កម្លាំងអាវុធហត្ថ៣០០នាក់ បើកយុទ្ធនាការបង្ក្រាបបទល្មើសកាប់ព្រៃទន្ទ្រានយកដីរដ្ឋ ក្នុងភូមិសាស្ត្រខេត្តពោធិ៍សាត់១ខែតែមិនសង្ឃឹមថាបានផលល្អ!
03-April-2024 / សន្តិសុខសង្គម
ពោធិ៍សាត់៖វាជារឿងភ្ញាក់ផ្អើលដែល នាយឧត្តមសេនីយ៍ សៅ សុខា អគ្គមេបញ្ជាការរងនៃយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ នៅថ្ងៃទី១២ ខែមីនា ឆ្នាំ២០២៤បញ្ចេញកម្លាំងអាវុធហត្ថប្រមាណ៣០០នាក់បំពាក់មធ្យោបាយគ្រប់គ្រាន់ឲ្យ ចុះជួយគាំទ្រដល់កម្លាំងគណៈបញ្ជាការឯកភាពខេត្តពោធិ៍សាត់ ដើម្បីបើកយុទ្ធនាការទប់ស្កាត់ និងបង្ក្រាបបទល្មើសកាប់ព្រៃទន្ទ្រានយកដីរដ្ឋ ក្នុងភូមិសាស្ត្រស្រុកវាលវែង ខេត្តពោធិ៍សាត់។
លោកឧត្តមសេនីយ៍ទោ ស សំបូរធន នាយសេនាធិការកងរាជអាវុធហត្ថលើផ្ទៃប្រទេស ជាអ្នកដឹកនាំកម្លាំងខាងលើចុះតាម គោលដៅទីតាំងភូមិសាស្ត្រ អាទិភាពមាន ០៤ឃុំ និង ១៤ចំណុចធំៗ ក្នុងនោះរួម ទី១.នៅឃុំថ្មដា (ចំណុចខ្នង ១៦ ភូមិអូរសួស្តី ឃុំថ្មដា ស្រុកវាលវែង)។ ទី២.នៅឃុំអន្លង់រាប(ចំណុចជើងភ្នំ១៥០០ និងចំណុច៨០ ភូមិដីក្រហម ឃុំអន្លង់រាប ស្រុកវាលវែង (ចំណុចជើងភ្នំក្រឡឹង និងជួរភ្នំ) ភូមិដីក្រហម ឃុំអន្លង់រាប ស្រុកវាលវែង (ចំណុចជើងភ្នំខ្មោច) ភូមិអូរ១៧ ឃុំអន្លង់រាប ស្រុកវាលវែង (ចំណុចដីសហគមន៍ក្រាំងរងៀង) ឃុំអន្លង់រាប (ចំណុចអូរ១ អូរ២ ចំណុចក្បាលស្ទឹងទួលល្ងៀង ភូមិអូរដីខ្មៅ ឃុំអន្លង់រាប។
ទី៣.នៅឃុំក្រពើពីរ (ចំណុចច្រកចង្អៀត ភូមិក្រពើពីរលើ) ឃុំក្រពើពីរ ព្រំប្រទល់ស្រុកវាលវែង និងស្រុកសំឡូត ខេត្តបាត់ដំបង (ចំណុចជើងភ្នំប្រើសដល់ទឹកធ្លាក់ថ្មចាំង) ភូមិក្រពើពីរលើ ឃុំក្រពើពីរ (ចំណុចភ្នំតាងិល នៅចំណុចប្រសព្វរវាងភូមិអូរតាទិន) ភូមិសំឡាញ និងភូមិកុំប៉ង ឃុំក្រពើពីរ/ចំណុចស្រែយក្ស ភូមិកុំប៉ង ឃុំក្រពើពីរ (ចំណុចខ្នងភ្នំព្រះអាទិត្យ) ភូមិបឹងរំលេច ឃុំក្រពើពីរ ព្រំប្រទល់ស្រុករុក្ខគិរី ខេត្តបាត់ដំបង។ និងទី៤.នៅឃុំប្រម៉ោយ (ចំណុចអូរទី២ ចំណុចជើងភ្នំសុគន្ធ ចំណុចអូរតាសូ ចំណុចអូរក្បាលខ្ទីង និងចំណុចអូរបេង ឃុំប្រម៉ោយ (ជាចំណុចប្រសព្វ៤ភូមិ : ភូមិស្ទឹងថ្មី ភូមិមន្ទីរពេទ្យចាស់ ភូមិផ្ចឹកជ្រុំ និងភូមិឈើទាលជ្រុំ ឃុំប្រម៉ោយ)/ចំណុចខាងមុខ និងខាងក្រោយភ្នំលោកតាគ្រី ភូមិដូននាគ ឃុំប្រម៉ោយ/ចំណុចម៉ុងរី ភូមិដូងឃ្លៀង ឃុំប្រម៉ោយ ព្រំប្រទល់ជាមួយស្រុកភ្នំក្រវ៉ាញ។
បេសកកម្មនេះមានរយ:ពេលមួយខែ និងបន្តដូចភ្លៀងរលឹមនៅក្នុងគោលបំណង ដើម្បីពង្រឹងប្រសិទ្ធិភាពការងារគ្រប់គ្រងតំបន់ការពារធម្មជាតិ សំដៅធានាឲ្យបាននូវនិរន្តរភាពប្រព័ន្ធអេកូឡូស៊ី ការអភិរក្សជីវៈចម្រុះ និងការប្រើប្រាស់ធនធានធម្មជាតិឲ្យបានសមស្រប។ និងដើម្បីទប់ស្កាត់ និងធ្វើការបង្ក្រាបឲ្យមានប្រសិទ្ធភាពនូវបទល្មើសកាប់ព្រៃទន្ទ្រានយកដីរដ្ឋនៅក្នុងភូមិសាស្ត្រខេត្តពោធិសាត់ ជាពិសេសស្រុកវាលវែង។ សូមបញ្ជាក់ថាមុននិងមានការដាក់បញ្ជូនកម្លាំងបង្ក្រានេះគឺបានកើតឡើងបន្ទាប់ពីមានកិច្ចប្រជុំមួយនៅខេត្តពោធិសាត់កាលពីថ្ងៃទី១១មិនាដែលមានរដ្ឋមន្ត្រីក្រសួងបរិស្ថានអាជ្ញាធរខេត្តនិងលោកនាយឧត្តមសេនីយ៍សៅសុខា។កន្លងមកសកម្មជនបរិស្ថានលោកតាន់គឺមសួបានចុះស្រាវជ្រាវរកឃើញបទល្មើសជាច្រើននៅតែបន្តកើតឡើងក្នុងភូមិសាស្ត្រភ្នំឱរ៉ាល់នៃខេត្តកំពង់ស្ពឺនិងពោធិសាត់។ទោះបីយ៉ាងណាការប្រើកម្លាំងគគ្រឹកគគ្រេងចឹងគេជឿថាមិនសូវបានផលល្អប៉ុន្មានទេព្រោះកាលជំនាន់រដ្ឋាភិបាលអាណត្តិមុនប្រកាសឲ្យប្រើសុទ្ធតែយន្តហោះកាំជ្រួចហ្វុងលទ្ធផលនៅមិនទាន់បានល្អតែដេកចំមើលតិចសិនមើលក្រែងរដ្ឋាភិបាលអាណត្តិថ្មីគ្រាន់ជាង!៕
