វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2914 នាក់
ម្សិលមិញ 10264 នាក់
សរុប 14142096 នាក់
ប្រទេសអ៊ុយក្រែន៖ទាហានរុស្ស៊ីដែលព្យាយាមឡោមព័ទ្ធទីក្រុងគៀវ ឥឡូវនេះកំពុងប្រឈមមុខនឹងហានិភ័យវិញម្តងបន្ទាប់ពីកងកម្លាំងអ៊ុយក្រែនបានធ្វើការវាយប្រហារតបតវិញ ។
ការប្រយុទ្ធគ្នាយ៉ាងខ្លាំងក្លាកំពុងបន្តកើតមាននៅភាគខាងលិចនិងខាងកើតនៃទីក្រុងគៀវ ខណៈកងទ័ពអ៊ុយក្រែន ដែលរងគ្រោះអស់រយៈពេលមួយខែពីការទប់ទល់ក្រោមការបាញ់ផ្លោងយ៉ាងធ្ងន់ធ្ងរកំពុងព្យាយាមវាយដណ្តើមទីតាំងពីពួកឈ្លានពានរុស្ស៊ីវិញ ដោយបើកការវាយប្រហារផ្ទាល់ខ្លួនវិញម្តង។
ក្រសួងការពារជាតិអង់គ្លេសបាននិយាយកាលពីយប់ថ្ងៃព្រហស្បតិ៍ទី២៤មីនាបានឲ្យដឹងថា ទីក្រុងពីរនៅភាគខាងលិចនៃរដ្ឋធានី គឺ ម៉ាការីវ (Makariv) និង ម៉ូឈុន (Moschun) “ប្រហែលជា”ត្រូវបានវាយបានមកវិញដោយកងទ័ពរបស់ទីក្រុងគៀវ ដែលនេះមានន័យថា ឥឡូវមាន “លទ្ធភាពជាក់ស្តែងដែលថាកងកម្លាំងអ៊ុយក្រែនអាចឡោមព័ទ្ធអង្គភាពរុស្ស៊ីនៅប៊ូឆា (Bucha) និងអៀរពីន (Irpin)”។
ប្រសិនបើអង្គភាពទាំងនោះ ដែលរាប់បញ្ចូលទាំងផ្នែកនៃក្បួនរថយន្តចម្ងាយ ៦៧ គីឡូម៉ែត្រ ដែលធ្វើដំណើរទៅជិតរដ្ឋធានីអ៊ុយក្រែនក្នុងថ្ងៃដំបូងៗនៃសង្គ្រាម ត្រូវបានឡោមព័ទ្ធមែននោះពួកគេនឹងមិនអាចពង្រឹងឬផ្គត់ផ្គង់ខ្លួនឡើងវិញបានឡើយ ហើយអាចនឹងសុំចុះចាញ់ ដោយធ្វើឱ្យទាហានរុស្ស៊ីរងបរាជ័យដ៏ធំបំផុតមិនធ្លាប់មាននៃប្រវត្តិសាស្ត្រសង្គ្រាមទាំងមូល។
ប្រភពពីមន្ទីរបញ្ចកោណបានឱ្យដឹងថា អ៊ុយក្រែនក៏បានបង្ខំឱ្យកងទ័ពរុស្ស៊ីដកថយពីភាគខាងកើតទីក្រុងគៀវផងដែរ ដោយបណ្តេញពួកគេថយក្រោយចន្លោះពី ២៤ ទៅ ៣២គីឡូម៉ែត្រចុះទៅផ្លូវឆ្ពោះទៅទិសដៅក្រុងឆឺនីហ៊ីវ (Chernihiv)។ ការវាយតបតវិញរបស់អ៊ុយក្រែនត្រូវបានគេដឹងផងដែរថាកំពុងធ្វើឡើងនៅទីក្រុងមីកូឡាអ៊ីវ (Mykolaiv) និងទីក្រុងឃើសុន (Kherson) នៅភាគខាងត្បូង និងទីក្រុងអ៊ីហ្ស៊ីយុម (Izyum) នៅភាគឦសាន។
កាលពីព្រឹកថ្ងៃព្រហស្បតិ៍ទី២៤មីនា ទាហ៊ានអ៊ុយក្រែនបានបំផ្លាញកប៉ាល់ដឹករថក្រោះដ៏ធំរបស់រុស្ស៊ីដែលចូលចតក្នុងទីក្រុងកំពង់ផែ បឺឌីយ៉ានស៍ (Berdyansk)។ វាជាការឆេះកប៉ាល់រុស្ស៊ីធំបំផុតរបស់រុស្ស៊ីនេះត្រូវបានគេទម្លាក់កំហុសលើប្រព័ន្ធផ្សព្វផ្សាយរដ្ឋរុស្ស៊ីដែលលាតត្រដាងទីតាំងរបស់នាវានេះឱ្យអ៊ុយក្រែនឃើញ។
អង្គការណាតូប៉ាន់បានប្រមាណថាលោកប្រធានាធិបតីពូទីនបានបាត់បង់ទាហានរហូតដល់ ៤០.០០០ នាក់ ទាំងស្លាប់ របួសនិងចាប់ខ្លួន ដែលនេះស្មើនឹងចំនួនប្រហែល ១ភាគ៤នៃកងទ័ពដែលពូទីនត្រៀមលក្ខណៈ មុនពេលចូលឈ្លានពានអ៊ុយក្រែន។ក្រៅពីរឿងនេះកាលពីថ្ងៃព្រហស្បតិ៍ ទី២៤ មីនាថា រុស្ស៊ីនិងអ៊ុយក្រែនបានដោះដូរឈ្លើយសឹក គ្នាជាលើកដំបូងចាប់តាំងពីទីក្រុងមូស្គូបានបញ្ជាឱ្យទាហានចូលអ៊ុយក្រែនកាលពីមួយខែមុន។
លោកស្រី អៀរីណា វើរ៉េសឆាក់ (Iryna Vereshchuk)ឧបនាយករដ្ឋមន្ត្រីអ៊ុយក្រែនបានសរសេរនៅលើហ្វេសប៊ុកថា “តាមបញ្ជាពីប្រធានាធិបតីវ៉ូឡូឌីមៀ ហ្សេលេនស្គីការដោះដូរឈ្លើយសឹកពេញលេញជាលើកដំបូងត្រូវបានធ្វើឡើង”។លោកស្រីថា “ជាថ្នូរនឹងទាហានឈ្លានពាន១០ នាក់ដែលត្រូវបានចាប់ខ្លួន យើងបានជួយសង្គ្រោះទាហានរបស់យើង ១០ នាក់” សំដៅទៅលើកងទ័ពរុស្ស៊ីនិងអ៊ុយក្រែន។
ក្រៅពីនេះ នាវិកស៊ីវិលរុស្ស៊ី ១១ នាក់ដែលត្រូវបានជួយសង្គ្រោះនៅជិតទីក្រុងកំពង់ផែអូដេសសា (Odessa)នៃសមុទ្រខ្មៅត្រូវបានដោះដូរជាមួយសមាជិកនាវិកកប៉ាល់ស៊ីវិលអ៊ុយក្រែន ១៩ នាក់ ដែលចាប់ខ្លួនដោយទីក្រុងមូស្គូ។ក្រសួងការបរទេសរុស្ស៊ីបាននិយាយនៅដើមសប្តាហ៍នេះថា ទីក្រុងមូស្គូបានបំពេញការដោះដូរឈ្លើយសឹកចំនួនពីរលើកចាប់តាំងពីខ្លួនបានចាប់ផ្តើមការលុកលុយលើអ៊ុយក្រែនកាលពីចុងខែមុន៕