រឿងក្តីកេរ្តិ៍មរតករវាង អតីតតារាកំប្លែង ជុំ រស្មី ហៅស្រីទូច និងឪពុកចុងរបស់ខ្លួន ឈានដល់កិច្ចព្រមព្រៀមសម្របសម្រួលគ្នា ត្រឹមសាលាឧទ្ធរណ៍
06-June-2026 / សិល្បះនិងប្លែកៗ
ភ្នំពេញ៖ សំណុំរឿងបណ្ដាំមរកតរបស់ក្រុមគ្រួសារ(អ្នកស្រីកែវមន្ថាជាម្តាយ) តារាកំប្លែងជើងចាស់អ្នកស្រី ជុំ រស្មី ហៅស្រីទូច និងឪពុកចុងរបស់ខ្លួន ដែលបានអូសបន្លាយជាង២ឆ្នាំហើយមកហើយតាំងពីសាលាដំបូងរាជធានីភ្នំពេញ ដល់សាលាឧទ្ធរណ៍ បាននូវពន្លឺយុត្តិធម៌ហើយ បន្ទាប់ពីភាគីទាំងពីរបានឈានដល់កិច្ចព្រមព្រៀងគ្នា សម្របសម្រួលដកពាក្យបណ្ដឹង និងព្រមទទួលយកចំណែកដែលបានបែងចែករួចរាល់ និងស្រុះស្រួលទាំងអស់គ្នា។ ការឈានដល់ដំណាក់កាលព្រមព្រៀង ទទួលយកពីសំណាក់តារាកំប្លែងជើងចាស់អ្នកស្រី ជុំ រស្មី ហៅស្រីទូច និងក្មួយស្រីតារាចម្រៀងល្បីឈ្មោះ ស៊ូ ស៊ីរីកា គឺក្រោមការសម្របសម្រួលពីសំណាក់លោក សេង ស៊ីវុត្ថា ប្រធានសាលាឧទ្ធរណ៍។
ក្រុមគ្រួសារអតីតតារាកំប្លែងជើងចាស់ ជុំ រស្មី ហៅស្រីទូច ដែលមានតារាចម្រៀង ស៊ូ ស៊ីរីកា ជាក្មួយម្នាក់ផងនោះ បានចេញមុខប្រកាសនៅចំពោះមុខអ្នកសារព័ត៌មានជាច្រើន កាលពីល្ងាចថ្ងៃទី១៣ ខែសីហា ឆ្នាំ២០២៤ ថា ពេលនេះក្រុមគ្រួសាររបស់អ្នកស្រី ទទួលបានយុត្តិធម៌ និងព្រមបញ្ចប់រឿងក្ដីដណ្ដើមមរតកជាមួយឪពុកចុង ដោយមានជួយជ្រោមជ្រែងយ៉ាងមុតមាំពីតុលាការសាលាឧទ្ធរណ៍។ រឿងក្ដីរបស់តារាសម្តែងជើងចាស់អ្នកស្រី ជុំ រស្មី ហៅស្រីទូច ជាមួយនឹងឪពុកចុងរបស់ខ្លួន បានអូសបន្លាយពេលវេលាយ៉ាងរ៉ាំរ៉ៃមកជាង ២ឆ្នាំហើយ រហូតដល់លើក ។
យ៉ាងណាមិញ សេចក្ដីសម្រេចក៏មានការព្រមព្រៀងចរចាសម្របសម្រួលគ្នា ដែលទីបំផុតលោកស្រី ជុំ រស្មី ឬតារាកំប្លែងស្រីទូច បានប្រកាសថា ក្រុមគ្រួសាររបស់ខ្លួនទទួលបានពន្លឺយុត្តិធម៌ តែក៏មានការស្នើសុំទៅកាន់ភាគីខាងឪពុកចុងមួយចំនួនវិញដែរ។ ការស្មើសុំនោះ គឺតារាចម្រៀង ស៊ូ ស៊ីរីកា ត្រូវជាក្មួយស្រីលោកស្រី ជុំ រស្មី និងត្រូវជាចៅស្រីលោកយាយ កែវ មុន្ថា ប្រកាសចង់ចូលផ្ទះដែលជាកេរមរតករបស់លោកយាយ ដើម្បីទាមទារយករបស់មានតម្លៃ និងសម្លៀកបំពាក់របស់ខ្លួនមកវិញ ព្រោះបានជាប់នៅក្នុងផ្ទះដែលមានទំនាស់នោះ អស់រយៈពេលជាច្រើនខែមកហើយ។
ម្យ៉ាងវិញទៀត ដីមួយកន្លែងដែលស្ថិតនៅក្នុងស្រុកវាលវែង ខេត្តពោធិ៍សាត់ មានទំហំ ១០០ម៉ែត្រ គុណនឹង៥០០ម៉ែត្រ ដែលភាគីខាងឪពុកចុងរបស់អ្នកស្រី ជុំ រស្មី បានព្រៀមព្រៀងដោះដូរគ្នាប្រគល់ឲ្យមកភាគីខាងអ្នកស្រីនោះ គឺសុំឲ្យពន្លឿននិតិវិធីឲ្យបានឆាប់រហ័ស ព្រោះទីតាំងដីនោះ មានប្លង់ហើយស្រាប់ និងមិនបានដាក់បញ្ចាំក្នុងធនាគារឡើយ ដើម្បីបានចាត់ចែងសម្រួលដល់ជីវភាព ដែលគ្រួសារអ្នកស្រីកំពុងជួបនូវការលំបាក។
អតីតតារាកំប្លែងជើងចាស់ ជុំ រស្មី ហៅស្រីទូច បានកាសែត ថា រហូតមកដល់ពេលនេះ សំណុំរឿងដណ្ដើមកេរមរតកបានឈានដល់កិច្ចព្រមព្រៀងគ្នា បញ្ចប់រឿងត្រឹមសាលាឧទ្ធរណ៍ហើយ ដោយមានការសម្របសម្រួលពីសំណាក់លោកប្រធានសាលាឧទ្ធរណ៍ និងមេធាវីតំណាងរបស់ខ្លួន។ អ្វីដែលក្រុមគ្រួសាររបស់លោកស្រីទាមទារ ក៏ទទួលបាននូវកេរមរតកខ្លះៗ មានទាំងផ្ទះនៅក្នុងខណ្ឌដូនពេញ រាជធានីភ្នំពេញ និងដីដែលមានទីតាំងនៅក្នុងស្រុកវាលវែង ខេត្តពោធិ៍សាត់។ អ្វីដែលជាបញ្ហាមិនទាន់ដោះស្រាយចប់នោះ គឺភាគីឪពុកចុងរបស់អ្នកស្រី បានសុំពន្យាពេលរហូតដល់ទៅ ៤ខែ ដើម្បីខ្លួនមានលទ្ធភាពប្រគល់នូវទ្រព្យទាំងនោះជូន។
អតីតតារាកំប្លែងជើងចាស់ ជុំ រស្មី បានបន្ថែមទៀតថា ម្យ៉ាងទៀតការព្រមព្រៀងគ្នានេះ គឺមានតែនៅលើក្រដាសប៉ុណ្ណោះ ដោយអ្វីៗគឺស្ថិតនៅក្នុងស្ថានភាពរង់ចាំរហូតដល់ទៅ ៤ខែបន្ថែមទៀត ដែលធ្វើឲ្យក្រុមគ្រួសាររបស់លោកស្រី ជួបនូវបញ្ហាលំបាកខាងផ្នែកជីវភាព និងស្នើដល់ភាគីឪពុកចុងជួយដោះស្រាយឲ្យបានឆាប់រហ័ស ចំពោះកេរមរតកណាដែលមិនមានបញ្ហា ឬមិនដាក់ប្លង់នៅធនាគារ។
ក្រុមគ្រួសារអតីតតារាកំប្លែងជើងចាស់ ជុំ រស្មី ហៅ ស្រីទូច និងក្រុមគ្រួសារតារាចម្រៀង ស៊ូ ស៊ីរីកា ដែលជាអ្នកស្នងមរតករបស់លោកយាយ កែវ មុន្ថា ក៏បានថ្លែងអំណរគុណយ៉ាងអស់ពីទំហំចិត្តចំពោះ លោក សេង ស៊ីវុត្ថា ប្រធានសាលាឧទ្ធរណ៍ ដែលខ្នះខ្នែងស្វែងរកពន្លឺយុត្តិធម៌ជូនក្រុមគ្រួសាររបស់លោកស្រី និងបានបញ្ចប់បញ្ហាទំនាស់ខាងលើនេះប្រកបដោយសន្តិវិធី និងប្រសិទ្ធភាព៕
