វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 175 នាក់
ម្សិលមិញ 3141 នាក់
សរុប 14177442 នាក់
ពោធិ៍សាត់៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៣០ ខែមិថុនា ឆ្នាំ២០២៣នេះ បានព្រមានដល់ក្រុមប្រឆាំងក្រៅស្រុក កុំប្រមាថ និងកុំព្រហើនឱ្យសោះ ចំពោះករណីសម្តេចសម្រេចលុបចោល Facebook ដែលមានចំនួនអ្នកតាមដាន ១៤លាននាក់ ។បើកពួកគេតែព្រហើន សម្តេចអាចបញ្ជាឱ្យបិទ Facebook នៅកម្ពុជា ច្បាស់ណាស់ក្រុមប្រឆាំងនឹងដាច់ផ្ងារ បាត់ទំនាក់ទំនងប្រជាពលរដ្ឋក្នុងស្រុក។
សម្តេចតេជោ ហ៊ុន សែន បានថ្លែងពីខេត្តពោធិសាត់ពេលជួបកម្មករថា «យប់មិញនេះ ខ្ញុំសម្រេចលុបចោល Facebook ដែលមានមនុស្ស១៤លាននាក់ ហើយពួកប្រឆាំងក្រៅប្រទេសកំពុងសប្បាយ ក៏ប៉ុន្តែអ្នកត្រូវគិត បើខ្ញុំចេញបញ្ជាបិទ Facebook នៅស្រុកខ្មែរ លោកឯងដាច់ផ្ងារ ខ្ញុំគ្រាន់តែប្រាប់លោកឯងទេ តែមិនមែនជាមធ្យោបាយដែល ហ៊ុន សែន ត្រូវប្រកាន់យកទេ តែលោកឯងកុំប្រមាថយុទ្ធសាស្ត្ររបស់ ហ៊ុន សែន ឱ្យសោះ ហ៊ុន សែន បំផ្លាញចោល ១៤លាននាក់ ប៉ុន្តែ ហ៊ុន សែន មានទំនាក់ទំនងជាមួយប្រជាពលរដ្ឋ អាចបានគ្រប់ពេលទាំងប្រព័ន្ធ Telegram ហើយឥឡូវមាន TikTok ទៀត»។
សម្តេចតេជោ ហ៊ុន សែន បានថ្លែងទៀតថា «គ្រាន់តែប្រដៅពួកអ្នកក្រៅស្រុក កំពុងសប្បាយដែលខ្ញុំបំផ្លាញចោល Facebook ប៉ុន្តែខ្ញុំនឹងផ្តាច់ជើងលោកឯង ប្រសិនបើព្រហើន ខ្ញុំនឹងឱ្យបិទ Facebook មិនឱ្យប្រើប្រាស់ក្នុងមួយរយៈខ្លី ឬមួយស្ថាពរ លោកឯកគិតយ៉ាងម៉េច តែខ្ញុំមិនចង់ប៉ះពាល់ដល់ប្រជាជនទេ ប៉ុន្តែអ្នកឯងកុំភ័ន្តច្រឡំជាមួយយុទ្ធសាស្ត្រ ហ៊ុន សែន ឱ្យសោះគ្រាន់តែប្រដៅអ្នកឯង»។រឿងក្រុមហ៊ុនហ្វេសប៊ុកផ្អាកហ្វេសប៊ុក នេះ សម្តេចតេជោ ហ៊ុន សែន បានចោទសួរទៅ Facebook ថាតើគោលនយោបាយ Facebook មានបានពិនិត្យមើលក្រុមប្រឆាំងប្រមាថសម្តេច ភរិយា និងកូនសម្តេចដែរទេ? ។ សម្តេច «Facebook គេមានគោលការណ៍របស់គេ ខ្ញុំទទួលការគោរព ប៉ុន្តែ Facebook មើលរំលងទៅលើបញ្ហាមួយចំនួន ដែលធ្វើខុសនឹងគោលនយោបាយរបស់ Facebook។ ប្រយ័ត្នច្របាច់ក ហ៊ុន សែន លៀនអណ្តាតខ្លួនឯង»។
សម្តេចតេជោ ហ៊ុន សែន បានប្រកាសថា អ្នកដែលបង្កើត Facebook ប្រើឈ្មោះសម្តេច គឺសុទ្ធតែក្លែងក្លាយទាំងអស់ ព្រោះសម្តេចបានសម្រេចលុបចោល Facebook តាំងពីយប់មិញហើយ។
សូមជម្រាបថា សម្តេចតេជោ ហ៊ុន សែន នៅយប់ថ្ងៃទី២៩ ខែមិថុនា ឆ្នាំ២០២៣ បានប្រកាសឈប់ប្រើ និងលេង Facebook ជាស្ថាពរ និងស្នើឲ្យក្រុមហ៊ុន Facebook លុបចោលឈ្មោះសម្តេចចេញពីបញ្ជីក្រុមហ៊ុន Facebook ទៀតផង។សម្តេចតេជោ ហ៊ុន សែន បានបញ្ជាក់ថា ដោយសាររយៈពេលកន្លងមកមានការក្លែងបន្លំគណនីហ្វេកបុក (Facebook) របស់សម្តេចយ៉ាងច្រើន ដែលមានរហូតជាង ២០ដែលធ្វើឲ្យមានការភ័នច្រឡំពីអ្នកប្រើប្រាស់ Facebook ដូចគ្នា។ ម្យ៉ាងទៀតមួយរយៈពេលចុងក្រោយនេះ បណ្តាញទំនាក់ទំនងដែលមានប្រសិទ្ធភាពជាង គឺបណ្តាញតេឡេក្រាម (Telegram) ដែលមិនបារម្មណ៍ពីការចូលលួចដូច Facebook។
សម្តេចតេជោ ហ៊ុន សែន បញ្ជាក់ថា បើទោះបីសម្តេចលុបចោល Facebook ក៏ពិតមែនប៉ុន្តែសម្តេចនៅតែរក្សាបានទំនាក់ទំនងជាមួយប្រជាពលរដ្ឋ តាមរយៈប្រព័ន្ធទំនាក់ទំនងសង្គមផ្សេងទៀត ដូចជា Telegram, TikTok ជាដើម។តាមរយៈបណ្តាញ Telegram សម្តេចបានបង្ហាញគណនី TikTok ជាច្រើន ដែលប្រើឈ្មោះសម្តេចតេជោ សុទ្ធតែក្លែងក្លាយទាំងអស់។សម្តេចតេជោ ហ៊ុន សែន បានបង្ហាញ Tiktok ផ្លូវការរបស់សម្ដេច ដោយបងប្អូន គ្រាន់តែ Scan QR Code ឬ ចុចលីង https://www.tiktok.com/@hunsenofcambodia ។
សូមបញ្ជាក់បើតាមសេចក្តីលម្អិតចំនួន៣៥ទំព័ររបស់ក្រុមប្រឹក្សាភិបាលត្រួតពិនិត្យ Meta ដែលកាន់កាប់លើបណ្តាញសង្គមហ្វេសប៊ុក នៅថ្ងៃព្រហស្បតិ៍ បានលើកជាសំណើរទៅកាន់ហ្វេសប៊ុកឲ្យផ្អាកជាបន្ទាន់នូវទំព័រហ្វេសប៊ុក និងអ៊ីនស្តាក្រាមផ្លូវការរបស់សម្តេច ហ៊ុន សែន ក្នុងរយៈពេល៦ខែ ក្រោយពេលដែលគេទទួលបានការរាយការណ៍ថា សម្តេច ហ៊ុន សែន បានប្រើប្រាស់ភាសាគំរាមកំហែង និងបំភិតបំភ័យអ្នកដទៃ តាមបណ្តាញសង្គម។
ការផ្អាកគឺសំអាងទៅលើវីដេអូមួយ ដែលលោក ហ៊ុន សែន បានថ្លែងជាសាធារណៈ កាលពីថ្ងៃទី០៩មករាកន្លងទៅនេះ ក្រុមប្រឹក្សាភិបាលត្រួតពិនិត្យ ថា សម្តេច ហ៊ុន សែន បានប្រើសារគំរាមកំហែងជាសាធារណៈទៅលើក្រុមអ្នកនយោបាយប្រឆាំង។ គ្រានោះលោក ហ៊ុន សែន ថា លោកនឹងប្រើប្រាស់ដំបង ឬបញ្ជូនក្រុមអ្នកលេងទៅផ្ទះរបស់ក្រុមអ្នកប្រឆាំងទាំងឡាយណា ដែលចោទគណបក្សប្រជាជនកម្ពុជាថាជាចោរលួចសន្លឹកឆ្នោត កាលពីបោះឆ្នោតឃុំ-សង្កាត់ឆ្នាំ២០២២។ ទោះបីយ៉ាងណាសម្តេច ហ៊ុន សែន បកស្រាយថា ហ្វេសប៊ុក បានមើលរំលងពីពាក្យពេចន៍របស់ក្រុមអ្នកនយោបាយប្រឆាំង ដែលបានប្រមាថលោក រួមទាំងប្រពន្ធកូន។ បន្ទររឿងនេះ ឧកញ៉ា ឡេង ណាវ៉ាត្រា ដែលជាពាណិជ្ជករអចលនទ្រព្យមួយរូបកំពុងមានរឿងរ៉ាវមិនបំពេញកាតព្វកិច្ចជាមួយអថិតិជនរបស់ខ្លួនបានប្រកាសឈប់ប្រើហ្វេសប៊ុកលោក ដែលមានអ្នកទស្សនា២,២លាននាក់ ដោយងាកទៅប្រើ Tik Tok ដើម្បីទទួលព័ត៌មានវិញ។
លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា បានប្រាប់កាសែតថាការប្រកាសរបស់លោកនាយករដ្ឋមន្ត្រី ហ៊ុន សែន ឈប់ប្រើប្រាស់ហ្វេសប៊ុក នឹងជះឥទ្ធិពលដល់ការប្រើប្រាស់បណ្ដាញព័ត៌មានសង្គមយក្សមួយនេះក្នុងចំណោមវរជនខ្មែរ(Elites) និងអ្នកដែលគោរពស្រឡាញ់រូបលោក។ សម្រាប់លោកបណ្ឌិត ការណ៍ដែលសម្តេចនាយករដ្ឋមន្ត្រីឈប់ប្រើប្រាស់ហ្វេសប៊ុក ជារឿងគួរឲ្យសោកស្តាយបំផុត ព្រោះហ្វេសប៊ុកមានមាតិកាច្រើន ដែលអាចធ្វើជាស្ពានចម្លងឆន្ទៈ និងព័ត៌មានពីពលរដ្ឋខ្មែរគ្រប់ស្រទាប់វណ្ណៈ ទៅកាន់លោក ហ៊ុន សែន។ លោកថា ហ្វេសប៊ុកក៏បានដើរតួជាអាជ្ញាកណ្តាលដ៏មានប្រសិទ្ធភាពផងដែរសម្រាប់ករណីខ្លះ ដោយកន្លងមកតាមរយៈហ្វេសប៊ុក លោកក៏បានរកឃើញមន្ត្រីគ្រាប់ល្ពៅមួយចំនួនដែរ។ លោកបណ្ឌិតគិតថាគ្រប់គ្នាគោរពការសម្រេចចិត្តរបស់ លោក ហ៊ុន សែន និងសង្ឃឹមថា លោក ហ៊ុន សែន នឹងបន្តប្រើប្រាស់បណ្តាញព័ត៌មានសង្គមនេះឡើងវិញ ក្នុងពេលវេលាសមស្របណាមួយនាពេលអនាគត។ទោះយ៉ាងណាមន្ត្រី និងអ្នកគាំទ្រគណបក្សប្រជាជនកម្ពុជា ក៏កំពុងតែសកម្មដែរ ក្នុងការចែកចាយគណនីតេឡេក្រាម និងគណនីTik Tok របស់ខ្លួនដែលទើបតែបង្កើតថ្មីៗ និងបង្កើតយូរហើយក៏មាន៕