វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6386 នាក់
ម្សិលមិញ 5304 នាក់
សរុប 14145912 នាក់
ក្រចេះ៖ក្រុមអ្នកលេងល្ខោនផ្ទុះប្រតិកម្ម និងហួសចិត្តចំពោះលោកមេប៉ុស្តិ៍វ័យក្មេងម្នាក់ នៅឃុំស្រែចាស្រុកស្នួល ខេត្តក្រចេះ ដែលបានធ្វើរឿងដ៏មិនសមទំនង ចុះទៅបិទល្ខោនពួកគាត់កំពុងតែសម្តែងសុខៗ។ ប្រជាពលរដ្ឋជាអ្នកទស្សនា បានសម្តែងការក្តៅក្រហាយឡើងឈូរឆតែម្តង ព្រោះតែពួកគាត់មិនពេញចិត្តទៅនឹងទង្វើដ៏ចម្លែករបស់មេប៉ុស្តិ៍រូបនេះ ។ ហេតុការណ៍នេះបានកើតឡើងនៅក្នុងកម្មពិធីបុណ្យកឋិនទាន វត្តអូរលុង ស្រុកស្នួល ខេត្តក្រចេះ កាលពីយប់ថ្ងៃទី២១ ខែវិច្ឆិកា ឆ្នាំ២០២៣ កន្លងទៅ ។
សម្រាប់ប្រជាពលរដ្ឋតាមបណ្តាញសង្គមបន្ទាប់ពីបានឃើញឃ្លិបវីដេអូ ទង្វើដ៏មិនសមទំនងរបស់លោកមេប៉ុស្តិ៍ស្រែចារ ដែលបានទៅបញ្ឈប់ល្ខោនមិនឲ្យសម្តែងទាំងកណ្តាលទី ដែលធ្វើឱ្យផ្អើល រិះគន់នៅលើបណ្ដាញសង្គមរួចមក ។ទោះបីយ៉ាងណាថ្ងៃទី២៣ ខែវិច្ឆិកា ឆ្នាំ២០២៣ លោកមេប៉ុស្តិ៍រូបនេះ ត្រូវបានថ្នាក់លើដកបញ្ឈរជើងហើយ។នេះបើយោងតាមលិខិតរបស់ «ស្នងការដ្ឋាននគរបាលខេត្តក្រចេះ» បានចេញសេចក្តីបំភ្លឺព័ត៌មានឲ្យសាធារណជនបានជ្រាបថា៖ «ក្រោយពីបានទទួលព័ត៌មានភ្លាម ស្នងការនគរបាលខេត្ត បានធ្វើការចាត់ក្រុមប្រឹក្សាវិន័យស្រាវជ្រាវ និងកោះហៅនាយប៉ុស្តិ៍នគរបាលរដ្ឋបាលស្រែចារ មកសាកសួរបំភ្លឺពិតជាបានសួរកលិខិតអនុញ្ញាត និងបង្កឲ្យមានការរំខានក្នុងការសម្តែងពិតប្រាកដ។ ក្រុមប្រឹក្សាវិន័យបានសម្រេចដាក់វិន័យចំពោះលោកនាយប៉ុស្តិ៍នគរបាលរដ្ឋបាលស្រែចារ ដោយផ្អាកការងារជាបណ្តោះអាសន្ន និងមកបង្ហាញមុខនៅការិយាល័យបុគ្គលិករៀងរាល់ម៉ោងធ្វើការ»។
សេចក្តីបំភ្លឺរបស់ស្នងការដ្ឋាននគរបាលខេត្តក្រចេះ បានបន្តថា៖ «សូមធ្វើការអភ័យទោសចំពោះកំហុសឆ្គងរបស់មន្ត្រី នៃស្នងការដ្ឋាននគរបាលខេត្ត។ ស្នងការដ្ឋាននគរបាលខេត្តក្រចេះ សូមថ្លែងអំណគុណ និងត្រៀមដើម្បីទទួលរាល់កិច្ចសហការមតិរិះគន់ដើម្បីស្ថាបនា ពីប្រជាពលរដ្ឋគ្រប់មជ្ឈដ្ឋាន ពិសេសតាមបណ្តាញផ្សព្វផ្សាយសង្គមព័ត៌មាន»។ករណីយ៍នេះដែរបើតាមគណនីហ្វេសប៊ុកមួយឈ្មោះ «Reth Mony» បានចេញមុខមកបង្ហោះសារប្រាប់ ថា៖ «លោក យឹង សំអឿន ហៅ ដួង នាយនគរបាលប៉ុស្តិ៍ឃុំស្រែចារ ស្រុកស្នួល ខេត្តក្រចេះ ត្រូវស្នងការដកបញ្ឈរជើង និងតែងតាំងមេប៉ុស្តិ៍ស្តីទីជំនួសវិញ ក្រោយពេលចុះបិទល្ខោននៅក្នុងកម្មពិធីបុណ្យកឋិនទាន វត្តអូរលុង ស្រុកស្នួល ។