វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1084 នាក់
ម្សិលមិញ 4027 នាក់
សរុប 14153754 នាក់
ភ្នំពេញ៖ទូតអាមេរិកប្រចាំនៅកម្ពុជាបានប្រកាសចាប់ផ្ដើមយុទ្ធនាការបញ្ចេញសំឡេងលើផ្នែកប្រជាធិបតេយ្យនិងសិទ្ធិមនុស្សតែលោកជិន ម៉ាលីន រដ្ឋលេខាធិការ អ្នកនាំពាក្យក្រសួងយុត្ដិធម៌និងសិទ្ធមនុស្សបានលើកឡើងតាមហ្វេសប៊ុកនៅថ្ងៃទី១ធ្នូថា៖យុទ្ធនាការផ្នែកប្រជាធិបតេយ្យនិងសិទ្ធិមនុស្សរបស់ស្ថានទូតអាមេរិកគឺជា“យុទ្ធនាការល្អ តែខុសកាលៈទេសៈ”។
លោកជិន ម៉ាលីនថា “ជាទស្សនៈផ្ទាល់ខ្លួន ក្នុងកាលៈទេសៈដ៏លំបាកដែលកម្ពុជាកំពុងទទួលរងការវាយប្រហារពីCovid-19នាពេលនេះស្ថានទូតអាមេរិករួមទាំងអង្គការសិទ្ធិមនុស្សជាតិនិងអន្តរជាតិផ្សេងទៀតគួរតែរួមគ្នាចូលរួមជាមួយរាជរដ្ឋាភិបាលក្នុងការធ្វើសកម្មភាពទប់ស្កាត់ការរីករាលដាលនៃការឆ្លងCovid-19 នេះចូលដល់សហគមន៍ ដើម្បីទទួលបានការគាំទ្រនិងស្វាគមន៍ពីប្រជាជាតិខ្មែរទូទាំងប្រទេស”។ លោកបញ្ជាក់ថាវិធានការទប់ស្កាត់ការរីករាលដាលនៃការឆ្លងCovid-19 ចូលដល់សហគមន៍នាពេលនេះ គឺដើម្បីការពារ និងសង្គ្រោះអាយុជីវិតរបស់ពលរដ្ឋ ដែលជាការធានាបាននូវសិទ្ធិជាមូលដ្ឋានមួយរបស់ពលរដ្ឋ គឺសិទ្ធិរស់រានមានជីវិតដែលសិទ្ធិនេះមានអាទិភាពជាងសិទ្ធិណាៗទាំងអស់។
លោកជិន ម៉ាលីនបន្ថែមថា “ប្រសិនបើសិទ្ធិនេះមិនត្រូវបានធានានិងការពារនោះទេសិទ្ធិផ្សេងៗទៀតក៏នឹងពុំមានអាទិភាពនិងតម្លៃអ្វីដែរ”។គួរឲ្យដឹងដែរថាស្ថានទូតអាមេរិកប្រចាំនៅកម្ពុជាបានប្រកាសយុទ្ធនាការនៅក្នុងខែធ្នូនេះដោយស្ថានទូតធ្វើការអបអរទំនាក់ទំនងនិងចាប់ផ្ដើមយុទ្ធនាការ “បញ្ចេញសំឡេងលើផ្នែកលទ្ធិប្រជាធិបតេយ្យនិងសិទ្ធិមនុស្ស” ដែលជាផ្នែកមួយនៃការរម្លឹកដែលមានរយៈពេល១ឆ្នាំខួបលើកទី៧០ឆ្នាំនៃការបង្កើតទំនាក់ ទំនងការទូតរវាងអាមេរិកនិងកម្ពុជា។
សូមបញ្ជាក់ថាទិវាសិទ្ធមនុស្សអន្តរជាតិនឹងត្រូវប្រារព្ធធ្វើនៅថ្ងៃទី១០ធ្នូខាងមុខនេះ។មានការកត់សម្គាល់ថាកាលពីថ្ងៃទី១៦វិច្ឆិកាកន្លងទៅនេះសមាជិកសភានិងព្រឹទ្ធសភាអាមេរិកមួយចំនួនបានចុះហត្ថលេខារួមគ្នាលើលិខិតមួយស្នើសុំឲ្យលោកម៉ៃប៉ុមពីអូរដ្ឋមន្ត្រីក្រសួងការបរទេសអាមេរិកចាត់ការមកលើកម្ពជាដោយអ្នកតំណាងទាំងនោះចោទថាកម្ពុជាបាននិងកំពុងធ្លាក់ចុះប្រពន្ធ័ប្រជាធិបតេយ្យនិងសិទ្ធមនុស្ស៕