
វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 23258 នាក់
ម្សិលមិញ 22729 នាក់
សរុប 21302799 នាក់
បាត់ដំបង៖ លោកបណ្ឌិត ឈឹម ធឿន នាយកវិទ្យាស្ថានពហុបច្ចេកទេសភូមិភាគតេជោសែនបាត់ដំបង កាលពីល្ងាចថ្ងៃទី២៣ ខែកញ្ញា ឆ្នាំ២០២៤ បានដឹកនាំក្រុមការងារចុះធ្វើការវាយតម្លៃសមត្ថភាពបញ្ចប់វគ្គបណ្តុះបណ្តាលសម្រាប់កម្រិតសញ្ញាបត្របច្ចេកទេស និងវិជ្ជាជីវៈ១ (C1) ១.៥លាននាក់ ជំហាន១ នៅក្នុងវិទ្យាស្ថានផ្ទាល់ដើម្បីវាស់ស្ទង់នូវកម្រិតសមត្ថភាពសិស្សក្រោយពីបញ្ចប់ការចុះហាត់ការ និងវាយតម្លៃសមត្ថភាពលើជំនាញដែលសិស្សបានសិក្សារយៈពេល ៨ខែសម្រាប់ចូលទីផ្សារការងារ ។
ការចុះត្រួតពិនិត្យនេះមានការចូលរួមពីមន្ទីរពាក់ព័ន្ធ អាជ្ញាធរដែនដី ចៅសង្កាត់ ចំនួន ៦ក្នុងក្រុងបាត់ដំបង និងក្រុមហ៊ុន ដៃគូសហការជាមួយវិទ្យាស្ថានចំនួន២១ ។លោកបណ្ឌិត ឈឹម ធឿន បានបានឲ្យដឹង ថា ការបង្កើតឱ្យមានការសិក្សាលើផ្នែកជំនាញដល់យុវជនមកពីគ្រួសារក្រីក្រ និងគ្រួសារងាយរងហានិភ័យនាពេលនេះ គឺជាការចូលរួមចំណែកយ៉ាងសំខាន់នៅក្នុងការផ្តល់ឱកាសការងារជាច្រើនដល់យុវជនទាំងនោះសម្រាប់រកប្រាក់ចំណូលបានសម្រាប់ចិញ្ចឹមជីវភាពគ្រួសារ និងខ្លួនឯងបាន ស្របតាមតម្រូវការទីផ្សារការងារដែលពួកគាត់ទទួលបាន ។
ជាងនេះទៀតនោះ អាចចូលរួមអនុវត្តគោលនយោបាយភូមិ ឃុំមានសុវត្ថិភាព ការកាត់បន្ថយបាននូវការសេពគ្រឿងញៀនបានមួយផ្នែកធំ តាមរយៈនៃការមានការងារធ្វើពិតប្រាកដ ជាពិសេសកាត់បន្ថយបាននូវការធ្វើចំណាកស្រុកដោយប្រថុយប្រថានទៅស្វែងរការងារធ្វើនៅក្រៅប្រទេស ហើយអ្វីដែលសំខាន់ជាងនេះទៀតនោះ អាចឈានទៅសម្រេចតាមចក្ខុវិស័យរបស់រាជរដ្ឋាភិបាលនាឆ្នាំ២០៣០ និងឆ្នាំ២០៥០ផងដែរ ។
លោកបណ្ឌិត ឈឹម ធឿន បានណែនាំឱ្យសិស្សទាំងអស់ចូលរួមផ្សព្វផ្សាយបន្ថែមដល់យុវជនដទៃទៀត ដែលពុំទាន់មានជំនាញច្បាស់លាស់ គួរចាប់យកឱកាសចូលរៀនវគ្គជំនាញខ្លីដែលរាជរដ្ឋាភិបាលផ្តល់ជូនដោយមិនបង់ថ្លៃសិក្សានេះ ហើយថែមទាំងទទួលបាននូវប្រាក់ឧបត្ថម្ភប្រចាំខែចំនួន២៨ម៉ឺនរៀលបន្ថែមទៀត ក្នុងពេលកំពុងសិក្សាថែមទៀតផង សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ ។
តំណាងសិស្សជំនាញបច្ចេកទេសវិជ្ជាជីវៈ ដែលទើបបញ្ចប់វគ្គ អ្នកស្រី ឡុក សុគន្ធា មកពីសង្កាត់ស្វាយប៉ោ និងលោក ប្រេម សំណាង មកពីសង្កាត់ក្តុលដូនទាវ សុទ្ធតែបានបង្ហាញនូវភាពសប្បាយរីករាយ ខណៈពេលដែលពួកគាត់បានបណ្តុះបណ្តាលរួចនាពេលនេះ ហើយទទួលបានចំណេះជំនាញពិតប្រាកដ ដើម្បីយកទៅប្រកបរបរផ្ទាល់ខ្លួន និងចូលទៅធ្វើការងារនៅតាមក្រុមហ៊ុនដៃគូសហការជាមួយវិទ្យាស្ថាន តាមតម្រូវការទីផ្សារការងារ ។
សូមបញ្ជាក់ថា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសដាក់ឱ្យអនុវត្តជាផ្លូវការនូវកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ ចំនួន ១.៥លាននាក់ កាលពីថ្ងៃទី១៤ ខែវិច្ឆិកា ឆ្នាំ២០២៣ ។ គិតត្រឹមថ្ងៃទី២៣ ខែកញ្ញា ឆ្នាំ២០២៤ វិទ្យាស្ថានមានសិស្សកំពុងរៀនជំនាញវិជ្ជាជីវៈ និងបច្ចេកទេស កម្រិតសញ្ញាបត្របច្ចេកទេស និងវិជ្ជាជីវៈ ១ (C1) សរុបចំនួន ៣,៥៤០នាក់ ក្នុងនោះស្រី ចំនួន១,១១៣នាក់ ។
ដោយបានសិក្សាលើជំនាញការកែច្នៃបន្លែ និងផ្លែឈើ ការរចនាក្រាហ្វិកដោយកុំព្យូទ័រ ការថែទាំ និងជួសជុលរថយន្ដ ការតម្លើងបណ្ដាញអគ្គិសនីក្នុងអគារ សេវាកម្មបរិក្ខារម៉ាស៊ីនត្រជាក់ក្នុងគេហដ្ឋាន សេវាកម្មកុំព្យូទ័រ ការងារកំបោរ ការចិញ្ចឹម និងថែទាំត្រីប្រា និងសេវាកម្មសម្អាងកាយ ហើយសិស្សត្រូវធ្វើការវាយតម្លៃសមត្ថភាពបញ្ចប់វគ្គនាថ្ងៃនេះមានចំនួន៥១៩នាក់ ក្នុងនោះស្រី២៥៣នាក់ ៕