អុំទូក៣ថ្ងៃនៅភ្នំពេញមានមនុស្ស៥លាននាក់ចូលរួម២២នាក់ស្លាប់ឆេះតូបអស់ជាង៤រយសម្តេចធិបតីហ៊ុនម៉ាណែតសសើរ
25-December-2024 / ទេសចរណ៏និងវប្បធម៌
ភ្នំពេញ ៖ ព្រះករុណាជាអម្ចាស់ជីវិតតម្កល់លើត្បូង ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្តេចយាងជាព្រះរាជាធិបតីដ៏ខ្ពង់ខ្ពស់បំផុត ទតព្រះរាជបុណ្យអុំទូក បណ្តែតប្រទីប និងសំពះព្រះខែ អកអំបុក នាព្រះពន្លាជ័យ មុខព្រះបរមរាជវាំង ក្នុងថ្ងៃទី២៨ ខែវិច្ឆិកា ឆ្នាំ២០២៣ ដែលជាថ្ងៃបិទបញ្ចប់នូវព្រះពិធីបុណ្យគម្រប់រយៈពេលបីថ្ងៃ។
លោក ប៊ូ ជុំសេរី អនុរដ្ឋលេខាធិការ ក្រសួងអប់រំ យុវជន និងកីឡា និងជាអនុប្រធានអចិន្ត្រៃយ៍ ប្រធានគណៈមេប្រយោគនៃអនុគណៈកម្មការបច្ចេកទេស គណៈកម្មាធិការជាតិរៀបចំបុណ្យជាតិ-អន្តរជាតិបានក្រាបបង្គុំទូលថ្វាយរបាយការណ៍ និងរាយការណ៍ឲ្យដឹង ថា៖ នៅឆ្នាំ២០២៣នេះ នៅទូទាំងព្រះរាជាណាចក្រកម្ពុជានៃយើង បានចាត់តាំងបញ្ជូនទូកមួង ទូកង និង ទូកខ្នាតអន្តរជាតិ ចំនួន ៣៣៧ ទូក មកចូលរួមក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលក្នុងនោះមាន៖ ទូកចែវចំនួន ៤៣ (ក្នុងនោះមានទូកនារីចំនួន ១ទូក) ទូកអុំ ១៥៨ ទូក ទូកខ្នាតអន្តរជាតិ ១៣៤ទូក (ក្នុងនោះមានទូកនារីចំនួន ២ទូក) ចំណុះទូកចូលរួមអុំ និងចែវ មានចំនួនសរុប ២០ ៤១៧នាក់ ដែលក្នុងនោះមានស្ត្រី ចំនួន ១៦៥នាក់។
លោករដ្ឋលេខាធិការរូបនេះ បានគូសបញ្ជាក់ថា អស់រយៈពេល៣ថ្ងៃកន្លងមកនេះ លទ្ធផលបច្ចេកទេសរួមមាន៖ ១.ទូកអុំខ្នាតអន្តរជាតិនារី៖ ផែនលេខ១ មាន ១ទូក ផែនលេខ២ មាន ១ទូក។ ទូកអុំខ្នាតអន្តរជាតិបុរស ផែនលេខ១ មានចំនួន២២ទូក ផែនលេខ២ មាន ៤៦ទូក, ផែនលេខ៣ មានចំនួន ៤០ទូក និងផែនលេខ៤ មានចំនួន១១ទូក។ ទូកអុំនារី តាមលក្ខណៈប្រពៃណីជាតិ ផែនលេខ១ មាន១ទូក។ ទូកអុំបុរស តាមលក្ខណៈប្រពៃណីជាតិ ផែនលេខ១ មានចំនួន ១២២ទូក ផែនលេខ២មានចំនួន ២៤ទូក ផែនលេខ៣ មាន ២១ទូក និងផែនលេខ ៤ មាន១១ទូក។ទូកចែកនារី ផែនលេខ១ មាន១ទូក។ ទូកចែវបុរស ផែនលេខ១ មាន១១ទូក ផែនលេខ២ មាន១១ទូក ផែនលេខ៣ ១០ទូក និងផែនលេខ៤ មាន១០ទូក។
ចំពោះទូកគូពិសេស នៅឆ្នាំ២០២៣នេះ គណៈកម្មការបច្ចេកទេស និងគណៈមេប្រយោគបានរៀបចំឱ្យមានទូកចំនួន ៩៨ទូក ជាទូកគូពិសេស ចូលរួមប្រកួតប្រជែង ដោយកំណត់លទ្ធផលតាមរយៈថិរៈវេលា ដោយឆ្នាំនេះទូកគូពិសេស ដែលមានល្បឿនលឿនជាងគេមានចំនួន ៣ទូក រួមមាន៖ លេខ១ ទូកឈ្មោះ មហាទន្សាយតេជោសែនជ័យ ពាក់ស្លាកលេខ ១៨៣ មានចំណុះ ៧៥នាក់ មកពីខេត្តកំពង់ចាម ដោយសរុបរយៈពេល៣ថ្ងៃនេះធ្វើសម្រេចក្នុងថិរៈវេលា ត្រឹម ២៨:០៦.៣៣ នាទី។ ចំណាត់ថ្នាក់លេខ២ បានទៅលើទូកឈ្មោះសម្តេចវិបុលបញ្ញាបារមីមានជ័យ ពាក់ស្លាកលេខ ២៦៧ មានចំណុះ ៧៤នាក់ មកពីខេត្តតាកែវ ក្នុង៣ថ្ងៃនេះប្រើប្រាស់ថិរៈវេលាត្រឹម ២៨:០៦.៦២នាទី។ ចំណាត់ថ្នាក់លេខ៣ បានទៅលើទូកឈ្មោះកោះកេរសែនជ័យបារមីព្រះអង្គខ្មៅ ពាក់ស្លាក់លេខ ២០៣ មានចំណុះ ៧៧នាក់ មកពីខេត្តព្រះវិហារ ៣ថ្ងៃប្រើថិរៈវេលា ២៨:០៧.៨១ នាទី។
អភិបាលខេត្តកំពង់ចាម លោក អ៊ុន ចាន់ដា បានអបអរសាទរ ទូក ង មហាទន្សាយតេជោសែនជ័យ មកពីស្រុកកងមាស ខេត្តកំពង់ចាម ទទួលបានជ័យលាភីលេខ១ ទូទាំងប្រទេស ក្នុងផែនគូពិសេស។ លោក ម៉េត មាសភក្តី អ្នកនាំពាក្យសាលារាជធានីភ្នំពេញ នៅថ្ងៃទី២៩ ខែវិច្ឆិកា ឆ្នាំ២០២៣ថាពេល៣ថ្ងៃ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៣ បានធ្វើឱ្យមានកំណើនភ្ញៀវទេសចរណ៍ជាតិ-អន្តរជាតិ ចូលរួមកម្សាន្តនៅរាជធានីភ្នំពេញប្រមាណជាង ៥លាននាក់ ប្រកបដោយភាពសប្បាយរីករាយ។ ចំពោះការងាររក្សាសន្តិសុខសុវត្ថិភាពក៏មានល្អប្រសើរ ។ រីឯបរិស្ថានអនាម័យក៏មិនចោទជាបញ្ហាផងដែរ ដោយភ្នាក់ងារសម្អាតបានយ៉ាងល្អ ។
លោក ស៊ូ សាវ៉ន ប្រធានការិយាល័យសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូន រាជធានីភ្នំពេញបានឱ្យដឹងថា ក្រោយពីព្រះរាជពិធីបុណ្យអុំទូកថ្ងៃទី២ បានពិនិត្យឃើញតាមទីតាំងសប្បាយនានា មានគុំនរសម្រាម យ៉ាងច្រើនសន្ធឹកសន្ធាប់នៅលេីសួនច្បារ ច្រើនលើស២០% ធៀបនឹងថ្ងៃទី១នៃព្រះរាជពិធីបុណ្យអុំទូក។ កម្លាំងដែលប្រចាំការសម្រាប់ការងារបោសសំអាត និងអនាម័យ មានចំនួន ៣០៨នាក់ ក្នុងនោះក៏មានមន្ត្រីជាប់កិច្ចសន្យាផងដែរ។រដ្ឋបាលរាជធានីភ្នំពេញ បានរៀបចំពិធីអកអំ បុកនៅរមណីយ៏ដ្ឋានប្រវត្តិសាស្ត្រវត្តភ្នំ ដែលជាបេះដូង និងជានិមិត្តរូប នៃរាជធានីភ្នំពេញ នារាត្រីថ្ងៃ១៥កើតពេញបរមី ត្រូវនឹងថ្ងៃទី២៧ ខែវិច្ឆិកា ឆ្នាំ២០២៣ ដែលជាយប់ថ្ងៃទី២នៃព្រះរាជពិធីបុណ្យ អុំទូក បណ្តែងប្រទីប និងសំពះព្រះខែ អកអំបុក ។
ក្រសួងសុខាភិបាល បានត្រៀមក្រុមគ្រូពេទ្យ និងរថយន្តគិលានុសង្គ្រោះ សរុបចំនួន ៧០គ្រឿង ដែលមានរថយន្តប្រចាំការតាមគោលដៅ ចំនួន ៥០គ្រឿង រថយន្តគ្លីនិកចល័ត ចំនួន ៤គ្រឿង និងជម្រកតង់ពិនិត្យសុខភាពដើម្បីផ្តល់សេវាសុខាភិបាល ចំនួន ១៥កន្លែង ដែលផ្តល់សេវា ២៤ម៉ោងលើ២៤ម៉ោង។ដោយឡែកនៅទីស្តីការក្រសួងសុខាភិបាល ក៏បានត្រៀមរថយន្តគិលានសង្គ្រោះ ចំនួន ២០គ្រឿង ដើម្បីប្រចាំការត្រៀមអន្តរាគមន៍សង្គ្រោះបន្ទាន់ក្នុងករណីចាំបាច់បំផុត។
ទាក់ទងព្រះរាជពិធីនេះសម្តេចធិបតី បានគូសរំលេចតាមបណ្តាញសង្គមនាព្រឹកថ្ងៃពុធ ទី២៩ ខែវិច្ឆិកា នេះថា «ភាពជោគជ័យនេះ អាចសម្រេចទៅបាន គឺដោយសារការចូលរួមចំណែកពីគ្រប់បណ្តាក្រុមការងារពាក់ព័ន្ធ ជាពិសេសកងកម្លាំងគ្រប់ប្រភេទ ដែលបានលះបង់ពេលវេលា និងកម្លាំងកាយចិត្តធ្វើយ៉ាងណាធានាឱ្យបានសេចក្តីសុខ សុវត្ដិភាព សណ្តាប់ធ្នាប់សាធារណៈ និងបង្កលក្ខណ:គ្រប់បែបយ៉ាង ដើម្បីបម្រើដល់ដំណើរការនៃព្រះរាជពិធីបុណ្យជាតិនេះ ឱ្យប្រព្រឹត្តទៅដោយភាពអធិកអធម និងសប្បាយរីករាយបំផុត»។
ក្នុងនាមប្រមុខរាជរដ្ឋាភិបាល និងក្នុងនាមសម្តេចផ្ទាល់ សម្តេចធិបតី ថ្លែងអំណរគុណដល់ក្រុមការងារគ្រប់លំដាប់ថ្នាក់ និងកងកម្លាំងគ្រប់ប្រភេទ ដែលបានបំពេញភារកិច្ចប្រកបដោយការទទួលខុសត្រូវខ្ពស់ ទាំងក្នុងការរៀបចំដំណេីរប្រព្រឹត្តទៅនៃកម្មវិធី និងការសម្អាតដោយធានាបាននូវសោភ័ណភាព និងអនាម័យ ។សម្តេចធិបតី ហ៊ុន ម៉ាណែត ក៏បានថ្លែងអំណរគុណដល់ក្រុមការងារសម្តែងគ្រប់ប្រភេទ ក៏ដូចសិល្ប:ករ សិល្បៈការីនីទាំងអស់ ដែលបានផ្តល់ផ្ទាំងទស្សនីយភាពរីករាយ និងការរាំលេងកំសាន្តគ្រប់ទីកន្លែងដល់មហាជន ប្រកបដោយភាពស្រស់ស្រាយ និងសប្បាយអឺងកង។ការប្ររព្ធពិធីនេះ រដ្ឋបាលរាជធានីភ្នំពេញ បានខកខានតាំងពី៣ឆ្នាំមុន ដោយសារការរីករាលដាល នៃជំងឺកូវីដ-១៩ ប៉ុន្តែនៅឆ្នាំនេះ រដ្ឋបាលរាជធានីភ្នំពេញ ក៏បានប្រារព្វពិធីនេះឡើងវិញចំថ្ងៃទី២ នៃព្រះរាជពិធីបុណ្យអុំទូក បណ្តែតប្រទីប សំពះព្រះខែ អកអំបុក ហើយពិធីនេះក៏ត្រូវបានរៀបចំធ្វើឡើងវិញ ជាលើកដំបូងផងដែរ ក្នុងអាណត្តិទី៧នៃរាជរដ្ឋាភិបាល ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី។
ទោះបីជាក្នុងពិធីប្រារព្ធមានសុវត្ថិភាពល្អជោកជ័យតែក៏មានមនុស្សចំនួន ២២នាក់ បានស្លាប់ និងរបួសធ្ងន់ស្រាលចំនួន ៦៩នាក់ នៅក្នុងគ្រោះថ្នាក់ចរាចរណ៍នៅទូទាំងប្រទេស រយៈពេល ៣ថ្ងៃ (២៦-២៧-២៨ វិច្ឆិកា) នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ។នេះមិនទាន់និយាយពីអគ្គិភ័យបំផ្លាញផ្សារសន្តិភាពនៅសង្កាត់ចោមចៅអស់ជាង៤០០តូបនោះផងទេ៕
