រូវបង់ថ្លៃសិក្សា ប្រមាណជិត ៤០០ដុល្លារក្នុងរយៈពេលមួយឆ្នាំ។
ជាថ្នូរនិងការប្រកាសលុបចោលកម្មវិធីដែលអះអាងថាមិនដំណោះរការនិងការលូកដៃពីវិស័យឯកជនក្នុងពិធីដដែលនេះ សម្តេចនាយករដ្ឋមន្ត្រី បានណែនាំបន្ថែមទៅក្រសួងអប់រំ យុវជន និងកីឡា ដែលដាក់ចេញនូវយន្តការអ្វីក៏ដោយ ត្រូវតែធានាភាពម្ចាស់ការរបស់រដ្ឋក្នុងការគ្រប់គ្រងមូលដ្ឋានរបស់ខ្លួន១០០ភាគរយ ដោយមិនត្រូវឱ្យឯកជនចូលរួមដឹកនាំនោះឡើយ។ ជាមួយគ្នានេះ សម្តេចបានណែនាំ មិនឱ្យមានការបង្កើតប្រព័ន្ធពីរ ក្នុងសាលាតែមួយនោះឡើយ។
សម្តេចបានបញ្ជាក់បន្ថែមថា ភាពជាដៃគូរវាងរដ្ឋ និងឯកជន ក៏មិនអាចយករូបមន្តណា ដែលធ្វើឱ្យបាត់ម្ចាស់ការរបស់រដ្ឋ នៅក្នុងមូលដ្ឋានបានឡើយ។«ធ្វើអ្វីក៏ដោយ កុំឱ្យបាត់ម្ចាស់ការ ធ្វើការជាមួយដៃគូឯកជនណាក៏ដោយមិនអាចឱ្យដៃគូដឹកមុខទេ យើងជាខ្មែរត្រូវម្ចាស់ការគ្រប់គ្រង ទៅលើផែនការគម្រោងរបស់យើង ហើយដៃគូមកជួយយើងតាមផែនការរបស់យើងវិញ»។ នេះបើតាមការបញ្ជាក់បន្ថែមរបស់សម្តេចធិបតី ហ៊ុន ម៉ាណែត៕
