តុលាការសម្រេចឃុំកញ្ញាយិនម៉ាណានៅគុកប៉េហ្ស៊ីពេលម្តាយជនរងគ្រោះ ប្តឹងទារសំណង២០ម៉ឺនដុល្លារអាមេរិក…
21-September-2026 / សន្តិសុខសង្គម
ភ្នំពេញ៖ករណីគ្រោះថ្នាក់ចរាចរណ៍ដ៏កក្រើករាជធានីភ្នំពេញ បង្ក មឡើងរថយន្ដម៉ាក Rang Rover ពាក់ស្លាកលេខ ភ្នំពេញ 2AF 7777 បើកលឿនដូចហោះទៅបុកនិស្សិតស្រីម្នាក់ឈ្មោះ ឌុំ រីដាពេលជិះម៉ូតូទៅសាលាប៉ើងស្លាប់ទាន់ហន់ស្ថិតនៅត្រង់ចំណុចផ្លូវបែកជាបួន នៅតាមបណ្ដោយផ្លូវលេខ ៥២៨ កែងផ្លូវលេខ ៣១៧ ក្នុងសង្កាត់បឹងកកទី១ ខណ្ឌទួលគោក រាជធានីភ្នំពេញ កាលពីវេលាម៉ោង ២រសៀលថ្ងៃទី២៦ ខែមីនា ឆ្នាំ២០១៩ រួចជនបង្កបើកឡានរត់គេចខ្លួនបានស្រមោលតែបន្សល់រូបក្នុងកាម៉រ៉ាសុវត្ថិភាពទើបបែករឿង ។
នៅវេលាម៉ោងព្រឹកវេលាម៉ោង ៧:៣០នាទី ថ្ងៃទី២៩ ខែមីនា ឆ្នាំ២០១៩នេះ ម្ចាស់រថយន្តស៊េរីទំនើបរ៉ែងរ៉ូវឺ( Rang Rover) លោក យិន ង៉ិចដែលជាសេដ្ឋីម្នាក់និងជាសមាជិកក្រុមប្រឹក្សាខេត្តសៀមរាប ដែលជាឪពុក បាននាំកូនស្រីរបស់ខ្លួន ជាអ្នកបេីករថយន្តបង្ក( ដែលគេស្គាល់អត្តសញ្ញាណតាមរយៈកាម៉េរាសុវត្ថិភាព)មកប្រគល់ជូនសមត្ថកិច្ចនៅការិយាល័យនគរបាលចរាចរណ៍ផ្លូវគោករាជធានីភ្នំពេញ ដើម្បីដោះស្រាយទៅតាមនិតិវធីច្បាប់។
ក្រោយពីធ្វើការសាកសួរសមត្ថកិច្ចនៃការិយាល័យនគរបាលចរាចរណ៍ផ្លូវគោក បានបញ្ចូនខ្លួនយុវនារីដែលរស់ស្គាល់តែភាពស្រណុកហ៊ឺហារបន្តមកកាន់សាលាដំបូងរាជធានីភ្នំពេញនៅវេលាម៉ោងប្រមាណជា ១០:៣០នាទីព្រឹក ថ្ងៃដដែល ដើម្បីបន្តនិតិវធីដល់តុលាការចាត់ការទៅតាមផ្លូវច្បាប់។
បន្ទាប់ពីលោកស្រីកែវសុគន្ធារាជអាជ្ញារងចោទប្រកាន់បញ្ជូនឲ្យចៅក្រមស៊ើបសួរលោក ប៊ុន ធី ចៅក្រមស៊ើបសួរសាលា ដំបូងរាជធានីភ្នំពេញ នៅថ្ងៃទី២៩ខែមីនាឆ្នាំ២០១៩នេះ បានសម្រេចចេញដីការ បង្គាប់ឲ្យឃុំខ្លួនកញ្ញាយិនង៉ិចម៉ីហៅយិនម៉ាណានៅពន្ធនាគារ ប៉េហ្ស៊ី (PJ) ជាបណ្តោះអាសន្នរងចាំបន្តនីតិវិធី។
ម្តាយជនរងគ្រោះបានដាក់ពាក្យប្តឹងទារសំណង២០ម៉ឺនដុល្លារអាមេរិកពីជនបង្កទៅតុលាការ។បើយោងតាមហ្វេសប៊ុករបស់ “Vanneth Dum” ដែលជាបងស្រីបង្កើតរបស់ កញ្ញា ឌុំ រីដា បានបង្ហោះសារឲ្យដឹងពីមូលហេតុថា៖ “ក្នុងនាមនាងខ្ញុំជាបងស្រីបង្កើតរបស់រីដា នាងខ្ញុំនឹងពិភាក្សា និងស្នើសុំមេធាវីដើម្បីដោះស្រាយជាមួយគ្រួសារជនបង្ក ៤ចំនុចដែលគ្រួសារនាងខ្ញុំចង់បាន៖
១៖ កាត់ទោសជនបង្កទៅតាមអ្វីដែលបានប្រព្រឹត្តិ ដោយគោរពតាមច្បាប់ដែលបានចែង។២៖ ចង់អោយជនបង្កមកអុចធូបសុំខមាទោសមុខផ្នូរប្អូនស្រីខ្ញុំ(សូមបញ្ជាក់ដែរថាលោកផែងវណ្ណៈបានប្រកាសថានាំលុយ៥០០០ដុល្លារជាលុយជនបង្កទៅចូលបុណ្យសពដែរ)។
៣ ៖ចង់អោយគ្រួសារជនបង្កចេញថ្លៃសិក្សាចំពោះសិស្សនិស្សិតក្រីក្រ២៣រូបស្មើនឹងអាយុរីដា ដែលខ្វះលទ្ធភាពក្នុងការសិក្សា ដើម្បីជាការលើកកំពស់ការអប់រំ ។បើទោះបីបាត់បង់រីដាម្នាក់ដែលជាធនធានមនុស្ស តែមាននៅតែមានការបណ្ដុះធនធានមនុស្សបន្តទៀត ហើយនេះក៏ចង់បង្ហាញពីការចែករំលែកទៅអ្នកដែលស្រលាញ់ការសិក្សាក្នុងនាមរីដាជាឈាមខ្មែរដូចគ្នា។
៤៖ ទាមទារប្រាក់សំណង២០ម៉ឺនដុល្លា បើទោះជាប្រាក់សំណងច្រើនលើសលប់យ៉ាងណាក៏មិនអាចស្មើនឹងការបាត់បង់ជីវិតប្អូនស្រីនាងខ្ញុំ និងភាពឈឺចាប់របស់គ្រួសារដែរ”។
បងស្រីបង្កើតរបស់ កញ្ញា ឌុំ រីដា ដោយបញ្ជាក់ ទាំងអារម្មណ៍សោកស្តាយ ថា៖ “កាន់តែដឹងរឿងរ៉ាវច្រើន បន្ទាប់ពីប្អូនលាចាកលោកទៅ ក្នុងខែ៥នេះគាត់នឹងទៅធ្វើការនៅខេត្តកំពង់សោមហើយក្នុងមុខងារយ៉ាងល្អ ព្រមទាំងមានគំរោងទៅក្រៅប្រទេសទៀត ឱទេវតាកាន់តែអោយខ្ញុំពិបាកកាត់ចិត្តទៀតហើយ មិនដឹងនិយាយអ្វីអោយត្រូវទេពេលនេះ ប្អូនទៅចោលអ្វីៗទាំងអស់ដែលបានគ្រោងទុក។
បើអាចប្តូរបានខ្ញុំសុខចិត្តស្លាប់ជំនួសប្អូនវិញ ព្រោះអនាគតកំពុងលេចឡើងយ៉ាងត្រចង់ហើយ បែរជាមច្ចុរាជគ្មានប្រណីដល់ក្មេងស្រីកំសត់ម្នាក់នេះសោះ។ តើអោយរពឹង លើអ្វីទៀត បាត់បង់ជំហដ៏ធំមួយហើយ មហាសែនស្តាយប្អូន។”កញ្ញាឌុំរីដាត្រូវបានសាច់ញាតិធ្វើបុណ្យបញ្ចុះកាលពីថ្ងៃទី២៨មិនានៅស្រុកកំណើត។
