ជំនួបត្រាំ-ម៉ាក្រុង បង្ហាញការខ្វែងគំនិតគ្នាលើវិធីសាស្ត្រដោះស្រាយវិបត្តិអ៊ុយក្រែន តែយល់ព្រមលើកងរក្សាសន្តិភាព
21-September-2026 / ព័ត៌មានអន្តរជាតិ
អាមេរិក៖ ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីបារាំង លោកអេម៉ានូអែលម៉ាក្រុន( Emmanuel Macron) បានជួបពិភាក្សាគ្នាផ្ទាល់នៅសេតវិមាន កាលពីថ្ងៃចន្ទ ដោយបង្ហាញពីភាពខុសគ្នា លើវិធីសាស្ត្រដោះស្រាយវិបត្តិអ៊ុយក្រែន តែយល់ព្រមលើគំនិត ដាក់ពង្រាយកងរក្សាសន្តិភាពអឺរ៉ុបក៏ដោយ។
ទីភ្នាក់ងារសារព័ត៌មាន Reutersបានផ្សាយឲ្យដឹងថា៖ប្រធានាធិបតី ត្រាំ ចង់បានបទឈប់បាញ់ឆាប់រហ័ស និងបង្ហាញពីលទ្ធភាពជួប ជាមួយលោក ពូទីន លោក Macron បានជំរុញឱ្យមានដំណោះស្រាយដោយប្រុងប្រយ័ត្ន ដោយចាប់ផ្តើមពីបទឈប់បាញ់ ហើយបន្តទៅកិច្ចព្រមព្រៀងសន្តិភាព ដែលរួមបញ្ចូលការធានាសន្តិសុខ និងគោរពអធិបតេយ្យភាពអ៊ុយក្រែន។«យើងចង់បានសន្តិភាពយ៉ាងឆាប់រហ័ស ប៉ុន្តែយើងមិនចង់បានកិច្ចព្រមព្រៀងដែលខ្សោយនោះទេ» លោក Macron បានថ្លែង។
ទោះបីយ៉ាងណាមេដឹកនាំទាំងពីរ បានឯកភាពលើលទ្ធភាពនៃការដាក់ពង្រាយកងរក្សាសន្តិភាពអឺរ៉ុប ក្រោយការសម្រេចបាននូវកិច្ចព្រមព្រៀងសន្តិភាព។ លោក Macron បានបញ្ជាក់ថា កងកម្លាំងទាំងនោះនឹងមិនប្រចាំការនៅជួរមុខឡើយ ប៉ុន្តែនឹងដើរតួនាទីក្នុងការធានាការគោរពសន្តិភាព។ ប្រធានាធិបតីបារាំងរូបនេះ ក៏បានអះអាងទៀតថា លោក ពូទីន ក៏បានយល់ព្រមចំពោះគំនិតនេះផងដែរ។លោកម៉ាក្រុនលើកឡើងថា៖នៅពេលណាដែលយើងមានកិច្ចព្រមព្រៀងសន្តិភាពមួយរឹងមាំ ហើយយូរអង្វែង ចុះហត្ថលេខាដោយអ៊ុយក្រែន និងរុស្ស៊ី ហើយដោយមានពួកយើងជាភាគីអ្នកធានា នោះបារាំងនិងអង់គ្លេសដែលបានពិភាក្សាគ្នាច្រើនសប្តាហ៍មកហើយនោះ សូមប្រកាសថានឹងចូលរួម។ អ្វីដែលយើងបានជជែកគ្នា រវាងកងកម្លាំងទ័ពគ្រប់ផ្នែក គឺយើងត្រៀមបញ្ជូនកម្លាំងទ័ពទៅអ៊ុយក្រែន តែមិនមែនទៅសមរភូមិ ឬទៅដែនដីដែលជាប់ជម្លោះទេ តែគឺទៅចូលរួមធានាការពារសន្តិភាព ក្រោយភាគីទាំង២ចុះហត្ថលេខា។ ដូច្នេះវាជាបេសកកម្មសន្តិភាព មិនមែនទៅប្រយុទ្ធឡើយ។ បេសកកម្មយើង គឺដើម្បីបញ្ជាក់អំពីការជួយធានា។ វាជាបេសកកម្មដែលមានកម្រិត តែវាបញ្ជាក់ច្បាស់អំពីការចូលរួមសាមគ្គីរបស់យើង។
លោក Macron បានចាត់ទុកកិច្ចជួបពិភាក្សានេះ ថាជា «ចំណុចរបត់»។ ក្នុងជំនួបនោះ លោក Macron ក៏បានកែតម្រូវការអះអាងរបស់លោក ត្រាំ ដែលថា អឺរ៉ុបផ្តល់ជំនួយដល់អ៊ុយក្រែន ត្រឹមតែជាប្រាក់កម្ចីដោយលោកម៉ាក្រុនថាជាជំនួយឥតសំណង។ទាក់ទងនឹងកិច្ចព្រមព្រៀង ជាមួយអ៊ុយក្រែន លោក ត្រាំ បានរាយការណ៍ពីវឌ្ឍនភាពលើផែនការចែករំលែកប្រាក់ចំណូលពីធនធានរ៉ែ ដើម្បីទូទាត់ថ្លៃអាវុធដែលសហរដ្ឋអាមេរិកបានផ្គត់ផ្គង់ដល់អ៊ុយក្រែន ដោយលោកបានបង្ហាញក្តីរំពឹងថា លោក Zelenskiy នឹងធ្វើដំណើរមកកាន់សហរដ្ឋអាមេរិកដើម្បីសម្រេចកិច្ចព្រមព្រៀងនេះជាផ្លូវការ។លោកត្រាំ៖ខ្ញុំនឹងជួបលោកហ្សេឡេនស្គី។ ប្រហែលជាគាត់អាចមកនៅសប្តាហ៍នេះ ឬសប្តាហ៍ក្រោយ ដើម្បីចុះហត្ថលេខាលើកិច្ចព្រមព្រៀង។ វាពិតជាដំណឹងមួយល្អ ហើយខ្ញុំសប្បាយចិត្តនឹងទទួលជួបគាត់ នៅក្នុងបន្ទប់ធ្វើការរបស់ខ្ញុំ។ ឥឡូវនេះ កិច្ចព្រមព្រៀងកំពុងតែត្រូវបានជជែកគ្នា ជិតរួចរាល់ជាស្ថាពរហើយ។ វាគឺជាកិច្ចព្រមព្រៀងស្តីអំពីរ៉ែដីកម្រ និងរ៉ែមួយចំនួនទៀត។ ហើយបើតាមខ្ញុំយល់ គឺគាត់ចង់មកនេះ ដើម្បីមកចុះហត្ថលេខាតែម្តង។ ដូច្នេះសម្រាប់ខ្ញុំវាជារឿងល្អខ្លាំងណាស់។ ខ្ញុំគិតថា វាមិនចាំបាច់ទាល់តែមានការអនុម័តពីក្រុមប្រឹក្សាណាមួយទេ ដូច្នេះកិច្ចព្រមព្រៀងនេះនឹងអាចចេញរួច!
ឆ្លើយនឹងសំណួរអ្នកកាសែត លោកដូណាល់ ត្រាំ បានបង្ហាញការត្រេកអរដែរ ដែលលោកម៉ាក្រុងមកជួបនិងលើកជាសំណើរធំៗទាក់ទិននឹងអ៊ុយក្រែន។ ហើយលោកត្រាំបានបញ្ជាក់ថា លោកគាំទ្រគំនិតបញ្ជូនកងកម្លាំងរក្សាសន្តិភាពទៅអ៊ុយក្រែន!លោកត្រាំ៖ពិតមែនហើយ កងទ័ពអឺរ៉ុបអាចនឹងត្រូវបញ្ជូនទៅអ៊ុយក្រែនក្នុងនាមជាកងកម្លាំងរក្សាសន្តិភាព។ ដូច្នេះនៅពេលមានកិច្ចព្រមព្រៀងសន្តិភាព គឺពួកគេអាចត្រួតពិនិត្យតាមដានការគោរពវាឲ្យបានត្រឹមត្រូវ។ ខ្ញុំជឿថា វាមិនមែនជាបញ្ហាចោទទេ! មានប្រទេសអឺរ៉ុបជាច្រើនដែលគាំទ្រគំនិត តែខ្ញុំមិនចង់និយាយជំនួសភាគីបារាំងដែរ តែខ្ញុំដឹងថាបារាំងក៏គាំទ្រគំនិតនេះ។ ខ្ញុំគិតថា វាគឺថ្ងៃដ៏ល្អមួយ នៅពេលណាយើងអាចដើរចូលក្នុងនាមជាអ្នករក្សាសន្តិភាព ហើយប្រឆាំងទៅនឹងអ្វីដែលកំពុងកើតឡើងរាល់ថ្ងៃនេះ ព្រោះមនុស្សស្លាប់ច្រើនណាស់។អ្នកកាសែតម្នាក់បានជជីកសួរ ថាតើលោកពូទីន នឹងសុខចិត្តយល់ព្រម ឲ្យមានកងកម្លាំងរក្សាសន្តិភាពនៅអ៊ុយក្រែនទេ ? លោកត្រាំបានឆ្លើយថា សុខចិត្ត ព្រោះលោកជឿថា លោកពូទីនពិតជាចង់បានកិច្ចព្រមព្រៀងសន្តិភាពមួយមែន ដើម្បីបញ្ចប់សង្គ្រាម!
.png&h=97&w=146)