វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7521 នាក់
ម្សិលមិញ 6001 នាក់
សរុប 13880351 នាក់
បាត់ដំបង៖ក្រោយពីមានភ្លៀងធ្លាក់ជញ្ជ្រាំនៅប៉ែកខាងលើក្នុងស្រុកសំឡូតតំបន់ជាប់ព្រំដែនកម្ពុជា-ថៃ បណ្តាលឲ្យមានឃុំចំនួន៤ក្នុងស្រុកសំឡូត កំពុងរងផលប៉ះពាល់ខ្លាំងរហូតបាក់ស្ពានយោលស្ថិតក្នុងឃុំតាសាញកាលពីព្រឹក ថ្ងៃទី១៦ ខែកញ្ញា ឆ្នាំ២០១៩ និងពលរដ្ឋជាង២០គ្រួសារត្រូវបានជម្លៀសចេញពីលំនៅឋាន។
តាមប្រភពពីអាជ្ញាធរស្រុកបានឲ្យដឹងថា នៅយប់មិញ មានភ្លៀងធ្លាក់ជាប់ៗគ្នារហូត ដល់វេលាម៉ោង១០ព្រឹកនេះ បានធ្វើឲ្យទឹកហូរខ្លាំងពេក បណ្តាលឲ្យស្ពានយោលស្ទឹងគ្រញូងនេះ បានដាច់ទាំងស្រុង និងធ្វើឲ្យប៉ះពាល់ លិចលង់ឃុំចំនួន៤ គឺ១៖ ឃុំតតោក, ២៖ ឃុំតាសាញ, ៣៖ ឃុំសំឡូត, ៤៖ ឃុំអូរតាទៀក ស្រុកសំឡូត ខេត្តបាត់ដំបង ធ្វើឲ្យប្រជាពលរដ្ឋ២៧គ្រួសារ រស់ជិតនោះរត់យករួចខ្លួនទាន់ និងមិនប៉ះពាល់អ្វីគ្រោះថ្នាក់ ដល់ជីវិតនោះទេ។
លោក សើ សាម៉េត អភិបាលស្រុកសំឡូត បានឲ្យដឹងនៅថ្ងៃនេះថា ក្រោយមានជំនន់ទឹកភ្លៀងយ៉ាងគំហុក រហូតមកដល់ពេលនេះត្រូវបានប្រធានធនធានទឹកនិងឧតុនិយមខេត្តបាត់ដំបងសម្រេចបើកទ្វារទឹកក្នុងអាងពហុបំណងសេកសកបង្ហូរធ្លាក់ចូលស្ទឹងសង្កែ ធ្វើឲ្យស្ថានភាពទឹកផ្នែកខាងលើសំឡូតបានថមថយបន្តិច តែផ្លូវមួយចំនួននៅមិនទាន់អាចធ្វើដំណើរឆ្លងកាត់បាននៅឡើយ។
បើតាមរដ្ឋបាលខេត្តបាត់ដំបង បានបញ្ជាក់តាមរយៈគេហទំព័រហ្វសប៊ុកថា “មន្ទីរធនធានទឹក និងឧតុនិយមខេត្តបាត់ដំបង នឹងបើកទ្វារទឹកបន្ធូរស្ថានភាព ទឹកតាមស្ទឹងសង្កែ ដូច្នេះ យប់នេះ ឬព្រឹកស្អែក ទឹកនៅក្នុងស្ទឹងសង្កែទីរួមខេត្តបាត់ដំបង នឹងកើនឡើងខ្ពស់ អាស្រ័យ ដូចនេះសូមបងប្អូនមេត្តា មានការប្រុងប្រយត្ន័ខ្ពស់”។
សូមបញ្ជាក់ថា ទឹកជំនន់បានវាយប្រហារខេត្តចំនួន៧ ក្នុងរយៈពេលកន្លះខែកញ្ញា ឆ្នាំ២០១៩ បានបណ្តាលឲ្យមនុស្សស្លាប់ចំនួន ១២នាក់ និងជាង ១ម៉ឺនគ្រួសារ ត្រូវបានប៉ះពាល់ និងជម្លៀសចេញពីផ្ទះសម្បែងទៅកាន់ទីទួលសុវត្ថិភាព។លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា គិតត្រឹមថ្ងៃទី១៥ ខែកញ្ញា ទឹកជំនន់ទន្លេមេគង្គ និងជំនន់ទឹកភ្លៀង បានប៉ះពាល់ដល់ខេត្តចំនួន ៧ រួមមាន៖ ខេត្តព្រះវិហារ ស្ទឹងត្រែង ក្រចេះ ត្បូងឃ្មុំ កំពង់ចាម កំពង់ធំ និងខេត្តព្រៃវែង ដែលបណ្តាលឲ្យមនុស្សស្លាប់ចំនួន ១២នាក់ និងប៉ះពាល់ដល់ប្រជាពលរដ្ឋសរុប ៨៧.៤៦៩គ្រួសារ។
លោក បានបញ្ជាក់ថា ទឹកជំនន់ទន្លេមេគង្គ បានឲ្យបង្កផលប៉ះពាល់ដល់ប្រជាពលរដ្ឋសរុប ៨៧.៤៦៩គ្រួសារ ក្នុងនោះទឹកជន់លិចស្រែស្រូវជាង ៣៧.៨០១ហិចតា លិចចម្ការ ៣.៤៧០ហិចតា។ ទឹកជំនន់ជន់លិចសាលា ៣២៣កន្លែង លិចវត្តអារាម ១៥៣វត្ត និងលិចមណ្ឌលសុខភាព ២៨កន្លែង។ ច្រាំងទន្លេប្រវែង២២.៣៤៥ម៉ែត្រ នៅខេត្តក្រចេះ កំពង់ចាម និងត្បូងឃ្មុំ ដែលបង្កឱ្យផ្ទះប្រជាពលរដ្ឋ ៥១ខ្នងផ្ទះ ក៏ត្រូវរុះរើបន្ទាន់៕