សម្ដេចតេជោ ហ៊ុន សែន ប្រាប់មេដឹកនាំរបស់វៀតណាមថា សម្ដេចមានការសោកស្ដាយដែលស្ថានការណ៍ព្រំដែនកម្ពុជា-ថៃ ក្លាយជាបែបនេះ
21-September-2026 / ផ្សេងៗ
ភ្នំពេញ ៖ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា បានដឹកនាំគណ:ប្រតិភូជាន់ខ្ពស់កម្ពុជាមាតុភូមិនិវត្ដន៍ប្រកបដោយសុខសុវត្ថិភាពវិញហើយ តាមរយ:យន្ដហោះពិសេស នៅថ្ងៃទី ២ ខែកញ្ញា ឆ្នាំ២០២៥ ម៉ោងប្រមាណ៥ ល្ងាច នាអាកាសយានដ្ឋានអន្ដរជាតិភ្នំពេញ ។
លោក ជា ធិរិទ្ធ អ្នកនាំពាក្យព្រឹទ្ធសភា បានប្រាប់កាសែតអំពីលទ្ធផលនៃដំណើរទស្សកិច្ចរយ:ពេលពីរថ្ងៃនេះថា៖ ក្នុងជំនួបជាមួយថ្នាក់ដឹកនាំកំពូលទាំងអស់របស់វៀតណាម សម្ដេចតេជោ ហ៊ុន សែន លើកឡើងពីបញ្ហាព្រំដែន ដែលបង្កឡើងដោយភាគីថៃ ដោយសម្តេចបានបញ្ជាក់ពីគោលដៅធំរបស់កម្ពុជា ដែលចង់បានអ្នកសង្កេតការណ៍ពីប្រទេសវៀតណាម ដើម្បីធានារក្សាបាននូវបទឈប់បាញ់ប្រកបដោយប្រសិទ្ធភាព និងអាចវិលមមករកប្រក្រតីភាពវិញក្នុងពេលឆាប់ៗខាងមុខនេះ ។
សម្ដេចតេជោ តែងរក្សាការដាក់គោលដោធំពីរគឺ ការប្រែក្លាយតំបន់អតីតសមរភូមិ ឲ្យក្លាយ ជាតំបន់ដែលមានទីផ្សារ និងទីពីរគឺការប្រែក្លាយតំបន់ព្រំដែនឲ្យក្លាយជាព្រំដែនដែលមានសន្ដិភាពមិត្ដភាព និងសហប្រតិបត្ដិការ ដោយសម្ដេចមិនចង់ឲ្យមានសង្គ្រាមនៅតាមព្រមដែនទេ ។
សម្ដេចតេជោបានប្រាប់ទៅកាន់ថ្នាក់ដឹកនាំរបស់វៀតណាមថា សម្ដេចមានការសោកស្ដាយណាស់ ដែលស្ថានការណ៍នៅតាមបន្ទាត់ព្រំដែនកម្ពុជា-ថៃ មានបញ្ហាបែបនេះ ហើយសម្ដេចតេជោក៏បានមានប្រសាសន៍ថា ចាត់ទុកវាជាសុបិន្ដមួយដ៏អាក្រក់មួយទៅចុះ រវាងប្រទេសទាំងពីរ ហើយសម្ដេចសង្ឃឹមថាស្ថានការណ៍នៃប្រទេសតាំងពីរកម្ពុជា-ថៃ នឹងវិលត្រលប់មកល្អប្រសើរ និងប្រក្រតីភាពដូចដើមវិញ។
ជាការឆ្លើយតប ភាគីវៀតណាម បានបង្ហាញការគាំទ្រឲ្យមានបទឈប់បាញ់ដ៏ល្អប្រសើរ ដោយសូមភាគីទាំងពីរកម្ពុជា-ថៃ ជៀសឲ្យបាននូវការផ្ទុះអាវុធឡើងវិញជាមួយគ្នា នឹងអាចមានដំណោះស្រាយដោយសន្ដិវិធី។
សួមបញ្ជាក់ថា នារសៀល ថ្ងៃទី១ ខែកញ្ញា ឆ្នាំ២០២៥សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា អញ្ជើញជួបពិភាក្សាការងារជាមួយ លោក តូ ឡឹម To Lam អគ្គលេខាធិការគណបក្សកុម្មុយនីស្តវៀតណាម នៅទីស្នាក់ការមជ្ឈិមបក្សវៀតណាម ទីក្រុងហាណូយ សារធារណរដ្ឋសង្គមនិយមវៀតណាម។
លោក ជា ធីរិទ្ធ បានឲ្យដឹងថា លោក តូ ឡឹម បានសម្ដែងនូវការស្វាគមន៍យ៉ាងកក់ក្តៅចំពោះសម្ដេចតេជោ និងគណៈប្រតិភូកម្ពុជាដែលបានអញ្ជើញបំពេញទស្សនកិច្ច និងចូលរួមក្នុងខួបអនុស្សាវរីយ៍៨០ឆ្នាំ នៃបដិវត្តន៍ខែសីហា និងអបអរសាទរទិវាឯករាជ្យជាតិវៀតណាមនាពេលនេះ។ លោកបានចាត់ទុកវត្តមានសម្ដេចតេជោ គឺបានឆ្លុះបញ្ចាំងយ៉ាងច្បាស់អំពីទំនាក់ទំនងល្អរវាងកម្ពុជានិងវៀតណាមដ៏រឹងមាំដែលមាននាពេលកន្លងមកដល់ពេលបច្ចុប្បន្ននេះ។ លោកបានលើកឡើងថា វៀតណាមបានផ្ដល់តម្លៃយ៉ាងខ្ពស់ ចំពោះទំនាក់ទំនងរវាងកម្ពុជានិងវៀតណាម។
សម្ដេចតេជោ ហ៊ុន សែន បានអរគុណចំពោះលោក តូ ឡឹម ដែលបានធ្វើបដិសណ្ឋារកិច្ចយ៉ាងកក់ក្តៅចំពោះសម្ដេច និងគណៈប្រតិភូដែលបានអញ្ជើញមកកាន់ប្រទេសវៀតណាមនាឱកាសនេះ។ សម្ដេចតេជោ បានវាយតម្លៃខ្ពស់ចំពោះបដិវត្តន៍ខែសីហា កាលពីឆ្នាំ១៩៤៥ ដែលមានអត្ថន័យសម្រាប់ប្រទេសវៀតណាម និងក៏ជាចំណុចសំខាន់មួយដែលកើតមានចលនានៃការតស៊ូដើម្បីទាមទារឯករាជ្យទាំងក្នុងក្របខ័ណ្ឌតំបន់ និងពិភពលោក។
សម្ដេចតេជោបានសម្តែងនូវការពេញចិត្តចំពោះទម្លាក់ទំនងរវាងបក្សនៃប្រទេសទាំងពីរ ក្នុងឋានៈសម្ដេចតេជោ ជាប្រធានគណបក្សប្រជាជនកម្ពុជា ហើយក្នុងឋានៈលោក តូ ឡឹម ជាអគ្គលេខាធិការបក្សកុម្មុយនិស្តវៀតណាម ហើយសម្ដេចបានបង្ហាញនូវក្តីរីករាយដែលទំនាក់ទំនងទាំងក្នុងក្របខ័ណ្ឌរដ្ឋាភិបាលក៏មានភាពល្អប្រសើរ។ សម្ដេចតេជោបានបញ្ជាក់ផងដែរថា ស្នូលសំខាន់នោះ គឺក្របខ័ណ្ឌនៃទំនាក់ទំនងបក្សនៃប្រទេសទាំងពីរមានការរីកចម្រើន ហើយជំនួបកំពូលនៃមេដឹកនាំគណបក្សទាំងពីរកាលពីពេលកន្លងទៅគឺជាផ្នែកមួយដ៏សំខាន់ នៃការអនុវត្តទំនាក់ទំនងរវាងប្រទេសទាំងពីរ កាន់តែមានភាពដ៏ប្រសើរ។
លោកអគ្គលេខាធិការបក្សកុម្មុយនីសវៀតណាម បានសម្តែងនូវក្តីរីករាយចំពោះវឌ្ឍនភាពនៃទំនាក់ទំនងរវាងកម្ពុជានិងវៀតណាមនាពេលបច្ចុប្បន្នដែលមានភាពរីកចម្រើន។ លោកបានឯកភាពទាំងស្រុងចំពោះទំនាក់ទំនងរវាងគណបក្សនិងគណបក្សនៃប្រទេសទាំងពីរ ដែលមានភាពរីកចម្រើន។លោកបានបញ្ជាក់ថា តាមរយៈជំនួបកំពូលនាពេលកន្លងមកនៃ មេដឹកនាំគណបក្សនៃប្រទេសទាំងពីរ បានក្លាយជាផែនទីសម្រាប់ការអនុវត្ត ក្នុងទំនាក់ទំនងរវាងប្រទេសទាំងពីរឲ្យមានភាពរឹងមាំ ហើយតាមរយៈទំនាក់ទំនងបក្ស ក៏បានបណ្ដុះបណ្ដាលធនធានមនុស្សទៀតផង។
លោក តូ ឡឹម ក៏បានជំរុញបន្ថែមទៀតឲ្យប្រទេសទាំងពីរ ជាពិសេសក្នុងក្របខ័ណ្ឌគណបក្ស បន្តចែករំលែកផ្លាស់ប្ដូរនូវដំណើរទស្សនកិច្ចទៅវិញទៅមក និងការតភ្ជាប់យុវជននិងយុវជន ឲ្យកាន់តែមានភាពស្អិតរមួតបន្ថែមទៀត។សម្តេចតេជោ ក៏បានមានប្រសាសន៍ពីការពង្រីកទំនាក់ទំនង រវាងប្រទេសទាំងពីរជាពិសេសលើវិស័យ សេដ្ឋកិច្ច យោធា ពាណិជ្ជកម្ម ដែលប្រទេសទាំងពីរមានភាពរីកចម្រើននាពេលបច្ចុប្បន្ននេះ។
សម្ដេចបានបញ្ជាក់ថា រយៈពេល៧ខែក្នុងឆ្នាំនេះ កម្ពុជាបាននាំចេញទំនិញមកកាន់ប្រទេសវៀតណាម ច្រើនជាងទំនិញវៀតណាមនាំមកកាន់កម្ពុជា ដែលក្នុងនោះកម្ពុជានាំទៅកាន់វៀតណាមគឺមានប្រមាណ៣,៨ពាន់លានដុល្លារ និងវៀតណាមនាំមកកាន់ប្រទេសកម្ពុជាគឺប្រមាណ៣,២ពានលានដុល្លារ ដែលការណ៍នេះ គឺជាការបំពេញឲ្យគ្នាទៅវិញទៅមក លើវិស័យពាណិជ្ជកម្មរវាងប្រទេសទាំងពីរដែលកម្ពុជាជាប្រទេសមាននូវវត្ថុធាតុដើម ហើយវៀតណាមជាប្រទេសកែច្នៃ។ ជាចុងក្រោយភាគីទាំងពីរបានសម្តែងនូវក្តីរីករាយ និងបន្តពូនជ្រុំទំនាក់ទំនងរវាងប្រទេសទាំងពីរឲ្យកាន់តែមានការរីកចម្រើនតទៅមុខទៀត។
