កសិករនៅឃុំព្រៃរំដេង ស្រុកមេសាង ស្នើសុំដល់ថ្នាក់ដឹកនាំខេត្តព្រៃវែង ពិសេសប្រមុខដឹកនាំប្រទេសកម្ពុជា មេត្តាជួយអន្តរាគមន៍អោយស្រូវប្រាំងមានតម្លៃខ្ពស់ជាង ១០០០រៀល ក្នុង០១ គីឡូក្រាម
06-August-2026 / សេដ្ឋកិច្ច
ខេត្តព្រៃវែង : នៅរសៀលថ្ងៃទី ១៤ ខែ មករា ឆ្នាំ ២០២៥ អ្នកយកព័ត៌មាន របស់អង្គភាពសារព័ត៌មាន គេហទំព័រ មាតុភូមិ www. meatophoum.com បានចុះយកព័ត៌មានដល់មូលដ្ឋានរស់នៅរបស់បងប្អូនប្រជាកសិករនៅក្នុងភូមិព្រៃចេក ឃុំព្រៃរំដេង ស្រុកមេសាង ខេត្តព្រៃវែង ដើម្បីស្វែងយល់ និងសាកសួរពីបញ្ហាជីវភាពរស់នៅប្រចាំថ្ងៃរបស់ពួកគាត់ ។
បងប្អូនប្រជាកសិករជាច្រើនគ្រួសារបាននិយាយរៀបរាប់ស្រដៀងៗគ្នាប្រាប់ថា : ឆ្នាំនេះ ( ឆ្នាំ ២០២៥ ) ពួកគាត់មានក្តីព្រួយបារម្ភខ្លាំងណាស់ ចំពោះតម្លៃស្រូវ ប្រាំង ដែលបាននឹងកំពុងមានការធ្លាក់ចុះថ្លៃយ៉ាងគំហុក ។ បងប្អូនប្រជាកសិករ បានបន្តទៀតថា : ពួកគាត់សូមគោរពស្នើសុំដល់ថ្នាក់ដឹកនាំអាជ្ញាធរដែនដី សមត្ថកិច្ចពាក់ព័ន្ធគ្រប់លំដាប់ថ្នាក់ នៃខេត្តព្រៃវែង ពិសេសប្រមុខរាជរដ្ឋាភិបាលកម្ពុជា គឺសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណា ចក្រកម្ពុជា សូមលោកមេត្តាជួយធ្វើ អន្តរាគមន៍ កុុំអោយឈ្មួញកណ្តាលទម្លាក់តម្លៃទិញស្រូវពីប្រជាកសិករខ្មែរខ្លាំងពេក បើមិនបានតម្លៃខ្ពស់ ក៏សុំត្រឹមតែស្រូវ ០១ គីឡូក្រាម តម្លៃជាង ១០០០ រៀលក៏បានដែរ។ ព្រោះពួកគាត់បានចំណាយដើមទុនធ្វើស្រែប្រាំងអស់ច្រើនខ្លាំងណាស់ ទាំងថ្លៃជី ថ្លៃជួលត្រាក់ទ័រភ្ជួររាស់ដី ថ្លៃជួលម៉ាសុីនច្រូតកាត់ស្រូវ ថ្លៃទិញប្រេងម៉ាសុីនបូមទឹកដាក់ស្រែ និងអ្នកខ្លះទៀត ត្រូវចំណាយលុយអស់រាប់សិបលានរៀល ខួងអណ្តូងទឹកដាក់ម៉ូទ័រ ដើម្បីបូមយកទឹកស្រោច ស្រពស្រែប្រាំង ពីព្រោះនៅតាមបៀរ ឬត្រពាំងទឹកនៅតាមវាលស្រែត្រូវរីងស្ងួត មិនមានទឹកគ្រប់គ្រាន់ សំរាប់ផ្គត់ផ្គង់ធ្វើ ស្រែប្រាំងបានទេ ។
លោក ឌុច ឈាវ មេភូមិព្រៃចេក ឃុំព្រៃរំដេង ស្រុកមេសាង ខេត្តព្រៃវែង បានមានប្រសាសន៍ ប្រាប់អ្នកយកព័ត៌មាន មាតុភូមិ នៅវាល ស្រែទីកន្លែង ដែលលោកនិងប្រជាកសិករកំពុងតែបូមទឹកបញ្ចូលស្រែប្រាំង លោកបញ្ជាក់ថា : ឆ្នាំនេះប្រជាកសិករក្នុងភូមិ ព្រៃចេក ឃុំព្រៃរំដេង ស្រុកមេសាង ខេត្ត ព្រៃវែងបាននាំគ្នាធ្វើស្រែប្រាំង មានចំនួនប្រមាណ៣០ភាគរយ តែបើក្នុងរដូវវស្សាវិញ គឺប្រជាកសិករនាំគ្នាធ្វើស្រែវស្សាមានចំនួន១០០ភាគរយ ។ លោកមេភូមិបានបន្តទៀតថា : បញ្ហាប្រឈមចំពោះមុខសព្វថ្ងៃ គឺកង្វះខាតទឹកបូមបញ្ចូលដាក់ស្រែ ព្រោះក្នុងមូលដ្ឋានរបស់លោកគ្មានប្រព័ន្ធធារាសាស្ត្រទេកន្លងមកលោកបានស្នើសុំតាមរយ:លោក ទុយ ជា មេឃុំ ព្រៃ រំដេងទៅថ្នាក់ដឹកនាំស្រុកមេសាង និងមន្ទីរធនធានទឹក ឧតុនិយម ខេត្តអោយជួយជីកប្រឡាយ១ខ្សែដើម្បីទាញយកទឹកពីទន្លេ មកស្រោចស្រពស្រែ របស់ប្រជា កសិករដែរ តែពុំទាន់ទទួលបានការ ឆ្លើយតបនៅឡើយទេ ។
ប៉ុន្តែទោះជាជួបប្រទះការលំបាកបែបនេះក្តី ក៏ប្រជា ពលរដ្ឋ លោកខ្នះខ្នែងខិតខំរិះរក គ្រប់មធ្យោបាយគ្រប់បែបយ៉ាង ដោយអ្នកខ្លះចំណាយលុយទិញប្រេង ចាក់ម៉ាសុីនបូម ទឹក អ្នកខ្លះចំណាយលុយជួុលគេបុកអណ្តូង ទម្លាក់ម៉ូទ័រចូលក្នុងអណ្តូងដើម្បីបូមទឹកបញ្ចូលស្រែ ព្រោះស្រូវប្រាំងបាននឹងកំពុងចាប់ផ្តើមមូលដើមចេញផ្លែ ជាបណ្តើរៗ សឹងគ្រប់ទីវាលស្រែហើយ ។ ដោយឡែកទាក់ទិន នឹងករណីការធ្វើ បាតុកម្មបិទផ្លួវជាតិលេខ៥ ពីសំណាក់បងប្អូនប្រជាកសិករ នៅឯស្រុកមោង ឬស្សី ខេត្តបាត់ដំបង នាពេលថ្មីៗកន្លងទៅនេះតាមបណ្តាញ facebook ដើម្បីតវ៉ា សុំអោយក្រសួងកសិកម្ម រុក្ខាប្រមាញ់ និងនេសាទ ជួយរកដំណោះស្រាយដើម្បីតម្លើងថ្លៃស្រូវជូនពួកគាត់ ។
លោកមេភូមិព្រៃចេក ឌុច ឈាវ បានបញ្ជាក់ថា : នៅឆ្នាំ២០២៥នេះ រដូវបុណ្យចូលឆ្នាំចិន- វៀតណាម ជិតចូលមកដល់ក្នុងអំឡុងចុងខែ ០១ ឬក្នុងខែ០២ ដូច្នេះថៅកែៗ ទិញស្រូវមកពីវៀតណាម គេប្រហែលជាជាប់រវល់ចូលឆ្នាំប្រពៃណីជាតិ របស់គេ ហើយអ្នកខ្លះនាំគ្នាសំរាកដើរលេងលំហែកាយនៅអឺរ៉ុប ដូច្នេះមិនសូវមានឈ្មួញវៀតណាមសំរុកចុះមកទិញស្រូវប៉ុន្មានទេ ហើយតម្លៃក៏មិនទាន់អាចកំណត់បានដឹងពិតប្រាកដដែរ ។ តែទោះជាតម្លៃស្រូវធ្លាក់ថ្លៃក៏ដោយ លោកយល់ថា : នេះជាតម្លៃទីផ្សារសេរី បើបង ប្អូនប្រជាកសិករយើងពេញចិត្តលក់ស្រូវបានក៏លក់ទៅតាមចិត្តរៀងៗខ្លួន បើលក់មិនបានរក្សាទុកស្រូវក្នុងជង្រុកតាមផ្ទះ តាមគ្រួសារនីមួយៗ រង់ចាំពេលវេលាណា ស្រូវឡើងថ្លៃសឹមលក់ក៏បាន ៕ រាយការណ៍ព័ត៌មានដោយ: លោក ស៊ុន សុផល Tel: 012 953 824 / 088 55 34 100 / 016 953 222
