វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 741 នាក់
ម្សិលមិញ 4563 នាក់
សរុប 14168117 នាក់
ភ្នំពេញ៖ អគ្គលេខាធិការដ្ឋាន នៃរដ្ឋសភា នៅរសៀលថ្ងៃទី២២ ខែសីហា ឆ្នាំ២០២៣នេះ បានចេញសេចក្ដីប្រកាសព័ត៌មានផ្លូវការ បង្ហាញលទ្ធផលកិច្ចប្រជុំលើកទី១ នីតិកាលទី៧ ដែលបានប្រព្រឹត្តទៅកាលពីព្រឹកមិញនេះ។
របៀបវារៈនៃសម័យប្រជុំរដ្ឋសភា លើកទី១ នីតិកាលទី៧ នាពេលនេះ គឺ ការបោះឆ្នោត ជាកញ្ចប់ ដើម្បីជ្រើសតាំងប្រធាន អនុប្រធាន រដ្ឋសភា ប្រធាន អនុប្រធានគណៈកម្មការជំនាញ ទាំងអស់នៃរដ្ឋសភា និងផ្តល់សេចក្តីទុកចិត្តចំពោះរាជរដ្ឋាភិបាល។បន្ទាប់ពីកិច្ចប្រជុំដោយជោគជ័យសម្តេចតេជោ ហ៊ុន សែន បានថ្លែងចាត់ទុកថ្ងៃទី២២ ខែសីហា ឆ្នាំ២០២៣នេះ ជាថ្ងៃរដ្ឋសភាបើកសម័យប្រជុំលើកទី១ នីតិកាលទី៧ នៃរដ្ឋសភា ដើម្បីបោះឆ្នោតជ្រើសតាំងក្បាលម៉ាស៊ីនរដ្ឋសភា និងរាជរដ្ឋាភិបាលកម្ពុជា គឺជាព្រឹត្តិការណ៍ប្រវត្តិសាស្ត្រថ្មី ដើម្បីនិរន្តរភាពនៃសន្តិភាព និងការអភិវឌ្ឍរបស់កម្ពុជា។
ជាលទ្ធផលនៃសម័យប្រជុំលើកទី១ នីតិកាលទី៧ រដ្ឋសភាបានអនុម័តគាំទ្រដល់ លោកជំទាវកិត្តិសង្គហបណ្ឌិត ឃួន សុដារី ជាប្រធានរដ្ឋសភា, លោកបណ្ឌិត ជាម យៀប ជាអនុប្រធានទី១ និងលោក វង សូត ជាអនុប្រធានទី២ រួមទាំងប្រធាន និងអនុប្រធានគណៈកម្មការទាំង ១០របស់រដ្ឋសភាផងដែរ។ ជាមួយគ្នានេះ រដ្ឋសភាក៏បានបោះឆ្នោតអនុម័តទាំងស្រុង លើសមាសភាពគណៈរដ្ឋមន្ត្រីថ្មី ដែលមានឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី។
សម្តេចតេជោ ហ៊ុន សែន បានថ្លែងថាចំពោះសុខភាព និងកម្លាំងរបស់សម្តេចមានលទ្ធភាព ក្នុងការបន្តតំណែងធ្វើជានាយករដ្ឋមន្ត្រី ពី៥-១០ឆ្នាំទៀត ហើយនៅប្រទេសមួយចំនួន នាយករដ្ឋមន្ត្រីត្រូវចុះពីតំណែង នៅពេលសំឡេងឆ្នោតធ្លាក់ចុះ ប៉ុន្តែសម្រាប់សម្តេចវិញ សំឡេងឆ្នោតគាំទ្រកើនឡើងខ្ពស់បំផុត មិនធ្លាប់មានរបស់គណបក្សប្រជាជន តែសម្តេចបែរជាចាកចេញទៅវិញ គឺដើម្បីធានានូវសន្តិភាព និងការអភិវឌ្ឍរបស់កម្ពុជារយៈពេលវែង។
សម្តេចតេជោ ហ៊ុន សែន បន្ថែមថា បើទោះបីជាសម្តេចឈប់ធ្វើនាយករដ្ឋមន្ត្រី តែសម្តេចមិនទាន់ឈប់ពីឆាកនយោបាយនោះឡើយ សម្តេចនៅតែជាប្រធានគណបក្សកាន់អំណាច និងធ្វើជាប្រធានព្រឹទ្ធសភា នៅខែមីនា ឆ្នាំ២០២៤ខាងមុខ។សម្រាប់រាជរដ្ឋាភិបាលអាណត្តិទី៧សម្តេចតេជោ ហ៊ុន សែន ចង់ឃើញ ២ចំណុចសំខាន់ ពីការដឹកនាំរបស់អ្នកបន្តវេនជំនាន់ក្រោយ ទី១៖ បន្តរក្សាសន្តិភាព ស្ថិរភាពនយោបាយបន្តទៀត និងទី២៖ គឺសម្រេចឱ្យបាននូវការចាកចេញពី ប្រទេសអភិវឌ្ឍតិចតួច ក្លាយទៅជាប្រទេសមានប្រាក់ចំណូលមធ្យមកម្រិតខ្ពស់ ហើយនឹងឈានទៅជាប្រទេស ដែលមានប្រាក់ចំណូលខ្ពស់។ក្នុងសេចក្ដីប្រកាសព័ត៌មានរដ្ឋសភាបានបង្ហាញបញ្ជីឈ្មោះប្រធានគណៈកម្មការទាំង១០ នៃរដ្ឋសភា និងសមាសភាពរបស់រាជរដ្ឋាភិបាលផងដែរ។