វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 315 នាក់
ម្សិលមិញ 4027 នាក់
សរុប 14152985 នាក់
ភ្នំពេញ ៖ ប្រជាពលរដ្ឋបានឲ្យដឹងថា៖ ក្នុងសង្កាត់បាក់ខែងសំបូរណាស់ ការដាក់អ៊ូសាឡង់បូមខ្សាច់ លាន់ឮកងរំពងពេញភូមិ .។ គ្រាន់តែក្នុងមូលដ្ឋានសង្កាត់បាក់ខែង ខណ្ឌជ្រោយចង្វារ រាជធានីភ្នំពេញ មានការដាក់អ៊ូសាឡង់បូមខ្សាច់ មានប្រមាណ៥-៦កន្លែង ។
ក្នុងនោះទីតាំងរបស់ ឧកញ៉ា លឹម ស្រូយ ២កន្លែង ធ្វើអាជីកម្មបូមខ្សាច់យ៉ាងចាស់វស្សានៅទីនោះ និងជាបុគ្គលម្នាក់ ខាងបូមខ្សាច់លោតឆ័ត្រដ៏ល្បីផងដែរកន្លងទៅគឺធ្លាប់បូមខ្សាច់ពីទន្លេសាប ក្នុងខណ្ឌព្រែកព្នៅ ទម្លុះផ្លូវជាតិលេខ៥ បូមខ្សាច់ដាក់ចូលបឹងសំរោង។
នៅព្រឹកថ្ងៃទី៤ ខែធ្នូ ឆ្នាំ២០២០ តំណាងអភិបាល នៃគណៈអភិបាល និងជាគណៈបញ្ជាការឯកភាពរាជធានីភ្នំពេញ គឺលោក ស៊ុយ សេរិទ្ធ អភិបាលរង សាលារាជធានីភ្នំពេញ បានដឹកនាំមន្ត្រីជំនាញ មានការសហការចូលរួមពីអាជ្ញាធរសង្កាត់ ខណ្ឌ ចុះត្រួតពិនិត្យទទួលស្គាល់ថា ការដាក់អ៊ូសាឡង់បូមខ្សាច់ គ្មានលិខិតអនុញ្ញាត ពីរដ្ឋបាលសាលារាជធានីភ្នំពេញមែន ។ ករណិយ៍នេះប្រជាពលរដ្ឋសួរថា ៖ ការដាក់អ៊ូបូមខ្សាច់រាប់សិបឆ្នាំមកហើយ ហេតុអីក៏អាជ្ញាធរភូមិ-សង្កាត់-ខណ្ឌ មិនដឹង ..?
លោក គង់ ប៊ុនលី ចៅសង្កាត់បាក់ខែង បានឱ្យកាសែតដឹង តាមទូរស័ព្ទនៅព្រឹកថ្ងៃទី៤ ខែធ្នូ ឆ្នាំ២០២០ ថា៖ អាជ្ញាធរក្រុងពិតជា បានចុះមកពិនិត្យមើលមែននៅកន្លែងទីតាំងដាក់អ៊ូបូមខ្សាច់ ក្នុងសង្កាត់បាក់ខែង ប៉ុន្តែលោកមិនទាន់ដឹងពីគោលការណ៍ថ្នាក់លើមានចំណាត់ការបែបណា ពីព្រោះចៅសង្កាត់រងម្នាក់បានទៅចូលរួម នឹងមិនទាន់រាយការណ៍ជូនមកលោកនៅឡើយ។ទាក់ទងនិងសកម្មភាពបូមខ្សាចអត់ច្បាប់លក់យកលុយចាយនេះលោក គង់ ប៊ុនលី ចៅសង្កាត់បាក់ខែង បានបន្តថា៖ ឋានៈត្រឹមខ្ញុំថ្នាក់មូលដ្ឋានគេមិនស្តាប់ទេ អាងអីពីថ្នាក់លើៗ ដល់ពេលនេះថ្នាក់លើកចុះមកដឹងហើយថាយ៉ាងមេច. !
សូមរំឮកថា៖ ទីតាំងដាក់អ៊ូសាឡង់បូមខ្សាច់នៅសង្កាត់បាក់ខែង មិនត្រឹមតែឧកញ៉ា លឹម ស្រូយ ជាជើងខ្លាំងមានឱកាសបូមខ្សាច់រាប់ឆ្នាំនៅទីនោះទេ គាត់មានទីតាំងដល់២កន្លែង បូមយ៉ាងអនាធិបតេយ្យ និងជាមេក្លោងខាងចេញមុខកាង រត់ការឱ្យទីតាំងដាក់អ៊ូសាឡង់បូមខ្សាច់ជាច្រើនកន្លែងនៅមូលដ្ឋានសង្កាត់បាក់ខែង ហើយមានឈ្មោះ«ជាតិ» ។មានពាក្យចចាមរ៉ាមខ្លះថា ឈ្មោះ «ជាតិ» មានដាក់ហ៊ុនខ្លះដែរជាមួយឧកញ៉ា លឹម ស្រូយ។
ពាក់ព័ន្ធករណីនេះ ឧកញ៉ា លឹម ស្រូយ ប្រាប់កាសែតថា៖ កន្លែងបូមខ្សាច់គាត់មានច្បាប់ តែមិនមែនចេញដោយក្រសួងរ៉ែនិងថាមពល ទេ គឺចេញដោយក្រសួងការពារជាតិ ក្នុងរុករកគ្រាប់យុទ្ធភ័ណ្ឌក្នុងទន្លេ?។ ។ លោកឧកញ៉ា លឹម ស្រូយ បន្តថា៖ ដោយឡែកកន្លែងដាក់អ៊ូមានសាឡង់ម៉ាស៊ីនបូមខ្សាច់ មិនមែនជារបស់គាត់ទេ ប៉ុន្តែគាត់ជួលដីនោះទៅអោយឧកញ៉ា លាង ឃុន ដើម្បីបូមខ្សាច់ទៅអភិវឌ្ឍន៍នៅម្តុំ ក្រោនភ្នំពេញ ហើយព្រឹកថ្ងៃទី៤ ខែធ្នូ ឆ្នាំ២០២០ ស្រាប់តែមានខាងអាជ្ញាធរក្រុង និងខណ្ឌ សង្កាត់ តម្រូវឱ្យពួកគាត់ធ្វើការស្នើសុំច្បាប់អោយបានត្រឹមត្រូវ ដោយខាងក្រុងទុកពេលឱ្យរយៈពេល១ខែ។ លោកឧកញ៉ា លឹម ស្រូយ បានធ្វើការបដិសេធ ថា៖ «ខ្ញុំមិនអោយអ្នកណាមកដាក់ហ៊ុនជាមួយខ្ញុំទេ បើឈ្មោះ«ជាតិ»នោះកាន់តែមិនមែន ខណៈ«ជាតិ» គាត់មានលុយឯណាមករកស៊ីជាមួយខ្ញុំ ។
លោក ឃ្លាំង ហួត អភិបាលខណ្ឌជ្រោយចង្វារ បានប្រាប់ ថា៖ ថ្ងៃនេះខាងសាលារាជធានីភ្នំពេញមកពិនិត្យ ដោយសារថ្ងៃមុនមានបណ្តឹងមួយ ខ្ញុំក៏ចុះទៅធ្វើ ចុះទៅបិទ ដល់ចុះទៅបិទខាងហ្នឹងគេខឹង ថាគាត់រកស៊ីមិនបាន គេរកស៊ីបាន តែគាត់ស្តាប់ខ្ញុំមិនបាន …។ខ្ញុំប្រាប់គាត់ថា ការរកសុីទទួលទានក្នុងមូលដ្ឋានខ្ញុំ .ខ្ញុំគាំទ្រខាងអភិវឌ្ឍន៍ប្រទេសជាតិ ទី១-មានច្បាប់ ន,ទី២-ត្រូវបង់ពន្ធអោយបានត្រឹមត្រូវតាមច្បាប់ និងទី៣ -កុំអោយប៉ៈពាល់ប្រជាជន.រួចក៏បិទទូរស័ព្ទ។
លោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូនបានធ្លាប់ ប្រាប់កាសែតថា៖ ការទម្លុះផ្លូវជាតិ ចាំបាច់ត្រូវធ្វើលិខិតស្នើសុំការអនុញ្ញាតពីក្រសួងសាធារណការ និងដឹកជញ្ជូន មិនមែនចេះតែទម្លុះតាមចិត្តទេ ហើយការស្នើសុំនេះទៀតសោតខាងក្រសួងក៏មិនសំដៅថា អនុញ្ញាតអោយដែរ សំខាន់ត្រូវឱ្យខាងជំនាញបច្ចេកទេស ទៅពិនិត្យ វាយតម្លៃ ថាអោយច្បាប់ ឬមិនឱ្យ ។ គេមិនដឹងថាតើហេតុអីបានជារដ្ឋបាលសាលារាជធានីភ្នំពេញទើបនឹងដឹងថាទីតាំងដាក់អ៊ូសាឡង់ម៉ាសុឺនបូមខ្សាច់នៅសង្កាត់បាក់ខែង ខណ្ឌជ្រោយចង្វារធ្វើអាជីវម្មលោតឆ័ត្រ (ឯកសារមិនគ្រប់លក្ខណៈ) នោះទេ?..៕