ទស្សនកិច្ចលើកនេះសម្តេចតេជោទទួលការគាំទ្រពីចិនបន្ទាប់ពីការអះអាងថាអ្នកបន្តវេនមិនប្តូរជំហរ!?
26-December-2024 / ផ្សេងៗ
ភ្នំពេញ៖ដំណើរទស្សនកិច្ចរយៈពេល៣ថ្ងៃលើកទឹកដីចិន របស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានបិទបញ្ចប់ហើយ ជាមួយការបង្ហាញនូវការប្តេជ្ញាចិត្តដ៏មុតមាំក្នុងការធ្វើឱ្យទំនាក់ទំនង និងកិច្ចសហប្រតិបត្តិការទាំងឡាយរវាងប្រទេសទាំងពីកាន់តែរឹងមាំ។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានដឹកនាំគណៈប្រតិភូត្រឡប់មកដល់ប្រទេសកម្ពុជាំវិញហើយ នៅវេលាម៉ោងប្រមាណ៤៖៣០នាទីរសៀល ថ្ងៃទី០៤ ខែធ្នូ ឆ្នាំ២០២៤នេះ បន្ទាប់ពីទៅបំពេញទស្សននាថ្ងៃទី២ធ្នូ។ក្នុងចំណោមការសន្យាមានការគាំទ្រគម្រោងព្រែកជីកហ្វូណនតេជោត្រូវបានបញ្ជាក់ដោយមេដឹកនាំកំពូលចិន គឺលោកប្រធានធិបតីស៊ី ជីនពីង។តាមរយៈហ្វេសប៊ុកសម្តេចបានថ្លែងអំណរគុណដល់លោកប្រធានាធិបតី ស៊ី ជីនពីង ចំពោះការគាំទ្រគម្រោងព្រែកជីកហ្វូណនតេជោដែលមិនមែនជាគម្រោងថ្មី ព្រោះវាជាគម្រោងដែលមានតាំងពីសម័យព្រះបាទ អង្គឌួង មកម្ល៉េះ។ លោក ហ៊ុន សែន បញ្ជាក់ថា គម្រោងនេះអនុញ្ញាតឲ្យកម្ពុជាមានឯករាជ្យភាពខាងវិស័យដឹកជញ្ជូនផ្លូវទឹក និងផ្តល់ផលប្រយោជន៍សេដ្ឋកិច្ចដ៏ច្រើន។
គម្រោងព្រែកជីកហ្វូណនតេជោនេះត្រូវបានបើកការដ្ឋានយ៉ាងគគ្រឹកគគ្រេងនៅថ្ងៃទី០៥ ខែសីហា ឆ្នាំ២០២៤ ។ គម្រោងនេះមានចម្ងាយ ១៨០គីឡូម៉ែត្រពីទន្លេបាសាក់ទៅកាន់សមុទ្រខេត្តកែបដោយត្រូវចំណាយថវិកាប្រមាណ ១,៧ពាន់លានដុល្លារ។ គម្រោងព្រែកជីកហ្វូណនជាការវិនិយោគរួមគ្នារវាងក្រុមហ៊ុនខ្មែរ និងក្រុមហ៊ុនចិនCRBC ក្នុងរូបភាព BOT ដោយក្នុងនោះ ក្រុមហ៊ុនខ្មែរកាន់កាប់ទុនវិនិយោគ៥១% និងក្រុមហ៊ុនចិនកាន់កាប់ទុនវិនិយោគ៤៩%។ គម្រោងព្រែកជីកហ្វូណននឹងគ្រោងសាងសង់បញ្ចប់នៅក្នុងឆ្នាំ២០២៨ ខាងមុខ។តែបញ្ហាថវិការពីភាគីចិនគឺជាកត្តាចម្បង។
ក្នុងឋានៈជាប្រធានគណបក្សប្រជាជនកម្ពុជា និងជាប្រធានព្រឹទ្ធសភាកម្ពុជា ពេលបំពេញទស្សនកិច្ចជាថ្មីលើទឹកដីមហាមិត្តចាស់ សម្តេចតេជោ ហ៊ុន សែន បានជួយសម្តែងការគួរសម និងពិភាក្សាការងារប្រកបដោយភាពស្និទ្ធស្នាលជាមួយ លោក ស៊ី ជីនពីង ប្រធានាធិបតីចិន, លោក វ៉ាង ហ៊ូនីង (Wang Huning) ប្រធានសភាប្រឹក្សានយោបាយប្រជាជនចិន, លោក ចាវ ឡឺជី (Zhao Leji) ប្រធានសភាតំណាងប្រជាជនចិន។
បន្ថែមពីលើនេះ សម្តេចតេជោ ហ៊ុន សែន ក៏បានអញ្ជើញទសន្សនកិច្ចសាលារដ្ឋបាលជាតិ នៃគណៈកម្មាធិការមជ្ឈឹមបក្សកុម្មុយនីស្តចិន និងទស្សនកិច្ចនៅសាលពិព័រណ៍ប្រវត្តិសាស្ត្រ ១០០ឆ្នាំ នៃគណបក្សកុម្មុយនីស្តចិនផងដែរ។បើតាមស្ថានទូតចិនប្រចាំកម្ពុជាវិញបានគូសបញ្ជាក់លើហ្វេសប៊ុករបស់ខ្លួនដែរថា លោក ស៊ី ជីនពីង អគ្គលេខាធិការគណបក្សកុម្មុយនីស្ដចិន រក្សាទំនាក់ទំនងយ៉ាងជិតស្និទ្ធជាមួយ លោក ហ៊ុន សែន ប្រធានគណបក្សប្រជាជនកម្ពុជា ដោយបានកំណត់កុងសុងស៊ុសសំខាន់ៗដែលពាក់ព័ន្ធ និងជាមូលដ្ឋានគ្រឹះសម្រាប់អភិវឌ្ឍទំនាក់ទំនងទ្វេភាគី។
ព្រិទ្ធសភាកម្ពុជាក៏ឲ្យដឹងថាដំណើរទស្សនកិច្ចថ្មី ក្នុងតួនាទីថ្មីមានរយៈពេលខ្លី តែបានជាចំណែកធំធេងក្នុងការពង្រឹងបន្ថែមនូវស្មារតីជាមិត្តភាពរវាងកម្ពុជា-ចិន ឱ្យរឹងរឹតតែរឹងមាំក្នុងការកសាងគោលបានយោបាយសហគមន៍ជោគវាសនារួមកម្ពុជា-ចិន, កិច្ចសហប្រតិបត្តិការត្បូងពេជ្រជាដើម ក៏ដូចជាកិច្ចអភិវឌ្ឍន៍នៅកម្ពុជា រួមទាំងការកសាងហេដ្ឋារចនាសម្ព័ន្ធនានា ដែលទាមទារការគាំទ្រជាចាំបាច់ពីប្រទេសចិន។
ក្នុងដំណើរទស្សនកិច្ច កម្ពុជា-ចិន បានបង្ហាញការគាំទ្រគ្នាទៅវិញទៅមក និងការពង្រឹងកិច្ចសហប្រតិបត្តិការរវាងប្រទេសទាំងពីរទាំងក្នុងក្របខណ្ឌបក្ស និងក្របខណ្ឌរាជរដ្ឋាភិបាល។ ជាមួយគ្នានេះ លោកបានអះអាងថា ចិននឹងបន្តគាំទ្រកម្ពុជា កសាងសហគមន៍ជោគវាសនារួមចិន-កម្ពុជា ក្នុងយុគសម័យថ្មី ប្រកបដោយគុណភាពខ្ពស់ កម្រិតខ្ពស់ និងស្តង់ដាខ្ពស់ ហើយនឹងបន្តពតដៃជាមួយកម្ពុជា ជាកម្លាំងអភិវឌ្ឍន៍ដែលចូលរួមចំណែកក្នុងការរក្សាសន្តិភាពពិភពលោក។
សម្តេចតេជោ ក៏បានថ្លែងអំណរគុណលោក ស៊ី ជីនពីង យ៉ាងជ្រាលជ្រៅចំពោះការផ្តល់អំណោយពហុកីឡដ្ឋានមរតកតេជោ ជួយឱ្យកម្ពុជា មានលទ្ធភាពធ្វើជាម្ចាស់ផ្ទះរៀបចំកីឡាស៊ីហ្គេម ។ អរគុណរដ្ឋាភិបាល គណបក្សកុម្មុយនីស្តចិន ដែលបានជួយគ្រប់យ៉ាងដល់កម្ពុជា ដូចជាការផ្គត់ផ្គង់វ៉ាក់សាំងអំឡុងពេលនៃជំងឺរាតត្បាតកូវីដ១៩ ដែលបានផ្តល់លទ្ធភាពឱ្យកម្ពុជា អាចគ្រប់គ្រងស្ថានការណ៍ទប់ស្កាត់ជំងឺកូវីដ១៩ បានល្អប្រសើរ ឈានទៅស្តារសេដ្ឋកិច្ច និងបើកប្រទេសឡើងវិញយ៉ាងឆាប់រហ័ស។
យោងតាមការចុះផ្សាយនៅលើទំព័រហ្វេសប៊ុករបស់ប្រធានព្រឹទ្ធសភាកម្ពុជា លោក ហ៊ុន សែន ប្រធានសភាប្រឹក្សានយោបាយប្រជាជនចិន លោក វ៉ាង ហ៊ូនីងបានស្វាគមដំណើរទស្សនកិច្ចរបស់ប្រមុខគណបក្សប្រជាជនកម្ពុជា និងអះអាងថា ចិននៅតែបន្តអនុវត្តកិច្ចព្រមព្រៀងនៃការកសាងសហគមន៍ជោគវាសនារួម ហើយប្រទេសទាំងពីរបានរួមគ្នាជំរុញទំនាក់ទំនងនេះឱ្យឈានទៅមុខជាលំដាប់។
បើតាមប្រមុខគណបក្សប្រជាជនកម្ពុជា នៅក្នុងជំនួបជាមួយ លោក វ៉ាង ហ៊ូនីង ប្រធានសភាប្រឹក្សានយោបាយប្រជាជនចិន នៅរដ្ឋធានីប៉េកាំង នៅរសៀល ថ្ងៃទី២ ខែធ្នូ ឆ្នាំ២០២៤ ចិនបានផ្ដល់ការគាំទ្រ និងជំនួយ មិនត្រឹមតែដល់ការអភិវឌ្ឍសង្គម សេដ្ឋកិច្ចប៉ុណ្ណោះទេ ក៏ប៉ុន្តែ គាំទ្រដល់ឯករាជ្យភាពខាងនយោបាយរបស់កម្ពុជាផងដែរ។ភាគីចិនបានលើកឡើងថា ការបន្តវេននៃថ្នាក់ដឹកនាំជំនាន់ក្រោយរបស់កម្ពុជា បានដើរតាមមាគ៌ារបស់លោក ហ៊ុន សែន។សម្តេចតេជោ លើកឡើងថា សម្តេចពិតជារីករាយដែលបានជួប ឯកឧត្តមXi Jinping និង ឯកឧត្តម Wang Huning ជាថ្មី ដែលជា ជំនួបយុទ្ធសាស្ត្របន្ទាប់ពីសម្តេច បានផ្ទេរអំណាចដឹកនាំទៅអ្នកបន្តវេន។
សម្តេចតេជោ មានមោទនភាព ដែលបានដោះស្រាយ នូវការផ្ទេរអំណាច ដឹកនាំយ៉ាងរលូនទៅអ្នកដឹកនាំជំនាន់ថ្មី ដែលបានធ្វើសកម្មភាពយ៉ាងលឿន។ ការសុខចិត្តផ្ទេរអំណាចរបស់សម្តេចនេះ គឺប្តូរនឹងសន្តិភាពរយៈពេលវែង។ ក្រោមការដឹកនាំរបស់អ្នកដឹកនាំជំនាន់ថ្មីចំណងមិត្តភាពកម្ពុជា-ចិន មិនមានការផ្លាស់ប្តូរទេ ផ្ទុយទៅវិញ ថែមទាំង ពង្រឹងឱ្យកាន់តែរឹងមាំបន្ថែមទៀត ស្របនឹង ការចុះហត្ថលេខាលើសហគមន៍ជោគវាសនារួម និង ការរីកចម្រើនរួមគ្នា។
សម្តេចតេជោ បានជម្រាប ឯកឧត្តម ឯកឧត្តម ZHAO Leji ថា ជាប្រធានព្រឹទ្ធសភា សម្តេចបានកំណត់គោលដៅអាទិភាពពីរ គឺការលើកតម្កើងការទូតសភា តាមរយៈជំនួបរបស់សម្តេចជាមួយនឹងថ្នាក់ដឹកនាំបរទេស និងទស្សនកិច្ចរបស់សម្តេចនៅបរទេស និង ការធ្វើគណនេយ្យភាពចំពោះមុខអង្គបោះឆ្នោត ដោយឱ្យសមាជិកព្រឹទ្ធសភាទាំងអស់ចុះធ្វើការជាមួយនឹងសមាជិក ក្រុមប្រឹក្សាឃុំ-សង្កាត់ទាំងអស់។សូមបញ្ជាក់ថា ដំណើរទស្សនកិច្ចរបស់ លោក ហ៊ុន សែន ទៅចិន បានធ្វើឡើងបន្ទាប់ពីប្រមុខការទូតកម្ពុជា លោក ប្រាក់ សុខុន បានទៅប្រទេសចិន ពីថ្ងៃទី២៨វិច្ឆិកា ដល់ថ្ងៃទី០១ធ្នូ ដើម្បីពង្រឹងមិត្តភាពដែកថែប រវាងកម្ពុជា-ចិន។
គណៈប្រតិភូជាន់ខ្ពស់ ព្រះរាជាណាចក្រកម្ពុជា អញ្ជើញអមដំណើរសម្តេចតេជោ ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានអញ្ជើញទស្សនកិច្ចមិត្តភាពផ្លូវការ នៅសាធារណរដ្ឋប្រជាមានិតចិននៅពេលនេះ រួមមាន៖* សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា* លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ប្រធានគណៈទាក់ទងការបរទេស និងជាសមាជិកគណៈអចិន្រែ្តយ៍ នៃគណបក្ស។លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាសមាជិកគណៈអចិន្រែ្តយ៍ នៃគណបក្ស* លោក ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ និងជាសមាជិកគណៈអចិន្រែ្តយ៍ នៃគណបក្ស* លោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាសមាជិកគណៈអចិន្រែ្តយ៍ នៃគណបក្ស* លោក ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាសមាជិកគណៈអចិន្រែ្តយ៍ នៃគណបក្ស* លោកបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា និងជាសមាជិកគណៈកម្មការកណ្តាលគណក្ស* លោកបណ្ឌិត ចែម វិឌ្យ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃព្រឹទ្ធសភា និងជាអនុប្រធានគណៈទាក់ទងការបរទេសគណបក្ស* លោក ស្រ៊ី ថាមរ៉ុង ទេសរដ្ឋមន្ត្រីទទួលបន្ទុកបេសកកម្មពិសេស និងជាសមាជិកគណៈកម្មាធិការកណ្តាលគណបក្ស* លោក ម៉ម សារិន ប្រធានខុទ្ទកាល័យគណៈកម្មាធិការកណ្តាលគណបក្ស។
លោក ឡាយ សំកុល អគ្គលេខាធិការព្រឹទ្ធសភា និងជាសមាជិកគណៈកម្មាធិការកណ្តាលគណបក្ស* លោកស្រី អ៊ាត សោភា រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ ទីប្រឹក្សាផ្ទាល់សម្តេចមហាបវរធិបតីនាយករដ្ឋមន្ត្រី និងជាអនុប្រធានគណៈទាក់ទងការបរទេស នៃគណបក្ស។* លោកឧត្តមសេនីយ៍ឯក ហ៊ុន ម៉ានិត អគ្គនាយកស្រាវជ្រាវ ចារកម្ម នៃក្រសួងការពារជាតិ មេបញ្ជាការរងកងទ័ពជើងគោក និងជាសមាជិកគណៈកម្មាធិការកណ្តាលគណបក្ស។* លោកស្រី សឿង រដ្ឋចាវី ឯកអគ្គរាជទូតវិសាមញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋប្រជាមានិតចិន។* លោក ឈីវ យីស៊ាង នាយកខុទ្ទកាល័យសម្តេចប្រធានព្រឹទ្ធសភា និងជាសមាជិកគណៈកម្មាធិការកណ្តាលគណបក្ស* រួមទាំងឥស្សរជនជាន់ខ្ពស់អមដំណើរជាច្រើនរូបទៀត។
សូមបញ្ជាក់ថា ព្រះរាជាណាចក្រកម្ពុជា និងសាធារណរដ្ឋប្រជាមានិតចិន ត្រូវបានភ្ជាប់ទំនាក់ទំនងការទូតជាមួយគ្នា នៅថ្ងៃទី១៩ ខែកក្កដា ឆ្នាំ១៩៥៨។ នៅថ្ងៃទី៨ ខែមេសា ឆ្នាំ២០០៦ ប្រទេសទាំងពីរកម្ពុជា ចិន បានតម្លើងទំនាក់ទំនងទ្វេភាគីទៅជាកិច្ចសហប្រតិបត្តិការភាពជាដៃគូគ្រប់ជ្រុងជ្រោយ នៅក្នុងដំណើរបំពេញទស្សនកិច្ចផ្លូវការរបស់ លោក វ៉េន ជាប៉ាវ នាយករដ្ឋមន្ត្រីចិនមកកាន់កម្ពុជា ពីថ្ងៃទី៧ ទី៨ ខែមេសា ឆ្នាំ២០០៦ នៅកម្ពុជា។ ថ្ងៃទី១៣ ខែធ្នូ ឆ្នាំ២០១០ ប្រទេសទាំងពីរ បានតម្លើងទៅជាកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយ នៅក្នុងដំណើរទស្សនកិច្ចផ្លូវការ របស់សម្តេចអគ្គមហាសេនាបតីតេជោ ហ៊ុន សែន ទៅកាន់រដ្ឋធានីប៉េកាំង ប្រទេសចិន ពីថ្ងៃទី១៣ ដល់ថ្ងៃទី១៧ ខែធ្នូ ឆ្នាំ២០១០។
ថ្ងៃទី២៨ ខែមេសា ឆ្នាំ២០១៩ ប្រទេសទាំងពីរកម្ពុជា ចិន បានចុះហត្ថលេខាលើផែនការសកម្មភាពដើម្បីបង្កើតសហគមន៍វាសនារួមកម្ពុជាចិន (2019-2023) ក្នុងឱកាសសម្តេចតេជោនាយករដ្ឋមន្ត្រី អញ្ជើញចូលរួមវេទិកាខ្សែក្រវ៉ាត់ និងផ្លូវ សម្រាប់កិច្ចសហប្រតិបត្តិការអន្តរជាតិលើកទី២ ពីថ្ងៃទី២៥ដល់ថ្ងៃទី២៩ ខែមេសា ឆ្នាំ២០១៩ នៅទីក្រុងប៉េកាំង ប្រទេសចិន។ថ្ងៃទី១០ ខែកុម្ភៈឆ្នាំ២០២៣ ក្នុងឱកាសដំណើរទស្សនកិច្ចផ្លូវការ របស់សម្តេចតេជោនាយករដ្ឋមន្ត្រី នៅប្រទេសចិន ពីថ្ងៃទី៩ ដល់ថ្ងៃទី១១ ខែកុម្ភៈ ឆ្នាំ២០២៣ កម្ពុជានិងចិន បានឯកភាពបង្កើត ក្របខណ្ឌកិច្ចសហប្រតិបត្តិការត្បូងពេជ្រ ដោយមានវិស័យអាទិភាពចំនួន៦ រួមមាន៖ ១. កិច្ចសហប្រតិបត្តិការនយោបាយ ២. គុណភាព និងសមត្ថភាពផលិតកម្ម ៣. កសិកម្ម ៤. ថាមពល ៥. សន្តិសុខ និង៦. ការផ្លាស់ប្តូរ រវាងប្រជាជន និងប្រជាជន និងច្រករបៀងអភិវឌ្ឍន៍ឧស្សាហកម្ម ដើម្បីសម្រេចចក្ខុវិស័យអភិវឌ្ឍន៍ខេត្តព្រះសីហនុ ឲ្យទៅជាតំបន់សេដ្ឋកិច្ចពិសេសពហុបំណង និងច្រករបៀងមច្ឆា និងអង្ករ ដើម្បីឲ្យជាប៉ូលសេដ្ឋកិច្ចទី៤ គ្រប់ដណ្តប់ខេត្តពោធិសាត់ បាត់ដំបង បន្ទាយមានជ័យ និងប៉ៃលិន ដែលសំបូរត្រី ស្រូវ និងទឹក។
ថ្ងៃទី១៥ ខែកញ្ញា ឆ្នាំ២០២៣ កម្ពុជា និងចិន បានចុះហត្ថលេខាលើ ផែនការសកម្មភាព នៃការកសាងសហគមន៍វាសនារួមកម្ពុជា ចិន ក្នុងយុគសម័យថ្មី (2024-2028) ក្នុងឱកាសនៃដំណើរទស្សនកិច្ចជាលើកដំបូងរបស់ សម្តេចមហាបវរធិបតីនាយករដ្ឋមន្ត្រី ទៅកាន់ប្រទេសចិន កាលពីថ្ងៃទី១៤ ដល់ថ្ងៃទី១៦ ខែកញ្ញា ឆ្នាំ២០២៣។ ថ្ងៃទី១៩ ខែតុលា ឆ្នាំ២០២៣ ក្នុងឱកាសនៃការអញ្ជើញចូលរួមវេទិកាខ្សែក្រវាត់ និងផ្លូវលើកទី៣ សម្រាប់កិច្ចសហប្រតិបត្តិការអន្តរជាតិ នៅទីក្រុងប៉េកាំង ប្រទេសចិន ពីថ្ងៃទី១៦ ដល់ថ្ងៃទី១៩ ខែតុលា ឆ្នាំ២០២៣ សម្តេចមហាបវរធិបតីនាយករដ្ឋមន្ត្រី បានជួបពិភាក្សាជាមួយថ្នាក់ដឹកនាំចិន ហើយក្នុងជំនួបជាមួយលោក ស៊ី ជិនពីង ថ្នាក់ដឹកនាំទាំងពីរបានឯកភាពគ្នា កំណត់យកឆ្នាំ២០២៤ ជាឆ្នាំ នៃការផ្លាស់ប្តូរប្រជាជន និងប្រជាជនកម្ពុជា ចិន។
កម្ពុជា និងចិន បានកំណត់យកឆ្នាំ២០២៣ ជាឆ្នាំមិត្តភាពកម្ពុជា ចិន ហើយបានរួមគ្នាប្រារព្វពិធីអនអរសាទរជាច្រើន ដើម្បីបង្កើនការយល់គ្នាទៅវិញទៅមក និងមិត្តភាព រវាងប្រទេសទាំងពីរកម្ពុជា ចិន។ ក្នុងឆ្នាំ២០២៣កន្លងទៅនេះ កម្ពុជា ចិន បានសហការគ្នារៀបចំសកម្មភាពដ៏អធិកអធមជាច្រើន ដើម្បីអបអរសាទរខួបលើកទី៦៥ នៃការបង្កើតទំនាក់ទំនងការទូត រួមទាំងការផ្លាស់ប្តូរលិខិតជូនពររវាងថ្នាក់ដឹកនាំកំពូល និងពិធីជប់លៀងរៀបចំដោយស្ថានទូត នៃប្រទេសទាំងពីររៀងៗខ្លួន៕
