វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 729 នាក់
ម្សិលមិញ 5168 នាក់
សរុប 16012863 នាក់
មណ្ឌលគិរី៖ បុរសជនជាតិដើមភាគតិចព្នងម្នាក់ត្រូវបានដំរីព្រៃព្រេចបណ្ដាលឲ្យស្លាប់ ខណៈចូលទៅដាក់អន្ទាក់មាន់ព្រៃ នៅថ្ងៃទី១៣ ខែមករា ឆ្នាំ២០២៥ វេលាម៉ោងប្រហែល ៧ និង០០នាទីព្រឹក នៅចំណុចអូរច្រា ស្ថិតនៅភូមិពូចា ឃុំស្រែព្រះ ស្រុកកែវសីមា ខេត្តមណ្ឌលគិរី។ប្រជាពលរដ្ឋដែលស្លាប់ ដោយសារដំរីជាន់ឈ្មោះ ព្លឹង គោញ ភេទប្រុស កើតឆ្នាំ១៩៧៣ មានទីលំនៅភូមិឃុំកើតហេតុខាងលើ។
ប្រភពពីកូនរបស់ជនរងគ្រោះបានឲ្យសមត្តកិច្ចឲ្យដឹងថា ឪពុករបស់ខ្លួន ដែលបានចូលទៅក្នុងព្រៃម្នាក់ឯងដើម្បីទៅដាក់អន្ទាក់មាន់ព្រៃដើម្បីយកមកធ្វើម្ហូប ។ប៉ុន្តែរហូតដល់យប់ក៏មិនឃើញឪពុកខ្លួនត្រឡប់មកផ្ទះវិញសោះ រហូតដល់ព្រឹកថ្ងៃទី១៤ ខែមករា ឆ្នាំ២០២៥ ខ្លួនបានទៅបបួលបងប្អូនដើម្បីទៅតាមរកឪពុករបស់ខ្លួនដែលបានបាត់ ។ពេលដែលខ្លួនកំពុងដើររកដល់ ចំណុចអូរច្រា ស្ថិតនៅភូមិពូចា ឃុំស្រែព្រះ ក៏បានប្រទះឃើញសពរបស់ឪពុក បានដេកស្លាប់នៅលើដី ភ្លាមនោះពូរបស់ខ្លួនឈ្មោះ លើម វន ក៏បានទាក់ទងទៅប្រាប់ប្រជាការពារភូមិពូចាដើម្បីឱ្យរាយការណ៍ទៅសមត្ថកិច្ច។
សមត្ថកិច្ចប៉ុស្តិ៍នគរបាលរដ្ឋបាលស្រែព្រះបន្ទាប់ពី បានទទួលព័ត៌មានពីប្រជាការពារភូមិ នៅវេលាម៉ោង១០ និង២៥នាទី ថា មានករណីមនុស្សស្លាប់នៅចំណុចអូរច្រាកម្លាំងប៉ុស្តិ៍នគរបាលរដ្ឋបាល ក៏បានចុះទៅដល់កន្លែងកើតហេតុ ដើម្បីពិនិត្យសាកសព និងពិនិត្យកន្លែងកើតហេតុ។សមត្ថកិច្ចសន្និដ្ឋានថា ឈ្មោះ ព្លឹង គោញ ពិតជាស្លាប់ដោយសារដំរីជាន់ពិតប្រាកដមែន មិនមែនជាករណីឃាតកម្មទេ ដោយមានស្លាកស្នាមជើងដំរីជាន់នៅចំណុច មុខ ជើង និងពោះ។