វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1998 នាក់
ម្សិលមិញ 3528 នាក់
សរុប 14188383 នាក់
ភ្នំពេញ៖ឧបការីរដ្ឋមន្ត្រីការបរទេសសហរដ្ឋអាមេរិក លើកឡើងថា ប្រទេសកម្ពុជានឹងទទួលបាននូវផលប្រយោជន៍ពីការផ្ដល់សិទ្ធិធ្វើនយោបាយឡើងវិញសម្រាប់លោក កឹម សុខា ប្រសិនបើមេដឹកនាំអតីតគណបក្សសង្គ្រោះជាតិដែលត្រូវបានតុលាការកំពូលរំលាយរូបនេះ ត្រូវបានដោះស្រាយបញ្ចប់ ចំពោះការខ្វែងគំនិតខាងនយោបាយ ខណៈសំណុំរឿងនេះកំពុងតែបន្តនីតិវិធីនៅតុលាការនៅឡើយ។
តាមរយៈការិយាល័យសម្រាប់កិច្ចការអាស៊ីបូព៌ា និងប៉ាស៊ីហ្វិក នៃក្រសួងការបរទេសសហរដ្ឋអាមេរិក ឧបការីរដ្ឋមន្ត្រីការបរទេសសហរដ្ឋអាមេរិក លោក Daniel J.Kritenbrink បានបង្ហោះសារនៅលើបណ្ដាញសង្គម Twitter នៅថ្ងៃពុធម្សិលមិញថា សហរដ្ឋអាមេរិកពិតជាមានការខកចិត្តចំពោះសវនាការដែលមានលក្ខណៈជានយោបាយ ហើយការជំនុំជម្រះនេះនៅតែបន្តអូសបន្លាយ ដោយគ្មានដំណោះស្រាយណាមួយចំពោះសំណុំរឿងនេះនៅឡើយ។ លោកលោក Daniel J.Kritenbrink ក៏បង្ហាញចិត្តសោមនស្សរីករាយដែលបានជួបលោក កឹម សុខា កាលពីថ្ងៃទី១២ ខែកក្កដា ឆ្នាំ២០២២ អំឡុងពេលដែលលោកបានបំពេញទស្សនកិច្ចនៅកម្ពុជា៖ «ខ្ញុំមានសោមនស្សរីករាយដែលបានជួបលោក កឹម សុខា អំឡុងពេលដំណើរបំពេញទស្សនកិច្ចរបស់ខ្ញុំទៅកាន់រាជធានីភ្នំពេញ។ សហរដ្ឋអាមេរិកនៅតែមានការខកចិត្តចំពោះសវនាការដែលមានលក្ខណៈជានយោបាយ ហើយបន្តអូសបន្លាយដោយគ្មានដំណោះស្រាយ។ ប្រទេសកម្ពុជានឹងទទួលបាននូវផលប្រយោជន៍ពីដំណោះស្រាយនយោបាយ ពីការស្តារឡើងវិញចំពោះសិទ្ធិនយោបាយលោក កឹម សុខា»។
រឿងក្ដីលោក កឹម សុខា កំពុងស្ថិតនៅក្នុងដៃចៅក្រមជំនុំជម្រះនៅឡើយ។ មេបក្សជំទាស់រូបនេះត្រូវបានសមត្ថកិច្ចចូលចាប់ខ្លួនទាំងពាក់កណ្តាលអធ្រាត្រ កាលពីខែកញ្ញា ឆ្នាំ២០១៧ នៅគេហដ្ឋានរបស់លោក ស្ថិតក្នុងខណ្ឌទួលគោក រាជធានីភ្នំពេញ។ដល់ពេលនេះ ការជំនុំជម្រះលើសំណុំរឿងលោក កឹម សុខា ជុំវិញបទចោទ «សន្ទិដ្ឋិភាព» ត្រូវរ៉ូវដោយសម្ងាត់ជាមួយរដ្ឋបរទេស ឬភ្នាក់ងារបរទេស ចង់ផ្ដួលរំលំរដ្ឋាភិបាលនេះ បានបន្តអូសបន្លាយប្រមាណ២ឆ្នាំមកហើយ គិតចាប់តាំងពីចាប់ផ្ដើមបើកការជំនុំជម្រះកាលពីដើមឆ្នាំ២០២០មក។
សូមបញ្ជាក់ថាកម្ពុជាចង់ឲ្យអាមេរិកលុបចោលបំណុលដែលរបបលន់នល់ជំពាក់ប្រមាណ៤០០លានដុល្លារអាមេរិកនិងចង់ឲ្យបន្តផ្តល់ប្រពន្ធ័អនុគ្រោះពន្ធ័GSPដែលផុតកំណត់កាលពីឆ្នាំ២០២០មកកម្ពុជាវិញ។តាមរយៈប្រព័ន្ធអនុគ្រោះពន្ធនេះ បានបើកផ្លូវឱ្យកម្ពុជាត្រូវបង់ពន្ធក្នុងកម្រិតតិចតួច ឬមិនបង់ពន្ធសោះ សម្រាប់ការនាំទំនិញចូលទីផ្សារសហរដ្ឋអាមេរិក។ ស្ថិតក្រោមគោលការណ៍នេះ នាំឱ្យកម្ពុជាទទួលបានផលចំណេញក្នុងមួយឆ្នាំៗប្រមាណ១៨០លានដុល្លារអាមេរិក។