សម្តេចធិបតីប្រកាសពីបំណងពង្រឹងគុណភាពសិក្សាពីមត្តេយ្យដល់ថ្នាក់ទី១២ក្នុងពេលគ្រូនៅសៀមបូកសុំសាលា
16-September-2024 / សុខភាពនិងកីឡា
ភ្នំពេញ៖ នៅថ្ងៃទី៥ ខែតុលា ឆ្នាំ២០២៣ក្នុងឱកាសអញ្ជើញចូលរួម ក្នុងទិវាគ្រូបង្រៀនលើកទី២៦ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសពីមហិច្ឆិតា ក្នុងអាណត្តិនៃការដឹកនាំរបស់សម្តេច មួយឬពីរអាណត្តិនេះ គឺចង់ឱ្យសាលារដ្ឋទាំងអស់ ចាប់ពីថ្នាក់បឋម ដល់ថ្នាក់មធ្យមសិក្សាទុតិយភូមិ (ថ្នាក់ទី១២) ក្លាយជាសាលារៀនល្អ អាចទទួលបាន សម្រាប់ប្រជាពលរដ្ឋ នៅតាមមូលដ្ឋាន។
សម្តេចនាយករដ្ឋមន្ត្រី ថា «មហិច្ឆតារបស់ខ្ញុំ ក្នុងមួយអាណត្តិ ពីរអាណត្តិនេះ សាលារដ្ឋទាំងអស់មិនចាំបាច់មានកូនចៅ ប្រជាពលរដ្ឋវេចបង្វេចពីស្រុកមួយទៅស្រុកមួយ ទៅរៀនសាលាមួយទៀត ព្រោះគ្រប់សាលាទាំងអស់ សាលារដ្ឋរបស់យើងចាប់ពីថ្នាក់បឋមដល់ថ្នាក់ទី១២ ក្លាយជាសាលាល្អអាចទទួលបាននៅមូលដ្ឋាន»។សម្តេចធិបតី ហ៊ុន ម៉ាណែត បានថ្លែងថា ជាគោលដៅរបស់រាជរដ្ឋាភិបាល គឺត្រូវពង្រឹកវិស័យអប់រំ ជាជាងពង្រីក តាមរយៈការធ្វើឱ្យការអប់រំ នៅសាលារដ្ឋមានគុណភាព ដើម្បីបណ្តុះបណ្តាលធនធានមនុស្ស ឱ្យមានសមត្ថភាព គុណធម៌ សីលធម៌ និងវិន័យឱ្យបានល្អ។
សម្តេចបានបញ្ជាក់ទៀតថា តាមរយៈការសិក្សាលើសាលាជាង៥០សាលា សម្តេចរកឃើញសាលាមួយចំនួន ដែលលោកគ្រូអ្នកគ្រូ មានការច្នៃប្រឌិតខ្ពស់ ក្នុងការអប់រំសិស្សានុសិស្សបានយ៉ាងល្អ ដោយមិនបាច់មានការចំណាយបន្ថែមនោះទេ ហើយបានក្លាយជាគំរូមួយ សម្រាប់យកទៅអនុវត្តន៍ នៅតាមសាលាផ្សេងៗទៀត។ក្រៅពីរឿងសាលារឿនសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងឲ្យដឹងថា រាជរដ្ឋាភិបាល កំពុងគិតគូរ និងយកចិត្តទុកដាក់ផ្ដល់ប្រាក់បៀវត្ស ដល់គរុសិស្ស ដោយយកតាមមូលដ្ឋាន បៀវត្ស សរុបគុណនឹង៧០ភាគរយ ផងដែរ។
សម្ដេចធិបតី ហ៊ុន ម៉ាណែត បានមានប្រសាសន៍ថា គរុសិស្សខុសគេត្រង់ ពេលប្រឡងជាប់ចូលមកជាសិស្ស គឺអត់គិតជាប្រាក់បៀវត្សទេ ។ សម្ដេចថា កាលពីមុនគរុសិស្ស ទទួលបានប្រាក់ឧបត្ថម្ភ ៤ម៉ឺនរៀល និងក្រោយមកទៀតឡើងដល់ ៨ម៉ឺនរៀល ហើយសម្ដេចតេជោ បានកែសម្រួល ជាប្រចាំ ដើម្បីលើកកម្ពស់ ព្រោះគរុសិស្សមិនមែនជាមន្ត្រីរាជការទេ គឺជានិស្សិត ។សម្ដេចធិបតីបន្តថា គរុនិស្សិត ដែលរៀននៅវិទ្យាស្ថានកម្រិតឧត្ដម ទទួលបានជាង៦០ម៉ឺនរៀល ចំណែកគ្រូមត្តេយ្យ គ្រូបឋមទទួលបាន៥៣ម៉ឺនរៀល ដូច្នេះកើនពី៤ម៉ឺន ទៅ៨ម៉ឺន ទៅ៥០ម៉ឺនរៀល ។
សម្ដេចនាយករដ្ឋមន្ត្រីបញ្ជាក់ថា «ខ្ញុំគិតថាការពង្រឹងនេះ ត្រូវគិតគូពីការវិនិយោគ លើធនធានមនុស្ស ល្ងាចមិញខ្ញុំគិតជាមួយខាងហិរញ្ញវត្ថុថា សម្រាប់លោកគ្រូអ្នកគ្រូ ដែលប្រឡងជាប់ជាគរុសិស្ស យើងកុំយកបៀវត្សមូលដ្ឋាន យើងយកបៀវត្សសរុបគុណនឹង ៧០ភាគរយតែម្ដង» ។សម្ដេចបញ្ជាក់ថា «គរុសិស្សកាំ (ក) កាលពីឆ្នាំ២០២៣ ទទួលបាន ៦ម៉ឺន៣ពាន់រៀល គុណនឹង៧០ភាគរយ ឥឡូវ (ឆ្នាំ២០២៤) នឹងឡើងទៅ១លាន១សែន៧ម៉ឺនរៀល គរុសិស្សកាំ (ខ) ដែលចេញទៅបង្រៀងមូលដ្ឋាន កាលមុន ៧៥ម៉ឺន គុណនឹង៧៥ភាគេយ បានជាង៥៦ម៉ឺន ឥឡូវថ្មីនេះយើងគុណទៅ បាន១លាន១សែនជាង ហើយគ្រូទាបបំផុតគម្រិត (គ) កាលមុនបាន ៦៦ម៉ឺនគុណនឹង៨០ភាគរយ បាន៥៣ម៉ឺន ក្នុង១ខែ ឥឡូវយើងគុណនឹងបៀវត្សមូលដ្ឋាន បាន៩៨ម៉ឺន ជិត១លានរៀលដែរ ។ នេះមិនមែនជាបៀវត្សទេ ជាអាហារូបករណ៍» ។
ទិវាគ្រូបង្រៀន លើកទី២៦នេះមានប្រធានបទ «គ្រូបង្រៀនជាសសរស្តម្ភ នៃកំណែទម្រង់ សាលារៀនឆ្ពោះទៅរកឧត្តមភាព» ។ទន្ទឹមនិងការប្រារព្ធទិវាដឹងគុណគ្រូនេះសិស្សានុសិស្ស លោកគ្រូ អ្នកគ្រូ សាលាបឋមសិក្សាទន្សោង ក្នុងស្រុកសៀមបូក ខេត្តស្ទឹងត្រែង បានសំណូមពរដល់ស្ថាប័នពាក់ព័ន្ធជួយសាងសង់អគារសិក្សាមួយខ្នង ដើម្បីសម្រួលដល់ការរៀន និងបង្រៀន ខណៈបច្ចុប្បន្ននេះ សិស្សកំពុងតែរៀននៅក្នុងរោងដោល និងនៅតាមផ្ទះ ដែលជួបបញ្ហាប្រឈមផ្សេងៗ នៅក្នុងរដូវវស្សាភ្លៀងធ្លាក់ ។លោកគ្រូ ជៀម វណ្ណៈ តំណាងឲ្យជនជាតិដើមភាគតិចគួយ បានរៀបរាប់ថា ៖ នៅពេលមានភ្លៀងម្ដងៗ សិស្សអង្គុយរៀន មិនបានទេ ព្រោះខ្យល់ទឹកភ្លៀងសាចចូល ហើយខែប្រាំងក្តី កូនសិស្សមករៀន ត្រូវដោះអាវចេញ ក៏មានដែរ ។
លោកបន្តថា នៅសាលាបឋមសិក្សាទន្សោងនេះ មានអគារមួយខ្នង មានចំនួន០៣បន្ទប់ សម្រាប់បង្រៀនថ្នាក់ទី១ ទី២ និងទី៣ ចំណែកទី៤ ទី៥ គឺខ្ចីផ្ទះប្រជាពលរដ្ឋបង្រៀន ហើយថ្នាក់ទី៦ បង្រៀននៅក្នុងរោងដោលជាបណ្តោះអាសន្ន អស់រយៈពេល១០ឆ្នាំមកហើយ ។លោក សៅ សេង នាយកសាលាបបឋមសិក្សា ភូមិទន្សោង បានទទួលស្គាល់ថា នេះជាការតស៊ូទ្រាំនឹងភាពលំបាក ព្រោះតែចង់ឱ្យកូនចៅប្រជាពលរដ្ឋមានចំណេះដឹងដូចគេឯង ហើយភាពលំបាកនេះ ក៏ជាបញ្ហាប្រឈមធ្វើឱ្យកុមារមួយចំនួន បានបោះបង់ចោលការសិក្សា ផងដែរ ។លោក ប៉ាវ បូណា ប្រធានការិយាល័យអប់រំ យុវជន និងកីឡា ស្រុកសៀមបូក បានបញ្ជាក់ប្រាប់កាសែតថា តម្រូវការនេះ ពិតជាទាមទារឱ្យមានការជួយធ្វើការអភិវឌ្ឍគ្រប់ហេដ្ឋារចនាសម្ព័ន្ធ ព្រោះជាតំបន់ទីជនបទ ស្ថិតនៅឆ្ងាយដាច់ស្រយាល ផ្លូវក៏លំបាក ទៅមក ថែមទៀត ។លោកបន្តថា ចំណែកការស្នើសុំសាលារៀននោះ លោកបានស្នើសុំ ទៅមន្ទីរអប់រំ យុវជន និងកីឡាខេត្ត រួចហើយដែរ ប៉ុន្តែមិនទាន់មានដំណឹងយ៉ាងណានោះទេ ហើយលោក នឹងតាមដានសួរនាំទៅមន្ទីរបន្តទៀត ។
