ការចោទប្រកាន់លើស្ថានការណ៍ដ៏រសើបតាមព្រំដែនគួរតែផ្អែកលើអង្គហេតុ និងភស្តុតាងរឹងមាំ និងយន្តការផ្លូវការ
21-September-2026 / សន្តិសុខសង្គម
ភ្នំពេញ៖អ្នកនាំពាក្យក្រសួងការពារជាតិកម្ពុជា ឆ្លើយតបទៅភាគីថៃវិញ ថា រាល់ការចោទប្រកាន់ជុំវិញស្ថានការណ៍ក្ដៅនៅតាមព្រំដែនប្រទេសទាំងពីរ គួរពឹងផ្អែកលើអង្គហេតុ និងភស្តុតាងដែលអាចផ្ទៀតផ្ទាត់ការណ៍ពិតបាន ហើយរាល់បញ្ហាគួរយកមកដោះស្រាយតាមយន្តការផ្លូវការ ទើបប្រសើរជាងការសន្និដ្ឋានតាមរយៈប្រព័ន្ធផ្សព្វផ្សាយ។ 
ប្រតិកម្មរបសើកម្ពុជា ធ្វើឡើងបន្ទាប់ពីសារព័ត៌មានថៃ Thai Enquirer ដកស្រង់សម្ដី អ្នកនាំពាក្យក្រសួងការពារជាតិថៃ Surasant Kongsiri មកផ្សព្វផ្សាយ «ថៃបានដាក់លិខិតតវ៉ាផ្លូវការជុំវិញសកម្មភាពដ្រូនរបស់កម្ពុជាដែលកំពុងប្រតិបត្តិការតាមបណ្តោយព្រំដែន ខណៈការចរចាទ្វេភាគីនៅតែបន្តជាប់គាំង ក្រោមការចោទប្រកាន់ថាទីក្រុងភ្នំពេញនៅតែបន្តបំពានកិច្ចព្រមព្រៀងរួម ។»។
ករណីយ៍នេះអ្នកនាំពាក្យក្រសួងការពារជាតិកម្ពុជា ល្ងាចថ្ងៃទី១៧ ខែសីហាបានឲ្យដឹងថា៖«មកទល់នឹងពេលនេះ ភាគីកម្ពុជាពុំទាន់ទទួលបាននូវលិខិតតវ៉ាជាផ្លូវការណាមួយពីភាគីថៃនៅឡើយទេ។ ការចោទប្រកាន់ណាមួយពាក់ព័ន្ធនឹងស្ថានការណ៍ដ៏រសើបតាមបណ្តោយព្រំដែន គួរតែផ្អែកលើអង្គហេតុ និងភស្តុតាងដែលអាចផ្ទៀងផ្ទាត់បាន ហើយគួរត្រូវបានលើកយកមកដោះស្រាយតាមរយៈយន្តការផ្លូវការដែលមានស្រាប់រវាងប្រទេសទាំងពីរ ជាជាងការធ្វើការសន្និដ្ឋានជាមុនតាមរយៈប្រព័ន្ធផ្សព្វផ្សាយ។»។
អ្នកនាំពាក្យបានក្រសួងការពារជាតិសង្កត់ធ្ងន់ថា ការសម្រេចបាននូវសន្តិភាពយូរអង្វែងរវាងកម្ពុជា ថៃ ដែលរួមចំណែកដល់សន្តិភាព ស្ថិរភាព និងឯកភាពក្នុងអាស៊ាន គឺទាមទារការប្តេជ្ញាចិត្តពិតប្រាកដ និងការគោរពពេញលេញចំពោះច្បាប់អន្តរជាតិ ធម្មនុញ្ញអាស៊ាន ក៏ដូចជាសន្ធិសញ្ញា និងកិច្ចព្រមព្រៀងដែលមានស្រាប់ទាំងអស់ ដែលចងភ្ជាប់ភាគីទាំងពីរកម្ពុជា-ថៃ។
ដោយឡែកទាក់ទងបញ្ហាដោះមីនមន្ត្រីក្រសួងការពារជាតិម្នាក់បានថ្លែងថា ការដោះមីនរបស់ភាគីថៃត្រូវធ្វើឡើងតែនៅក្នុងទឹកដីថៃប៉ុណ្ណោះ មិនត្រូវធ្វើនៅក្នុងទឹកដីកម្ពុជា ឬតំបន់ដែលមិនទាន់បានវាស់វែងនិងខណ្ឌសីមា នោះឡើយ ហើយកុំយករឿងជាន់មីនមកពាក់ព័ន្ធនឹងកម្ពុជា។
ការលើកឡើងរបស់មន្ត្រីក្រសួងការពារជាតិ ដែលស្នើសុំមិនបញ្ចេញឈ្មោះ ធ្វើឡើងបន្ទាប់ពីកាសែតថៃ បានចុះផ្សាយថា ទាហានថៃ បានជាន់មីននៅម្ដុំច្រកអានសេះនៅថ្ងៃទី១៧ ខែសីហានេះ។៖ «ភាគីថៃមិនត្រូវប៉ុនប៉ងភ្ជាប់ឧបទ្ទវហេតុដែលទាហានថៃដើរជាន់មីនក្នុងអំឡុងប្រតិបត្តិការរបស់ខ្លួន មកទាក់ទងនឹងកម្ពុជាឡើយ។ ប្រតិបត្តិការដោះមីនរបស់ភាគីថៃត្រូវធ្វើឡើងតែនៅក្នុងទឹកដីថៃប៉ុណ្ណោះ មិនត្រូវធ្វើនៅក្នុងទឹកដីកម្ពុជា ឬតំបន់ដែលមិនទាន់បានវាស់វែងនិងខណ្ឌសីមា ឬតំបន់ទឹកដីកម្ពុជាដែលកងកម្លាំងថៃកំពុងកាន់កាប់ដោយខុសច្បាប់នោះឡើយ»។
មន្ត្រីដដែលបានថ្លែងថា៖ «ការដោះមីនមិនអាចប្រើជាលេសដើម្បីពង្រីកវត្តមានយោធា បង្កើតការពិតថ្មីនៅលើដី ឬធ្វើឱ្យការកាន់កាប់ដោយខុសច្បាប់ក្លាយជាស្របច្បាប់បានឡើយ។ ការដោះមីនមិនបង្កើតអធិបតេយ្យភាព»។
កាសែតថៃ បានចុះផ្សាយថា ទាហានថៃម្នាក់បានជាន់មីនផ្ទុះរបួសជើង នៅពេលកំពុងបោសសម្អាតទីតាំងនៅក្បែរច្រកអានសេះ ដែលពួកគេកំពុងគ្រប់គ្រង។
អ្នកនាំពាក្យកងទ័ពជើងគោកថៃ Winthai Suvaree បានចេញមកប្រកាសថា ពួកគេបានឈូសបំផ្លាញមូលដ្ឋានយោធាកម្ពុជានៅក្បែរទីនេះ ក្រោយពេលពួកគេបានវាយរុញច្រានទាហានកម្ពុជាចេញពីទីនេះ ហើយបានចាប់ផ្ដើមបោសសម្អាតមីន។
ទាក់ទងរឿងមីននេះដែរលោកឆាំង យុ នាយកមជ្ឈមណ្ឌលឯកសារកម្ពុជាសសេរក្នុងហ្វេប៊ុកថា៖ជាក់ស្តែងទាហានថៃគួរតែមានការប្រុងប្រយ័ត្នខ្ពស់ជាងនេះចំពោះបញ្ហាគ្រាប់មីនដែលស្ថិតនៅក្នុងដែនដីរបស់ខ្លួន។ កត្តានេះហាក់ដូចជាចម្លែកនៅពេលដែលភាគីថៃអះអាងថា កម្ពុជាកំពុងដាក់គ្រាប់មីននៅលើទឹកដីថៃ ហើយសហគមន៍អន្តរជាតិហាក់ដូចជាស្តាប់ ឬមានទំនោរជឿលើការអះអាង រួមទាំងតំបន់ដែលធ្លាប់ស្ថិតក្រោមការកាន់កាប់របស់យោធាខ្មែរក្រហម ហើយថៃបានដាក់ពង្រាយកម្លាំងទាហានរបស់ខ្លួនយ៉ាងច្រើននៅក្នុងតំបន់នោះទៀតផង។ ក្នុងស្ថានភាពបែបនេះ ការដាក់គ្រាប់មីនថ្មីគួរតែជារឿងពិបាក ឬអាចនិយាយបានថាស្ទើរតែមិនអាចធ្វើទៅបាន។
លោកឆាំយុលើកឡើងថា៖សម្រាប់ទាហានថៃ បញ្ហានេះគ្រាន់តែជាការសម្តែងល្ខោននយោបាយ និងការធ្វើសមយុទ្ធយុទ្ធសាស្ត្រនយោបាយពោលគឺជាល្បែងនយោបាយមួយ។ ប៉ុន្តែសម្រាប់ប្រទេសកម្ពុជា នេះគឺជាការតស៊ូប្រដាប់អាវុធពិតប្រាកដ ដែលកំពុងបង្កអស្ថិរភាព និងឈានទៅជិតដល់ការគំរាមកំហែងដល់ការរស់រានមានជីវិត និងអនាគតរបស់ជាតិ។ ប្រទេសកម្ពុជាគួរតែចាត់ទុកបញ្ហានេះជាបញ្ហាប្រឈមដ៏សំខាន់មួយ សម្រាប់ជំរុញនូវការធ្វើទំនើបកម្ម និងការពង្រឹងសមត្ថភាពរបស់ខ្លួន។
សម្រាប់ស្ថានភាពព្រុំដែនកម្ពុជាថៃអ្នកនាំពាក្យក្រសួងការពាជាតិបានបញ្ជាក់ថា រាជរដ្ឋាភិបាល និងក្រសួងការពារជាតិកម្ពុជានៅតែបញ្ជាក់ពីការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ សុចរិតក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួនបំផុតនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត ដើម្បីឆ្ពោះទៅការធ្វើឱ្យប្រសើរឡើងវិញឆាប់រហ័ស និងការវិលត្រឡប់ទៅរកប្រក្រតីភាព។
