សម្តេចតេជោ៖អ្នកធាក់ស៊ីក្លូទាំងអស់ទៅពេទ្យអត់គិតលុយបើទារលុយរាយការណ៍!
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជានៅព្រឹកថ្ងៃទី៨ ខែមីនា ឆ្នាំ២០១៩ បានអះអាងជាថ្មីទៀតថា អ្នកធាក់ស៊ីក្លូនៅកម្ពុជាទាំងអស់ ទៅព្យាបាលនៅមន្ទីរពេទ្យ ដោយឥតគិតថ្លៃ ហើយប្រសិនបើមានករណី យកលុយត្រូវរាយការណ៍ មកភាគីពាក់ព័ន្ធ។
ក្នុងពិធីជួបសំណេះសំណាល និងពិសារអាហារជាមួយបងប្អូន អ្នកប្រកបរបរធាក់ស៊ីក្លូជាង ៣២០នាក់ នៅមជ្ឈមណ្ឌលកោះពេជ្រ សម្ដេចមានប្រសាសន៍ថា “មន្ទីរពេទ្យរដ្ឋទាំងអស់ ត្រូវផ្ដល់សេវាដោយឥតគិតថ្លៃ។ ប្រសិនបើមានការទាមទារ ប្រាក់ណាមួយពីមន្ទីរពេទ្យរបស់រដ្ឋ សូមផ្ដល់នូវព័ត៌មាននេះ សម្រាប់មូលនិធិ ដើម្បីមូលនិធិ និយាយទៅកាន់ក្រសួងសុខាភិបាល” ។សម្តេចនាយករដ្ឋមន្ដ្រី ក៏បញ្ជាអភិបាលរាជធានីភ្នំពេញ ចុះតាមដាននៅតាមមន្ទីរពេទ្យរដ្ឋ ចំពោះអ្នកធាក់ស៊ីក្លូ មកទទួលសេវាពិនិត្យ ដោយឥតគិតថ្លៃផងដែរ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ស្ថានភាពអ្នកធាក់ស៊ីក្លូ បច្ចុប្បន្នមានភាពល្អប្រសើរជាងមុន៖ “ស្ថានភាពស៊ីក្លូបច្ចុប្បន្នល្អជាងមុន ដែលបង្កសុវត្ថិភាពដល់អ្នកជិះផងដែរ។ ជាពិសេសក្នុង១ថ្ងៃទទួល៧ពាន់រៀលពីសមាគម។ អ្នកធាក់ស៊ីក្លូមានដើមទុនក្នុងដៃ។ ថ្លៃជួល២ពាន់ និងថ្លៃម្ហូប៥ពាន់។ អ្នកធាក់ស៊ីក្លូមានដើមទុន ស្រាប់ ទោះបីជាមិនដឹកភ្ញៀវក៏នៅតែមានប្រាក់ជាប់ជាប្រចាំ” ។
សម្តេចតេជោ ហ៊ុន សែន បានមានប្រសាសន៍បញ្ជាក់ជាថ្មីម្តងទៀតថា មូលនិធិស៊ីក្លូនេះ គឺមិនគ្រាន់តែឧបត្ថម្ភមួយថ្ងៃ ៧,០០០ រៀលប៉ុណ្ណោះទេ ប៉ុន្តែមូលនិធិនេះនឹងផ្តល់ប្រាក់ឧបត្ថម្ភដល់បងប្អូននៅពេលទទួលមរណៈភាពគឺបានទទួលប្រមាណ ១,០៥០,០០០ រៀលទៀតផង។បន្ថែមពីលើនេះទៀត សម្តេចថា មូលនិធិនេះ នឹងបន្តទទួលប្រាក់ឧបត្ថម្ភរហូតទៅដល់ពេលស្លាប់។ ដរាបណាបើសម្តេចបន្តធ្វើនាយករដ្ឋមន្ត្រីសមាគមនេះ នឹងមិនបាត់បង់នោះទេ។
សូមបញ្ជាក់ថា ក្រុមអ្នកធាក់ស៊ីក្លូមកជួបជុំជាមួយសម្តេច គឺបានទទួលប្រាក់២០ម៉ឺនរៀល និងសំភារៈមួយចំនួនទៀត។
សូមរំលឹកថា សម្តេចតេជោ ហ៊ុន សែន បានសម្រេចបង្កើត «មូលនិធិត្រីចក្រយាន» ឬហៅកាត់ថា «មូលនិធិស៊ីក្លូ» កាលពីដើមឆ្នាំ ២០១៨ ដែល សម្តេចតេជោផ្ទាល់និងក្រុមគ្រួសារបានឧបត្ថម្ភថវិកាប្រមាណ ១៤ម៉ឺនដុល្លារទៅក្នុងមូលនិធិ ហើយសម្តេចធ្វើអំណោយថវិកា ២ម៉ឺនដុល្លារ ក្នុងមួយខែៗដល់មូលនិធិថែមទៀតផង។
មូលនិធិស៊ីក្លូ បានផ្តល់ថវិកាឧបត្ថម្ភប្រមាណ ៧,០០០រៀល ក្នុងមួយថ្ងៃ (៥,០០០ រៀលសម្រាប់អាហារ និង២,០០០រៀល សម្រាប់ជួលស៊ីក្លូ) ឬស្មើនឹង ២១ម៉ឺនរៀលក្នុងមួយខែ ដល់អ្នកធាក់ស៊ីក្លូ។ ប្រាក់ឧបត្ថម្ភនេះ បើកជូនជារៀងរាល់ ១០ថ្ងៃម្តង តាមប្រព័ន្ធវីង (Wing)។ តាមរយៈមូលនិធិ គឺជួយដោះស្រាយភាពលំបាកមួយចំនួនធំរបស់បងប្អូនប្រកបរបរធាក់ស៊ីក្លូ និងជួយឲ្យលុយកាក់ដែលពួកគាត់រកបានពីរបរធាក់ស៊ីក្លូបាននៅសល់សម្រាប់បន្ថែមលើការចំណាយផ្សេងៗដើម្បីទ្រទ្រង់ជីវភាពអោយកាន់តែប្រសើរឡើង។
សម្តេចតេជោ ហ៊ុន សែន បានប្រកាសថា សម្តេចនឹងបន្តធ្វើជា នាយករដ្ឋមន្ត្រីក្នុងរយៈពេល១០ ឆ្នាំទៀត ដើម្បីរួមសុខរួមទុក្ខ ជាមួយបងប្អូនកូនក្មួយធាក់ស៊ីក្លូ មូលនិធិស៊ីក្លូ។ សម្តេចតេជោនាយករដ្ឋមន្ត្រី បានឧបត្ថមដល់បងប្អូនអ្នកធាក់ស៊ីក្លូ ចំនួន ៣២០នាក់ ដែលក្នុងម្នាក់ៗទទួលបាន អាវភ្លៀង ១, មុង ១, មី១កេះ, អង្ករ ៣០គីឡូក្រាម និងថវិការ២០ម៉ឺនរៀល ព្រមទាំងថវិកា ៥ម៉ឺនរៀលទៀត សម្រាប់បុណ្យចូលឆ្នាំខ្មែរខាងមុខនេះ។
