ឥណ្ឌូណេស៊ី ផ្ដល់ជំនួយផ្នែកយោធាដល់កម្ពុជា មានតម្លៃ៥០ម៉ឺនដុល្លារ បន្ទាប់ពីមានពត៍មានថាទិញអាវុធ
16-September-2024 / សន្តិសុខសង្គម
ភ្នំពេញ៖ ស្ថានទូតឥណ្ឌូណេស៊ី បានផ្ដល់ជំនួយផ្នែកយោធាដល់កម្ពុជា ដែលមានតម្លៃ ៥០ម៉ឺនដុល្លារ ដើម្បីពង្រឹងសន្ដិសុខ និងទំនាក់ទំនងរវាងប្រទេសទាំងពីរ។ពិធីប្រគល់-ទទួល នេះត្រូវបានធ្វើឡើង នាល្ងាចថ្ងៃទី២៩ ខែសីហា ឆ្នាំ២០២៤ ដោយមានការអញ្ជើញចូលរួមពីលោកបណ្ឌិត Santo Darmosumarto ឯកអគ្គរដ្ឋទូតឥណ្ឌូណេស៊ីប្រចាំនៅកម្ពុជានិងលោកនាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក នៅក្នុងបរិវេណបញ្ជាការដ្ឋានកងទ័ពជើងអាកាស។
លោកឯកអគ្គរដ្ឋទូត Santo បានចាត់ទុកពិធីប្រគល់-ទទួលជំនួយនៅពេលនេះដើម្បីពង្រឹងពង្រីកពូនជ្រំទំនាក់ទំនងយូរអង្វែងរវាងយោធានៃប្រទេសឥណ្ឌូណេស៊ី និងកម្ពុជា។ «ខ្ញុំមានសេចក្តីសោមនស្សរីករាយដែលឃើញទំនាក់ទំនងដ៏រឹងមាំបែបនេះបានផ្តល់នូវមូលដ្ឋានគ្រឹះសម្រាប់ការកើនឡើងយ៉ាងសំខាន់នៃកិច្ចសហប្រតិបត្តិការទ្វេភាគីរបស់យើងក្នុងវិស័យផ្សេងៗក្នុងរយៈពេលប៉ុន្មានឆ្នាំចុងក្រោយនេះ។ យើងមានកិត្តិយសដែលបានធ្វើបែបនេះនៅពេលដែលយើងកំពុងប្រារព្ធខួប ៦៥ឆ្នាំ នៃទំនាក់ទំនងការទូតរបស់យើង»។ លោកឯកអគ្គរដ្ឋទូតឥណ្ឌូណេស៊ី Santo ក៏បានសម្តែងក្តីសង្ឃឹមថា ការបន្តពង្រឹងកិច្ចសហប្រតិបត្តិការការពារជាតិ និងសន្តិសុខទ្វេភាគីនឹងរួមចំណែកជាវិជ្ជមានមិនត្រឹមតែឆ្ពោះទៅរកសន្តិភាព និងស្ថិរភាពនៅក្នុងប្រទេសទាំងពីរប៉ុណ្ណោះទេ ប៉ុន្តែថែមទាំងក្នុងតំបន់ទាំងមូលផងដែរ។
លោកនាយឧត្តមសេនីយ៍ ម៉ៅ សុផាន់ ក៏បានថ្លែងអំណរគុណចំពោះរដ្ឋាភិបាលឥណ្ឌូណេស៊ីដែលបានផ្ដល់ជំនួយផ្នែកយោធានៅពេលនេះ នឹងធ្វើឲ្យវិស័យយោធាកម្ពុជាកាន់តែរឹងមាំ និងរីកចម្រើន ហើយនឹងរួមចំណែកធ្វើឲ្យទំនាក់ទំនាក់ទ្វេភាគីកម្ពុជា-ឥណ្ឌូណេស៊ី កាន់តែប្រសើរឡើងថែមទៀត។ លោកនាយឧត្តមសេនីយ៍ ម៉ៅ សុផាន់បានឲ្យដឹងថា ជំនួយផ្នែកយោធាដែលឥណ្ឌូណេស៊ីផ្ដល់ជូនកម្ពុជា រួមមាន អាវុធវែងទំនើប ១៥០ដើម, អាវុធខ្លីចំនួន២០ដើម និង គ្រាប់តូចធំចំនួន១០ម៉ឺនគ្រាប់។
សូមជម្រាបថា កិច្ចសហប្រតិបត្តិការលើវិស័យការពារជាតិ និងសន្តិសុខរវាងប្រទេសឥណ្ឌូណេស៊ី និងកម្ពុជា ត្រូវបានផ្តួចផ្តើមឡើងក្នុងទសវត្សរ៍ឆ្នាំ១៩៧០ ប៉ុន្តែត្រូវបានពង្រឹងនៅក្នុងទសវត្សរ៍ឆ្នាំ១៩៩០។ បន្ទាប់ពីកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ប្រទេសឥណ្ឌូណេស៊ីបានបញ្ជូនកងរក្សាសន្តិភាពជាង ៣.៩០០ នាក់ទៅចូលរួមក្នុងបេសកកម្មអ៊ុនតាក់ក្នុងឆ្នាំ១៩៩២-១៩៩៣។
នៅក្នុងកិច្ចសហប្រតិបត្តិការលើវិស័យការពារជាតិ និងសន្តិសុខ កម្ពុជាបានបង្ហាញចំណាប់អារម្មណ៍ចង់ទិញសម្ភារៈយោធាមួយចំនួនដូចជាឧទ្ធម្ភាគចក្រ និងអាវុធធុនស្រាលដែលផលិតដោយឥណ្ឌូណេស៊ី។ នេះបើតាមការអះអាងរបស់ប្រមុខការទូតឥណ្ឌូណេស៊ីលោកស្រី Retno Marsudi នៅក្នុងសេចក្តីថ្លែងការណ៍ព័ត៌មានក្រោយកិច្ចប្រជុំលើកទី៥ នៃគណៈកម្មាធិការចម្រុះសម្រាប់កិច្ចសហប្រតិបត្តិការទ្វេភាគី (JCBC) កម្ពុជា-ឥណ្ឌូណេស៊ីនៅក្នុងប្រទេសកម្ពុជាកាលពីថ្ងៃទី២១ សីហាកន្លងទៅ។ ការលើកឡើងយ៉ាងដូច្នេះរបស់លោកស្រី Retno Marsudi ត្រូវបានប្រព័ន្ធសារព័ត៌មានស៊ើបអង្កេតឥណ្ឌូណេស៊ី «Tempo» យកមកចុះផ្សាយនៅថ្ងៃទី២២ សីហា។
បើតាម Tempo ដោយសារតែកម្ពុជាចាប់អារម្មណ៍ចង់ទិញសម្ភារៈយោធាឥណ្ឌូណេស៊ី ប្រមុខការទូតឥណ្ឌូណេស៊ីបានអញ្ជើញតំណាងកម្ពុជាទៅទស្សនាឧស្សាហកម្មផលិតអាវុធឥណ្ឌូណេស៊ីនៅក្រុមហ៊ុនឥណ្ឌូណេស៊ី PT PINDAD និង PT Dirgantara ព្រមទាំងអញ្ជើញតំណាងកម្ពុជាឲ្យទៅចូលរួមក្នុងពិព័រណ៍ និងវេទិកាការពារជាតិឥណ្ឌូណេស៊ីពីថ្ងៃទី៦ ដល់ថ្ងៃទី៩ វិច្ឆិកា ឆ្នាំ២០២៤ខាងមុខ។ តែករណីយ៍នេះ តាមរយៈអ្នកនាំពាក្យក្រសួងការពារជាតិកម្ពុជា លោកឈុំ សុជាតិបានច្រានចោលលើព័ត៌មាននេះដោយបានបញ្ជាក់យ៉ាងខ្លីប្រាប់វិទ្យុបារាំងអន្តរជាតិនៅថ្ងៃទី២៦ សីហានេះថា កម្ពុជាគ្មានបានបញ្ជាទិញ ហើយក៏គ្មានគម្រោងទិញសព្វាវុធណាមួយពីប្រទេសឥណ្ឌូណេស៊ីដែរ។
គួរបញ្ជាក់ថា នៅក្នុងសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំលើកទី៥ របស់គណៈកម្មាធិការចម្រុះសម្រាប់កិច្ចសហប្រតិបត្តិការទ្វេភាគី (JCBC) កម្ពុជា-ឥណ្ឌូណេស៊ីនៅទីក្រុងភ្នំពេញ ក្រសួងការបរទេសកម្ពុជាមិនបានលើកឡើងអំពីចំណាប់អារម្មណ៍ចង់ទិញសម្ភារៈយោធាពីឥណ្ឌូណេស៊ីឡើយ។ ដោយឡែក ពាក់ព័ន្ធនឹងកិច្ចសហប្រតិបត្តិការសន្តិសុខ និងការពារជាតិត្រូវបានក្រសួងការបរទេសកម្ពុជាបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា ប្រមុខការទូតកម្ពុជា-ឥណ្ឌូណេស៊ីបានវាយតម្លៃខ្ពស់ និងបានអះអាងពីការបន្តប្រាស្រ័យទាក់ទងគ្នារួមមានកិច្ចពិភាក្សារវាងកងទ័ពជើងគោក ការធ្វើសមយុទ្ធរួមគ្នា និងការបណ្តុះបណ្តាលជំនាញផ្នែកបច្ចេកទេសនានា។
សម្រាប់យោធាឥណ្ឌូណេស៊ីតែងតែផ្តល់ការហ្វឹកហ្វឺនដល់អង្គភាពផ្សេងៗនៃកងយោធពលខេមរភូមិន្ទ រួមទាំងកងបញ្ជាការពិសេស (កងពលតូចលេខ៩១១) និងទីបញ្ជាការកងអង្គរក្ស (BHQ)។ កិច្ចសហប្រតិបត្តិការទាំងនេះក៏បានគូសបញ្ជាក់ផងដែរដោយការផ្លាស់ប្តូរទស្សនកិច្ចជាញឹកញាប់ក្នុងចំណោមមន្ត្រីជាន់ខ្ពស់យោធានៃប្រទេសទាំងពីរកម្ពុជា-ឥណ្ឌូណេស៊ី៕
