​រឿង​ភាគី​ថៃ​អុកឡុក​និង​ផ្អាក​កម្មវិធី Miss Grand International ២០២៤ ធ្លាយ​ដល់​ក្រសួងទេសចរណ៍​កម្ពុជា​

​ភ្នំពេញ ៖ ក្រសួងទេសចរណ៍​ចេញ​សេចក្តីប្រកាស​បដិសេធ ចំពោះ​ការចុះផ្សាយ​ព័ត៌មាន​មិន​ពិត​របស់​សារព័ត៌មាន The Nation Thailand បាន​ចុះផ្សាយ​ព័ត៌មាន​តាម​បណ្តាញ​សង្គម បាន​លើកឡើងថា មូលហេតុ​មួយ​នៃ​ការលុបចោល​កម្មវិធី Miss Grand International ២០២៤​នៅ​កម្ពុជា​បណ្ដាលមកពី ឯកឧត្ដម​រដ្ឋមន្ត្រីក្រសួង​ទេសចរណ៍ មិនបាន​ចូលរួម​សន្និសីទកាសែត​ក្នុង​កម្មវិធី​នេះ​។​ 

​ក្រសួងទេសចរណ៍ សូម​ជម្រាបជូន​សាធារណ​ជនជាតិ និង​អន្តរជាតិ​ទាំងអស់​ឱ្យបាន​ជ្រាបថា នៅ​ថ្ងៃទី​៧ ខែតុលា ឆ្នាំ​២០២៤ សារព័ត៌មាន The Nation Thailand បាន​ចុះផ្សាយ​ព័ត៌មាន​តាម​បណ្តាញ​សង្គម Facebook ដែលមាន​ខ្លឹមសារ​ដើម​ជា​ភាសា​អង់គ្លេស​ថា “ (…) the reasons for the cancellation were that no officials from the host showed up to welcome the contestants upon arrival, the absence of the minister of tourism at the press conference as promised, (…)” ។ ការចុះផ្សាយ​របស់​សារព័ត៌មាន The Nation Thailand បាន​លើកឡើងថា មូលហេតុ​មួយ​នៃ​ការលុបចោល កម្មវិធី Miss Grand Intemational ២០២៤ នៅ​កម្ពុជា​បណ្តាលមកពី ឯកឧត្តម​រដ្ឋមន្ត្រី ក្រសួងទេសចរណ៍ មិនបាន​ចូលរួម​សន្និសីទកាសែត​ក្នុង​កម្មវិធី​នេះ​តាម​ការសន្យា​។​

​ពាក់ព័ន្ធ​នឹង​ការចោទប្រកាន់​ខាងលើ ក្រសួងទេសចរណ៍ សូម​ធ្វើការ​បញ្ជាក់ជូន​សាធារណ​ជនជាតិ និង អន្តរជាតិ​ទាំងអស់​ជ្រាបថា​៖១. ក្រសួងទេសចរណ៍ សូម​ច្រានចោល និង​បដិសេដ​ចំពោះ​ការចុះផ្សាយ​ព័ត៌មាន​ខាងលើនេះ ដែល​ខុសពី ការពិត​ទាំងស្រុង និង​បានធ្វើឱ្យ​ប៉ះពាល់​យ៉ាងធ្ងន់ធ្ងរ​ដល់​កិត្តិយស​របស់​ក្រសួងទេសចរណ៍​នៃ​ព្រះរាជាណាចក្រ​កម្ពុជា​។​

២. ពាក់ព័ន្ធ​នឹង​កម្មវិធី Miss Grand International ២០២៤ នេះ កាលពី​ព្រឹក​ថ្ងៃអាទិត្យ​ទី​៦ ខែតុលា ឆ្នាំ​២០២៤ ឯកឧត្តម​រដ្ឋមន្ត្រីក្រសួង​ទេសចរណ៍ បានអនុញ្ញាត​ទទួល​ជួប​សំណេះសំណាល​ជាមួយ​ប្រតិភូ​នៃ​កម្មវិធី​រួមមាន តំណាង​ក្រុមហ៊ុន HK7 Co., Ltd (​ក្រុមហ៊ុន​ទទួលបាន​សិទ្ធិផ្តាច់មុខ​ក្នុង​ការរៀបចំ​កម្មវិធី Miss Grand International ២០២៤ នៅ​ប្រទេស​កម្ពុជា​) តំណាង​កម្មវិធី Miss Grand International និង​បេ​ក្ខ​នារី​ដែល​មកពី​បណ្តា​ប្រទេស ទាំង​៧៥​នៃ​កម្មវិធី Miss Grand International ២០២៤ នៅ​ទីស្តីការ​ក្រសួងទេសចរណ៍​។

ក្នុងឱកាស​នោះ ឯកឧត្តម​រដ្ឋមន្ត្រី​បាន​សម្តែង​ការស្វាគមន៍​ប្រតិភូ និង​បេ​ក្ខ​នារី នៃ​កម្មវិធី Miss Grand International ២០២៤ មកកាន់ ព្រះរាជាណាចក្រ​កម្ពុជា និង​បានបង្ហាញ​នូវ​ការរីករាយ​ចំពោះ​កម្មវិធី Miss Grand International ២០២៤ ក្នុងការ ចូលរួម​ផ្សព្វផ្សាយ​អំពី​វប្បធម៌ ទេសចរណ៍​នៅ​កម្ពុជា និង​ការផ្សារភ្ជាប់​ទេសចរណ៍​ជាមួយ​សន្តិភាព​។ ជាមួយគ្នានេះ ក្រសួងទេសចរណ៍ បាន​ជួយ​សម្របសម្រួល និង​ផ្តល់​កិច្ចសហការ​ជាមួយ​បណ្តា​ក្រសួង​-​ស្ថាប័ន​ពាក់ព័ន្ធ​លើ​រូ​បទ ចេញ​-​ចូល​ព្រះរាជាណាចក្រ​កម្ពុជា និង​ការចូល​ទស្សនា​រមណីយ​ដ្ឋា​ន​នានា​។​ឯកឧត្តម​រដ្ឋមន្ត្រីក្រសួង​ទេសចរណ៍ ពុំ​ធ្លាប់បាន​សន្យាថា​នឹងចូលរួម​សន្និសីទកាសែត ឬ​កម្មវិធី​ណាមួយ​ផ្សេងទៀត ក្រៅ​អំពី​ទទួល​ជួប​សំណេះសំណាល ជាមួយ​ប្រតិភូ និង​បេ​ក្ខ​នារី នៃ​កម្មវិធី Miss Grand International ២០២៤ កាលពី​ព្រឹក​ថ្ងៃទី​៦ ខែតុលា ឆ្នាំ​២០២៤ នៅ​ទីស្តីការ​ក្រសួងទេសចរណ៍​នោះទេ ទេសចរណ៍​

៣. ក្រសួងទេសចរណ៍ ស្នើឱ្យ​សារព័ត៌មាន The Nation Thailand កែតម្រូវ និង​បញ្ឈប់​រាល់​ការផ្សាយ ព័ត៌មាន​មិន​ពិត​ខាងលើ និង​ត្រូវគោរព​ក្រមសីលធម៌​វិជ្ជាជីវៈ​សារព័ត៌មាន​ឱ្យបាន​ត្រឹមត្រូវ​។​

​ដោយឡែក​សម្រាប់​អ្នកស្រី​អ៊ឹម សុគន្ធា​ម្ចាស់ Miss Grand Cambodia ដែល​ទិញ​សិទ្ធ​បាន​បានបញ្ជាក់​ច្បាស់ៗ​ក្នុង​ការធ្វើ​សន្និសីទកាសែត​នៅ​ព្រឹក​ថ្ងៃទី​៩​តុលា​ថា ខ្លួន​ចំណាយលុយ​អស់​ជិត ១០​ម៉ឺន​ដុល្លារ​គ្រាន់តែ​ការរៀបចំ​ធ្វើជា​ម្ចាស់ផ្ទះ​ប៉ុន្មាន​ថ្ងៃនេះ តែ​បែរជា​ស្ថាប័ន MGI ណា​វ៉ា​ត់ ដកសិទ្ធិ​ធ្វើជា​ម្ចាស់ផ្ទះ​ភ្លាមៗ​ពី​កម្ពុជា​ក្រោម​ហេតុផល​មិន​សមស្រប ។​អ្នកស្រី​ថា​លោក Nawat បាន​ផ្លាស់ប្តូរ​ម៉ោង​ពេល​កម្មវិធី​ភ្លាមៗ ដោយ​មិនមាន​វត្តមាន​ថ្នាក់​មន្ត្រី​ក្រសួងទេសចរណ៍ និង​ថែមទាំង​ចោទ​អ្នកស្រី​ថា មិន​ផ្តល់​កិត្តិយស​ឱ្យ​លោក​ទៅវិញ​។

​តួយ៉ាង ក្នុង​ដំណើរការ​នៃ​កម្មវិធី គឺ​ត្រូវ​រៀបចំ​ធ្វើ​នូវ​ម៉ោង ៦​ល្ងាច ប៉ុន្តែ​លោក Nawat បែរជា​ចាប់ផ្តើម​កម្មវិធី​មុនពេល នៅ​ម៉ោង ៤​រសៀល ដោយ​មិនមាន​វត្តមាន​ថ្នាក់​មន្ត្រី​ក្រសួងទេសចរណ៍ ជា​ហេតុដែល​អ្នកស្រី អុឹម សុគន្ធា ត្រូវ​បង្ខំចិត្ត​ស្នើរ​សុំ​ទៅកាន់​ថ្នាក់ដឹកនាំ​ក្រសួង​ដើម្បី​លុបចោល​វត្តមាន​ចូលរួម​។​

​ត្រង់ចំណុច​នេះ អ្នកស្រី​បញ្ជា​ក់ដោយ​ហួសចិត្ត​ដែរ​ថា លោក Nawat មិន​ត្រឹមតែ​ផ្លាស់ប្តូរ​កាលវិភាគ​តាមចិត្ត​ឯង​នោះទេ ថែមទាំង​យក​រឿងនេះ មក​ចោទ​អ្នកស្រី​ថា “​មិន​អញ្ជើញ​ថ្នាក់ដឹកនាំ​ក្រសួង​មក មិន​ផ្តល់​កិត្តិយស​ដល់​រូបលោក​” ទាំង​ដែល​លោក​ផ្ទាល់ ជា​អ្នក​ប្រកាសថា លោក​នឹង​ចាប់ផ្តើម Live កម្មវិធី​នៅ​ម៉ោង ៤​រសៀល អ្នកណា​មក​មិនទាន់​គឺ បិទ Hall ។​

​លើសពីនេះ ក្នុងជំនួប​មួយទៀត ដែល​តម្រូវឱ្យ​ក្រុម​បវរកញ្ញា ចូលជួប​សម្តែង​គួរសម​ជាមួយនឹង​រដ្ឋ​មន្ត្រី​ក្រសួងទេសចរណ៍ ក៏​លោក Nawat ទៅ​យឺត​ដែរ​។ ជាក់ស្តែង បើតាម​កាលវិភាគ​ដែល​ព្រមព្រៀងគ្នា​រវាង​អ្នកស្រី អុ​ឹ​ម សុគន្ធា និង​លោក Nawat បញ្ជាក់ថា គឺមាន​ជំនួប​ជាមួយនឹង​រដ្ឋមន្ត្រីក្រសួង​ទេសចរណ៍ នៅ​ម៉ោង ១០​ព្រឹក ថ្ងៃទី​៦ តុលា ប៉ុន្តែ​អ្នកដឹកនាំ​ស្ថាប័ន​រូបនេះ បែរជា​ប្រកាសប្រាប់​ក្រុម​បវរកញ្ញា​ទាំងអស់ ឱ្យ​សម្រាក​ឱ្យ​យូរ ចាំ​ជួបជុំគ្នា​នៅ​ម៉ោង ៩:៣០​នាទី​ទៅវិញ​។​

​ត្រង់ចំណុច​នេះ កញ្ញា ប៊ី សុធា​រីបេក្ឋជនMiss Grand International ២០២៤ អះអាងថា នៅ​យប់​មុនពេល​ជួប​សម្តែង​ការគួរសម​ជាមួយ​រដ្ឋ​មន្ត្រី​ក្រសួងទេសចរណ៍ ក្រុម​បវរកញ្ញា​ទាំងអស់​មិនបាន​ដឹង​ទាក់ទង​នឹង​កាលវិភាគ​ឡើយ គឺ​ធ្វើ​តាមតែ​អ្វីដែល​ក្រុមការងារ​លោក Nawat ទម្លាក់​ក្នុង​គ្រុប​។ ជាក់ស្តែង​នៅពេលនោះ លោក Nawat បញ្ជាក់​នឹង​ក្រុម​បវរកញ្ញា​ថា លោក​អនុញ្ញាតឱ្យ​ក្រុម​បវរកញ្ញា​សម្រាក​ឱ្យ​យូរ​នៅ​ព្រឹកស្អែក ៩:៣០ នាទី សឹម​ចុះមក​ជួបជុំគ្នា​។​

​ជុំវិញ​ការលើកឡើង​នេះ អ្នកស្រី អុឹម សុគន្ធា បាន​ចោទសួរ​ទៅកាន់​អ្នកដឹកនាំ​ស្ថាប័ន MGI វិញ​ថា តើ​អ្នកណា​ជា​អ្នក​ដែល Unprofessional ពិតប្រាកដ ទាំង​ដែល​លោក​តែងតែ​ផ្លាស់ប្តូរ​កាលវិភាគ និង​ការរៀបចំ​តាម​អារម្មណ៍​ខ្លួនឯង​បែបនេះ​។​

​គួរ​បញ្ជាក់ដែរថា ចំពោះ​ដំណើរការ​នៃ​ការរៀបចំ​កម្មវិធី​នេះ អ្នកស្រី អុឹម សុគន្ធា ក្នុងនាម​ជា​ម្ចាស់ផ្ទះ​នៃ​កម្មវិធី គឺ​បាន​សហការ​ជាមួយ​ក្រសួង និង​អាជ្ញាធរ​ពាក់ព័ន្ធ​ស្របតាម​លក្ខខណ្ឌ​ស្តង់ដារ ក៏ដូចជា​ការចង់បាន​របស់លោក Nawat ទាំងអស់ ដែល​មិន​ត្រឹមតែ​ធានា​នូវ​សុខ​សុវត្ថិភាព​ភ្ញៀវ​ប៉ុណ្ណោះ​ទេ គឺ​គិតគូរ​ពីមុខ​មាត់​ប្រទេសជាតិ​ទាំងមូល​។​  
​