បុរសម្នាក់ច្របាច់ករសង្សារសន្លប់ ស្មានថាស្លាប់ ក៏ធ្វើអត្តឃាតតាម!
11-February-2026 / សន្តិសុខសង្គម
កណ្តាល៖ បុរសម្នាក់បានកុហក់ស្ត្រីជាអតីតសង្សាថា ឱ្យទៅយកគ្រឿងសមុទ្រ តែពេលទៅដល់មុខបន្ទប់ជួលស្ថិតក្នុងភូមិរកាកោង ឃុំរកាកោងទី១ ស្រុកមុខកំពូល ខេត្តកណ្តាលក៏ បែជាយកកាំបិទចុងស្រួចភ្ជង់សំឡុតមិនឲ្យបែកគ្នាតែនាងមិនព្រមក៏ រួចច្របាច់ករនាងរហូតសន្លប់។ ឃើញចឹងបុរសជាអតីតសង្សារស្មានថានាងស្លាប់ ក៏សម្រេចិត្តធ្វើអត្តឃាតខ្លួនឯងតាមក្រោយដោយចងករនៅវេលាម៉ោង ១២:០០នាទីថ្ងៃទី២៤ ខែកុម្ភៈ ឆ្នាំ២០២៥ ។
លោកវរសេនីយ៏ឯក ឯក លន់ អធិការនគរបាលស្រុកមុខកំពូល បានឱ្យដឹងថា បុរសរងគ្រោះមានឈ្មោះ ផៃ យ៉ុន ភេទប្រុស អាយុ២៦ឆ្នាំ ជនជាតិខ្មែរ អ្នកបើករថយន្តដឹកសិស្ស មានទីលំនៅភូមិពាម ឃុំរកាកោងទី១ ស្រុកមមុខកំពូល ខេត្តកណ្តាល។ វត្ថុតាងបន្សល់ទុកនៅកន្លែងកើតហេតុមាន កាំបិតចុងស្រួចដងជ័រចំនួន១, ទូរស័ព្ទ ១គ្រឿង, ស្ពីកឃឺរ័ ១គ្រឿង, កៅអីជ័រពណ៏ក្រហមចំនួន៤ត្រួតលើគ្នា, ខ្សែភ្លើងចំនួន២សរសៃ ពណ៌ខៀវ និងក្រហម ប្រវែង១ម៉ែត។ ចំណែកស្ត្រី ជាអតីតសង្សាមានឈ្មោះ ឃ រ ត ជាអ្នកគ្រូបង្រៀនភាសារអង់គ្លេស។
នារីជនរងគ្រោះ និងឈ្មោះ ហេង វណ្ណៈ ដែលត្រូវជាបងប្អូនជីដូនមួយរបស់សព និងឈ្មោះ ហុង រដ្ឋា ត្រូវជាម្ចាស់បន្ទប់ជួល បានបំភ្លឺដូចគ្នាប្រាប់សមត្ថកិច្ចឲ្យដឹងថាបុស(សព) ធ្លាប់មានប្រពន្ធមានកូន ១នាក់ បានបែកបាក់គ្នា ហើយនៅកំឡុងឆ្នាំ២០២៤ ។បុរសធ្វើអត្តឃាតបានមកជួលបន្ទប់ស្នាក់នៅតែម្នាក់ឯង(កន្លែងកើតហេតុ) ដោយធ្វើការជាអ្នកបើកបររថយន្តដឹកសិស្សសាលាឯកជន ហើយក៏បានស្គាល់អ្នកគ្រូ រួចក៏មានទំនាក់ទំនងស្នេហាជាមួយគ្នា(សង្សារ)។ រហូតមកដល់កំឡុងដើមខែកុម្ភៈ ឆ្នាំ២០២៥ ខាងប្រុសចាប់ផ្តើមកើតចិត្តប្រចណ្ឌ និងតែងតែប្រើពាក្យគំរាមទៅលើសង្សារដោយនិយាយថា (បើខ្លួនមិនបាន អ្នកណាផ្សេងក៏មិនបានដែរ)។ ដោយមិនចូលចិត្តនឹងទង្វើរបស់ជនរងគ្រោះ អ្នកគ្រូ ក៏សុំផ្តាច់ទំនាក់ទំនងគ្នា តែភាគ្គីខាងបុរសមិនព្រម និងតែងតែសុំអង្វរសុំត្រូវគ្នាវិញ។
លុះនៅថ្ងៃទី២៣ ខែកុម្ភៈ ឆ្នាំ២០២៥ ជនរងគ្រោះបានផ្ញើសារតាម facebookទៅអ្នកគ្រូ ដោយកុហក់លើកទី១ ថា ខ្លួនទិញរបស់ផ្ញើរ ដោយឱ្យអ្នកគ្រូទៅយកនៅបន្ទប់ជួលរបស់ខ្លួន តែអ្នកគ្រូមិនបានទៅជួបទេ។ រហូតថ្ងៃទី២៤ ខែកុម្ភៈឆ្នាំ២០២៥ ជនរងគ្រោះក៏បានឆាត ជាលើកទី២ ដោយកុហកថា ខ្លួនបានទិញគ្រឿងសមុទ្រយកមកផ្ញើ ដោយឱ្យអ្នកគ្រូ ទៅយកនៅបន្ទប់ជួលរបស់ខ្លួន។
ក្រោយចេញពីបង្រៀននៅវេលាម៉ោង ១១:១០នាទី អ្នកគ្រូ ក៏បានជិះម៉ូតូជួប ជនរងគ្រោះ និងក៏បានដើរចូលទៅក្នុងបន្ទប់ ជួលភ្លាមនោះបុរសជាជនរងគ្រោះ បានទាញទ្វារបន្ទប់បិត ហើយចាក់គន្លឹះទ្វារជាប់ រួចយកកាំបិតចុងស្រួចភ្ជង់ទៅលើអ្នកគ្រូអតីតសង្សារ ដោយនិយាយថា ជាតិក្រោយចាំពួកយើងជួបគ្នា។ តែដោយអ្នកគ្រូលើកដៃសំពះអង្វរជនរងគ្រោះក៏ដាក់កាំបិតចុះ ហើយច្របាច់ករអ្នកគ្រូ ផ្តួលទៅលើពូក បណ្តាលឲ្យអ្នកគ្រូថប់ដង្ហើមសន្លប់បាត់ស្មារតី។ ឃើញអតីតសង្សារខ្លួនសន្លប់នឹកស្មានថាស្លាប់បាត់បង់ជីវិត ភាគីខាងបុរស ក៏ប្រញាប់ទៅចងករសម្លាប់ខ្លួនឯងដោយប្រើខ្សែរភ្លើងចំនួន២សរសៃ ចងភ្ជាប់ទៅនឹងឥដ្ឋខ្យល់លើបង្អួច។
ចំណែកអ្នកគ្រូ ក្រោយពីរភ្ញាក់ដឹងខ្លួនពីសន្លប់ ក៏ឃើញជនរងគ្រោះចងកស្លាប់ ក៏បានទូរស័ព្ទរាយការណ៍ទៅនាយកសាលារបស់ខ្លួន ហើយក៏មានការភ្ញាក់ផ្អើរដល់ម្ចាស់បន្ទប់ជួល និងដល់សមត្ថកិច្ច។កម្លាំងផ្នែកជំនាញ បានសហការជាមួយកម្លាំងប៉ុស្តិ៍ អជ្ញាធរភូមិ ឃុំ គ្រូពេទ្យបង្អែក ចុះទៅកន្លែងកើតហេតុធ្វើការពិនិត្យសពជនរងគ្រោះតាមបច្ចេកទេសក៏សន្និដ្ឋាន ជនរងគ្រោះស្លាប់ដោយសារធ្វើអត្តឃាតចងករពិតប្រាកដមែន ។
