វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 834 នាក់
ម្សិលមិញ 6677 នាក់
សរុប 14148410 នាក់
អ៊ុយក្រែន៖ កាលពីថ្ងៃអាទិត្យ ទី១០ ខែមីនា រដ្ឋបាលប្រទេសអ៊ុយក្រែនបានច្រានចោលទាំងការខឹងសម្បារចំពោះការអំពាវនាវឱ្យរបស់សម្ដេចសង្ឃកាតូលិក ប៉ាប ហ្វ្រង់ស៊ីស ឱ្យទីក្រុងកៀវ ចរចាបញ្ចប់សង្គ្រាមជាមួយរុស្ស៉ី និងគួរតែមានភាពក្លាហានដើម្បី «លើកទង់ស»ចរចារសុំចុះចាញ់ ។ នេះបើតាមការចេញផ្សាយដោយ ទីភ្នាក់ងារសារព័ត៌មាន AFP។ការអត្ថាធិប្បាយរបស់សម្ដេចប៉ាប នៅក្នុងបទសម្ភាសន៍មួយដែលត្រូវបានចេញផ្សាយកាលពីថ្ងៃសៅរ៍សប្ដាហ៍មុន បានដុតបញ្ឆេះកំហឹងក្នុងទីក្រុងកៀវ បន្ទាប់ពីទ្រង់មានបន្ទូលថា អ៊ុយក្រែនគួរតែចរចាជាមួយរុស្ស៉ី ដែលកំពុងគ្រប់គ្រងទឹកដីមួយផ្នែកធំរបស់អ៊ុយក្រែន។ រដ្ឋមន្ត្រីការបរទេសអ៊ុយក្រែន លោកឌ្មីត្រូគូលីបា( Dmytro Kuleba) បានគូសបញ្ជាក់ដូច្នេះថា «ទង់របស់យើងគឺមានពណ៌លឿង និងពណ៌ខៀវ។ នេះគឺជាទង់តំណាងឱ្យជីវិត ការស្លាប់ និងជ័យជម្នះរបស់ពួកយើង។ យើងនឹងមិនលើកទង់ផ្សេង ជាដាច់ខាត»។
ចំណែកអគ្គរដ្ឋទូតអ៊ុយក្រែនប្រចាំបុរីវ៉ាទីកង់ លោក Andrii Yurash ថែមទាំងបានប្រដូចព្រះបន្ទូលរបស់សម្ដេចប៉ាប ពីការចរចាជាមួយរុស្ស៉ី ប្រៀបដូចទៅនឹងការចរចា ជាមួយ Adolf Hitler ផងដែរ។
សម្តេចព្រះសង្ឃរាជ Pope Francis ក្នុងព្រះរាជបន្ទូលក្នុងកិច្ចសម្ភាសន៍មួយកាលពីថ្ងៃទី២កុម្ភៈ ឆ្នាំ២០២៤ ប៉ុន្តែទើបត្រូវបានចាក់ផ្សាយ ក្នុងខែមីនានេះ។ សម្តេចព្រះសង្ឃរាជ Pope Francis ព្រះជន្ម៨៧ព្រះវស្សាបានមានព្រះរាជបន្ទូលថា «វាជាការពិតប៉ុន្តែខ្ញុំគិតថា អ្នកដែលខ្លាំងជាងគេបំផុតនោះ គឺមនុស្សម្នាក់ដែលចេះសម្លឹងមើលស្ថានភាព, ជាមនុស្សគិតអំពីប្រជាជន និងជាមនុស្សមានសេចក្តីក្លាហាននៃការហ៊ានចុះចាញ់និង ហ៊ានធ្វើការចរចា»។ព្រះអង្គមានបន្ទូលទៀតថា «បច្ចុប្បន្ននេះអ្នកអាចធ្វើការចរចាជាមួយនឹងមានការជួយពីមហា អំណាចអន្តរជាតិ…ដូច្នេះចូរកុំខ្មាស់អៀន ក្នុងការចរចានៅមុនពេលដែល រឿងរ៉ាវនោះឈាន ទៅរកភាពកាន់តែចុះខ្សោយ»។
សង្គ្រាមក្នុងប្រទេសអ៊ុយក្រែនបានឈានចូល៧៤៦ថ្ងៃហើយ គិតត្រឹមថ្ងៃចន្ទទី១១មីនាឆ្នាំ ២០២៤។ ជាងពីរឆ្នាំកន្លងមកនេះ រុស្ស៊ីបានចូលគ្រប់គ្រង់តំបន់ភាគកើតចំនួន៤ និងប្រកាស ដាក់ជាជាទឹកដីរណបថែមទៀត គឺ ខេត្តដូណេតស៍, ខឺសិន, លូហានស៍និងខេត្តហ្សាប៉ូរីហ្សៀ។ មនុស្សស្លាប់និងរងរបួសរៀងៗខ្លួនច្រើនម៉ឺននាក់ ប៉ុន្តែការរកច្រកដើម្បីឈានទៅការបញ្ចប់ សង្គ្រាមនៅតែស្ថិតក្នុងភាពទ័លច្រក ដោយអ៊ុយក្រែនមិនព្រមចរចាដោយការធ្វើសម្បទាន ទឹកដីភាគខាងកើតដល់រុស្ស៊ីឡើយ។លោករដ្ឋមន្ត្រីការបរទេសអ៊ុយក្រែន Kuleba បានអំពាវនាវព្រះវិហារកាតូលិកបុរីវ៉ាទីកង់ថា សូមចៀសវាងនូវកំហុស ដែលធ្លាប់ បានធ្វើពីអតីតកាល។ លោក Kuleba ថ្លែងថា «នៅពេល ដែលនិយាយអំពីការលើកទង់ជ័យស គឺយើងបានដឹងអំពីយុទ្ធសាស្ត្រ របស់ព្រះវិហារបុរី វ៉ាទី កង់តាំងពីពាក់កណ្តាលសតវត្សទី២០នោះមកម្ល៉េះ»។
លោក Kuleba បានលើកយកសម្តីប្រៀបធៀប នូវអ្វីដែលសម្តេចព្រះសង្ឃរាជ Pope Francis ចាត់ទុកនរណាដែលជាមេដឹកនាំខ្លាំង។ រដ្ឋមន្ត្រីការបរទេសអ៊ុយក្រែន បាននិយាយថា «អ្នកដែលខ្លាំងបំផុត គឺអ្នកដែលហ៊ានធ្វើសង្គ្រាម រវាងសភាវៈល្អ និងសភាវៈអាក្រក់, ឈរនៅខាង សភាវៈល្អជាជាងមានបំណងចង់ឱ្យ គេមានបំណងបោះជំហានដូចពីមុនហើយបែរជាចាត់ទុក ថាវាជាការចរចាទៅវិញ»។
ឯកអគ្គរដ្ឋទូតអ៊ុយក្រែនប្រចាំនៅបុរីវ៉ាទីកង់ លោក Andrii Yurash បានថ្លែងប្រៀបធៀប សំណើរកការចរចារបស់សម្តេច Pope Francis ដូចជាការនិយាយជាមួយ មេដឹកនាំផ្តាច់ការ អាល្លឺម៉ង់ លោក Adolf Hitler។ លោក Andrii Yurash បានសរសេរលើបណ្តាញសង្គមថា «មេរៀនមានតែមួយទេ បើយើងចង់បញ្ចប់សង្គ្រាម យើងត្រូវធ្វើអ្វីគ្រប់យ៉ាងដើម្បីសម្លាប់សត្វនាគ"។ ព្រះវិហារបុរីកាតូលិកវ៉ាទីកង់ ក្រោយព្រះរាជបន្ទូលរបស់សម្តេចព្រះសង្ឃរាជបានធ្វើឱ្យមាន ការថ្កោលទោសពីប្រទេសអ៊ុយក្រែន នោះមក បានថ្លែងថាព្រះរាជបន្ទូលអំពាវនាវរបស់ សម្តេចព្រះសង្ឃរាជកាតូលិក គឺក្នុងន័យសាមញ្ញចង់ឱ្យមាន ការបញ្ចប់សង្គ្រាមដ៏សាហាវនោះ តែប៉ុណ្ណោះ។
ព្រះវិហារបុរីកាតូលិកវ៉ាទីកង់ បានបកស្រាយថា ការប្រើពាក្យលើក "ទង់ស" គឺជាសញ្ញាដែលគេប្រើយ៉ាងទូលំទូលាយ នៃការចុះចាញ់ នៅលើសមរភូមិ…គឺក្នុងបំណងមានន័យ «ការបញ្ចប់អរិភាព, ជាបទឈប់បាញ់ដែលឈាន ដល់សេចក្តីក្លាហាននៃការចរចា»។ ប៉ុន្តែសម្តីបកស្រាយនោះ មិនចូលត្រចៀកប្រទេសអ៊ុយក្រែន ដែលកំពុងតែស្ថិតក្នុង សភាពក្រពុលមុខនឹងសង្គ្រាមក្នុងពេលនេះឡើយ។លោក Kuleba បានថ្លែងថារដ្ឋាភិបាលក្រុងគៀវសង្ឃឹមថា សម្តេចព្រះសង្ឃរាជកាតូលិកបុរីវ៉ា ទីកង់នឹងយាងមកទតដោយ ព្រះនេត្រផ្ទាល់របស់ព្រះអង្គ ក្នុងប្រទេសអ៊ុយក្រែនថាតើទំហំ វិនាសកម្មមានសភាពធំប៉ុណ្ណា ក្រោយសង្គ្រាមប្រមាណជាង២ឆ្នាំរួចមកនេះ។
សម្តេច Pope Francis ក៏ធ្លាប់បានរងការរិះគន់មកពីមុនផងដែរបន្ទាប់ពីការលុកលុយខែកុម្ភៈ ឆ្នាំ២០២២ ដោយព្រះរាជបន្ទូល នាពេលនោះ គ្រាន់តែភ្លេចដាក់ឈ្មោះរដ្ឋាភិបាលក្រុងម៉ូស្គូថា ជាអ្នកឈ្លានពាន។ សម្តេចព្រះសង្ឃរាជដដែល ក៏ធ្លាប់ត្រូវបានអ៊ុយក្រែន រិះគន់ថែមទៀត កាលពីឆ្នាំ២០២៣ នៅពេលដែលព្រះអង្គបាន មានព្រះរាជបន្ទូលកោតសរសើរមេដឹកនាំចក្រពត្តិរុស្ស៊ី Peter the Great និងព្រះមហាក្សត្រីយានី Catherine II ។សម្តេចព្រះសង្ឃរាជ Pope Francis ក៏ធ្លាប់បានធ្វើឱ្យមានការខកចិត្តនៅក្នុងប្រទេសរុស្ស៊ី ផងដែរនៅពេលដែលព្រះអង្គ បានមានបន្ទូលនៅក្នុងរដូវរងាឆ្នាំ២០២២ថា កម្លាំងដ៏សាហាវ "ឃោរឃៅបំផុត" របស់រុស្ស៊ី នៅក្នុងអ៊ុយក្រែន "មិនមែនជាប្រពៃណីរបស់រុស្ស៊ី" ទេ ប៉ុន្តែជារបស់ជនជាតិភាគតិច ដូចជាជនជាតិ Chechens និងជនជាតិ Buryati ជាដើម។ បុរីវ៉ាទីកង់នាពេលនោះ ត្រូវគេឃើញបានសុំទោសជាផ្លូវការទៅកាន់ទីក្រុងម៉ូស្គូ។
កាលពីឆ្នាំមុន សម្តេច Pope Francis ធ្លាប់បានតែងតាំងព្រះរាជតំណាងថ្នាក់កំពូលមួយរូប ដើម្បីជួយព្យាយាមស្វែងរកសន្តិភាព ក្នុងប្រទេសអ៊ុយក្រែន ដោយព្រះរាជតំណាងនោះ បានធ្វើទស្សនកិច្ចនៅទីក្រុងម៉ូស្គូផង, ក្រុងគៀវផង, រដ្ឋធានីវ៉ាស៊ីនតោនអាមេរិក និងនៅក្នុងរដ្ឋធានីប៉េកាំងនៃប្រទេសចិនផងដែរ។មេដឹកនាំអ៊ុយក្រែនលោកហ្សេឡិនស្គី ក្រោយព្រះរាជបន្ទូលរបស់សម្តេច Pope Francis បានថ្លែងប្រតិកម្មជាប្រយោលបង្ហាញថា ព្រះរាជបន្ទូលចង់ឱ្យមាន ការចរចាចង់បញ្ចប់សង្គ្រាមនោះ មិនមែនជាបន្ទូលសម្របសម្រួលពីចម្ងាយនោះឡើយ។ លោកហ្សេឡិនស្គី បានថ្លែងថា «នៅពេលដែលពួកបិសាចរុស្ស៊ី ចាប់ផ្តើមធ្វើសង្គ្រាមថ្ងៃទី២៤ កុម្ភៈឆ្នាំ២០២២, ពលរដ្ឋក្នុងអ៊ុយក្រែនទាំងអស់ បានងើបឈរឡើងដើម្បីការពារប្រទេសជាតិរួម មានពលរដ្ឋកាន់សាសនាគ្រឹស្ត, សាសនាមូស្ល៊ីម និងសាសនាជ្វីហ្វ»។
លោកហ្សេឡិនស្គី បានថ្លែងបន្តថា ខ្ញុំសូមអរគុណចំពោះពលរដ្ឋអ៊ុយក្រែនដែលកាន់សាសនា នានាក្នុងការចូលរួមក្នុងជួរកងទ័ព និងក្នុងជួរកងកម្លាំងការពារជាតិ។ ពួកគេបានគាំទ្រយើង ដោយធ្វើការបួងសួង, ដោយពាក្យសម្តី និងដោយសកម្មភាពនានាទាំងឡាយ។ នេះជាអ្វីទាំង ឡាយដែលគេបានធ្វើនៅតាមព្រះវិហារ»។ លោកហ្សេឡិនស្គី បានថ្លែងបន្តថា «ការបួងសួងទាំងនេះ មិនមែនមានចម្ងាយ ត្រឹមតែ២ពាន់ ៥០០គីឡូម៉ែត្រប៉ុណ្ណោះទេ គឺនៅតាមកន្លែងនានា ដែលមានការអធិដ្ឋានបួងសួងពីចម្ងាយរវាង អ្នកដែលចង់រស់រានមានជីវិត និងអ្នកដែលចង់បំផ្លាញជីវិតរបស់អ្នក»។មន្ត្រីការទូតប៉ូឡូញនិងមន្ត្រីការទូតអាល្លឺម៉ង់ ដែលស្និទ្ធនឹងរដ្ឋាភិបាលក្រុងគៀវ បានប្រតិកម្ម ប្រឆាំងនឹងព្រះរាជបន្ទូល របស់សម្តេចព្រះសង្ឃរាជ Pope Francis។ រដ្ឋមន្ត្រីការបរទេសប៉ូ ឡូញលោក Radoslaw Sikorski បានសរសេរ តាមបណ្តាញសង្គមថា «ដើម្បីឱ្យមានតុល្យភាព តើព្រះសង្ឃរាជ ហ៊ានមានបន្ទូលលើកទឹកចិត្ត ឱ្យមេដឹកនាំរុស្ស៊ី លោកពូទីនដកកងទ័ពរបស់ ខ្លួនចេញពីអ៊ុយក្រែនដែរឬទេ?» រដ្ឋមន្ត្រីប៉ូឡូញថ្លែងបន្តថាពេលនោះ «សន្តិភាពនឹងវិលមកវិញ ភ្លាមៗដោយមិនចាំបាច់ ត្រូវការកិច្ចចរចាឡើយ»។
អគ្គលេខាធិការអង្គការណាតូ លោក ជែនស៍ ស្តូធិនប៊ើក (Jens Stoltenberg) បានបញ្ជាក់យ៉ាងច្បាស់ៗកាលពីដើមសប្តាហ៍នេះថា លោកមិនយល់ស្របនឹងការលើកឡើងរបស់សម្តេចសង្ឃកាតូលីកប៉ាបហ្វ្រង់ស៊ីស ដែលចង់ឱ្យអ៊ុយក្រែន គួរតែ "លើកទង់ពណ៌ស" និងចរចាបញ្ចប់សង្គ្រាមដែលបង្កឡើងដោយការឈ្លានពានរបស់រុស្ស៊ី ។ឆ្លើយតបនឹងការលើកឡើងរបស់សម្តេចសង្ឃកាតូលីក លោក ស្តូធិនប៊ើក(Stoltenberg) បានលើកឡើងទៅកាន់ភ្នាក់ងាររ៉យទ័រថា "ប្រសិនបើយើងចង់បានការចរចារ និងដំណោះស្រាយសន្តិភាពយូរអង្វែង មធ្យោបាយទៅកាន់គោលបំណងទាំងអស់នេះ គឺគួរផ្តល់ការគាំទ្រផ្នែកយោធាដល់អ៊ុយក្រែន" ។
លោក ស្តូធិនប៊ើក (Stoltenberg) មិនបានបង្ហាញការបកស្រាយណាមួយឡើយ ចំពោះការប្រកាសរបស់ប្រធានាធិបតីបារាំង លោក អ៊ែមម៉ានូអ៊ែល ម៉ាក្រុង (Emmanuel Macron) ដែលថា សម្ព័ន្ធមិត្តលោកខាងលិច មិនគួរមិនយកចិត្តទុកដាក់ចំពោះការបញ្ជូនទ័ពទៅកាន់ទីក្រុងគីវនោះទេ ។លោក ស្តូធិនប៊ើក (Stoltenberg) គ្រាន់តែបន្ថែមថា បើទោះបីជាប្រទេសត្រឹមតែមួយនៅក្នុងអង្គការណាតូ សម្រេចបញ្ជូនទាហានទៅប្រទេសអ៊ុយក្រែនក៏ដោយ វាក៏នឹងប៉ះពាល់ដល់សម្ព័ន្ធភាពទាំងមូល ពីព្រោះតែសមាជិករបស់ខ្លួនទាំងអស់បានចងភ្ជាប់ដោយកតិកាសញ្ញាការពារសមូហភាព ។
ប្រធានព្រះវិហារកាតូលិក Greek របស់អ៊ុយក្រែនលោកអាចារ្យ Sviatoslav Shevchuk បាន ថ្លែងប្រតិកម្មថា «ការចង់ឱ្យមានការចុះចាញ់ មិនដែលស្ថិតមាននៅក្នុង ផ្នត់គំនិតរបស់ប្រជា ជនអ៊ុយក្រែនឡើយ។ ប្រធានព្រះវិហារកាតូលិក Greek របស់អ៊ុយក្រែន បានថ្លែងទៀតថា «អ៊ុយក្រែនបានរងរបួសមែន ប៉ុន្តែអ៊ុយក្រែនមិនចាញ់ឡើយ…អ៊ុយក្រែននឿយហត់មែន ប៉ុន្តែ អ៊ុយក្រែននៅតែងើបឈរបាននិងទ្រាំទ្របាន។ សូមជឿខ្ញុំចុះថា ការចុះចាញ់មិនមាននៅក្នុង គំនិតរបស់ពលរដ្ឋអ៊ុយក្រែនទេ សូម្បីតែពលរដ្ឋ ដែលកំពុងស្ថិតក្នុងសមរភូមិប្រយុទ្ធនាពេល នេះក៏ដោយ។ សូមស្តាប់ពលរដ្ឋរបស់យើងក្នុងតំបន់ Kherson, Zaporizhzhia, Odesa, Kharkiv និង Sumy»។
នៅសមរភូមិសេចក្តីរាយការណ៍ អាល់ហ្សាហ្ស៊ីរ៉ា បានឱ្យដឹងថាមនុស្ស៣នាក់បាន ស្លាប់ក្នុងការវាយប្រហារដោយគ្រាប់ផ្លោង និងដ្រូនរបស់រុស្ស៊ីនៅតំបន់ដូណេតស៍ គ្រាដែល ១២នាក់ទៀតបានរងរបួសដោយសារ ការវាយប្រហាររបស់មីស៊ីលរុស្ស៊ីក្នុងក្រុង Myrnohrad។រុស្ស៊ីបានបាញ់បង្ហោះដ្រូនអត្តឃាត Shahed ចំនួន៣៩គ្រឿងក្នុងតំបន់ភាគកណ្តាល និងភាគខាងត្បូងរួមទាំងរដ្ឋធានីគៀវផងដែរ។ កងការពារអាកាសអ៊ុយក្រែន បានថ្លែងថាគេបានបាញ់ ទម្លាក់ដ្រូនអស់ចំនួន៣៥គ្រឿងលើ តំបន់ចំនួន១០កន្លែង ប៉ុន្តែមិនមាន សេចក្តីរាយការណ៍ បញ្ជាក់អំពីការរងខូចខាតណាមួយ កើតឡើងឡើយ។ នៅជាមួយគ្នានេះដែរ, ព្រលានយន្តហោះ Pulkovo នៅ Saint Petersburg លើទឹកដីរុស្ស៊ីបានបិទដំណើរការភ្លាមៗក្រោយមាន សេចក្តីរាយការណ៍ឃើញ ដ្រូនរបស់អ៊ុយក្រែនមួយគ្រឿង ដែលហោះក្នុងតំបន់ Leningrad ក្បែរ នោះ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានអះអាងថាស្ថានការណ៍ល្អប្រសើរឡើងវិញរបស់កងទ័ពអ៊ុយក្រែន បានបង្អាក់ ការរីកចម្រើនទៅមុខរបស់កងទ័ពរុស្ស៉ី ខណៈទីក្រុងកៀវច្រានចោលការអំពាវនាវរបស់សម្ដេចសង្ឃកាតូលិក ប៉ាប ហ្វ្រង់ស៊ីសឱ្យអ៊ុយក្រែនចរចាបញ្ចប់ សង្គ្រាមជាមួយទីក្រុងមូស្គូ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។នៅក្នុងបទសម្ភាសន៍ជាមួយទូរទស្សន៍បារាំង BFM TV កាលពីថ្ងៃចន្ទ ទី១១ ខែមីនា លោក ហ្សេលេនស្គី បានគូសបញ្ជាក់ដូច្នេះថា «ការរីកចម្រើនរបស់កងទ័ពរុស្ស៉ីត្រូវបានបង្អាក់។ ទីបញ្ជាការរបស់យើង យោធារបស់យើងបានបញ្ឈប់ ការរីកចម្រើនរបស់កងទ័ពរុស្ស៉ី ក្នុងតំបន់ភាគខាងកើតអ៊ុយក្រែន»។ លោក ហ្សេលេនស្គី បន្ថែមថាកងទ័ពអ៊ុយក្រែនក៏កំពុងសាងសង់ជញ្ជាំងការពារមានប្រវែងជាង ១០០០គីឡូម៉ែត្រឯណោះ។
ក្រសួងការពារជាតិរុស្ស៉ី បានប្រកាសថា អ៊ុយក្រែនបានកំណត់គោលដៅវាយប្រហារនៅទូទាំងប្រទេស នាថ្ងៃអង្គារនេះ ដោយយ៉ាងហោចណាស់យន្តហោះដ្រូន ២៥គ្រឿង និងមីស៉ីល ៧គ្រាប់ និងជាការវាយប្រហារដ៏ធំមួយដែលមន្ត្រីក្នុងស្រុកម្នាក់អះអាងថា បានធ្វើឱ្យឆេះរោងចក្រចម្រាញ់ប្រេងមួយ ស្ថិតក្នុងក្រុមហ៊ុននាំចេញប្រេងធំជាងគេទី ២របស់ពិភពលោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី១២ ខែមីនា ឆ្នាំ ២០២៤។ទីភ្នាក់ងារសារព័ត៌មានរដ្ឋ RIA ដោយដកស្រង់ប្រភពពីសេវាកម្មផ្លូវដែករុស្ស៉ី បានរាយការណ៍ថា រថភ្លើងពិសេសសម្រាប់ពន្លត់អគ្គិភ័យ កំពុងប្រយុទ្ធនឹងភ្លើងឆេះនៅលើទឹកដីនៃក្រុមហ៊ុនថាមពល Lukoil ក្នុងតំបន់ Kstovo។ រោងចក្រចម្រាញ់ប្រេង NORSI របស់ក្រុមហ៊ុន Lukoil គឺជាទីតាំងចម្រាញ់ប្រេងដ៏ធំមួយរបស់រុស្ស៉ី ដែលជាធម្មតាមានសមត្ថភាព ចម្រាញ់បានដល់ ៣៤០,០០០បារ៉ែលក្នុងមួយថ្ងៃ។ ភ្លាមៗនេះ មិនទាន់មានការបញ្ជាក់ពីអ៊ុយក្រែននោះទេ។