ឧក្រឹដ្ឋជនជាតិចិនម្នាក់ ដែលត្រូវបានដាក់ក្នុងបញ្ជីរហាមឃាត់ចូលកម្ពុជា តែនៅអាចចូលបានដោយចាយលុយអស់ ១២០០ដុល្លារ!

ភ្នំពេញ៖ឧក្រឹដ្ឋជនជាតិចិននេះត្រូវបានតុលាការកាត់ទោសដាក់ពន្ធនាគារ៣ឆ្នាំ ហើយអនុវត្តបាន១៥ខែ ក៏ត្រូវបានដោះលែង ដោយទោសនៅសល់ព្យួរករណីជម្រឹតលុយនិងប្រើអាវុធខុសច្បាប់រួចត្រូវបានបណ្តេញចេញពីស្រុកខ្មែរ។ 

តែអ្វីដែលគួរឲ្យហួសចិត្តគឺពេល កម្លាំងនគរបាលរាជធានីភ្នំពេញ បើកប្រតិបត្តិការបង្ក្រាបក្រុមអង្គការចាត់តាំងរៀបចំគម្រោងចាប់ជំរិត និងជាមុខសញ្ញាហាមឃាត់ចូលប្រទេសកម្ពុជា នៅចំណុចផ្ទះលេខ MH១១០ ផ្លូវលេខ៣A ភូមិពង្រ សង្កាត់ស្នោរ ខណ្ឌកំបូល រាជធានីភ្នំពេញ នៅថ្ងៃទី៤ ខែមិថុនា ឆ្នាំ២០២៦ក៏ចាប់បានម្សៀចិនខាងលើ។

ក្នុងចំណោមក្រុមជនល្មើសទាំង៤នាក់ មានឧក្រិដ្ឋជនម្នាក់ឈ្មោះ WENG SHENG FENG អាយុ៤៣ឆ្នាំ (លិខិតឆ្លងដែនលេខ EP8477264 មានត្រាហាមចូលប្រទេសកម្ពុជា) ជាមុខសញ្ញាចាស់ជាប់ពន្ធនាគាររយៈពេល១៥ខែ កាលពីថ្ងៃទី១៨ ខែវិច្ឆិកា ឆ្នាំ២០២៣ ពីបទបង្ខាំងមនុស្សដោយខុសច្បាប់ធ្វើទារុណកម្ម ដើម្បីជំរិតទារប្រាក់ និងកាន់កាប់អាវុធដោយគ្មានការអនុញ្ញាត (ប្រើប្រាស់អាវុធខ្លីវាយជនរងគ្រោះរបួសធ្ងន់ និងជំរិតទារប្រាក់)។

ក្រោយពេលអនុវត្តទោស១៥ខែ ជននេះត្រូវបានបណ្តេញចេញពីប្រទេសកម្ពុជា លុះដល់អំឡុងដើមខែឧសភា ឆ្នាំ២០២៦ បានលួចឆ្លងដែនតាមប្រទេសឡាវ ចូលមកខេត្តស្ទឹងត្រែង (ចំណាយអស់១,២០០ដុល្លារអាមេរិក) រួចមកស្នាក់នៅទីតាំងខាងលើ។តើសមត្តកិច្ចត្រូវទុកឲ្យមន្ត្រីដែលក្បត់គុបគិតជាមួយឧក្រឹដ្ឋជនរូបនេះចូលស្រុកខ្មែររស់នៅសុខសប្បាយ?៕