បន្ទាប់ពីការព្រមានរបស់អសបប្រទេសភូមាសុខចិត្តទទួលយកជនជាតិរ៉ូហ៊ីងយ៉ាពីបងក្លាដេសមកវិញ
27-March-2024 / ព័ត៌មានអន្តរជាតិ
បងក្លាដេស៖ប្រទេសមីយ៉ាន់ម៉ា(ភូមា) និងបង់ក្លាដែស បានស្រុះស្រួលគ្នាសារជាថ្មីម្តងទៀត ក្នុងការធ្វើមាតុភូមិនិវត្តន៍ជនជនភាគតិចរ៉ូហ៊ីងយ៉ាក្រោយពីរាំងស្ទះអស់ឆ្នាំ ។ ទាក់ទងរឿងនេះ រដ្ឋមន្ត្រីការបរទេសបង់ក្លាដេសបាននិយាយថា គេនឹងចាប់ផ្តើមបញ្ជូនជនភាគតិចរ៉ូហ៊ីងយ៉ា ត្រលប់ទៅកាន់ប្រទេសភូមាវិញ នៅពាក់កណ្តាលខែវិច្ឆិកា។
មន្ត្រីភូមាដែលបានចូលរួមក្នុងកិច្ចចចារជាមួយបង់ក្លាដែស បានឲ្យដឹងថា ភាគីទាំងពីរ បានព្រមព្រៀងគ្នា និងតាំងចិត្តយ៉ាងមោះមុត ក្នុងការធ្វើមាតុភូមិនិវត្តន៍ជនជាតិរ៉ូហ៊ីងយ៉ា ឲ្យលេចចេញជារូបរាងឡើងឲ្យខាតតែបាន។ "ភូមា មានឆន្ទៈនយោបាយរឹងមាំនិងបត់បែន ហើយមានទីជម្រក សម្រាប់ទទួលជនជាតិរ៉ូហ៊ីងយ៉ា តាមកាលកំណត់"។
មន្ត្រីភូមា បញ្ជាក់បន្ថែម។មានការកត់សម្គាល់ថាការបង្ហាញសុឆន្ទះរបស់ប្រទេសភូមាគឺកើតឡើងក្រោយពី អ.ស.ប ចេញសេចក្តីថ្លែងការព្រមានមួយស្តីអំពី អំពើប្រល័យពូជសាសន៍ ប្រឆាំងនឹងជនជាតិភាគតិចកាន់សាសនាអ៊ីស្លាម ដែលនៅតែបន្តកើតមាន នាភាគខាងជើងរដ្ឋរ៉ាឃីន នៃប្រទេសភូមា ដែលជាភូមិឋានរបស់ជនជាតិរ៉ូហ៊ីងយ៉ា។
ប្រទេសបារាំង កូវ៉េត កូឌីវ័រ ហូឡង់ ប៉េរូ ប៉ូឡូញ ស៊ុយអែត សហរដ្ឋអាមេរិក និងអង់គ្លេស បានរួមគ្នាចុះហត្ថលេខា លើលិខិតមួយ ស្នើទៅកាន់ប្រធានក្រុមប្រឹក្សាសន្តិសុខ ដើម្បីឲ្យរៀបចំ ឲ្យមានការចូលមកនិយាយបកស្រាយពន្យល់ លើរបាយការណ៍ ស្តីពីអំពើឧក្រិដ្ឋរបស់កងទ័ពភូមា ធ្វើទៅលើ ប្រជាជនរ៉ូហ៊ីងយ៉ា។
ប្រទេស៩ ក្នុងចំណោមប្រទេសជាសមាជិកក្រុមប្រឹក្សាសន្តិសុខទាំង១៥ ដែលគាំទ្រសំណើរនេះ គឺជានីតិវិធី ដើម្បីបញ្ចៀសនីតិវិធីបោះឆ្នោត នៅក្នុងក្រុមប្រឹក្សាសន្តិសុខ ដោយហេតុថា កន្លងមក ចិនតែងតែចេញមុខរារាំង និងបោះឆ្នោតវេតូ ដើម្បីការពារភូមាជានិច្ច។ ជារៀងរាល់លើក ចិន តែងតែលើកឡើងថា បញ្ហាប្រជាជនរ៉ូហ៊ីងយ៉ា គឺជាបញ្ហាទ្វេភាគី រវាងភូមា និងបង់ក្លាដែរ ដែលអង្គការសហប្រជាជាតិ មិនត្រូវលូកដៃទេ។
សម្រាប់ អ.ស.ប បានលើកឡើងថា រាល់ប្រតិបត្តិការបញ្ជូនក្រុមរ៉ូហ៊ីងយ៉ា គឺត្រូវធ្វើឡើងដោយមានការស្មគ្រ័ចិត្ត ហើយត្រូវធ្វើឡើងប្រកបដោយសេចក្តីថ្លៃថ្នូរ និងសុខសុវត្តិភាព។
សូមបញ្ជាក់ថា ជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម ចំនួនជាង ៧២០.០០០ នាក់ បានរត់ភៀសខ្លួនទៅកាន់ប្រទេសបង់ក្លាដែស កាលពីខែសីហា ឆ្នាំ២០១៧ កន្លងទៅ។ ការរត់ភៀសខ្លួននេះ គឺដើម្បីរត់គេចពីការធ្វើទុក្ខបុកម្នេញ ការកាប់សម្លាប់ ក្រោមយុទ្ធនាការបង្ក្រាបបយ៉ាងឃោរឃៅ ពីសំណាក់ពួកយោធាភូមា ក្នុងបំណងប្រឆាំងនឹងជនជាតិភាគតិចរ៉ូហ៊ីងយ៉ា ដែលជាអ្នកកាន់សាសនាអ៊ីស្លាម។
ឧត្តមស្នងការទទួលបន្ទុកសិទ្ធិមនុស្ស បានបង្កើតក្រុមការងារស្វែងរកការពិតមួយ ដែលមានតួនាទី ស៊ើបអង្កេត តាមដានអំពីសកម្មភាពឧក្រិដ្ឋ ដែលបានធ្វើឡើង ទៅលើប្រជាជនរ៉ូហ៊ីងយ៉ា។ បើទោះក្រុមការងារនេះ មិនត្រូវបានអាជ្ញាធរភូម អនុញ្ញាតឲ្យចូលទៅស្រាវជ្រាវ ដល់រដ្ឋរ៉ាឃីន ក៏ដោយ តែក្រុមការងារនេះ បានស្រង់បាននូវសក្ខីកម្ម ជាច្រើន ពីសំណាក់ប្រជាជនរ៉ូហ៊ីងយ៉ា ដែលភៀសខ្លួននៅបង់ក្លាដែស។
របាយការណ៍ ដែលបានចេញផ្សាយ កាលពីខែកញ្ញាកន្លងទៅ ដោយក្រុមការងារស្វែងរកការពិតនេះ បានចោទប្រកាន់កងទ័ពភូមា ថាបានធ្វើសកម្មភាពឧក្រិដ្ឋកម្មប្រល័យពូជសាសន៍ លើសហគមនអ៊ីស្លាមរ៉ូហ៊ីងយ៉ា នៅក្នុងរដ្ឋរ៉ាឃីន។
