កម្ពុជាចំណាយអស់ជាង ១ពាន់លានដុល្លារ សម្រាប់កម្មវិធីជួយសង្គម និងស្តារសេដ្ឋកិច្ច ក្នុងអំឡុងវិបត្តិជំងឺកូវីដ១៩សេដ្ឋកិច្ចកម្ពុជាថយតិច!!
03-April-2024 / សេដ្ឋកិច្ច
ភ្នំពេញ៖ រហូតមកទល់នឹងពេលនេះ រាជរដ្ឋាភិបាលកម្ពុជា បានចំណាយកញ្ចប់ថវិកាជាង ១ពាន់លានដុល្លារហើយ សម្រាប់កម្មវិធីជួយសង្គម និងស្តារសេដ្ឋកិច្ច នៅក្នុងអំឡុងពេលប្រយុទ្ធប្រឆាំងជំងឺកូវីដ១៩នេះ។
ថ្លែងនៅក្នុងពិធីអញ្ជើញប្រកាសបើកយុទ្ធនាការចាក់វ៉ាក់សាំងកូវីដ១៩ ដល់កុមារ និងយុវវ័យដែលមានអាយុចាប់ពីក្រោម ១៨ឆ្នាំ នៅវិមានសន្តិភាព កាលពីថ្ងៃទី ១ខែសីហា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ឲ្យដឹងថា គិតមកទល់នឹងពេលនេះ រាជរដ្ឋាភិបាល បានចំណាយថវិកាអស់ប្រមាណ ១ភាគ ៣ ឬស្មើនឹងជាង ១ពាន់លានដុល្លារ នៃថវិកាសន្សំដែលមានក្នុងដៃស្រាប់សរុបជាង ៣ពាន់លានដុល្លារ ក្នុងការដោះស្រាយបញ្ហានា នា ដើម្បីគ្រប់គ្រងស្ថានការណ៍ក្នុងប្រទេសដែលបង្កឡើងដោយជំងឺកូវីដ១៩។
សម្តេចតេជោ ហ៊ុន សែន បានគួសបញ្ជាក់ថា ថ្វីដ្បិតវិបត្តិជំងឺកូវីដ១៩ បានបង្កផលប៉ះពាល់ដល់សេដ្ឋកិច្ចកម្ពុជាក៏ដោយ ក៏ប៉ុន្តែវាមិនមានន័យថា អាចធ្វើឲ្យសេដ្ឋកិច្ចកម្ពុជាដួលរលំនោះទេ ខណៈរាល់ការចំណាយនៅក្នុងអំឡុងពេលនេះ រាជរដ្ឋាភិបាល បានប្រើប្រាស់ថវិកាសន្សំរបស់ខ្លួនប៉ុណ្ណោះ ដោយមិនទាន់បានប្រើប្រាស់ប្រាក់កម្ចីបរទេសឡើយ។ ការណ៍នេះបង្ហាញពីភាពចាស់ទុំរបស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចដែលមានភាពហ្មត់ចត់ក្នុងការចាត់ចែងគ្រប់គ្រងដឹកនាំប្រទេស ពោលគឺ «មិនមែនរដ្ឋាភិបាលកញ្ជើធ្លុះនោះឡើយ»។
គិតមកទល់នឹងពេលនេះ រាជរដ្ឋាភិបាល បានចំណាយថវិកាជាង ៤០០លានដុល្លារ តាមរយៈកម្មវិធីឧបត្ថម្ភសាច់ប្រាក់ជូនប្រជាពលរដ្ឋក្រីក្រ និងជនងាយរងគ្រោះក្នុងអំឡុងពេលប្រយុទ្ធប្រឆាំងជំងឺកូវីដ១៩ ប្រមាណជិត ៣លាននាក់ នៅទូទាំងប្រទេស។ ក្រៅពីនេះ ក៏បានផ្តល់ប្រាក់ឧបត្ថម្ភដល់កម្មករ បម្រើការងារនៅក្នុងវិស័យរោងចក្រវាយនភណ្ឌកាត់ដេរ ស្បែកជើង និងកាបូបធ្វើដំណើរ និងបុគ្គលិកបម្រើការងារនៅក្នុងវិស័យពាក់ព័ន្ធទេសចរណ៍ ដែលត្រូវថៅកែព្យួរការងារ ក្នុងអំឡុងពេលវិបត្តិនេះផងដែរ។
ទន្ទឹមនឹងនេះ រាជរដ្ឋាភិបាល ក៏បានចំណាយថវិកាជាច្រើនទៅលើការជួយសង្គ្រោះវិស័យឯកជន និងសង្គម នៅក្នុងវិស័យអាទិភាពសំខាន់ៗក្នុងការជំរុញកំណើនសេដ្ឋកិច្ច ដែលរងផលប៉ះពាល់ពីវិបត្តិជំងឺកូវីដ១៩។សម្តេចតេជោ ហ៊ុន សែន បានថ្លែងថា សម្រាប់កំណើនសេដ្ឋកិច្ចរបស់កម្ពុជា ដំបូងឡើយព្យាការណ៍ថា នឹងមានកំណើន ៤,១ភាគរយ នៅឆ្នាំ២០២១ ប៉ុន្តែការរំខានរបស់ជំងឺកូវីដ១៩ យើងព្យាករណ៍សេដ្ឋកិច្ចមកនៅត្រឹមតែ ២,៥ភាគរយប៉ុណ្ណោះ។
សម្តេចតេជោ បានមានប្រសាសន៍ថា ក្នុងអំឡុងពេលជួបវិបត្តិនៃជំងឹកូវីដ១៩នេះ សេដ្ឋកិច្ចរបស់កម្ពុជា ពឹងផ្អែកខ្លាំងទៅលើវិស័យកសិកម្ម។ ក្នុងន័យនេះ ប្រមុខរាជរដ្ឋាភិបាលកម្ពុជា បញ្ជាក់ថា ទោះបីកម្ពុជាជួបវិបត្តិក្តី តែកម្ពុជាមិនបារម្ភពីការខ្វះខាតស្បៀងនោះទេ។
តាមការបញ្ជាក់ពីប្រមុខរាជរាជរដ្ឋាភិបាលកម្ពុជា បានមានប្រសាសន៍ថា ក្នុងរយៈពេល ៧ខែឆ្នាំ ២០២១នេះ ចំណូលពន្ធគយ និងពន្ធដារ ទទួលបានចំនួន ៣០៦១លានដុល្លារ ដែលនឹងរំពឹងថា នឹងអាចទទួលបានយ៉ាងហោចណាស់ចំនួន ៥ពាន់លានដុល្លារ នៅដំណាច់ឆ្នាំនេះ។ ទោះបីជាចំណូលពន្ធពេលនេះ ថយចុះបន្តិចក៏ដោយ ប៉ុន្តែសម្តេចតេជោ បានថ្លែងថា ចំណូលចរន្តនេះ នឹងអាចរក្សាបានក្នុង១ខែជាមធ្យមចំនួន ៤០០លានដុល្លារ ដែលអាចទ្រទ្រង់ការចំ ណាយបាន៕
