តុលាការរាជធានីបើកសវនាការរឿងកឹមសុខាក្បត់ជាតិថ្ងៃទី១៥មករា
ភ្នំពេញ៖ សាលាដំបូងរាជធានីភ្នំពេញ បានប្រកាសបើកសវនាការជំនុំជម្រះ លើសំណុំរឿង «សន្ទិដ្ឋិភាពជាមួយបរទេស» របស់លោក កឹម សុខា អតីតប្រធាន នៃអតីតគណបក្សសង្គ្រោះជាតិ នៅថ្ងៃទី១៥ ខែមករា ឆ្នាំ២០២០ខាងមុខនេះ។
សេចក្តីប្រកាសរបស់សាលាដំបូងរាជធានីភ្នំពេញ បានឲ្យដឹងថា ក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ ដែលទទួលបន្ទុកចាត់ការលើសំណុំរឿងព្រហ្មទណ្ឌលេខ ៤៧៧៧ ចុះថ្ងៃទី០៣ ខែធ្នូ ឆ្នាំ២០១៩ ដែលមានជនជាប់ចោទឈ្មោះ កឹម សុខា ភេទប្រុស សញ្ជាតិខ្មែរ កើតថ្ងៃទី២៧ ខែមិថុនា ឆ្នាំ១៩៥៣ ជាប់ចោទពីបទ សន្ទិដ្ឋិភាពជាមួយបរទេស តាមមាត្រា៤៤៣ នៃក្រមព្រហ្មទណ្ឌ បានសម្រេចកំណត់ដាក់កាលបរិច្ឆេទ ជំនុំជម្រះលើសំណុំរឿងនេះ នៅថ្ងៃទី១៥ ខែមករា ឆ្នាំ២០២០ វេលាម៉ោង០៨ និង៣០នាទីព្រឹក នៅសាលសវនាការទី១ នៃសាលាដំបូងរាជធានីភ្នំពេញ។
ការប្រកាសនេះបានកើតឡើងក្រោយពេលដែលសភាស៊ើបសួរសាលាឧទ្ធរណ៍ភ្នំពេញ នៅរសៀល ថ្ងៃទី០៩ ខែធ្នូ ឆ្នាំ២០១៩នេះ សាលាឧទ្ធរណ៍ បានចេញសេចក្តីប្រកាសព័ត៌មានផ្លូវការមួយ ដោយបដិសេធបណ្តឹងរបស់ក្រុមមេធាវី លោក កឹម សុខា ដែលប្តឹងប្រឆាំងនឹងសេចក្តីសម្រេចរបស់ចៅក្រមស៊ើបសួរសាលាដំបូងរាជធានីភ្នំពេញ ដែលបញ្ជូនសំណុំរឿង លោក កឹម សុខា ទៅជំនុំជម្រះ។
តាមសេចក្តីប្រកាសនេះ បានឱ្យដឹងថា សភាស៊ើបសួរសាលាឧទ្ធរណ៍ភ្នំពេញ បានសម្រេចដូចតទៅ៖
១៖ បណ្តឹងឧទ្ធរណ៍លើដីកាដំណោះស្រាយ របស់មេធាវីជនជាប់ចោទមិនអាចទទួលយកបានដោយយោងតាមមាត្រា២៤៩ និងមាត្រា២៦៧ និងមាត្រា ៤០៤ នៃក្រមនីតិវិធីព្រហ្មទណ្ឌ ដែលមិនអនុញ្ញាតឱ្យធ្វើបណ្តឹងឧទ្ធរណ៍ នឹងដីកាដំណោះស្រាយបញ្ហានជនជាប់ចោទទៅតុលាការជំនុំជម្រះបានឡើយ ។
២៖ បណ្តឹងឧទ្ធរណ៍ពីការសម្រេចបន្តការដាក់ស្ថិតក្រោមការត្រួតពិនិត្យតាមផ្លូវតុលាការ សភាស៊ើបសួរបានបដិសេធចោលដោយមានហេតុផលពាក់ព័ន្ធនឹងបទល្មើសមានលក្ខណៈធ្ងន់ធ្ងរដល់សង្គមជាតិ និងជាពិសេសសម្រាប់ធានាវត្តមាននៃដំណើរការនីតិវិធីបន្ត ដោយយោងលើមាត្រា ២៦៧ កថាខណ្ឌទី៥ និងមាត្រា២៤៩ នៃក្រមនីតិវិធីព្រហ្មទណ្ឌ។
សេចក្តីប្រកាសរបស់សាលាឧទ្ធរណ៍ ដែលចេញដោយ លោក ទូច ថារិទ្ធិ អគ្គលេខាធិការ និងជាអ្នកនាំពាក្យសាលាឧទ្ធរណ៍ បានឱ្យដឹងថា ក្នុងសវនាការមាន លោក ឃុន លាងម៉េង ប្រធានសភាស៊ើបសួរ និងប្រធានក្រុមប្រឹក្សាចៅក្រមជំនុំជម្រះនៃសាលាឧទ្ទរណ៍, លោក សួស សំអាត និង លោក យូ ប៊ុនណា ជាចៅក្រមប្រឹក្សា ដោយមានការចូលរួមដោយក្រុមមេធាវីរបស់ លោក កឹម សុខា និងមេធាវីរបស់រាជរដ្ឋាភិបាល តំណាងដោយ លោក គី តិច ផងដែរ។
លោក កឹម សុខា ប្រធានអតីតគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួន នៅគេហដ្ឋានរបស់លោក ស្ថិតនៅសង្កាត់បឹងកក់២ ខណ្ឌទួលគោក រាជធានីភ្នំពេញ កាលពីយប់ថ្ងៃទី០២ ឈានចូលថ្ងៃទី០៣កញ្ញាឆ្នាំ២០១៧ ពីបទក្បត់ជាតិ។ ការចាប់ខ្លួននេះ ធ្វើឡើងក្រោយមានការចុះផ្សាយ និងចែករំលែកតៗគ្នានូវវីឌីអូឃ្លីបខ្លីរបស់ លោក កឹម សុខា ថ្លែងទៅកាន់ពលរដ្ឋរស់នៅបរទេសមួយក្រុម។ ក្នុងវីឌីអូនោះ លោក កឹម សុខា បានលើកឡើង អំពីយុទ្ធសាស្ដ្រនយោបាយរបស់លោក ដែលលោកថាមានការគាំទ្រពីសហរដ្ឋអាមេរិក។
អ្វីដែលលោក កឹម សុខា ថ្លែងទាំងអស់នោះ ត្រូវបានរដ្ឋាភិបាលយកជាមូលដ្ឋានចោទលោក កឹម សុខា ថា មានផែនការប៉ុនប៉ងផ្តួលរំលំរដ្ឋាភិបាល។ ប្រសិនបើរកឃើញថាបានប្រព្រឹត្តដូចការចោទប្រកាន់មែននោះ លោកកឹម សុខា អាចប្រឈមនឹងការជាប់ពន្ធនាគារពី១៥ទៅ៣០ឆ្នាំ តាមមាត្រា៤៤៣នៃក្រមព្រហ្មទណ្ឌកម្ពុជា។តែយ៉ាងណាក្នុងស្ថានភាពណាក៏ដោយក៏គេមិនហ៊ានបន្តដាក់គុកលោកកឹមសុខាទៀតនោះទេលើកលែងតែរដ្ឋាភិបាលលែងខ្វល់ពីកង្វល់របស់សហគមន៍អន្តរជាតិ៕
