ក្រុមប្រឹក្សាធុរកិច្ចអាមេរិក-អាស៊ានសសើរកម្ពុជារឿងចាក់វ៉ាកសាំងនិងស្នើកម្ពុជា៦ចំនុច!
06-April-2025 / សេដ្ឋកិច្ច
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទទួលជួបពិភាក្សាការងារជាមួយលោកឯកអគ្គរដ្ឋទូត ម៉ៃឃល មីឆាឡាក់( Amb. Michael Michalak )អនុប្រធានជាន់ខ្ពស់ និងជានាយកគ្រប់គ្រងតំបន់ នៃក្រុមប្រឹក្សាធុរកិច្ចអាមេរិក-អាស៊ាន(USA-ASEAN Business Council “US-ABC”) នៅវិមានសន្តិភាព នាព្រឹកថ្ងៃទី៥ ខែឧសភា ឆ្នាំ២០២២ដែលបានដឹកនាំក្រុមហ៊ុន ១៣ និងលោក W.Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសកម្ពុជា ចូលជួបសម្តេច ។
សម្ដេចតេជោ ហ៊ុន សែន បានថ្លែងអំណរគុណដល់សហរដ្ឋអាមេរិកដែលបានផ្ដល់វ៉ាក់សាំង Johnson and Johnson ដល់កម្ពុជាកន្លងទៅ និងបានជម្រាបជូនប្រតិភូទាំងមូលអំពីថាមពលរបស់កម្ពុជា ដែលកម្ពុជាកំពុងតែប្រើប្រាស់អគ្គិសនីផលិតដោយវារីអគ្គិសនីសរុបទាំងអស់មានចំនួន ៦១,៣៩ភាគរយ និងថាមពលសូឡាមានចំនួន ៤,១ភាគរយ និងជីវឧស្ម័នមានចំនួន ០,២៨ ភាគរយ។សម្តេចតេជោ ហ៊ុន សែន បានសម្តែងនូវការស្វាគមន៍ចំពោះការតម្លើងរោងចក្រតម្លើងរថយន្តនៅខេត្តពោធិ៍សាត់ និងណែនាំឲ្យក្រុមហ៊ុនទាំងអស់ស្វែងរកឱកាសវិនិយោគបន្ថែមទៀតនៅកម្ពុជា។
លោកអនុប្រធានជាន់ខ្ពស់ និងជានាយកគ្រប់គ្រងតំបន់ នៃក្រុមប្រឹក្សាធុរកិច្ចអាមេរិក-អាស៊ាន ក៏បានថ្លែងអំណរគុណដល់សម្ដេចតេជោ ហ៊ុន សែន ដែលបានគាំទ្រក្រុមប្រឹក្សាធុរកិច្ចអាស៊ាន -អាមេរិក និងបានសម្តែងនូវការគាំទ្រ អបអរសាទរចំពោះកម្ពុជាធ្វើជាប្រធានអាស៊ាន។ ដោយឡែកក្នុងឱកាសជួបពិភាក្សាការងារជាមួយបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃទី៤ ខែឧសភា ឆ្នាំ២០២២គណៈប្រតិភូនៃក្រុមប្រឹក្សាធុរកិច្ចអាស៊ាន-សហរដ្ឋអាមេរិក (USA-ASEAN Business Council “US-ABC”) បានស្នើឲ្យរាជរដ្ឋាភិបាលកម្ពុជា ផ្តោតការយកចិត្តទុកដាក់លើចំណុចមួយចំនួន សំដៅលើកកម្ពស់បរិយាកាសវិនិយោគ ក្នុងប្រទេសកម្ពុជា និងសម្រេចបាននូវការស្តារសេដ្ឋកិច្ច ប្រកបដោយចីរភាព និងបរិយាបន្ន។
ចំណុងសំខាន់ទាំង៦ ដែលក្រុមប្រឹក្សាធុរកិច្ចអាស៊ាន-សហរដ្ឋអាមេរិក ស្នើសុំរួមមាន៖ ១. អនុវត្តគោលនយោបាយ កាត់បន្ថយការប្រើប្រាស់រថយន្ដ ដែលបានប្រើប្រាស់រួច ក្នុងគោលដៅកាត់បន្ថយផលប៉ះពាល់ទៅលើបរិស្ថាន និងលើកកម្ពស់វិស័យឧស្សាហកម្ម ផលិតរថយន្តក្នុងប្រទេសកម្ពុជា, ២. ជំរុញការកសាងសមត្ថភាព របស់សហគ្រាសធុនតូច និងមធ្យម, ៣. អភិវឌ្ឍជំនាញបច្ចេកវិទ្យា និងការទូទាត់ឌីជីថល ដើម្បីគាំទ្រដល់សេដ្ឋកិច្ចឌីជីថល, ៤. ពង្រឹងប្រសិទ្ធភាពនៃការប្រមូលពន្ធ, ៥. ធានានូវការផ្តល់ហិរញ្ញប្បទាន និងវិនិយោគគ្រប់គ្រាន់សម្រាប់វិស័យសុខាភិបាល និង៦. ជំរុញការធ្វើអន្តរកាលថាមពល សម្រាប់ការអភិវឌ្ឍប្រកបដោយចីរភាព។
អគ្គបណ្ឌិតសភាចារ្យឧបនាយករដ្ឋមន្ត្រី បានសម្តែងការស្វាគមន៍យ៉ាងកក់ក្តៅ និងថ្លែងអំណរគុណ ចំពោះក្រុមប្រឹក្សាធុរកិច្ចអាស៊ាន-សហរដ្ឋអាមេរិក (US-ABC) ដែលបានបំពេញតួនាទីយ៉ាងសកម្ម ក្នុងការសម្របសម្រួល និងពង្រឹងកិច្ចសហប្រតិបត្តិការ រវាងវិស័យសាធារណៈ និងឯកជន នៃតំបន់អាស៊ាន និងសហរដ្ឋអាមេរិក ជាពិសេសការគាំទ្រ និងចូលរួមផ្តល់នូវអនុសាសន៍សំខាន់ៗ ក្នុងកិច្ចប្រជុំរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្តាលអាស៊ាន (ASEAN Finance Ministers' and Central Bank Governors' Meeting “AFMGM”) ដែលរៀបចំដោយក្រសួងសេដ្ឋកិច្ច និងហិញ្ញវត្ថុ និងធនាគារ-ជាតិនៃកម្ពុជា កាលពីថ្ងៃទី ៨ ខែមេសា ឆ្នាំ២០២២ កន្លងទៅនេះ។
សហរដ្ឋអាមេរិក គឺជាដៃគូពាណិជ្ជកម្ម និងវិនិយោគដ៏សំខាន់របស់កម្ពុជា ដោយតម្លៃពាណិជ្ជកម្មសរុបរវាងប្រទេសទាំងពីរមានចំនួនសរុបប្រមាណ ៧.៩ ពាន់លានដុល្លារ និងវិនិយោគពីសហរដ្ឋអាមេរិកមកកម្ពុជាបានកើនដល់ ៨៦៣ លានដុល្លារ ក្នុងឆ្នាំ២០២១។US-ABC ក៏បានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអនុវត្តគោលនយោបាយ ក្នុងការគ្រប់គ្រងផលប៉ះពាល់ពីជំងឺកូវីដ-១៩ ជាពិសេស ការសម្រេចបាននូវការចាក់វ៉ាក់សាំង ជូនប្រជាជនទូទាំងប្រទេសបានប្រមាណ ៩០% និងបានឈានដល់ការបើកដំណើរការ សកម្មភាពសេដ្ឋកិច្ចបានពេញលេញនាពេលបច្ចុប្បន្ន។
អគ្គបណ្ឌិតសភាចារ្យឧបនាយករដ្ឋមន្ត្រី បានគូសបញ្ជាក់អំពីស្មារតីបុរេសកម្មរបស់រាជរដ្ឋាភិបាល កម្ពុជា ក្នុងការលើកកម្ពស់ការចូលរួម របស់វិស័យឯកជនក្នុងការស្ដារ និងជំរុញកំណើនសេដ្ឋកិច្ចជាតិ តាមរយៈការជំរុញការអនុវត្តគោលនយោបាយសំខាន់ៗ ដែលបានដាក់ចេញកន្លងមក រួមមាន៖ «ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥», «ក្របខណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ-១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣», «ច្បាប់ស្តីពីវិនិយោគថ្មី», «ច្បាប់ស្តីពីភាពជាដៃគូរវាងរដ្ឋ និងឯកជន» ព្រមទាំងកំពុងត្រៀមដាក់ចេញនូវគោលនយោបាយ សំខាន់ៗ មួយចំនួនទៀត ដូចជា «គោលនយោបាយសារពើពន្ធដើម្បីជំរុញការប្រើប្រាស់យានជំនិះដែលមិនប៉ះពាល់ដល់បរិស្ថាន», «គោលនយោបាយជាតិ ស្តីពីប្រសិទ្ធភាពថាមពល», «យុទ្ធសាស្ត្រអភិវឌ្ឍន៍សហគ្រាសធុនតូច និងមធ្យមឆ្នាំ ២០២២-២០២៦» និង «ផែនទីបង្ហាញផ្លូវសម្រាប់ការធានារ៉ាប់រងសុខភាពជាសកល» ជាដើម។
សម្រាប់ការគាំទ្រដល់ការធ្វើជាប្រធានអាស៊ានរបស់កម្ពុជា ឆ្នាំ ២០២២, អគ្គបណ្ឌិតសភាចារ្យឧបនាយករដ្ឋមន្ត្រី បានវាយតម្លៃខ្ពស់ ចំពោះការរៀបចំឱ្យមានកិច្ចពិភាក្សា រវាងថ្នាក់ដឹកនាំកំពូលអាស៊ានជាមួយសមាគមធុរកិច្ចរបស់សហរដ្ឋអាមេរិក ក្នុងអំឡុងពេល នៃកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលនឹងប្រព្រឹត្តទៅនៅថ្ងៃទី ១២-១៣ ខែ ឧសភា ឆ្នាំ ២០២២ នៅសហរដ្ឋអាមេរិក ខាងមុខ ដើម្បីអបអរខួបនៃទំនាក់ទំនងរវាងភាគីទាំងពីរ ក្នុងរយៈពេលជាងបួនទសវត្សរ៍ និងពង្រឹងកិច្ចសហប្រតិបត្តិការ ក្នុងវិស័យសំខាន់ៗ ដូចជា ការឆ្លើយតបនឹងជំងឺកូវីដ-១៩ និងភាពតានតឹងភូមិសាស្ត្រនយោបាយ, ការប្រែប្រួលអាកាសធាតុ និងការអភិវឌ្ឍប្រកប ដោយចីរភាព, ការអភិវឌ្ឍធនធានមនុស្ស និងការតភ្ជាប់សេដ្ឋកិច្ច ជាដើម។
សេចក្តីជូនដំណឹងរបស់ក្រសួងពាណិជ្ជកម្មចេញផ្សាយនៅថ្ងៃទី៥ ខែឧសភានេះ បានឱ្យដឹងថា លោករដ្ឋមន្ត្រី និងប្រតិភូធុរៈកិច្ចបានវាយតំលៃខ្ពស់លើទំហំពាណិជ្ជកម្មរវាងប្រទេសទាំងពីរ ដែលក្នុងនោះ ទោះបីជាមានការប្រឈមនឹងជំងឺកូវីដ-១៩ ក៏ដោយ ក៏ទំហំពាណិជ្ជកម្មរវាងប្រទេសទាំងពីរ មានការកើនឡើងគួរឱ្យកាត់សំគាល់ នៅក្នុងឆ្នាំ២០២១ ដោយទំហំពាណិជ្ជកម្ម កម្ពុជា-អាម៉េរិក សម្រេចបាន ៧,៨ប៊ីលានដុល្លារអាម៉េរិក កើនឡើងប្រមាណ ៤២% បើធៀបនឹងរយៈពេលដូចគ្នាកាលពីឆ្នាំមុន។
តំណាងក្រុមហ៊ុនទាំងអស់ ក៏បានសម្តែងក្ដីសោមន្យរីករាយយ៉ាងខ្លាំងចំពោះ កម្មវិធីចាក់វ៉ាក់សាំងនៅកម្ពុជា ដែលអនុញ្ញាតឱ្យមានសកម្មភាពសេដ្ឋកិច្ចបានដំណើរការបន្ត និងការពារអាយុជីវិតរបស់ប្រជាជន ក្នុងអំឡុងពេលកូវីដ-១៩។ លើសពីនេះ តំណាងក្រុមហ៊ុនទាំងអស់ ក៏បានបង្ហាញពីសុទិដ្ឋិនិយម និងទំនុកចិត្តលើសក្ដានុពលនៃកំណើនសេដ្ឋកិច្ចរយៈពេលវែងរបស់កម្ពុជា ជាពិសេសនៅក្នុងឆ្នាំនេះ ដែលកំណើនសេដ្ឋកិច្ចនឹងត្រលប់មករកភាពវិជ្ជមានឡើងវិញ។ ជាងនេះទៅទៀត ក្រុមហ៊ុនទាំងនោះបានកោតសរសើរចំពោះការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការធានាស្ថិរភាពសេដ្ឋកិច្ច និងផ្ដល់កិច្ចសហការល្អដល់ពួកគេ ដែលអនុញ្ញាតឱ្យពួកគេបង្កើនការវិនិយោគ និងពង្រីកអាជីវកម្មរបស់ពួកគេបន្ថែមនៅកម្ពុជា។
គណៈប្រតិភូ នៃក្រុមប្រឹក្សាធុរកិច្ចអាស៊ាន-សហរដ្ឋអាមេរិក (USA-ASEAN Business Council “US-ABC”) ដឹកនាំដោយលោក Amb. Michael Michalak អនុប្រធានជាន់ខ្ពស់ និងនាយកគ្រប់គ្រងតំបន់នៃក្រុមប្រឹក្សាធុរកិច្ចអាស៊ាន-សហរដ្ឋអាមេរិក រួមជាមួយតំណាងក្រុមហ៊ុនធំៗរបស់សហរដ្ឋអាមេរិកចំនួន១៣ រួមមាន៖ 3M, Abbott, Chevron, Amazon, Conoco Phillips, ExxonMobil, Ford, Meta, Visa, Pernod Ricard, Philip Morris, RMS Group និង Roche ចូលជួប និង ។
