បេក្ខជនទាំងអស់បានចូលក្នុងមណ្ឌលប្រឡងនៅគ្រប់រាជធានី ខេត្ត ដោយមានការត្រួតពិនិត្យ និងផ្ទៀងផ្ទាត់យ៉ាងយកចិត្តទពីសំណាក់គណៈមេប្រយោគនិងបុគ្គលិកសុខាភិបាល
11-February-2026 / សុខភាពនិងកីឡា
ភ្នំពេញ ៖ បេក្ខជនប្រឡងបាក់ឌុបទាំងអស់បានចូលក្នុងមណ្ឌលប្រឡងនៅគ្រប់រាជធានី ខេត្ត ដោយមានការត្រួតពិនិត្យ និងផ្ទៀងផ្ទាត់យ៉ាងយកចិត្តទុកដាក់ពីសំណាក់គណៈមេប្រយោគ អាជ្ញាធរមានសមត្ថកិច្ច អង្គភាពប្រឆាំងអំពើពុករលួយ ពិសេសបុគ្គលិគ្គសុខាភិបាលនាព្រឹកថ្ងៃទី១ នៃដំណើរការសំណេរប្រឡងសញ្ញាបត្រមធ្យមសិក្សាទុតិយភូមិសម័យប្រឡង៖ ០៨ តុលា ២០២៤។
ក្រសួងអប់រំបញ្ជាក់ទៀតថា ព័ត៌មានសរុបម៉ោងទី១ បេក្ខជនអវត្តមានសរុប២១២២ នាក់ ស្រី៨១៨នាក់ ត្រូវជា១,៥៥% នៃចំនួនបេក្ខជនសរុប ១៣៧០៤០ នាក់ ក្នុងនោះបេក្ខជនស្វៃរិនអវត្តមាន ១៧១០ នាក់។ បេក្ខជនមានបញ្ហាសុខភាពចំនួន ១៤ នាក់ ក្នុងនោះបេក្ខជន ៤នាក់ ត្រូវបានដាក់ឱ្យប្រឡងនៅបន្ទប់ដាច់ដោយឡែក។ បេក្ខជនរងគ្រោះថ្នាក់ចរាចរណ៍មានចំនួន ៤ នាក់ និងបានទទួលការសម្របសម្រួលពីអាជ្ញាធរ ដើម្បីបានមកចូលប្រឡង។ បេក្ខជនមានជំងឺគ្រុនឈាមចំនួន ២នាក់ និងបានទទួលការយកចិត្តទុកដាក់ពីគ្រូពេទ្យប្រចាំមណ្ឌល។
បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ត្រីក្រសួងអប់រំ យុវជន និងកីឡាពេល អញ្ជើញបើកវិញ្ញាសារប្រឡង នាព្រឹកថ្ងៃទី០៨ ខែតុលា ឆ្នាំ២០២៤នេះ នៅមណ្ឌលប្រឡងក្នុងវិទ្យាល័យព្រះស៊ីសុវត្ថិ ក្នុងរាជធានីភ្នំពេញបានថ្លែងនូវការវាយតម្លៃថា ក្នុងរយៈពេល ១០ឆ្នាំ បើគិតពីឆ្នាំ២០១៤ មកទល់២០២៤នេះ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) បានដំណើរការយ៉ាងរលូនជាងមុន ដោយមានការសហការពីសហភាពសហព័ន្ធយុវជនកម្ពុជា និងអង្គភាពប្រឆាំងអំពើពុករលួយ ព្រមទាំងភាគីដែលពាក់ព័ន្ធទាំងអស់។
ឧបនាយករដ្ឋមន្ដ្រី ហង់ជួន ណារ៉ុន បានថ្លែងយ៉ាងដូច្នេះថា «នៅឆ្នាំដំបូងមានបញ្ហាក្នុងការធ្វើកំណែទម្រង់នៃការប្រឡងនេះ ប៉ុន្តែក្រសួងបានរៀបចំមុនការប្រឡងរយៈពេលកន្លះឆ្នាំ ដោយមានការផ្សព្វផ្សាយ លិខិតបទដ្ឋាន ជាពិសេសមានការសហការជាមួយអង្គភាពប្រឆាំងអំពើពុករលួយ និងសហការជាមួយសហភាពសហព័ន្ធយុវជនកម្ពុជា តាមរយៈអ្នកសង្កេតការស្ម័គ្រចិត្ត និងចុះត្រួតពិនិត្យ»។
បើតាមឧបនាយករដ្ឋមន្ត្រី ហង់ជួន ណារ៉ុន, ក្រសួងបានចាត់តាំងថ្នាក់ដឹកនាំ នៃក្រសួងឲ្យទទួលខុសត្រូវតាមបណ្ដាខេត្តទាំងអស់។ ទាំងគណៈកម្មការអប្បមាទ និងអាជ្ញាធររាជធានី-ខេត្ត ព្រមជាមួយគណៈកម្មាករសន្តិសុខ បានការពារមិនឲ្យមានអ្នកបោះឯកសារចូលក្នុងមណ្ឌលប្រឡងនោះឡើយ។
បណ្ឌិតសភាចារ្យ ហង់ជួន ណារ៉ុន បានថ្លែងអំណរគុណដល់ អង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា ក៏ដូចជាភាគីពាក់ព័ន្ធទាំងអស់ ដែលតែងតែចូលរួមសហការគាំទ្រ ដល់កំណែទម្រង់នៃការប្រឡងបាក់ឌុប រហូតមានការរីកចម្រើនយ៉ាងល្អប្រសើរ ធានាបាននូវប្រសិទ្ធភាព ដើម្បីជោគជ័យនូវការប្រឡងសញ្ញាបត្រមធ្យមសិក្សាទុតិយភូមិ និងដើម្បីអនាគតយុវជនជំនាន់ក្រោយរបស់យើង។
សម្រាប់ការប្រឡងសញ្ញាបត្រ មធ្យមសិក្សាទុតិយភូមិ សម័យប្រឡង៖ ០៨ តុលា ២០២៤ក៏មានបេក្ខជនមានជម្ងឺនិងគ្រោះថ្នាក់ចរាចរចូលរួមដែលដោយមានការថែទាំពីគ្រូពេទ្យ។ ក្រសួងអប់រំ យុវជន និងកីឡាសូមអំពាវនាវដល់បេក្ខជនទាំងអស់ត្រូវគោរពបទប្បញ្ញត្តិនៃការប្រឡងឱ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវ សំណៅឯកសារនានា ឧបករណ៍អេឡិចត្រូនិកគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡងជាដាច់ខាត។ ក្នុងករណីរកឃើញថាបានប្រព្រឹត្តសកម្មភាពផ្ទុយនឹងបទប្បញ្ញត្តិ និងកម្រិតវិន័យ បេក្ខជននឹងត្រូវបានកំណត់ឱ្យធ្លាក់ជាស្វ័យប្រវត្តិ។ជាក់ស្តែងអនុរក្ស័ម្នាក់ដែលលួចចូលបន្ទប់ទឹកទូរសព្ទ័ទាក់ទងជាមួយកូនត្រូវបានផ្អាក់ពីការងារ។យោងតាមទំព័រហ្វេសប៊ុករបស់អង្គភាពប្រឆាំងអំពើពុករលួយ បានឱ្យដឹងថា មានមន្ត្រីអនុរក្សម្នាក់ ត្រូវបានផ្អាកពីតួនាទី ព្រោះប្រព្រឹត្តខុសនឹងវិន័យ។
ប្រភពព័ត៌មានបានឱ្យដឹងថា នៅវេលាម៉ោងប្រមាណ ៨៖១០នាទីព្រឹកថ្ងៃទី៨ ខែតុលា ឆ្នាំ២០២៤នេះ មន្ត្រីអនុរក្សដែលមានវ័យ៥២ឆ្នាំរូបនេះ បានយកទូរស័ព្ទជាប់ខ្លួនចូលបន្ទប់ប្រឡង និងបានចេញទៅនិយាយទូរស័ព្ទនៅបន្ទប់ទឹក ពេលកូនទូរស័ព្ទមក។ មន្ត្រីអនុរក្សរូបនេះ បម្រើការនៅមណ្ឌលប្រឡងវិទ្យាល័យហ៊ុនសែនរ៉ូតា ស្ថិតក្នុងស្រុកខ្សាច់កណ្តាល ខេត្តកណ្តាល។ចំណាត់ការចំពោះការប្រព្រឹត្តខុសវិន័យនេះ ប្រធានមណ្ឌលបានសម្រេចផ្អាកតួនាទីពីអនុរក្ស មកនៅគណៈកម្មការកណ្តាលវិន័យ។នៅព្រឹកថ្ងៃទី៨ ខែតុលា ឆ្នាំ២០២៤នេះ លោកកិត្តិនិតិបណ្ឌិត ឱម យិនទៀង ទេសរដ្ឋមន្ត្រីទទួលបន្ទុលបេសសកម្មពិសេស និងជាប្រធានអង្គភាពប្រឆាំងអំពើពុករលួយ រួមបានអញ្ជើញបើកវិញ្ញាសាប្រឡង នៅមណ្ឌល ប្រឡងសាលាបឋមសិក្សាគំរូក្រុង ស្ថិតក្នុងក្រុងកំពង់ឆ្នាំង ខេត្តកំពង់ឆ្នាំង។ចំពោះដំណើរការសំណេរនាព្រឹកនេះ មាន២មុខវិជ្ជា គឺប្រវត្តិវិទ្យា និងជីវវិទ្យាសម្រាប់ថ្នាក់វិទ្យាសាស្ត្រ និង ផែនដី និងបរិស្ថានវិទ្យា ប្រវត្តិវិទ្យាសម្រាប់ថ្នាក់វិទ្យាសាស្ត្រសង្គម៕
