វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1485 នាក់
ម្សិលមិញ 5304 នាក់
សរុប 14141011 នាក់
ភ្នំពេញ៖នៅថ្ងៃទី៣ ខែមករា ឆ្នាំ២០២២ តំណាងអយ្យការ នៃសាលាដំបូងរាជធានីភ្នំពេញ បានចោទប្រកាន់មេក្រុមបាតុករចំនួន ៩នាក់ ពាក់ព័ន្ធនឹងការរៀបចំធ្វើបាតុកម្មខុសច្បាប់នៅមុខក្រុមហ៊ុនណាហ្គាវើលដ៍ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។ យោងតាមសេចក្តីប្រកាសព័ត៌មានរបស់អ្នកនាំពាក្យអយ្យការអមសាលាដំបូងរាជធានីភ្នំពេញឲ្យដឹងថា៖មនុស្ស៩នាក់នោះ រួមមាន ឈឹម ស៊ីថរ(មេសហជីព), រី សុវណ្ណឌី, សុន ស្រីពេជ, ហ សុភាព, ឃ្លាំង សុបិន្ត, ទូច សិរីមាស, ឈឹម សុខន, សុខ ណារិទ្ធ និងឈ្មោះ សុខ គង្គា។
ក្នុងចំណោម៩នាក់នេះ មាន៦នាក់ ត្រូវបានសមត្ថកិច្ចចាប់ខ្លួនបញ្ជូនទៅកាន់តុលាការ ខណៈ៣នាក់បានរត់គេចខ្លួន។អយ្យការអមសាលាដំបូងរាជធានីភ្នំពេញ បានចោទថា ពួកគេមានការពាក់ព័ន្ធនឹងអង្គហេតុញុះញង់បំផុសបំផុលក្រុមអតីត បុគ្គលិករបស់ក្រុមហ៊ុនណាហ្គាវើលដ៍ ដែលត្រូវបានបណ្ដេញចេញឲ្យធ្វើសកម្មភាពបង្កចលាចលដល់សណ្តាប់ធ្នាប់របៀបរៀបរយសាធារណៈ និងអាចបង្កឲ្យមានអសន្តិសុខដល់សង្គម។ អយ្យការអមសាលាដំបូងរាជធានីភ្នំពេញបាន សម្រេចបើកការស៊ើបសួរលើបុគ្គលខាងលើ រួមទាំងបក្ខពួកពីបទញុះញង់បង្កឲ្យមានភាពវឹកវរ ធ្ងន់ធ្ងរដល់សន្តិសុខសង្គម តាមមាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌព្រះរាជាណាចក្រកម្ពុជា។ ពួកគេក្រោយត្រូវបានចោទប្រកាន់ដោយអយ្យការ ត្រូវបានបញ្ជូនទៅចៅក្រមស៊ើបសួរ ដើម្បីបន្តតាមនីតិវិធី។
សូមបញ្ជាក់ថា កាលពីយប់ថ្ងៃទី៣១ ខែធ្នូ ឆ្នាំ២០២១ នគរបាលបានចាប់ឃាត់ខ្លួនបុគ្គលចំនួន ៦នាក់ ក្នុងចំណោម ៩នាក់ (ចំនួន ៣នាក់ បានរត់គេចខ្លួន) ពីបទបានរៀបចំបាតុកម្មដោយខុសច្បាប់នៅខាងមុខក្រុមហ៊ុនណាហ្គាវើលដ៍ ធ្វើឲ្យប៉ះពាល់ដល់សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម។
ទន្ទឹមនិងការបង្ក្រាបនេះនដែរគេឃើញក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី ០២ ខែមករា បានចេញសេចក្តីជូនដំណឹងដល់អតីតបុគ្គលិកក្រុមហ៊ុនណាហ្កាវើលដ៍ លីមីធីត ដែលកំពុងធ្វើការដោយលើកមូលហេតុថា និយោជកមិនទូទាត់ប្រាក់បំណាច់បញ្ចប់កិច្ចសន្យាការងារដល់ខ្លួនមិនបានត្រឹមត្រូវតាមច្បាប់ ឲ្យទៅក្រសួងការងារចាប់ពីថ្ងៃទី ០៣ ខែមករា ឆ្នាំ ២០២២តទៅ ដោយផ្តល់ព័ត៌មានអំពីប្រាក់ឈ្នួល ប្រាក់អត្ថប្រយោជន៍ ដែលខ្លួនធ្លាប់ទទួលបាន រូបមន្តគណនា និងមូលដ្ឋានគណនា ដែលខ្លួនចង់បាន ដើម្បីក្រសួងធ្វើការផ្ទៀងផ្ទាត់ឡើងវិញ។សេចក្តីជូនដំណឹងរបស់ក្រសួងការងារ បានឲ្យដឹងថា ក្រសួងនឹងបង្គាប់ឲ្យនិយោជកធ្វើការទូទាត់សំណងបន្ថែមដល់បុគ្គលិក ក្នុងករណីដែលក្រសួងទទួលបានព័ត៌មានពេញលេញ ហើយរកឃើញថា មានភាពលម្អៀងក្នុងការគណនាពិតប្រាកដមែន។
ក្រសួងការបានអំពាវនាវដល់អតីតបុគ្គលិក្រុមហ៊ុនណាហ្កាវើលដ៍ដែលកំពុងធ្វើការតវ៉ាទាំងអស់ វិលមកអនុវត្តឲ្យបានត្រឹមត្រូវតាមនិតិវិធីនៃការដោះស្រាយវិវាទការងាររួមវិញ ស្របតាមស្មារតីមាត្រា ៣០២ ដល់មាត្រា ៣១៧ នៃច្បាប់ស្តីពីការងារ និងប្រកាសលេខ ៣១៧ សកបយ. ចុះថ្ងៃទី ២៩ វិច្ឆិកា ឆ្នាំ ២០០១ ស្តីពីនិតិវិធីនៃការដោះស្រាយវិវាទការងាររួម ដែលបានកំណត់និតិវិធីបន្ត គឺត្រូវប្តឹងទៅតុលាការដើម្បីបញ្ចប់វិវាទ ក្រោយពេលការផ្សះផ្សា ការចេញសេចក្តីបង្គាប់របស់ក្រុមប្រឹក្សាអាជ្ញាកណ្តាល និងការអនុវត្តវិធានការវិវាទ ត្រូវបានតុលាចេញដីកាសម្រេចចាត់ចែងតាមបណ្តោះអាសន្នលេខ ៥២៤ “ត” ដ.រ ចុះថ្ងៃទី ១៦ ខែធ្នូ ឆ្នាំ ២០២១ របស់សាលាដំបូងរាជធានីភ្នំពេញ ដោយបានកំណត់គុណវុឌ្ឍថា ជាកូដកម្មខុសច្បាប់ និងត្រូវចាត់ទុកថា ជាកំហុសធ្ងន់។
អតីតបុគ្គលិកក្រុមហ៊ុនណាហ្កាវើលដ៍ប្រមាណជាង ២០០នាក់ ធ្វើកូវដកម្មអស់រយៈពេលជាង ១០ថ្ងៃហើយ ដើម្បីទាមទារចូលបំពេញការងារជាធម្មតាវិញ ខណៈដែលកម្មករជាង១០០នាក់ទៀត ស្ម័គ្រទទួលយកការបញ្ឈប់ ប្រសិនបើភាគីនិយោជកទូទាត់ប្រាក់សំណងបានត្រឹមត្រូវ។
ការចាប់ខ្លួនមនុស្សទាំង៩នាក់កាលពីថ្ងៃទី៣១ធ្នូ នៅថ្ងៃទី១ ខែមករា ឆ្នាំ២០២២ស្នងការដ្ឋាននគរបាលរាជធានីភ្នំពេញសេចក្តីបំភ្លឺព័ត៌មានមួយឱ្យដឹងថា ការឃាត់ខ្លួនបុគ្គលិកក្រុមហ៊ុនណាហ្គាវើលដ៍ទាំង ៩នាក់នោះ ពាក់ព័ន្ធនឹងការរៀបចំធ្វើបាតុកម្មដោយខុសច្បាប់ ដែលធ្វើឱ្យប៉ះពាល់សណ្ដាប់ធ្នាប់ សាធារណៈ និងសុវត្ថិភាពសង្គម។«មុនពេលនឹងអនុវត្តវិធានការច្បាប់ ដោយចាប់ឃាត់ខ្លួនមេដឹកនាំបាតុកម្មទាំងនេះ រដ្ឋបាលរាជធានីភ្នំពេញ បានធ្វើការអំពាវនាវច្រើនលើកច្រើនសារឱ្យពួកគេបញ្ឈប់សកម្មភាពតវ៉ាដោយខុសច្បាប់ សំដៅធ្វើយ៉ាងណារក្សាបាននូវសន្តិសុខ សណ្តាប់ធ្នាប់សាធារណៈ និង សុវត្ថិភាពសង្គម។ ប៉ុន្តែពួកមេដឹកនាំបាតុកម្មមិនស្ដាប់តាមការអំពាវនាវរបស់អាជ្ញាធរ ហើយបន្តអូសបន្លាយបាតុកម្មអស់រយៈពេល ១៣ថ្ងៃមកហើយ»។
ទោះបីជាយ៉ាងនេះក្តី នាយករងទទួលបន្ទុកផ្នែកសិទ្ធិមនុស្សអង្គការលីកាដូ លោក អំ សំអាត ចាត់ទុកការចាប់ខ្លួនបុគ្គលិកក្រុមហ៊ុនណាហ្គាវើលដ៍នេះ ជាការគំរាមហែង បំភិតបំភ័យ ដើម្បីបំបាក់ស្មារតី មិនឱ្យបុគ្គលិកក្រុមហ៊ុនល្បែងមួយនេះធ្វើកូដកម្មបន្តទៀត។ ប៉ុន្តែវិធានការនេះ លោកថា ជាការរំលោភសិទ្ធិការងារបុគ្គលិកដែលធានាដោយច្បាប់។លោកបន្តថា ការទាមទារបស់បុគ្គលិកក្រុមហ៊ុនណាហ្គាវើលដ៍ គ្រាន់តែចង់ឱ្យក្រុមហ៊ុនទទួលអ្នកដែលត្រូវបញ្ឈប់ទាំង ៣៦៥នាក់ចូលធ្វើការវិញ និងទាមទារទូទាត់សំណងឱ្យបានត្រឹមត្រូវតែប៉ុណ្ណោះ។ ករណីនេះ លោកថា ភាគីពាក់ព័ន្ធគួរតែដោះស្រាយជាមួយគ្នាដោយសន្តិវិធី ដើម្បីស្វែងរកដំណោះស្រាយ មិនមែនមកចាប់ខ្លួនបុគ្គលិកទាំងនោះឡើយ។លោកថា៖«ខ្ញុំយល់ថា ករណីនេះ ជាវិវាទការងារ ដែលគួរដោះស្រាយគ្នាតាមលទ្ធភាពផ្លូវច្បាប់ ក្នុងការចរចារ ដើម្បីបញ្ចប់វិបត្តិការងារ វាគួរតែដោះលែងអ្នកទាំងអស់ហ្នឹង ហើយងាយទៅរកការងារចរចារតាមនីតិវិធី តាមច្បាប់ការងារ ដើម្បីបញ្ចប់វិបត្តិការងារ។ វាជារឿងល្អប្រសើរ ជាជាងការចាប់ខ្លួនចោទប្រកាន់ដែលបង្កឱ្យមានការរិះគន់ជាបន្តទៅទៀត»។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ លោក ឃុន ថារ៉ូ បង្ហាញការសោកស្តាយ និងថ្កោលទោសចំពោះវិធានការរបស់អាជ្ញាធរមានសមត្ថកិច្ច ដោយមិនបានអនុវត្តន៍តួនាទី និងកាត្វកិច្ចរបស់ខ្លួនស្របតាមច្បាប់ក្នុងការចូលរួមការពារសុវត្ថិភាពក្រុមកូដករ ដែលធ្វើកូដកម្មដោយសន្តិវិធី ត្បិតជាសិទ្ធិមូលដ្ឋានរបស់អង្គការវិជ្ជាជីវៈនៅកម្ពុជា។លោកអំពាវនាវដល់អាជ្ញាធរត្រូវប្រើប្រាស់តួនាទីប្រកបដោយវិជ្ជាជីវៈ អព្យាក្រិត មិនលំអៀងទៅរកភាគីណាមួយនៅក្នុងដំណើរស្វែងរកដំណោះស្រាយករណីវិវាទការងារនេះ និងដោះលែងថ្នាក់ដឹកនាំ និងសកម្មជនសហជីពទាំង ៩នាក់ ឱ្យមានសេរីភាពវិញ។
ក្រុមប្រតិភូចរចាវិវាទក្រុមហ៊ុនណាហ្គាវើលដ៍ ចាត់ទុកការចោទប្រកាន់របស់អាជ្ញាធរទៅលើក្រុមកម្មករដែលប្រមូលផ្តុំតវ៉ាអហិង្សាថា ធ្វើឱ្យប៉ះពាល់ដល់សន្តិសុខសណ្តាប់ធ្នាប់ និងអាជីវកម្មរបស់ថៅកែ ជាការលើកទឹកចិត្តឱ្យភាគីក្រុមហ៊ុនបន្តរំលោភច្បាប់ ដែលនាំឱ្យប៉ះពាល់ដល់មុខមាត់រដ្ឋាភិបាលលើឆាកអន្តរជាតិ។នៅក្នុងសេចក្តីប្រកាសព័ត៌មានកាលពីថ្ងៃទី១ ខែមករា របស់ក្រុមប្រតិភូចរចាវិវាទក្រុមហ៊ុនណាហ្គាវើលដ៍នៃសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនល្បែងមួយនេះ បានឱ្យដឹងថា៖ដើមចមដែលនាំឱ្យកម្មករធ្វើកូដកម្មចំនួន១៣ថ្ងៃកន្លងមកនេះ ដោយសារតែក្រុមហ៊ុនព្រងើយកន្តើយមិនអនុវត្តតាមច្បាប់ ហើយអាជ្ញាធរពាក់ព័ន្ធ ក្រសួងការងារថែមទាំងមិនមានចេតនាពិតប្រាកដក្នុងការរកដំណោះស្រាយជូនពួកគេនោះទេ។ ជាមួយគ្នានេះ អាជ្ញាធរបែរជាចោទថា កម្មករនិងតំណាងសហជីពធ្វើបាតុកម្មដោយខុសច្បាប់ ដែលធ្វើឱ្យប៉ះពាល់សណ្ដាប់ធ្នាប់សាធារណៈ និងសុវត្ថិភាពសង្គម ព្រមទាំងប៉ះពាល់អាជីវកម្មរបស់ក្រុមហ៊ុនទៅវិញ ។
ខ្លឹមសារក្នុងសេចក្តីប្រកាសព័ត៌មានបញ្ជាក់ថា៖«តាមសេចក្តីអំពាវនាវរបស់សាលារាជធានីភ្នំពេញថា ការប្រមូលផ្តុំរបស់កម្មករធ្វើឱ្យប៉ះពាល់ដល់អាជីវកម្មរបស់ក្រុមហ៊ុន មិនបានឆ្លុះបញ្ចាំងពីតថភាពពិតនោះទេ។ ផ្ទុយទៅវិញអាជ្ញាធរកំពុងតែលើកទឹកចិត្តដល់និយោជកបន្តរំលោភច្បាប់ ដែលធ្វើឱ្យប៉ះពាល់ដល់មុខមាត់រដ្ឋាភិបាលទាំងក្នុងតំបន់ និងអន្តរជាតិថែមទៀតផង»។ក្រុមប្រតិភូចរចាវិវាទក្រុមហ៊ុនណាហ្គាវើលដ៍អះអាងថា បើទោះបីជាមានការចាប់ខ្លួនមនុស្ស ១០នាក់ ក៏កម្មករទាំងអស់នៅតែប្តេជ្ញាចិត្តបន្តធ្វើកូដកម្មដោយអហិង្សា ដោយសន្តិវិធីរហូតមានដំណោះស្រាយផងដែរ ។
ទាក់ទងនិងការតវ៉ារបស់បុគ្គលឹកក្រុមហ៊ុនណាហ្កាដើម្បីផលប្រយោជន៍របស់ពួកគេកាសែតហ្វ្រេសញូវបានចេញផ្សាយអត្ថបទមួយសសេរដោយចៅចាក់ស្មុកនៅថ្ងៃទី១មករាដោយចោទប្រកាន់ថា៖ ចរិតនៃការប្រើប្រាស់រូបភាពតវ៉ាដើម្បីដុតកំហឹងសាធារណជន និងការប្រើប្រាស់វិធីសាស្ត្រធ្វើជនរងគ្រោះតូបនីយកម្មលើការរំលោភបំពានច្បាប់ របស់ក្រុមជនអគតិមួយចំនួនជ្រកក្រោមស្លាកសហជីព និងអង្គការសង្គម ស៊ីវិលក្នុងព្រឹត្តិការណ៍បាតុកម្មខុសច្បាប់របស់អតីតបុគ្គលិកក្រុមហ៊ុនណាហ្គាវើល៍ ដើម្បីបុព្វហេតុបដិវត្តន៍ពណ៌ត្រូវបានបកអាក្រាតបន្ថែម ក្រោយបុគ្គល៩នាក់ដែលជាជនសកម្ម និងសមាជិកនៃសហជីពទ្រទ្រង់សិទ្ធិការងារ បុគ្គលិកកម្មករខ្មែរនៃក្រុមហ៊ុន ណាហ្គា វើលដ៍ ដឹកនាំដោយឈ្មោះ ឈឹម ស៊ីថរ ត្រូវបានចាប់ខ្លួនដោយកម្លាំងស្នងការនគរបាលរាជធានីភ្នំពេញ។
ចៅចាក់ស្មុកបានហៅការបង្ក្រាបរបស់នគរបាលថា ធ្វើឡើងដោយឈរលើមូលដ្ឋានច្បាប់ត្រឹមត្រូវ នោះគឺអនុ លោមទៅតាមមាត្រា៤៩៤និង៥៩៥ ក្រមព្រហ្មទណ្ឌនៃព្រះរាជាណាចក្រកម្ពុជាបច្ចុប្បន្ន ដែលអនុញ្ញាតឱ្យសមត្ថកិច្ចនគរបាលអនុវត្តនីតិវិធីទៅតាមវិធានការច្បាប់។ រយៈពេល ១៣ ថ្ងៃនៃការធ្វើបាតុកម្មរបស់ក្រុមអតីតបុគ្គលិកក្រុមហ៊ុនណាហ្គាវើលដ៍នាពេលកន្លងមកត្រូវបាន គេវាយតម្លៃថាមិនមែនដើម្បីគោលបំណងការពារសិទ្ធិបុគ្គលិក និងការពារអត្ថប្រយោជន៍បុគ្គលិកកម្មករឡើយ តែហេតុផល និងភស្តុតាងនានាដែលបានរកឃើញបង្ហាញពីទង្វើទុច្ចរិតនៃមេសហជីព និងជនសកម្មនៃការរៀបចំបាតុកម្មនេះដោយបានយកសហជីព និងសកម្មភាពបាតុកម្មទៅបម្រើផលប្រយោជន៍នយោបាយ។
ចៅចាក់ស្មុកចោទថាសហជីពទ្រទ្រង់សិទ្ធិការងារ បុគ្គលិកកម្មករខ្មែរនៃក្រុមហ៊ុនណាហ្គា វើលដ៍ ដឹកនាំដោយឈ្មោះ ឈឹម ស៊ីថរ និងបក្ខពួកដោយមានការរៀបចំផែនការយ៉ាងច្បាស់លាស់ ព្រមទាំងមានការគាំទ្រថវិកាពីក្រៅប្រទេសផង នោះ បានធ្វើសកម្មភាពបំពានច្បាប់ម្តងហើយម្តងទៀត ហើយបានយករាជរដ្ឋាភិបាលកម្ពុជាធ្វើជាចំណាប់ខ្មាំង ក្រោមលេសទាមទារសិទ្ធិការងារ និងការពារផលប្រយោជន៍ បុគ្គលិកកម្មករ តែទង្វើជាក់ស្តែង ពួកគេមិនស្តាប់ការសម្របសម្រួលរបស់ស្ថាប័នមានសមត្ថកិច្ច ដោះស្រាយជម្លោះឡើយ។ ពួកគេបន្តបំពានច្បាប់ បើទោះបីជាអាជ្ញាធរមានសមត្ថកិច្ចបានណែនាំជាច្រើនដងក៏ដោយ ហើយរបៀបនៃការធ្វើបាតុកម្ម និងសញ្ញាផ្សេងៗដែលពួកគេប្រើប្រាស់ក្នុងការធ្វើបាតុកម្មសុទ្ធសឹងតែមានការទាក់ទងនឹងបណ្តាញនៅបរទេសទាំងអស់។
បណ្តាញបរទេសដែលគេប្រើក្នុងការតវ៉ានិងផ្តួលរំលំរបបដឹកនាំមួយចំនួនដូចជានៅកូរ៉េខាងត្បូង នៅម៉ាឡេស៊ី នៅហុងកុង និងនៅថៃ ភូមាជាដើម។ ពួកគេបន្តលាបពណ៌រាជរដ្ឋាភិបាលកម្ពុជា ក៏ដូចជាក្រសួងស្ថាប័នពាក់ព័ន្ធថាបំបិទសិទ្ធិសេរីភាពពួកគេ និងមិនគិតពីផលប្រយោជន៍អតីតបុគ្គលិកកម្មករ ដើម្បីញុះញង់ឱ្យសាធារណមតិយល់ច្រឡំលើរាជរដ្ឋាភិបាល បង្កើតកំហឹងប្រឆាំងរដ្ឋាភិបាល តែធាតុពិតគឺពួកគេបាននិងកំពុងប្រើប្រាស់ អតីតបុគ្គលិកកម្មករក្រុមហ៊ុនណាហ្គាវើលដ៍ជាលេសនយោបាយសុទ្ធសាធ។
ចៅចាក់ស្មុកបានសន្និដ្ឋានថា នៅពេលបាតុកម្ម ចាប់ផ្តើម និងថ្ងៃបន្តបន្ទាប់ សមាគមនិងអង្គការសង្គមស៊ីវិលមួយចំនួនដែលគេដឹងថា ជាប្រតិបត្តិករបដិវត្តន៍ពណ៌យ៉ាងសកម្ម ចាប់តាំងពីយូរមកហើយទាំងថ្មីទាំងចាស់ បានចេញធ្វើសកម្មភាពស៊ីចង្វាក់គ្នាដើម្បីគាំទ្រកម្លាំងបាតុកម្មខុសច្បាប់នេះតាមរយៈការចេញសេចក្តីថ្លែងការណ៍ ការចេញសារផ្សេងៗដើម្បីគាំទ្របាតុកម្មខុសច្បាប់នេះ។ នេះគឺជាទម្លាប់របស់ពួកគេដែលតែងតែធ្វើជនរងគ្រោះតូបនីយកម្មលើសកម្មភាពបទល្មើសដែលពួកគេធ្វើ និង បំភ្លៃសាធារណៈមតិថាពួកគេជាអ្នកលើកតម្លៃ និងលើកស្ទួយសិទ្ធិមនុស្ស ប្រជាធិបតេយ្យ និងសិទ្ធិការងារ តែគ្មានគ្មានផេះអីទេ គឺគ្រាន់តែជាការទទួលលុយដើម្បីអនុវត្តផែនការតាមការកំណត់គោលបំណងរបស់ម្ចាស់ជំនួយពួកគេប៉ុណ្ណោះ។ប្រសិនបើសមត្ថកិច្ចរកឃើញថា សហជីពទ្រទ្រង់សិទ្ធិការងារ បុគ្គលិកកម្មករខ្មែរនៃក្រុមហ៊ុនណាហ្គា វើលដ៍ ដឹកនាំដោយឈ្មោះ ឈឹម ស៊ីថរ ទទួលថវិកាមិនស្របច្បាប់ មកធ្វើបាតុកម្មមិនស្របច្បាប់នេះ អាចនឹងត្រូវប្រឈមមុខច្បាប់ធ្ងន់ធ្ងរ ព្រោះវាជាការទទួលហិរញ្ញប្បទាន ខុសច្បាប់មកធ្វើសកម្មភាពប្រឆាំងនឹងកម្ពុជា។ បើតាមការចោទប្រកាន់នេះក្រុមកូដករដែលចាប់ខ្លួនអាចនឹងត្រូវជាប់គុក!៕